Magmapahiuyonon sa Timbang nga Paagi

‘Magpadayon ka sa pagpahinumdom kanila nga . . . magmakataronganon.’—TITO 3:1, 2.

1, 2. Unsay giingon sa Kasulatan bahin sa pagkamapahiuyonon o pagkamakataronganon, ug nganong haom kini?

 PAGKAMAALAMON gayod ni Jehova, ang atong mahigugmaong langitnong Amahan. Ingong iyang mga linalang, mosalig kita kaniya aron giyahan ang atong kinabuhi. (Sal. 48:14) Ang tinun-an nga si Santiago misulat nga “ang kaalam nga gikan sa itaas maoy una sa tanan putli, unya makigdaiton, makataronganon, andam mosunod, tugob sa kaluoy ug maayong mga bunga, dili mapihigpihigon, dili salingkapaw.”—Sant. 3:17.

² “Ipaila ang inyong pagkamakataronganon sa tanang tawo,” nagtambag si apostol Pablo. a (Filip. 4:5) Si Kristo Jesus mao ang Ginoo ug Ulo sa Kristohanong kongregasyon. (Efe. 5:23) Hinungdanon gayod nga kitang tanan molihok sa makataronganong paagi, nga mosunod sa pagtultol ni Kristo ug magmapahiuyonon sa atong mga pakiglabot sa ubang mga tawo!

3, 4. (a) Iilustrar ang mga kaayohan nga mosangpot kon kita magpahiuyon. (b) Unsay atong hisgotan?

³ Makaayo kanato kon kita magmapahiuyonon sa timbang nga paagi. Sa pag-ilustrar: Human mabutyag ang usa ka gidudahang laraw sa mga terorista sa Britanya, ang kadaghanang pasahero sa ayroplano maorag andam nang mosunod sa mga lagda nga nagdili sa pagbitbit ug mga butang pasulod sa ayroplano nga gitugot sa nangagi. Sa pagdrayb ug kotse, angay kitang mohatag ug lugar sa ubang mga drayber, sama diha sa mga rotunda, aron seguradong walay madisgrasya ug dili matrapik.

⁴ Alang sa kadaghanan kanato, dili sayon ang pagpahiuyon. Aron matabangan kita, atong hisgotan ang tulo ka punto bahin sa pagkamapahiuyonon, nga mao, ang atong motibo, tinamdan bahin sa awtoridad, ug kon asa kutob kita angayng magpahiuyon.

Nganong Angay Kitang Magmapahiuyonon?

5. Ilalom sa Moisesnong Balaod, unsay magtukmod sa usa ka ulipon sa pagpabilin sa iyang agalon?

⁵ Ang usa ka pananglitan gikan sa una-Kristohanong kapanahonan nagpasiugda bahin sa hustong motibo kon nganong angay kitang magmapahiuyonon. Ilalom sa Moisesnong Balaod, ang mga Hebreohanon nga naulipon kinahanglang pagawson sa ikapitong tuig sa ilang pagkaulipon o sa Tinghugyaw, bisan kon unsay mauna. Apan ang usa ka ulipon makapili sa pagpabiling ulipon. (Basaha ang Exodo 21:5, 6.) Unsay magtukmod kaniya sa paghimo niini? Ang gugma maoy nagtukmod kaniya sa pagpabiling ulipon, ilalom sa awtoridad sa iyang buotang agalon.

6. Sa unsang paagi nalangkit ang gugma diha sa atong pagkamapahiuyonon?

⁶ Sa samang paagi, ang atong gugma alang kang Jehova maoy magtukmod kanato sa pagpahinungod sa atong kinabuhi kaniya ug sa pagtuman sa atong pahinungod. (Roma 14:7, 8) Si apostol Juan misulat: “Kini ang kahulogan sa paghigugma sa Diyos, nga atong bantayan ang iyang mga sugo; ug bisan pa ang iyang mga sugo dili mabug-at.” (1 Juan 5:3) Kini nga gugma dili mangita sa kaugalingong kaayohan niini. (1 Cor. 13:4, 5) Dihang makiglabot kita sa ubang mga tawo, ang gugma sa silingan maoy modasig kanato nga magpahiuyon ug isipon ang uban nga labaw kay kanato. Inay maghinakog, angay natong hunahunaon ang kaayohan sa uban.—Filip. 2:2, 3.

