Posible Gayod ang Matagbawong Kinabuhi!

ANG pangunang katuyoan sa daghang tawo mao ang pagbaton ug daghang salapi ug mga butang nga mapalit niana. Ang pipila gusto nga mahimong inila sa kalibotan. Gigugol sa uban ang halos tibuok nilang kinabuhi aron makagamag hingpit nga mga buhat sa arte. May mga tawo usab nga ang ilang katuyoan mao ang pagtabang sa uban. Apan daghan ang wala mahibalo kon unsay ilang katuyoan sa kinabuhi o kon nganong sila naglungtad.

Komosta ka man? Ugdang ka bang naghunahuna kon nganong ikaw naglungtad? Atong hisgotan ang pipila ka kasagarang mga tumong nga gipangagpas sa mga tawo aron masusi kon kana ba makahatag ug tinuod nga katagbawan. Sa unsang paagi posible ang matagbawong kinabuhi?

Ang Salapi ug Kalingawan Adunay Nahiangay nga Dapit

Ang Bibliya nag-ingon diha sa Ecclesiastes 7:12: “Ang kaalam usa ka panalipod maingon nga ang salapi usa ka panalipod; apan ang bentaha sa kahibalo mao nga ang kaalam nagatipig nga buhi sa mga nanag-iya niini.” Tinuod nga ang salapi mapuslanon. Nagkinahanglan kag salapi aron mabuhi, ilabina kon may pamilya kang kinahanglan nimong buhion.—1 Timoteo 5:8.

Unsa bay kapuslanan sa kinabuhi kon walay pipila ka kalingawan o mga butang nga mapalit sa salapi? Bisan pag si Jesu-Kristo, ang Magtutukod sa Kristiyanidad, miangkon nga wala siyay kapahilunaan sa iyang ulo, may mga higayon nga siya nagpahimulos ug lamiang pagkaon ug bino. Dugang  pa, nagsul-ob usab siyag mahalong besti.—Mateo 8:20; Juan 2:1-11; 19:23, 24.

Bisan pa niana, ang pangunang katuyoan ni Jesus sa kinabuhi dili ang pagpangagpas ug kalingawan. Siya may tukma ug nahiangay nga mga prioridad sa kinabuhi. Matod ni Jesus: “Bisag ang usa ka tawo adunay kadagaya ang iyang kinabuhi wala magagikan sa mga butang nga iyang gipanag-iya.” Unya nagsugilon siyag usa ka sambingay bahin sa usa ka datong tawo nga nagpatungha ug maayong abot ug misugod sa pagpangatarongan sa iyang kaugalingon: “Unsay akong buhaton, karon nga wala na akoy katigoman sa akong mga abot? . . . Akong gub-on ang akong mga balay-tipiganan ug tukoron ang mas dagko, ug didto akong tigomon ang akong tanan nga mga lugas ug ang akong tanan nga maayong mga butang; ug ako moingon sa akong kalag: ‘Kalag, aduna kay daghang maayong mga butang nga natigom alang sa daghang katuigan; pagpahayahay, kaon, inom, paglipaylipay.’” Unsay sayop sa panghunahuna niining tawhana? Ang sambingay nagpadayon: “Ang Diyos miingon [sa datong tawo], ‘Ikaw nga walay buot, karong gabhiona ilang pangayoon nga mapugsanon ang imong kalag gikan kanimo. Nan, kinsa ang magapanag-iya sa mga butang nga imong gitigom?’” Bisan pag gitigom sa tawo ang iyang abot, sa dihang namatay siya wala siya makapahimulos sa bahandi nga iyang natigom. Ingong panapos, gihatag ni Jesus kini nga leksiyon sa iyang mamiminaw: “Ingon usab niana ang tawo nga magatigom ug bahandi alang sa iyang kaugalingon apan dili dato ngadto sa Diyos.”—Lucas 12:13-21.

Tinuod, nagkinahanglan kitag salapi, ug ang kalingawan adunay dapit sa atong kinabuhi. Apan ang salapi o ang kalingawan dili mao ang labing hinungdanong butang sa kinabuhi. Aron mahimong dato ngadto sa Diyos, ang pagkinabuhi sa paagi nga moresulta sa iyang pag-uyon mao gayod ang labing hinungdanong butang nga pangagpason.

Hinungdanon ba ang Pagtinguha nga Mahinumdoman?

Gusto sa daghang tawo nga mahinumdoman sila sa uban. Ang pagtinguha nga mahinumdoman kita sa uban dili daotan. “Ang usa ka ngalan mas maayo pa kay sa maayong lana,” nag-ingon ang Bibliya, “ug ang adlaw sa kamatayon kay sa adlaw nga natawhan.”—Ecclesiastes 7:1.

Sa pagkamatay, ang tibuok kinabuhi sa usa ka tawo natino na. Kon may nahimo siyang dalayegong mga butang, ang adlaw sa pagkamatay nianang tawhana mas maayo kay sa iyang adlaw nga natawhan sa dihang wala pa siyay nahimo.

