Pag-alagad Diha sa Langyawg-Pinulongan nga Kongregasyon

“NAKITA ko ang laing manulonda nga naglupad sa kinatung-an sa langit,” misulat si apostol Juan, “ug siya adunay walay kataposang maayong balita nga ipahayag ingong makapalipay nga balita ngadto sa nanagpuyo sa yuta, ug ngadto sa matag nasod ug tribo ug pinulongan ug katawhan.” (Pinadayag 14:6) Ingong katumanan niining matagnaong panan-awon, ang maayong balita sa Gingharian sa Diyos ginasangyaw sa tibuok kalibotan diha sa nagkalainlaing pinulongan. Ang kadaghanan niini nga mga pinulongan ginasulti sa mga langyaw nga nagpuyo halayo sa ilang yutang natawhan. Kining mga tawhana usab nakadungog sa maayong balita nga gisangyaw sa masibotong mga Saksi ni Jehova nga nakakat-on ug langyawng pinulongan.

Usa ka ba niadtong mga Saksi nga nag-alagad diha sa langyawg-pinulongan nga kongregasyon? O tingali nagplano ka pa lang nga mobalhin? Aron magmalamposon sa imong paningkamot, kinahanglan nimong batonan ang dili-hakog nga motibo ug hustong tinamdan sa hunahuna. Tungod kay ang imong tumong mao man ang pagtabang sa uban nga makakat-on sa kamatuoran sa Pulong sa Diyos, ikaw adunay maayo kaayong motibo—gugma sa Diyos ug sa silingan. (Mateo 22:37-39; 1 Corinto 13:1) Ang tinguha sa pagtabang sa uban nga makaila sa Diyos angay gayod nga maoy magpalihok kanimo sa pagtuon ug bag-ong pinulongan inay kay ang pagpahimulos lamang sa panag-ubanay, pagkaon, ug kultura sa mga tawo nga lahig nasyonalidad o grupo. Naghunahuna ka ba nga morag lisod ang pagtuon ug laing pinulongan? Kon mao, ang pagbaton ug hustong tinamdan makatabang. “Ayaw kahadlok sa pinulongan,” matod pa ni James, nga nakakat-on ug Hapones. Ang pagkahibalo nga daghan niadtong nagtuon ug langyawng pinulongan ang nagmalamposon makatabang kanimo sa paglahutay ug paghupot ug positibong tinamdan. Nan, sa unsang paagi makakat-on ka ug bag-ong pinulongan? Unsay makatabang kanimo sa pagpasibo diha sa kongregasyon nga naggamit sa maong pinulongan? Ug unsay kinahanglan nimong himoon aron makapabiling lig-on sa espirituwal?

Nagkinahanglag Paningkamot ang Pagtuon ug Pinulongan

Adunay daghang paagi sa pagtuon ug pinulongan. Ang mga estudyante ug mga magtutudlo magkalahi sa ilang mga paagi sa pagtuon ug pagtudlo. Apan alang sa kadaghanang estudyante, ang pagtambong ug pipila ka klase nga may kuwalipikadong magtutudlo makapadali ug makapasayon sa pagkat-on. Ang pagbasa sa Bibliya ug sa binase-sa-Bibliya nga mga publikasyon ug pagpaminaw sa bisan unsang rekording nga mabatonan diha sa bag-ong pinulongan nga imong ginatun-an makatabang kanimo sa pagpauswag sa imong bokabularyo ug kahibalo sa teokratikanhong mga termino. Ang nahiangay nga mga programa sa radyo, TV, ug video makatabang usab kanimo nga masinati sa pinulongan ug kultura. Kon bahin sa gitas-on sa sesyon sa pagtuon, kasagaran mas epektibo ang mubo nga sesyon sa pagtuon kada adlaw kay sa budlay, dugay apan talagsa ra nga sesyon sa pagtuon.