7. Nganong kinahanglan kitang magmapahiuyonon diha sa atong ministeryo?

⁷ Ang atong sinultihan ug linihokan angayng dili makapandol sa uban. (Efe. 4:29) Sa pagkatinuod, ang gugma maoy magtukmod kanato nga  dili kita mobuhat ug bisan unsang makababag sa pag-uswag sa mga tawo nga lahig kagikan ug kultura diha sa ilang pag-alagad kang Jehova. Busa kinahanglan kitang magmapahiuyonon. Pananglitan, ang mga misyonarya nga naanad sa pagmek-ap o pag-estaking dili mopugos sa paggamit niana diha sa ilang mga teritoryo nga basin magpahunahuna sa uban nga sila imoral ug mapandol na hinuon.—1 Cor. 10:31-33.

8. Sa unsang paagi ang gugma alang sa Diyos motabang kanato sa paggawi ingong “mas ubos”?

⁸ Ang atong gugma alang kang Jehova motabang kanato sa pagpukgo sa atong pagkamagarbohon. Human maglalis ang mga tinun-an ni Jesus kon kinsay labing dako kanila, iyang gipatindog ang usa ka bata sa ilang taliwala. Siya miingon: “Bisan kinsa nga modawat niining gamayng bata pinasukad sa akong ngalan modawat usab kanako, ug bisan kinsa nga modawat kanako modawat usab kaniya nga nagpadala kanako. Kay siya nga nagagawi sa iyang kaugalingon ingon nga mas ubos taliwala kaninyong tanan mao ang usa nga dako.” (Luc. 9:48; Mar. 9:36) Ang matag usa kanato mahimong lisdan gayod sa paggawi ingong “mas ubos.” Ang napanunod nga pagkadili-hingpit ug ang kiling nga magmagarbohon lagmit motukmod kanato sa pagtinguha nga mainila, apan ang pagkamapaubsanon motabang kanato nga magpahiuyon ug magpasidungog sa uban.—Roma 12:10.

9. Aron magmapahiuyonon, unsay kinahanglan natong ilhon?

⁹ Aron magmapahiuyonon, kinahanglan natong ilhon ang awtoridad sa mga tinudlo sa Diyos. Ang tanang matuod nga mga Kristohanon nag-ila sa hinungdanong prinsipyo sa pagkaulo. Gipatin-aw kini ni apostol Pablo ngadto sa mga taga-Corinto: “Buot ko nga mahibalo kamo nga ang ulo sa matag lalaki mao si Kristo; sa baylo ang ulo sa usa ka babaye mao ang lalaki; sa baylo ang ulo ni Kristo mao ang Diyos.”—1 Cor. 11:3.

10. Unsay mapasundayag kon kita motahod sa awtoridad ni Jehova?

¹⁰ Ang atong pagtahod sa awtoridad sa Diyos magpasundayag sa atong pagsalig kaniya ingong atong mahigugmaong Amahan. Siya nahibalo sa tanang nagakahitabo ug makaganti kanato sumala niana. Maayong hinumdoman nato kana kon ang ubang mga tawo dili motahod o masuko kanato. Si Pablo misulat: “Kon mahimo, kutob sa inyong maarangan, makigdinaitay sa tanang tawo.” Ang maong tambag gipasiugda ni Pablo pinaagi niining sugoa: “Ayaw kamo pagpanimalos, mga hinigugma, kondili hatagig dapit ang kapungot; kay nahisulat: ‘Akoa ang panimalos; ako magabalos, nag-ingon si Jehova.’”—Roma 12:18, 19.

