Si Barzilai—Usa ka Tawong Makasaranganon

‘NGANONG mahimong palas-anon pa man ko nimo?’ Kini ang giingon sa 80-anyos nga si Barzilai kang Haring David sa Israel. Ang Bibliya nag-ingon nga si Barzilai maoy usa ka “bantogan kaayong tawo,” lagmit tungod kay siya adunahan. (2 Samuel 19:32, 35) Si Barzilai nagpuyo sa Gilead, nga usa ka bukirong dapit silangan sa Suba sa Jordan.—2 Samuel 17:27; 19:31.

Unsay mga kahimtang ug ngano nga ingon niadto ang sinultihan sa tigulang nang si Barzilai kang David?

Rebelyon Batok sa Hari

Si David nameligro. Giilog sa iyang anak nga si Absalom ang pagkahari human niya ‘kawata ang kasingkasing sa mga tawo sa Israel.’ Tin-aw nga silotan gayod ni Absalom si bisan kinsa nga nagmaunongon sa iyang amahan. Busa si David ug ang iyang mga alagad mibiya sa Jerusalem. (2 Samuel 15:6, 13, 14) Sa pag-abot ni David sa Mahanaim, usa ka dapit sa silangan sa Jordan, siya gitabangan ni Barzilai.

Si Barzilai ug ang duha pa ka lalaki, si Sobi ug Makir, naghatag kang David ug daghang materyal nga mga kinahanglanon. Kining tulo ka maunongong mga ginsakpan ni David nakasabot nga pait ang iyang kahimtang ug sa iyang mga tawo sa dihang sila miingon: “Ang katawhan gigutom ug gikapoy ug giuhaw diha sa kamingawan.” Busa, gihimo nila ang tanan nilang maarangan aron  matagan-an si David ug ang iyang mga tawo ug mga higdaanan, trigo, sebada, harina, sinangag nga mga lugas, lagpad nga mga liso, lentihas, dugos, mantekilya, karnero, ug uban pang kinahanglanon.—2 Samuel 17:27-29.

Peligroso ang pagtabang kang David. Silotan gayod ni Absalom si bisan kinsa nga mosuportar sa tinuod nga hari. Busa si Barzilai nagmaisogon sa dihang siya nagpakitag pagkamaunongon kang David.

Nabalit-ad ang Kahimtang

Wala madugay human niana, nagkaengkuwentro ang rebeldeng kasundalohan ni Absalom ug ang mga tawo ni David. Naggubatay sila sa kalasangan sa Epraim, lagmit dili ra layo sa Mahanaim. Naparot ang kasundalohan ni Absalom, “ug ang pagpamatay didto dako niadtong adlawa.” Bisan tuod misulay sa pag-ikyas si Absalom, siya namatay ra gihapon.—2 Samuel 18:7-15.

Sa makausa pa, wala nay misupak sa pagkahari ni David sa Israel. Wala na magtagotago ang iyang mga ginsakpan. Gawas pa, tungod sa ilang pagkamaunongon, sila gitahod ug gipabilhan ni David.

Sa hapit nang mobalik si David sa Jerusalem, “si Barzilai nga Gileadnon milugsong gikan sa Rogelim aron makaabot siya sa Jordan uban sa hari aron ikahatod siya sa Jordan.” Niadtong tungora, gidapit ni David ang tigulang nga Barzilai: “Tabok uban kanako, ug ako magtagana kanimo ug pagkaon uban kanako didto sa Jerusalem.”—2 Samuel 19:15, 31, 33.

Walay duhaduha, mapasalamaton gayod si David sa tabang ni Barzilai. Lagmit dili kay gusto rang gantihan ni David si Barzilai pinaagig paghatag ug materyal nga mga butang. Wala na kana kinahanglana ni Barzilai kay adunahan man siya. Tingali gusto ni David nga adto siya papuy-on sa palasyo tungod sa iyang dalayegong mga hiyas. Ang pagpuyo sa palasyo maoy usa ka kadungganan, ug mapahimuslan usab ni Barzilai ang daghang kaayohan ingong higala sa hari.