Ang pagkat-on ug usa ka pinulongan sama ra sa pagkat-on sa paglangoy. Dili ka makakat-on sa paglangoy pinaagi sa pagbasa lamang ug basahon bahin sa paglangoy. Kinahanglang molusbog ka sa tubig ug molangoy. Ingon usab niini ang pagkat-on ug usa ka pinulongan. Lisod makakat-on ug pinulongan pinaagi lamang sa pagtuon. Kinahanglang makiglabot ka sa mga tawo kutob sa imong mahimo—paminaw sa ilang sinultihan, pakig-uban  kanila, ug pakigsulti gayod kanila! Mahimo nimo kini ilabina panahon sa Kristohanong mga kalihokan. Kasagaran, ang imong nakat-onan magamit dayon nimo diha sa ministeryo sa kanataran. “Morag makahahadlok kini,” matod pa ni Midori, nga nagtuon ug Ininsek, “apan makita sa mga tagbalay nga kitang mga Saksi naningkamot gayod nga makakat-on. Kini makapatandog sa ilang mga kasingkasing. Kami moingon lang ug, ‘Nalipay ko nga nagkaila ta’ diha sa ilang pinulongan, ug ang ilang mga mata modan-ag sa kalipay!”

Makatabang usab ug dako ang Kristohanong mga tigom. Sa matag tigom, sulayi ang pagkomento bisag kausa lang. Bisan pag ang paghimo niini kulba tingali kaayo sa sinugdan, ayawg kabalaka. Buot sa kongregasyon nga ikaw magmalamposon! Si Monifa, nga nagtuon ug Koreano, nag-ingon: “Ako mapasalamaton kaayo sa sister nga milingkod tupad nako panahon sa mga tigom, nga nagsulat sa kahulogan sa pipila ka pulong para kanako. Ang iyang mabination ug mapailobong pagpaluyo nakatabang gayod kanako.” Sa dihang modaghan na ang imong bokabularyo, ikaw makasugod na sa paghunahuna diha sa bag-ong pinulongan—nga direktang magkonektar sa mga pulong ngadto sa gihawasan niini inay kay maghubad sa matag pulong diha sa imong hunahuna.

Ang una nimong tumong sa pagtuon ug pinulongan mao ang ‘pagbungat sa mga pulong nga daling masabtan.’ (1 Corinto 14:8-11) Bisan tuod ang mga tawo masinaboton tingali sa imong mga paningkamot, ang mga sayop o ang lahi nga aksento o paglitok sa pulong lagmit makawala sa ilang interes sa pagpamati sa imong mensahe. Ang hustong paglitok sa mga pulong ug paggamit ug hustong gramarya sa sinugdanan pa lang sa imong pagtuon sa pinulongan motabang kanimo sa paglikay nga maugmad ang dili-maayong mga batasan nga lisod kaayong wagtangon. Si Mark, nga nagtuon ug Swahili, misugyot: “Hangyoa kadtong larinong mosulti sa pinulongan sa pagtul-id sa imong mga sayop, ug unya pasalamati sila sa paghimo niana!” Siyempre, ikaw kinahanglang magmahunahunaon sa gigugol nga panahon ug paningkamot niadtong mitabang kanimo niining paagiha. Bisan tuod ipasusi nimo sa uban ang imong gibalay nga mga nota, paningkamoti ang paggamit ug mga pulong nga sinati o nadukiduki na nimo sa dihang mangandam sa imong mga bahin ug mga komento. Kini makapadali sa pagkat-on ug makatabang kanimo sa pagsulti nga may pagsalig sa kaugalingon.

Padayon sa Pag-uswag

“Ang pagtuon ug langyawng pinulongan mao ang kinalisorang buluhaton nga akong nahimo sukad,” nag-ingon si Monifa. “May mga higayon nga gusto na kong moundang. Apan akong gihunahuna ang dakong kalipay nga gibati sa akong ginatun-an ug Bibliya sa dihang makadungog siya ug laglom nga espirituwal nga mga kamatuoran diha sa akong yanong Koreanong sinultihan ug ang kalipay nga gibati sa mga igsoon sa dihang ako mouswag ug diyutay.” Ang punto mao, ayaw dayon pag-undang. Ang imong tumong mao ang pagtudlo sa nagaluwas-ug-kinabuhi nga mga kamatuoran sa Kasulatan ngadto sa uban. (1 Corinto 2:10) Busa, ang pagkakat-on sa pagtudlo sa Bibliya diha sa langyawng pinulongan nagkinahanglan ug bug-os, malahutayon nga paningkamot. Samtang nagpadayon ka sa pagtuon, ayaw itandi sa negatibong paagi ang imong pag-uswag sa nahimo sa uban. Dili managsama ang gikusgon ug ang mga paagi sa pag-uswag niadtong nagtuon ug bag-ong pinulongan. Apan, mapuslanon ang pagkahibalo sa imong kaugalingong pag-uswag. (Galacia 6:4) “Ang pagtuon ug pinulongan gipakasama sa pagsaka sa hagdan,” matod ni Joon, nga nagtuon ug Ininsek. “Sa dihang  bation nimo nga morag wala ka moabante, dihadiha imong maamgohan nga duna diay kay nahimong pag-uswag.”