11. Sa unsang paagi ikapakita nato nga kita nagapasakop sa pagkaulo ni Kristo?

¹¹ Angay usab natong tahoron ang mga tinudlo sa Diyos sulod sa Kristohanong kongregasyon. Gihulagway sa Pinadayag kapitulo 1 nga gikuptan ni Kristo Jesus ang ‘mga bituon’ sa kongregasyon sa iyang tuong kamot. (Pin. 1:16, 20) Ang maong ‘mga bituon’ kasagarang naghawas sa mga lawas sa mga ansiyano o mga magtatan-aw diha sa mga kongregasyon. Ang maong tinudlong mga magtatan-aw nagpasakop sa pagpanguna ni Kristo ug nagsundog sa iyang malulotong paagi sa pagpakiglabot sa uban. Ang tanan diha sa kongregasyon mosunod sa kahikayan nga gihimo ni Jesus nga ang “matinumanon ug maalamong ulipon” maoy magtaganag espirituwal nga pagkaon sa hustong panahon.  (Mat. 24:45-47) Karong adlawa, ang atong kaandam sa pagtuon ug pagpadapat sa gitaganang mga impormasyon magpakita nga kita mismo nagapasakop sa pagkaulo ni Kristo nga makapatunhay sa kalinaw ug panaghiusa.—Roma 14:13, 19.

Asa Kutob Kita Magpahiuyon?

12. Nganong may limitasyon ang pagkamapahiuyonon?

¹² Ang pagkamapahiuyonon wala hinuon magkahulogan nga atong ikompromiso ang atong pagtuo o ang atong diyosnong mga prinsipyo. Unsay baroganan sa unang mga Kristohanon sa dihang gimandoan sila sa relihiyosong mga pangulo nga mohunong sa pagpanudlo pinasukad sa ngalan ni Jesus? Si Pedro ug ang ubang mga apostoles maisogong mitubag: “Kinahanglang among sugton ang Diyos ingong magmamando inay ang mga tawo.” (Buh. 4:18-20; 5:28, 29) Busa karong adlawa, kon ang mga opisyales sa kagamhanan mosulay sa pagpahunong kanato sa pagsangyaw sa maayong balita, dili kita mohunong, bisan tuod ato tingaling usbon ang atong mga paagi aron makasangyaw gihapon kita sa mataktikanhong paagi. Kon idili ang atong pagpamalaybalay, mangita kitag laing mga paagi sa pagkontak sa mga tagbalay ug mopadayon kita sa pagtuman sa gisugo sa Diyos kanato. Sa samang paagi, kon idili sa “labaw nga mga awtoridad” ang atong panagkatigom, kita magtigom sa ginagmayng mga grupo aron dili himatikdan.—Roma 13:1; Heb. 10:24, 25.

13. Unsay giingon ni Jesus bahin sa pagtahod niadtong anaa sa awtoridad?

¹³ Sa Wali sa Bukid ni Jesus, iyang gipasiugda ang panginahanglan nga motahod sa awtoridad: “Kon ang usa ka tawo buot moadto sa korte uban nimo ug panag-iyahon ang imong pang-ilalom nga besti, tugoti nga maiya usab ang imong panggawas nga besti; ug kon ang tawong may awtoridad magpugos kanimo sa pag-alagad ug usa ka milya, ubani siya ug duha ka milya.” (Mat. 5:40, 41) b Ang konsiderasyon sa uban ug ang tinguhang makatabang kanila motukmod usab kanato sa pagbuhat ug labaw pa kay sa gihangyo kanato.—1 Cor. 13:5; Tito 3:1, 2.

14. Nganong dili gayod nato uyonan ang mga apostata?

¹⁴ Bisan pag gusto natong magpahiuyon, dili gayod nato uyonan ang mga apostata. Ang atong tin-aw ug lig-ong baroganan bahin niini gikinahanglan aron mapanalipdan ang kaputli sa kamatuoran ug ang panaghiusa sa kongregasyon. Mahitungod sa ‘mini nga mga igsoon,’ si Pablo misulat: “Kanila wala kami magpahiuyon agig pagpasakop, wala, bisan na lang sa usa ka takna, aron nga ang kamatuoran sa maayong balita makapadayon uban kaninyo.” (Gal. 2:4, 5) Ang debotadong mga Kristohanon magpabiling lig-on dapig sa pagkamatarong kon motungha man ugaling ang apostasya.

