Ipadayeg si Jehova sa Kongregasyon

“Ipahayag ko ang imong ngalan ngadto sa akong mga igsoon; sa taliwala sa kongregasyon pagadayegon ko ikaw.”—HEBREOHANON 2:12.

1, 2. Nganong mapuslanon kaayo ang kongregasyon, ug unsay pangunang papel niini?

 SA TIBUOK kasaysayan, ang mga indibiduwal nakasinatig panag-uban ug kasegurohan sulod sa pamilya. Bisan pa niana, ang Bibliya nagpaila ug laing pundok diin ang di-maihap nga katawhan sa tibuok yuta nagpahimulos karon sa talagsaong panag-uban ug kasegurohan. Kana ang Kristohanong kongregasyon. Kon sakop ka man o dili sa usa ka suod, mapaluyohong pamilya, mahimo kang magpabili ug angayng magpabili sa gitagana sa Diyos pinaagi sa kahikayan sa kongregasyon. Hinuon, kon ikaw nakig-uban na sa usa ka kongregasyon sa mga Saksi ni Jehova, lagmit kang makapamatuod bahin sa sadyang panag-ubanay nga imong gipahimuslan diha niana ug sa pagbati sa kasegurohan nga imong nasinati.

² Ang kongregasyon dili lang kay pundok sa mga higala. Dili kini usa ka kapunongan o klab sa komunidad diin magkatigom ang mga tawo nga susamag kagikan o intereses sa usa ka esport o kalingawan. Hinunoa, ang pangunang katuyoan sa kongregasyon mao ang pagdayeg kang Jehova nga Diyos. Matuod kana sa dugay nang panahon, sumala sa gipasiugda sa basahong Salmo. Sa Salmo 35:18, atong mabasa: “Pagadayegon ko ikaw diha sa dako nga kongregasyon; pagadayegon ko ikaw taliwala sa daghang katawhan.” Sa susamang paagi, ang Salmo 107:31, 32, nagdasig kanato: “Oh nga magpasalamat unta ang katawhan kang Jehova tungod sa iyang mahigugmaong-kalulot ug tungod sa iyang katingalahang mga buhat alang sa mga anak sa mga tawo. Ug ipahimaya nila siya diha sa kongregasyon sa katawhan.”

3. Sumala ni Pablo, unsay ginahimo sa kongregasyon?

³ Gipasiugda sa Kristohanong apostol Pablo ang laing hinungdanon kaayong papel sa kongregasyon sa dihang iyang gihisgotan ang “panimalay sa Diyos, nga mao ang kongregasyon sa buhing Diyos, usa ka haligi ug tukod sa kamatuoran.” (1 Timoteo 3:15) Unsang kongregasyona ang gihisgotan ni Pablo? Sa unsang mga paagi gigamit sa Bibliya ang terminong “kongregasyon”? Ug unsa ba gayod ang epekto niini diha sa atong kinabuhi ug mga palaaboton? Aron matubag kana, ato unang susihon ang pipila ka paggamit sa terminong “kongregasyon” diha sa Pulong sa Diyos.

4. Sa unsang diwa ang pulong “kongregasyon” kasagarang gigamit diha sa Hebreohanong Kasulatan?

⁴ Ang Hebreohanong pulong nga kasagarang gihubad nga “kongregasyon” naggikan sa usa ka lintunganayng pulong nga nagkahulogang ‘pagtigom.’ (Deuteronomio 4:10; 9:10) Gigamit sa salmista ang pulong “kongregasyon” maylabot sa mga manulonda sa langit, ug kini mahimong gamiton sa pagbatbat sa usa ka grupo sa daotang mga tawo. (Salmo 26:5; 89:5-7) Bisan pa niana, ang Hebreohanong Kasulatan kasagarang nagpadapat gayod niini sa mga Israelinhon. Gipahayag sa Diyos nga si Jacob “mahimo nga usa ka kongregasyon sa mga katawhan,” ug kana nahitabo gayod. (Genesis 28:3; 35:11; 48:4) Ang mga Israelinhon gitawag o gipili aron mahimong “kongregasyon ni Jehova,” “ang kongregasyon sa matuod nga Diyos.”—Numeros 20:4; Nehemias 13:1; Josue 8:35; 1 Samuel 17:47; Miqueas 2:5.

