Magmatimbang sa Pagtakdag mga Tumong, ug Ikaw Magmalipayon

“PAKYAS na sab ko!” Pila na ka higayon nga nakaingon ka niini human mapakyas ang imong plano? Mahimong ingon usab niana ang bation sa usa ka batan-ong inahan nga diyutay na lag panahon sa pag-alagad tungod kay gikapoy siyag maayo sa pag-atiman sa iyang masuso. Ang usa ka Kristohanon dili tingali mobatig katagbawan sa iyang mga paningkamot diha sa kongregasyon tungod sa paagi sa pagpadako kaniya sa iyang mga ginikanan. Lagmit ang usa ka edaran nga Saksi nagmasulub-on tungod kay diyutay na lang siyag mahimo sa pag-alagad kon itandi niadtong baskog pa siya. “Usahay, bisan ganig maminaw lang kog pakigpulong nga nagdasig sa pagpayunir, makahilak na ko,” matod pa ni Christiane, kansang kahimtang sa pamilya dili motugot kaniya sa paghimog labaw pa diha sa pag-alagad kang Jehova.

Unsay atong himoon kon kita mobati usab niini? Sa unsang paagi magmatimbang ang pipila ka Kristohanon maylabot sa ilang kahimtang? Unsay mga kaayohan kon kita magmatimbang sa pagtakdag mga tumong?

Magmakataronganon

Si apostol Pablo nagsulti kanato kon unsay angayng himoon aron kita makapabiling malipayon sa dihang siya miingon: “Pagmaya kanunay diha sa Ginoo. Sa makausa pa ako magaingon, Pagmaya! Ipaila ang inyong pagkamakataronganon sa tanang tawo.” (Filip. 4:4, 5) Aron kita magmalipayon ug mobatig katagbawan sa pag-alagad, kinahanglang dili kita magtakdag mga tumong nga lisod kab-oton. Kon pugson nato ang atong kaugalingon sa pagbuhat niana, kita mabug-atan. Sa laing bahin, angay kitang magbantay nga dili kita mahimong sobra ka relaks ug himoon natong pasangil ang atong mga limitasyon aron kita magtinapolan diha sa ministeryo.

Bisan unsa pay atong kahimtang, buot ni Jehova nga himoon nato ang atong kinamaayohan ug moalagad kita nga bug-os kalag ug kasingkasing. (Col. 3:23, 24) Kon dili nato kana himoon, dili nato matuman ang atong dedikasyon sa Diyos. (Roma 12:1) Dili usab nato matagamtam ang tinuod nga kalipay ug katagbawan, maingon man ang ubang mga panalangin.—Prov. 10:22.

Ang pulong nga gihubad sa Bibliya nga “makataronganon” nagpasabot ug pagkamahunahunaon, nga sa literal maoy “pagkamapahiuyonon.” (San. 3:17) Nagpasabot usab kini nga ang usa dili sobra ka estrikto sa iyang kaugaligon. Busa kon kita makataronganon, makaugmad kitag timbang nga panglantaw sa atong kahimtang. Mahimo ba nato kini? Ang pipila mahunahunaon sa kahimtang sa uban apan sila nalisdan sa paghimo niana sa ilang kaugalingon. Pananglitan, kon namatikdan nimo nga daw naluya ang imong suod nga higala tungod sa kadaghan sa iyang trabaho, dili ba imo man  siyang tabangan nga mohimog mga pagpasibo sa iyang pagkinabuhi? Sa susama, angayng mahibalo kita sa mga senyales kon molapas na kita sa atong mga limitasyon.—Prov. 11:17.

Mas lisod nga magmatimbang kon kita gipadako sa estrikto kaayong mga ginikanan. Sa bata pa, ang pipila gianad tingali sa paghimog labaw pa kay sa ilang maarangan aron sila higugmaon sa ilang ginikanan. Kon kita ingon niana, basin sayop ang atong panglantaw kon giunsa kita pag-isip ni Jehova. Iya gayod kitang higugmaon kon moalagad kita kaniya nga kinasingkasing. Ang Bibliya nagpasalig kanato nga si Jehova “nahibalo pag-ayo sa atong pagkaumol, nga nahinumdom nga kita abog.” (Sal. 103:14) Nasayod si Jehova sa atong mga limitasyon ug iya kitang higugmaon kon kita masibotong moalagad kaniya. Kon atong hinumdoman nga ang Diyos dili sama sa usa ka amo nga estrikto kaayo, kini motabang kanato nga magmakasaranganon ug dili kita magdahom ug sobra sa kon unsay atong maarangan.—Miq. 6:8.