Pagkamakasaranganon ug Pagkamatinud-anon

Agig tubag sa imbitasyon ni Haring David, si Barzilai miingon: “Pila ba ang mga adlaw sa katuigan sa akong kinabuhi, aron ako motungas uban sa hari ngadto sa Jerusalem? Ako kawaloan na ka tuig ang panuigon niining adlawa. Makaila pa ba ako tali sa maayo ug sa daotan, o makaila pa ba ang imong sulugoon sa akong gikaon ug sa giinom, o makapamati pa ba ako sa tingog sa mga mag-aawit nga lalaki ug babaye?” (2 Samuel 19:34, 35) Busa, matinahorong gibalibaran ni Barzilai ang imbitasyon ug ang talagsaong pribilehiyo. Apan ngano?

Ang usa ka rason sa desisyon ni Barzilai lagmit mao ang iyang pagkataas nag edad ug ang mga suliran nga dala sa pagkatigulang. Mahimong naghunahuna si Barzilai nga dili na siya magdugay sa kalibotan. (Salmo 90:10) Nahimo na niya ang iyang maarangan sa pagsuportar kang David, apan nahibalo usab siya sa mga suliran nga dala sa pagkatigulang. Busa, si Barzilai matinud-anong nakatimbangtimbang sa iyang mga katakos tungod kay siya wala maghunahuna bahin sa posisyon ug pagkainila. Dili sama sa ambisyosong si Absalom, si Barzilai maalamong nagpasundayag ug pagkamakasaranganon.—Proverbio 11:2.

Ang laing hinungdan sa desisyon ni Barzilai lagmit mao nga dili niya gusto nga ang iyang mga suliran sa pagkatigulang makababag sa kalihokan sa tinudlong hari sa Diyos. Misukna si Barzilai: “Nganong ang imong sulugoon mahimong palas-anon pa sa akong ginoo nga hari?” (2 Samuel 19:35) Bisan tuod gipaluyohan gihapon niya si David, lagmit naghunahuna si Barzilai nga  ang usa nga batan-on mas daghan ug mahimo kay kaniya. Lagmit nga gitumong ang iyang anak nga lalaki mismo, si Barzilai miingon: “Ania ang imong sulugoon nga si Kimham. Tugoti siya nga motabok uban sa akong ginoo nga hari; ug buhata kaniya kon unsa ang maayo sa imong mga mata.” Imbes masuko, gidawat ni David ang maong sugyot. Gani, sa wala pa sila motabok sa Jordan, ‘gihagkan ni David si Barzilai ug gipanalanginan siya.’—2 Samuel 19:37-39.

Gikinahanglan ang Pagkamakataronganon

Ang asoy bahin kang Barzilai nagpasiugda nga kita kinahanglang magmakataronganon. Sa unang bahin, dili nato angayng balibaran ang usa ka pribilehiyo sa pag-alagad o likayan ang pagkab-ot ug dugang pribilehiyo tungod kay dili nato gustong mahasol o mobating dili takos nga moabaga ug kaakohan. Kita tabangan sa Diyos kon kita mosalig kaniya alang sa kusog ug kaalam.—Filipos 4:13; Santiago 4:17; 1 Pedro 4:11.

Sa laing bahin, kinahanglan kitang magmakasaranganon. Pananglitan, tingali ang usa ka Kristohanon daghan nag pribilehiyo diha sa kongregasyon. Nahibalo siya nga kon iyang dawaton ang dugang nga mga pribilehiyo, basig dili na niya matuman ang ubang Kasulatanhong mga kaakohan sama sa pagtagana sa espirituwal ug materyal nga mga panginahanglan sa iyang pamilya. Sa maong kahimtang, dili ba magpaila nga siya makasaranganon ug makataronganon kon iyang balibaran ang dugang pribilehiyo sa pag-alagad?—Filipos 4:5; 1 Timoteo 5:8.

Si Barzilai usa ka maayong panig-ingnan, ug angay natong palandongon kana. Siya maunongon, maisogon, mahinatagon, ug makasaranganon. Labaw sa tanan, si Barzilai determinado nga unahon pagbuhat ang kabubut-on sa Diyos inay ang iyaha.—Mateo 6:33.

[Mapa sa panid 15]

(Alang sa aktuwal nga pagkahan-ay, tan-awa ang publikasyon)

Ang 80-anyos nga si Barzilai mipanaw ug layo aron sa pagtabang kang David

GILEAD

Rogelim

Sucot

Mahanaim

Suba sa Jordan

Gilgal

Jerico

Jerusalem

EPRAIM

[Hulagway sa panid 13]

Nganong gibalibaran ni Barzilai ang gitanyag ni David?