5. Unsang Gregong pulong ang kasagarang gihubad nga “kongregasyon,” ug sa unsang paagi ikapadapat kining pulonga?

⁵ Ang katumbas nga Gregong pulong maoy ek·kle·siʹa, nga gikan sa duha ka Gregong mga pulong nga nagkahulogang “gawas” ug “pagtawag.” Kini ikapadapat sa dili-relihiyosong grupo, sama sa “katigoman” nga gisibahan ni Demetrio sa pagbatok kang Pablo didto sa Efeso. (Buhat 19:32, 39, 41)  Apan ang Bibliya kasagarang naggamit niini alang sa Kristohanong kongregasyon. Ang pipila ka hubad naggamit sa pulong nga “church” (o iglesya), apan ang The Imperial Bible-Dictionary nagtaho nga kini “wala gayod . . . magpasabot sa literal nga tinukod diin ang mga Kristohanon nagkatigom alang sa publikong pagsimba.” Apan, makapaikag nga diha sa Kristohanon Gregong Kasulatan, atong hisayran nga ang pulong “kongregasyon” gipadapat sa labing menos upat ka nagkalainlaing paagi.

Ang Dinihogang Kongregasyon sa Diyos

6. Unsay gihimo ni David ug ni Jesus diha sa kongregasyon?

⁶ Nga gipadapat kang Jesus ang mga pulong ni David sa Salmo 22:22, si apostol Pablo misulat: “‘Ipahayag ko ang imong ngalan ngadto sa akong mga igsoon; sa taliwala sa kongregasyon pagadayegon ko ikaw pinaagig awit.’ Busa [si Jesus] kinahanglan nga mahisama sa iyang ‘mga igsoon’ sa tanang paagi, aron siya mahimong maluluy-on ug matinumanong hataas nga saserdote sa mga butang maylabot sa Diyos.” (Hebreohanon 2:12, 17) Si David nagdayeg sa Diyos sa taliwala sa kongregasyon sa karaang Israel. (Salmo 40:9) Apan, unsay gitumong ni Pablo sa miingon siya nga si Jesus nagdayeg sa Diyos “sa taliwala sa kongregasyon”? Unsang kongregasyona?

7. Sa unsang pangunang diwa ang pulong “kongregasyon” gigamit diha sa Kristohanon Gregong Kasulatan?

⁷ Makahuloganon ang atong mabasa sa Hebreohanon 2:12, 17. Nagpakita kini nga sa masakopong diwa, si Kristo nahiapil ingong usa ka membro sa kongregasyon diin siya nagpahayag sa ngalan sa Diyos ngadto sa iyang mga igsoon. Kinsa ba ang iyang mga igsoon? Sila nga nahimong bahin sa “binhi ni Abraham,” ang dinihogan-sa-espiritung mga igsoon ni Kristo, “mga mag-aambit sa langitnong pagtawag.” (Hebreohanon 2:16–3:1; Mateo 25:40) Oo, ang pangunang diwa sa “kongregasyon” diha sa Kristohanon Gregong Kasulatan mao ang daghag-membro nga grupo sa dinihogan-sa-espiritung mga sumusunod ni Kristo. Kining 144,000 ka dinihogan maoy naglangkob sa “kongregasyon sa mga panganay nga natala sa mga langit.”—Hebreohanon 12:23.

8. Sa unsang paagi abanteng gipasabot ni Jesus ang pagkaporma sa Kristohanong kongregasyon?

⁸ Gipasabot ni Jesus ang pagkaporma sa maong Kristohanong “kongregasyon.” Mga usa ka tuig sa wala pa siya mamatay, giingnan niya ang usa ka apostol: “Ikaw si Pedro, ug sa ibabaw niining dakong-bato pagatukoron ko ang akong kongregasyon, ug ang mga ganghaan sa Hades dili makabuntog niini.” (Mateo 16:18) Tukmang nasabtan ni Pedro ug Pablo nga si Jesus mismo mao ang gitagna nga dakong-bato. Si Pedro misulat nga kadtong pagatukoron ingong “buhing mga bato” sa usa ka espirituwal nga balay ibabaw sa dakong-bato, si Kristo, maoy ‘usa ka katawhan alang sa linaing pagpanag-iya aron kaylap nga ipahayag ang mga kahamili’ sa Usa nga nagtawag kanila.—1 Pedro 2:4-9; Salmo 118:22; Isaias 8:14; 1 Corinto 10:1-4.