Kinahanglang Magmapahiuyonon o Magmakataronganon ang mga Magtatan-aw

15. Sa unsang paagi ang Kristohanong mga ansiyano mahimong mapahiuyonon sa dihang sila magtigom?

¹⁵ Lakip sa mga kuwalipikasyon niadtong gitudlo sa pag-alagad ingong mga magtatan-aw mao ang kaandam nga magpahiuyon. Misulat si Pablo: “Busa ang magtatan-aw kinahanglang . . . makataronganon [o mapahiuyonon].” (1 Tim. 3:2, 3) Ilabinang hinungdanon kini sa dihang magtigom ang mga ansiyano aron hisgotan ang mga butang may kalabotan sa kongregasyon. Sa dili pa makab-ot ang usa ka desisyon, ang matag usa adunay kagawasan sa pagpahayag sa iyang opinyon, bisan tuod dili kinahanglang mokomento ang matag ansiyano. Panahon sa panaghisgot, mahimong usbon sa usa ang iyang opinyon sa dihang makadungog siya sa uban nga maghisgot sa mga prinsipyo sa Kasulatan nga mapadapat. Imbes ipugos ang iyang personal nga opinyon, ang usa ka hamtong nga ansiyano magpahiuyon. Sa sinugdanan sa ilang panaghisgot, mahimong magkasumpaki ang mga opinyon, apan ang pagpamalandong uban ang pag-ampo makapatunhay sa panaghiusa taliwala sa mapainubsanon ug mapahiuyonong mga ansiyano.—1 Cor. 1:10; basaha ang Efeso 4:1-3.

16. Unsang tinamdan ang angayng ipasundayag sa usa ka Kristohanong ansiyano?

¹⁶ Ang usa ka Kristohanong ansiyano kinahanglang maningkamot sa pagsunod sa teokratikanhong kahikayan diha sa tanan niyang kalihokan. Ang maong tinamdan kinahanglang ipasundayag usab bisan sa iyang pagduaw sa mga igsoon ingong magbalantay, kay makatabang kini kaniya sa pagpakitag konsiderasyon ug kalumo ngadto sa uban. Misulat si Pedro: “Bantayi ninyo ang panon sa Diyos nga ubos sa inyong pag-atiman, dili nga pinugos, kondili kinabubut-on; ni tungod sa gugma  sa kinitaan pinaagig limbong, apan maikagon.”—1 Ped. 5:2.

17. Sa unsang paagi ang pagkamapahiuyonon ikapakita sa tanan sa kongregasyon diha sa pagpakiglabot sa uban?

¹⁷ Ang tigulang nang mga membro sa kongregasyon mapasalamaton gayod sa bililhong tabang sa mga batan-on ug sila dili motamay kanila. Ug ang mga batan-on usab motahod sa mga tigulang nga daghan nag kasinatian sa pag-alagad kang Jehova. (1 Tim. 5:1, 2) Matikdan sa Kristohanong mga ansiyano kon kinsa ang mga lalaki nga may katakos nga kahatagan nilag pipila ka responsabilidad, nga bansayon sila sa pagtabang ug atiman sa panon sa Diyos. (2 Tim. 2:1, 2) Angayng pabilhan sa matag Kristohanon ang inspiradong tambag ni Pablo: “Magmasinugtanon kamo sa mga nagapanguna kaninyo ug magmapinasakopon, kay sila nagabantay sa inyong mga kalag ingon nga sila maoy maghatag ug husay; aron buhaton nila kini uban ang kalipay ug dili uban ang pagpanghupaw, kay kini makadaot kaninyo.”—Heb. 13:17.

Magmapahiuyonon Ingong mga Membro sa Pamilya

18. Nganong angay nga magmapahiuyonon ang matag membro sa pamilya?

¹⁸ Ang mga membro sa pamilya usab kinahanglang magmapahiuyonon. (Basaha ang Colosas 3:18-21.) Gipaila sa Bibliya ang tinong mga responsibilidad sa matag membro sa Kristohanong pamilya. Ang amahan mao ang ulo sa iyang asawa ug ang pangunang may kaakohan sa pagdumala sa mga anak. Angayng ilhon sa asawa ang awtoridad sa iyang bana, ug ang mga anak kinahanglang magmasinugtanon, usa ka hiyas nga kahimut-anan gayod sa Ginoo. Makatabang ang matag membro sa pamilya sa pagpatunhay sa panaghiusa ug kalinaw sa panimalay pinaagi sa pagkamapahiuyonon sa husto ug timbang nga paagi. Ang Bibliya adunay pipila ka pananglitan nga makatabang sa pag-ilustrar niining puntoha.