Si Haring Solomon mao ang nagsulat sa basahong Ecclesiastes sa Bibliya. Ang igsoon ni Solomon sa amahan nga si Absalom gustong mahinumdoman sa uban. Ugaling lang, ang tulo niya ka anak nga lalaki, nga mao untay makapasa sa iyang ngalan ngadto sa ulahing mga kaliwatan, lagmit bata pang nangamatay. Busa, unsay gibuhat ni Absalom? Ang Kasulatan nag-ingon: “Si Absalom . . . nagpatindog alang kaniya ug usa ka haligi, nga didto sa Ubos nga Patag sa Hari, kay siya miingon: ‘Wala akoy anak nga lalaki nga magpahinumdom sa akong ngalan.’ Busa gitawag niya ang haligi sumala sa iyang ngalan.” (2 Samuel 14:27; 18:18) Ang mga gun-ob niini nga haligi wala hikaplagi. Bahin kang Absalom, siya nailhan sa mga nagtuon ug Bibliya ingong rebelde nga buot moilog sa trono sa iyang amahang si David.

Daghan karong adlawa ang naningkamot nga mahinumdoman sa uban pinaagi sa ilang nalampos. Buot nilang dayegon sila sa mga tawo kansang mga hilig mag-usab-usab iniglabay sa panahon. Apan, unsay mahitabo sa maong pagkainila? Sa  librong The Culture of Narcissism, si Christopher Lasch nagsulat: “Sa atong panahon, sa dihang ang kalamposan gipasukad ilabina sa batan-ong hitsura, kamadanihon, ug kabag-o, ang pagkainila nahimong mas umalagi, ug kadtong nainila kanunayng mabalaka nga mawad-an niini.” Ingong resulta, daghang inilang mga tawo ang migamit ug droga ug alkoholikong ilimnon ug sila kasagarang nangamatayg sayo. Sa pagkatinuod, ang pagtinguha nga mainila kakawangan gayod.

Nan, buot natong magmadungganon sa panan-aw ni kinsa? Gihisgotan ni Jehova ang pipila nga nagbantay sa iyang Balaod, ug pinaagi sa iyang manalagnang si Isaias siya nag-ingon: “Igahatag ko gayod kanila sa akong balay ug sulod sa akong mga paril ang usa ka monyumento ug ang usa ka ngalan . . . Usa ka ngalan hangtod sa panahong walay tino akong igahatag kanila, nga dili pagaputlon.” (Isaias 56:4, 5) Tungod sa ilang pagkamasinugtanon sa Diyos, kadtong iyang giuyonan nakabaton ug “usa ka monyumento ug usa ka ngalan.” Hinumdoman sa Diyos ang ilang ngalan “hangtod sa panahong walay tino” mao nga ang ilang ngalan dili na gayod mapala. Kana ang matang sa ngalan nga gidasig sa Bibliya nga atong huptan—usa ka maayong dungog sa panan-aw ni Jehova, ang atong Maglalalang.

Gitagna ni Isaias ang panahon sa dihang ang mga tawong matinumanon makabaton ug kinabuhing walay kataposan sa Paraiso sa yuta. Ang “kinabuhing walay kataposan” sa maong Paraiso mao “ang tinuod nga kinabuhi”—ang matang sa kinabuhi nga gituyo sa Diyos nga mapahimuslan sa mga tawo sa dihang iyang gilalang sila. (1 Timoteo 6:12, 19) Imbes magbaton ug kinabuhi nga umalagi ug dili makapatagbaw, dili ba angay natong tinguhaon ang kinabuhing walay kataposan?

Dili Gayod Makapatagbaw ang Pagpangagpas sa Arte o Pagkapilantropo

Daghang tawo nga hilig sa arte ang nagtinguha sa pagpauswag sa ilang kahanas aron mahingpit ang ilang arte. Ang kinabuhi karon hamubo kaayo alang niana. Sa dihang kapin nag 90 anyos si Hideo, nga gihisgotan sa nag-unang artikulo, naningkamot siya sa pagpauswag sa iyang mga kahanas sa arte. Bisan pag ang usa ka tawo modangat sa punto nga siya matagbaw na sa iyang kaugalingong trabaho, nianang panahona dili na daghan ang iyang mahimo sama niadtong batan-on pa siya. Apan komosta man kon wala nay kataposan ang iyang kinabuhi? Pagkadaghan ang iyang mahimo aron mahingpit ang iyang arte!

Unsay ikasulti bahin sa pagkapilantropo sa usa ka tawo? Dalayegon ang usa ka tawo nga may pagtagad sa mga kabos ug mogamit sa iyang katigayonan sa pagtabang niadtong anaa sa kawalad-on. Ang Bibliya nag-ingon: “Adunay labaw nga kalipay sa paghatag kay sa pagdawat.” (Buhat 20:35) Ang pagkamahunahunaon sa kaayohan sa uban mahimong makapatagbaw gayod. Apan, pila ra bay mahimo sa usa ka tawo bisan pag iyang gugolon ang tibuok niyang kinabuhi sa maong buluhaton? Limitado ra kitag mahimo sa paghupay sa pag-antos sa uban. Bisan ang dako kaayong materyal nga gasa dili gayod makatagana sa usa ka pangunang panginahanglan nga wala panumbalinga sa kadaghanang tawo ug wala pa gayod kini ikatagana sa ilang kinabuhi. Unsa ba ang maong panginahanglan?