9. Kanus-a nagsugod pagkaporma ang kongregasyon sa Diyos?

⁹ Kanus-a nagsugod pagkaporma kining “katawhan alang sa linaing pagpanag-iya” nga Kristohanong kongregasyon? Niadtong Pentekostes 33 K.P. gibubo sa Diyos ang balaang espiritu sa mga tinun-an nga nagkatigom sa Jerusalem. Sa ulahi niadtong adlawa, si Pedro mipahayag ug talagsaong pakigpulong ngadto sa usa ka grupo sa mga Hudiyo ug mga proselita. Nasamdan ang kasingkasing sa daghan tungod sa pagkamatay ni Jesus; sila naghinulsol ug nabawtismohan.  Atong makita sa taho sa Bibliya nga tulo ka libo ang nagpabawtismo, nga pagkahuman niadto sila nahimong bahin sa bag-o ug nagkadakong kongregasyon sa Diyos. (Buhat 2:1-4, 14, 37-47) Nagkadako kadto tungod kay mas daghang Hudiyo ug mga proselita ang nagtuo nga ang nasod sa Israel dili na mao ang kongregasyon sa Diyos. Ingong kapuli niana, ang dinihogang mga Kristohanon nga naglangkob sa espirituwal nga “Israel sa Diyos” nahimong matuod nga kongregasyon sa Diyos.—Galacia 6:16; Buhat 20:28.

10. Unsa ang relasyon ni Jesus sa kongregasyon sa Diyos?

¹⁰ Ang Bibliya kasagarang nagpaila sa pagkalahi ni Jesus ug sa mga dinihogan, sama sa pamulong “labot kang Kristo ug sa kongregasyon.” Si Jesus mao ang Ulo sa maong kongregasyon sa dinihogan-sa-espiritung mga Kristohanon. Si Pablo misulat nga ang Diyos ‘naghimo [kang Jesus] nga ulo ibabaw sa tanang butang nganha sa kongregasyon, nga mao ang iyang lawas.’ (Efeso 1:22, 23; 5:23, 32; Colosas 1:18, 24) Karong adlawa, diyutay na lang nga nahibilin sa dinihogang mga membro sa maong kongregasyon ang ania pa sa yuta. Apan, makapaneguro kita nga ang ilang Ulo, si Jesu-Kristo, nahigugma kanila. Ang iyang pagbati bahin kanila gibatbat sa Efeso 5:25: “Si Kristo nahigugma usab sa kongregasyon ug nagtugyan sa iyang kaugalingon alang niini.” Siya nahigugma kanila tungod kay sila kanunayng nagtanyag sa Diyos ug “halad sa pagdayeg, nga mao, ang bunga sa mga ngabil nga naghimog pagpahayag sa dayag sa iyang ngalan,” sama sa gihimo ni Jesus samtang dinhi siya sa yuta.—Hebreohanon 13:15.

Ubang mga Paggamit sa Terminong “Kongregasyon”

11. Sa unsang ikaduhang diwa nga ang pulong “kongregasyon” gigamit diha sa Kristohanon Gregong Kasulatan?

¹¹ Usahay, ang Bibliya naggamit sa terminong “kongregasyon” sa mas limitado o linaing diwa, nga wala magpadapat niini sa katibuk-ang grupo sa 144,000 ka dinihogan nga naglangkob sa “kongregasyon sa Diyos.” Pananglitan, si Pablo misulat ngadto sa usa ka grupo sa mga Kristohanon: “Likayi nga mahimong hinungdan sa pagkapandol sa mga Hudiyo ingon man sa mga Grego ug sa kongregasyon sa Diyos.” (1 Corinto 10:32) Dayag nga kon dili tukma ang panggawi sa usa ka Kristohanon sa karaang Corinto, kana mahimong hinungdan sa kapandolan sa pipila. Apan, posible ba nga kana makapandol kang bisan kinsa ug sa tanang Grego, mga Hudiyo, o mga dinihogan sukad sa panahon sa apostol hangtod karon? Dili gayod. Busa mopatim-aw nga niining bersikuloha, ang “kongregasyon sa Diyos” mapadapat ngadto sa mga Kristohanong nagkinabuhi sa usa ka tinong panahon. Nahiuyon niana, ang usa makahisgot nga ang Diyos naggiya, nagtabang, o nagpanalangin sa kongregasyon, nga nagpasabot sa tanang Kristohanon sa usa ka partikular nga panahon, bisan kon diin sila nagpuyo. O kita makahisgot bahin sa kalipay ug kalinaw nga naglungtad sa kongregasyon sa Diyos karon, nga nagpasabot taliwala sa katibuk-ang Kristohanong kapunongan.