19, 20. (a) Isaysay ang pagkasukwahi ni Eli sa panig-ingnan ni Jehova bahin sa pagkamapahiuyonon. (b) Unsang leksiyon ang makat-onan sa mga ginikanan gikan niining maong mga panig-ingnan?

¹⁹ Sa bata pa si Samuel, si Eli mao ang hataas nga saserdote sa Israel. Apan ang mga anak ni Eli nga si Hopni ug Pinehas maoy “mga tawong walay-silbi” nga wala “moila kang Jehova.” Nakadungog na siyag daotang mga taho bahin sa iyang mga anak, lakip na sa ilang pagpakighilawas uban sa mga babaye nga nag-alagad sa ganghaan sa tolda nga tagboanan. Unsay iyang reaksiyon? Giingnan sila ni Eli nga kon ang ilang sala maoy batok kang Jehova, walay mangamuyo alang kanila. Apan napakyas siya sa pagtul-id ug pagsilot kanila. Tungod niana, ang mga anak ni Eli nagpadayon sa pagbuhat ug daotan. Sa kataposan, makataronganong mihukom si Jehova nga angay silang silotan ug kamatayon. Pagkadungog ni Eli nga nangamatay  ang iyang mga anak, siya namatay usab. Pagkamakapasubong sangpotanan! Dayag nga sayop gayod nga gitugotan o gipasagdan ra ni Eli nga magpadayon ang ilang daotang mga buhat.—1 Sam. 2:12-17, 22-25, 34, 35; 4:17, 18.

²⁰ Sukwahi niana ang mga pagpakiglabot sa Diyos sa iyang mga anak nga manulonda. Ang manalagnang si Micaias may usa ka talagsaong panan-awon nga si Jehova ug ang Iyang mga manulonda nagkatigom. Nangutana si Jehova sa iyang mga manulonda kon kinsa kanila ang makatonto kang Haring Ahab sa Israel aron mahitabo ang pagkapukan nianang daotang hari. Naminaw si Jehova sa mga sugyot sa lainlaing mga manulonda. Dayon dihay manulonda nga mipahayag nga siyay motonto kang Haring Ahab. Gipangutana siya ni Jehova kon unsaon niya paghimo kana. Kay natagbaw, gisugo ni Jehova ang maong manulonda sa pagbuhat niana. (1 Hari 22:19-23) Kon ipadapat sa mga tawo, di ba ang mga membro sa pamilya may makat-onang mga leksiyon gikan sa maong asoy bahin sa pagkamapahiuyonon? Angayng tagdon sa Kristohanong bana ug amahan ang mga opinyon ug mga sugyot sa iyang asawa ug mga anak. Sa laing bahin, angayng masabtan sa mga asawa ug mga anak nga kon sila nagpahayag ug opinyon o kagustohan, nianang higayona angay silang magmapahiuyonon sa direksiyon sa usa nga giawtorisahan sa Kasulatan sa pagdesisyon.

21. Unsay hisgotan sa sunod nga artikulo?

²¹ Mapasalamaton gayod kita sa mahigugmaon ug maalamong mga pahinumdom ni Jehova bahin sa pagkamapahiuyonon! (Sal. 119:99) Hisgotan sa atong sunod nga artikulo kon sa unsang paagi ang pagkamapahiuyonon sa timbang nga paagi makatabang nga magmalipayon ang magtiayon.

[Mga footnote]

Unsay Imong Tubag?

• Unsa ang maayong mga sangpotanan sa pagkamapahiuyonon?

• Sa unsang paagi ikapasundayag sa mga magtatan-aw ang pagkamapahiuyonon?

• Nganong hinungdanon ang pagkamapahiuyonon diha sa pamilya?

[Mga Pangutana sa Pagtuon]

[Hulagway sa panid 4]

Gisundog sa mga ansiyano ang malulotong paagi ni Kristo sa pagpakiglabot sa uban

[Hulagway sa panid 6]

Dihang magtigom ang mga ansiyano sa kongregasyon, ang pagpamalandong uban ang pag-ampo ug ang pagkamapahiuyonon makapatunhay sa panaghiusa