Bisan pa niini, ang pipila nalisdan gihapon sa pagkahimong timbang. Kon ingon niana ang imong kahimtang, pangayog tabang sa usa ka hamtong nga Kristohanon nga nakaila pag-ayo kanimo. (Prov. 27:9) Pananglitan, gusto ka bang magregular payunir? Maayo gayod kana nga tumong! Apan, nalisdan ka ba sa pagkab-ot niana? Lagmit nagkinahanglan kag tabang aron mapayano ang imong kinabuhi. O kaha, mahimo kang mokonsulta sa usa ka hamtong nga Kristohanong higala kon praktikal ba ang pagpayunir ilabina kon dako kag kaakohan sa pamilya. Makatabang siya kanimo aron imong matino kon makahimo ka ba gayod sa dugang buluhaton nga nalangkit niana ug kon unsang mga pagpasibo ang kinahanglan nimong himoon. Ang bana makatabang gayod aron matino sa asawa kon unsay iyang maarangan. Pananglitan, mahimo niyang isugyot nga mopahulayg taas ang iyang asawa kon plano niini nga mogugol ug mas daghang panahon sa ministeryo pagkasunod bulan. Makatabang kini aron makalahutay ang iyang asawa ug magmalipayon diha sa ministeryo.

Susiha Kon Unsay Imong Mahimo

Tungod sa pagkatigulang ug sa mga balatian, lagmit malimitahan ang atong pag-alagad. Kon ikaw usa ka ginikanan, lagmit wala na kaayo kay panahon sa personal nga pagtuon ug dili na kaayo ka makapahimulos sa mga tigom tungod kay nahurot na ang imong kusog ug panahon sa pag-atiman sa imong gagmayng mga anak. Apan kon kanunay nimong hunahunaon ang imong mga limitasyon, basin dili na hinuon nimo makita ang mga butang nga imong mahimo.

Libolibo ka tuig kanhi, ang usa ka Levihanon nangandoy ug usa ka kahimtang nga imposible niyang mabatonan. Kada tuig, aduna siyay pribilehiyo sa pag-alagad sa templo sulod sa duha ka semana. Apan siya nagtinguha nga mopuyo  nga permanente duol sa halaran. (Sal. 84:1-3) Unsay nakatabang niining matinumanong tawo nga magmakontento? Iyang naamgohan nga bisan ang pag-alagad ug usa ka adlaw diha sa sawang sa templo maoy talagsaon gayod nga pribilehiyo. (Sal. 84:4, 5, 10) Sa susama, imbes magsige kitag hunahuna sa atong mga limitasyon, angay natong susihon ug pabilhan ang mga butang nga atong mahimo.

Tagda pananglitan ang usa ka sister sa Canada nga si Nerlande. Sanglit siya nag-wheelchair, mibati siya nga limitado gayod ang iyang mahimo diha sa ministeryo. Apan siya wala maluya ug iyang gihimong teritoryo ang shopping mall nga duol sa ilang gipuy-an. Siya miingon: “Akong iparking ang akong wheelchair duol sa lingkoranan didto sa mall ug malipay kong mosangyaw sa mga tawo nga molingkod aron mopahulayg kadiyot.” Si Nerlande nagmalipayon ug nagmatagbawon gayod niining mahinungdanong paagi sa pagministeryo.

Paghimog mga Pagpasibo kon Gikinahanglan

Mahimong tulin kaayo ang usa ka linayagang sakayan kon huypon sa hangin ang mga layag niini. Apan kon dunay kusog kaayo nga unos, kinahanglang ipasibo sa timonil ang mga layag sumala sa direksiyon sa hangin. Bisan pag dili niya kontrolado ang unos, makahimo siya sa pagkontrolar sa iyang sakayan. Sa samang paagi, sagad dili nato kontrolado ang samag-unos nga mga kahimtang nga atong masinati. Apan makapasibo kita niana kutob sa maarangan pinaagi sa hustong paggamit sa atong kusog ug hunahuna ug sa pagkontrolar sa atong emosyon. Busa kon kita magpasibo sa atong kahimtang, kita mobatig kalipay ug katagbawan diha sa pag-alagad.—Prov. 11:2.