12. Sa unsang ikatulong diwa ang terminong “kongregasyon” gigamit diha sa Bibliya?

¹² Ang ikatulong paagi sa paggamit sa Bibliya sa pulong “kongregasyon” mapadapat sa tanang Kristohanon diha sa usa ka dapit. Atong mabasa: “Ang kongregasyon sa tibuok nga Judea ug Galilea ug Samaria nakabaton ug yugto sa kalinaw.” (Buhat 9:31) May daghang grupo sa mga Kristohanon nianang haluag nga dapit, apan silang tanan sa Judea, Galilea, ug Samaria gitumong ingong “ang kongregasyon.” Tungod sa gidaghanon sa nabawtismohan sa Pentekostes 33 K.P. ug sa wala madugay human niana, mahimong may ubay-ubayng grupo nga regular nga nagtigom sa Jerusalem. (Buhat 2:41, 46, 47; 4:4; 6:1, 7) Si Herodes Agripa I ang nagmando sa Judea hangtod sa iyang pagkamatay sa 44 K.P., ug sa 1 Tesalonica 2:14 tin-aw nga masabtan nga sa pagka-50 K.P., ubay-ubay na ang mga kongregasyon sa Judea. Busa, sa dihang atong mabasa nga si Herodes ‘nagdagmal sa pipila niadtong sakop sa kongregasyon,’ kini lagmit nagtumong sa ubay-ubayng grupo sa mga kongregasyon nga nagtigom sa Jerusalem.—Buhat 12:1.

13. Unsa ang ikaupat ug kasagarang paagi sa paggamit sa terminong “kongregasyon” diha sa Bibliya?

¹³ Sa ikaupat nga paagi, ang mas limitado ug kasagarang paggamit sa terminong “kongregasyon” nagtumong sa mga Kristohanon nga naglangkob sa usa ra ka lokal nga kongregasyon, sama sa kongregasyon  diha sa usa ka balay. Si Pablo naghisgot sa “mga kongregasyon sa Galacia.” Daghan ang mga kongregasyon nianang dakong probinsiya sa Roma. Kaduha gigamit ni Pablo ang “mga kongregasyon” maylabot sa Galacia, nga naglakip niadtong didto sa Antioquia, Derbe, Listra, ug Iconio. Ang may-katakos nga mga ansiyano o mga magtatan-aw gitudlo niining lokal nga mga kongregasyon. (1 Corinto 16:1; Galacia 1:2; Buhat 14:19-23) Sa Kasulatanhong diwa, kanang tanan maoy “mga kongregasyon sa Diyos.”—1 Corinto 11:16; 2 Tesalonica 1:4.

14. Unsay atong ikahinapos bahin sa paggamit sa terminong “kongregasyon” diha sa pipila ka kasulatan?

¹⁴ Sa pipila ka kahimtang, gagmay ra gayod ang mga grupo nga nagtigom sa Kristohanong mga tigom, nga masulod ra sa pribadong balay. Bisan pa niana, ang pulong “kongregasyon” gigamit sa pagtumong sa maong mga grupo. Ang ato nang nasayran mao ang mga kongregasyon didto sa mga balay ni Aquila ug Prisca, Nimfa, ug Filemon. (Roma 16:3-5; Colosas 4:15; Filemon 2) Kini makapadasig gayod sa lokal nga mga kongregasyon karon nga gagmay ra ug tingali regular nga nagtigom pa sa pribadong balay. Giila ni Jehova ang gagmayng mga kongregasyon sa unang siglo, ug seguradong siya nag-ila kanila karon, nga nagpanalangin kanila pinaagi sa iyang espiritu.

Mga Kongregasyon Nagdayeg Kang Jehova

15. Sa unsang paagi napasundayag ang paglihok sa balaang espiritu diha sa unang mga kongregasyon?

¹⁵ Among nahisgotan nga ingong katumanan sa Salmo 22:22, si Jesus nagdayeg sa Diyos sa taliwala sa kongregasyon. (Hebreohanon 2:12) Angay usab kanang himoon sa iyang matinumanong mga sumusunod. Sa unang siglo, sa dihang ang matuod nga mga Kristohanon gidihogan sa balaang espiritu aron mahimong mga anak sa Diyos ug busa mga igsoon ni Kristo, ang espiritu misugod paglihok sa daghang linaing mga paagi diha sa pipila kanila. Sila nakadawat ug milagrosong mga gasa sa espiritu. Ang espiritu gipasundayag pinaagi sa linaing katakos sa pagpahayag sa kaalam o kahibalo, sa gahom sa pagpang-ayo o pagpanagna, o bisan sa katakos sa pagsultig mga pinulongan nga wala nila mahibaloi sa nangagi.—1 Corinto 12:4-11.