Kinahanglan Gayong Matagan-an ang Usa ka Kinaiyanhong Panginahanglan

Sa iyang Wali sa Bukid, gihisgotan ni Jesus ang usa ka kinaiyanhong panginahanglan sa miingon siya: “Malipayon kadtong mahunahunaon sa ilang espirituwal nga panginahanglan, sanglit ila ang gingharian sa mga langit.” (Mateo 5:3) Busa sumala sa Bibliya, ang matuod nga kalipay wala magdepende sa bahandi, pagkainila, mga kalamposan sa arte, o pagkapilantropo. Kini nagdepende hinuon sa pagtagana sa atong espirituwal nga panginahanglan nga mao ang pagsimba sa Diyos.

Si apostol Pablo nagdasig niadtong wala makaila sa Maglalalang sa pagpangita kaniya. Siya miingon: “Gihimo [sa Diyos] gikan sa usa ka tawo ang tanang nasod sa katawhan, aron magpuyo ibabaw sa tibuok nawong sa yuta, ug iyang gilatid ang tinudlong mga panahon ug ang tinong mga utlanan sa mga puloy-anan sa mga tawo, aron sila mangita sa Diyos, kon sila man ugaling mangapkap man kaniya ug makakaplag gayod kaniya, bisan ug, sa pagkatinuod, siya dili halayo gikan sa matag usa kanato. Kay pinaagi kaniya kita adunay kinabuhi ug naglihok ug naglungtad.”—Buhat 17:26-28.

Ang pagtagbaw sa panginahanglan nga simbahon ang matuod nga Diyos mao ang yawi aron matagamtam  ang matuod nga kalipay sa kinabuhi. Tungod usab niini kita may kalaoman nga makabaton sa “tinuod nga kinabuhi.” Tagda ang panig-ingnan ni Teresa, kinsa nainila sa telebisyon sa iyang nasod sa dihang nahimo siyang unang Aprikana-Amerikanang artista nga nagdala sa kaugalingon niyang usa-ka-oras nga serye sa drama. Apan iyang gibiyaan kanang tanan. Ngano? Miingon siya: “Kombinsido ako nga ang pagsunod sa tambag sa Pulong sa Diyos mao ang labing maayong paagi sa kinabuhi.” Dili buot ni Teresa nga madaot ang iyang relasyon uban sa Diyos pinaagi sa pagdulag papel sa drama sa telebisyon nga nagpasiugda sa sekso ug kapintasan. Nawala siya sa mata sa publiko apan misugod siya sa pagsubay ug usa ka makapatagbaw gayod nga kinabuhi kay siya nahimong bug-os-panahong magwawali sa maayong balita sa Gingharian sa Diyos, nga naningkamot sa pagtabang sa uban aron makabaton silag maayong relasyon uban sa Diyos.

Bahin sa desisyon ni Teresa nga mohunong sa pagkaartista, usa sa iyang mga kauban kanhi miingon: “Naguol ko kaayo kay dili ko gustong talikdan niya ang iyang malamposong karera. Apan dayag nga nakakaplag siyag mas maayo pang butang.” Sa ulahi namatay si Teresa. Apan human siya mamatay, ang iya mismong kanhing kauban miingon: “Siya malipayon ug kana lang gayod ang mahimo nimong tinguhaon sa imong kinabuhi. Pila ba kanato ang makaingon niana?” Alang niadtong nag-una sa ilang relasyon uban sa Diyos diha sa ilang kinabuhi apan nasakpan sa kamatayon, anaa ang talagsaong kalaoman sa pagkabanhaw ubos sa pagmando sa Gingharian.—Juan 5:28, 29.

Ang Maglalalang adunay katuyoan alang sa yuta ug sa katawhang nagpuyo niini. Buot niyang ikaw makasabot sa maong katuyoan ug makatagamtam sa kinabuhing walay kataposan sa Paraiso sa yuta. (Salmo 37:10, 11, 29) Karon na ang panahon sa pagkat-on bahin kang Jehova, ang Maglalalang sa mga langit ug sa yuta, ug kon unsay iyang katuyoan alang kanimo. Ang mga Saksi ni Jehova sa inyong dapit malipay sa pagtabang kanimo nga makabaton sa maong kahibalo. Palihog pagkontak kanila o pagsulat sa mga magpapatik niining magasina.

[Hulagway sa panid 5]

Nganong sayop man ang pangatarongan sa datong tawo sa sambingay ni Jesus?

[Hulagway sa panid 7]

Gusto mo bang makatagamtam ug kinabuhing walay kataposan sa Paraiso sa yuta?