Tagda ang pipila ka pananglitan. Kon dali ra kitang maluya, mas maayo tingali kon dili kaayo kita maghago sa adlawan pa aron duna pa kitay igong kusog sa pagtambong sa tigom inigkagabii. Sa ingon niana, bug-os kitang makapahimulos sa pagpakig-uban sa mga igsoon. O kon ang usa ka inahan dili makasangyaw tungod kay nasakit ang iyang anak, mas praktikal kon imbitahon niya sa ilang balay ang usa ka sister aron sila magsangyaw pinaagi sa telepono samtang natulog ang iyang anak.

Apan komosta kon tungod sa imong kahimtang wala ka nay panahon nga mangandam alang sa mga tigom? Tinoa kon unsay imong maandam ug himoa gayod kana. Kon mohimo kitag mga pagpasibo bisan sa gagmayng mga  butang, kita makapabiling madasigon ug malipayon.

Ang pagpasibo sa atong mga tumong lagmit nagkinahanglag determinasyon ug paningkamot. Ang magtiayong si Serge ug si Agnès nga taga-Pransiya kinahanglang mohimog dakong kausaban sa ilang mga plano. “Sa dihang nasayran namo ni Agnès nga siya mabdos, nawad-an na mig paglaom nga mahimong misyonaryo,” matod pa ni Serge nga karon usa na ka amahan sa duha ka himsog nga batang babaye. Gisaysay ni Serge kon sa unsang paagi sila nagtakdag bag-ong tumong ingong magtiayon. Siya miingon: “Bisan pag wala kami mag-alagad sa laing nasod, kami nagkinabuhi nga samag misyonaryo dinhi sa among nasod. Kami mipasakop sa usa ka grupo nga nagsultig langyawng pinulongan.” Unsay resulta niana? Si Serge mipadayon: “Gibati namo nga dako gayod kamig nahimo sa kongregasyon.”

Ang usa ka sister sa Pransiya nga si Odile, nga 70 na ang pangedaron, nag-antos sa arthritis sa iyang tuhod ug maglisod pagbarog ug dugay. Tungod niini, mibati siyag kaluya kay dili na siya makapamalaybalay. Apan wala gayod siya mosurender. Iyang nakita nga mas praktikal alang kaniya ang pagsangyaw pinaagi sa telepono. Siya miingon: “Wala ako magtuo nga sayon ra diay kini ug ako nagmalipayon tungod niini!” Ingong resulta, napasig-uli ang iyang kasibot diha sa ministeryo.

Ang Praktikal nga mga Tumong Moresultag mga Panalangin

Dili kita mobatig kahigawad kon kita makataronganon sa kon unsay atong maarangan. Pinaagi sa pagtakdag timbang nga mga tumong, mobati kita nga malamposon bisan pa sa atong mga limitasyon. Busa malipayon gayod kita bisan diyutay lamang ang atong malampos.—Gal. 6:4.

Ang pagkatimbang motabang usab kanato nga magpakitag labawng konsiderasyon sa atong mga isigka-Kristohanon. Kita kanunayng mapasalamaton sa ilang mahimo kanato bisan pa sa ilang mga limitasyon. Kon pabilhan nato ang ilang mga paghago, moresulta kana sa pagtinabangay ug pagsinabtanay. (1 Ped. 3:8) Hinumdomi nga ang atong mahigugmaong Amahan nga si Jehova wala gayod mangayo ug labaw sa atong maarangan. Ug kon kita magmatimbang sa atong mga gidahom ug mga tumong, mobati kitag dugang kalipay ug katagbawan sa atong pag-alagad.

[Blurb sa panid 29]

Aron kita magmalipayon ug mobatig katagbawan sa pag-alagad, kinahanglang dili kita magtakdag mga tumong nga lisod kab-oton

[Hulagway sa panid 30]

Nagmalipayon si Nerlande sa iyang nahimo diha sa ministeryo

[Hulagway sa panid 31]

“Ipasibo ang imong mga layag”

[Credit Line]

© Wave Royalty Free/age fotostock

[Hulagway sa panid 32]

Nakatabang kang Serge ug Agnès ang pagtakdag bag-ong mga tumong