16. Unsa ang usa ka tumong sa milagrosong mga gasa sa espiritu?

¹⁶ Mahitungod sa pagsultig pinulongan, si Pablo miingon: “Ako magaawit ug pagdayeg uban ang gasa sa espiritu, apan ako magaawit usab ug pagdayeg uban sa akong hunahuna.” (1 Corinto 14:15) Nakaamgo siya nga kinahanglang masabtan sa uban ang iyang mga pulong aron sila matudloan. Maoy tumong ni Pablo ang pagdayeg kang Jehova diha sa kongregasyon. Iyang giawhag ang uban nga may mga gasa sa espiritu: “Tinguhaang  magmadagayaon niini alang sa pagpalig-on sa kongregasyon,” nga nagpasabot sa lokal nga kongregasyon diin sila nagpasundayag sa gasa sa espiritu. (1 Corinto 14:4, 5, 12, 23) Tin-aw, interesado si Pablo sa lokal nga mga kongregasyon, kay siya nahibalo nga sa matag usa kanila, ang mga Kristohanon may mga kahigayonan sa pagdayeg sa Diyos.

17. Unsay atong mapaneguro maylabot sa lokal nga mga kongregasyon karon?

¹⁷ Si Jehova nagpadayon sa paggamit ug pagsuportar sa iyang kongregasyon. Siya nagapanalangin sa daghag-membro nga grupo sa dinihogang mga Kristohanon sa yuta karon. Makita kini gumikan sa dagayang suplay sa espirituwal nga pagkaon nga gidawat sa katawhan sa Diyos. (Lucas 12:42) Siya nagapanalangin sa tibuok-kalibotang kapunongan sa mga igsoon sa katibuk-an. Ug siya nagapanalangin sa lokal nga mga kongregasyon, diin atong gidayeg ang atong Maglalalang pinaagi sa atong mga buhat ug sa makapalig-on-sa-pagtuo nga mga komento. Atong madawat dinha ang pagtudlo ug pagbansay aron makadayeg kita sa Diyos sa ubang mga higayon, sa dihang dili kita makatambong ug mga tigom sa lokal nga kongregasyon.

18, 19. Unsay buot buhaton sa sinserong mga Kristohanon diha sa bisan unsang lokal nga kongregasyon?

¹⁸ Hinumdomi nga si apostol Pablo miawhag sa mga Kristohanon sa lokal nga kongregasyon sa Filipos, Macedonia: “Mao kini ang padayon ko nga ginaampo, nga [kamo] mapuno sa matarong nga bunga, nga maoy pinaagi kang Jesu-Kristo, alang sa himaya ug kadayeganan sa Diyos.” Kana naglakip sa ilang pagpakigsulti sa uban bahin sa ilang pagtuo kang Jesus ug sa ilang kahibulongang paglaom. (Filipos 1:9-11; 3:8-11) Busa, giawhag ni Pablo ang mga isigka-Kristohanon: “Pinaagi [kang Jesus] itanyag nato kanunay sa Diyos ang halad sa pagdayeg, nga mao, ang bunga sa mga ngabil nga naghimog pagpahayag sa dayag sa iyang ngalan.”—Hebreohanon 13:15.

¹⁹ Nagakalipay ka ba sa pagdayeg sa Diyos “sa taliwala sa kongregasyon,” sama sa gihimo ni Jesus, ug sa paggamit sa imong mga ngabil sa pagdayeg kang Jehova atubangan niadtong wala pa makaila ug magdayeg kaniya? (Hebreohanon 2:12; Roma 15:9-11) Sa usa ka paagi, ang atong personal nga tubag mahimong magdepende kon unsay atong pagbati bahin sa papel sa atong lokal nga kongregasyon diha sa katuyoan sa Diyos. Sa sunod artikulo, atong hisgotan kon sa unsang paagi si Jehova nagadumala ug nagagamit sa atong lokal nga kongregasyon ug kon unsa gayod ang papel niini diha sa atong mga kinabuhi karon.

Nahinumdom Ka Ba?

• Sa unsang paagi naporma ang “kongregasyon sa Diyos,” nga gilangkoban sa dinihogang mga Kristohanon?

• Unsay tulo pa ka paagi nga ang Bibliya naggamit sa terminong “kongregasyon”?

• Maylabot sa kongregasyon, unsay buot himoon ni David, Jesus, ug sa unang-siglong mga Kristohanon, ug unsa gayod ang epekto niini kanato?

[Mga Pangutana sa Pagtuon]

[Hulagway sa panid 21]

Si Jesus mao ang patukoranan sa unsang kongregasyon?

[Hulagway sa panid 23]

Ang lokal nga mga grupo sa mga Kristohanon nagtigom ingong “mga kongregasyon sa Diyos”

[Hulagway sa panid 24]

Sama sa mga Kristohanon sa Benin, kita makadayeg kang Jehova diha sa panagkatigom sa mga kongregasyon