Ang pagtuon ug bag-ong pinulongan maoy tibuok-kinabuhing kalihokan. Busa, pagkalipay niana, ug ayaw pagdahom ug kahingpitan. (Salmo 100:2) Ang mga sayop dili malikayan. Kini maoy bahin sa proseso sa pagkat-on. Sa dihang ang usa ka Kristohanon nagsugod sa pagsangyaw diha sa pinulongang Italyano, gipangutana niya ang tagbalay, “Nahibalo ka ba sa silhig sa kinabuhi?” Ang buot niyang ipasabot mao ang “katuyoan sa kinabuhi.” Ang usa ka Saksi nga bag-o pang nagtuon sa pinulongang Polako nagdapit sa nanambong sa kongregasyon sa pag-awit sa iro inay pag-awit sa alawiton. Ug tungod sa gamayng kausaban sa paglitok, ang usa ka tawo nga nagtuon ug Ininsek nag-awhag sa iyang mga mamiminaw sa pagbaton ug pagtuo sa estante sa libro ni Jesus inay sa lukat. Ang bentaha kon ikaw masayop mao nga lagmit dili ka na makalimot sa hustong mga pulong nga imong nakat-onan.

Pakigtambayayong sa Kongregasyon

Ang kalainan sa pinulongan dili lang mao ang hinungdan sa pagkabahinbahin sa mga tawo. Ang kalainan sa kultura, rasa, ug nasod kasagaran maoy nakaingon sa pagkabahinbahin sa katawhan. Apan, kini nga mga babag dili kay dili mabuntog. Usa ka eskolar nga nagtuon sa relihiyosong mga grupo sa Uropa nga Ininsek ug pinulongan nakamatikod nga ang mga Saksi ni Jehova nagkahiusa bisan pag managlahi ug nasod nga gigikanan. Siya nag-ingon nga sa mga Saksi, “dili babag ang etnikong kagikan, ug ang pinulongan maoy usa lamang ka paagi sa pagsabot sa pulong sa Diyos.” Sa pagkatinuod, ang pagpadapat sa mga prinsipyo sa Bibliya maoy nakatabang sa matuod nga mga Kristohanon sa pagbuntog sa nasodnong mga kalainan. Alang kanila nga nagsul-ob ug ‘bag-ong pagkatawo, walay Grego ni Hudiyo ni langyaw.’—Colosas 3:10, 11.

Busa ang tanan diha sa kongregasyon angayng maningkamot sa pagpalambo sa panaghiusa. Kini nagkinahanglan ug pagkaandam sa pagdawat ug bag-ong mga paagi sa paghunahuna, pagbati, ug pagbuhat sa mga butang. Ang mga kalainan dili mahimong hinungdan sa pagkabahinbahin kon dili nimo iinsistir ang imong kaugalingong mga kagustohan. (1 Corinto 1:10; 9:19-23) Sinatia ang maayong mga bahin sa tanang kultura. Hinumdomi, ang dili-hakog nga gugma mao ang yawi sa maayong mga relasyon ug tinuod nga panaghiusa.

Kadaghanan sa langyawg-pinulongan nga mga kongregasyon nagsugod ingong gagmayng mga grupo, nga kasagaran ang kadaghanan kanila nagtuon sa bag-ong pinulongan, uban sa pipila nga mao pay pagsugod sa pagtuon sa mga prinsipyo sa Bibliya. Mao nga diha sa maong mga grupo mas lagmit nga mahitabo ang dili pagsinabtanay kay nianang sa dagko, establisado na nga kongregasyon. Busa, ang hamtong nga mga Kristohanon kinahanglang maningkamot nga mahimong makapalig-on diha sa kongregasyon. Ang pagpakitag gugma ug kalulot pinaagi sa mga pulong ug buhat makapatunghag maayong palibot diin ang mga bag-ohan mouswag sa espirituwal.

Kadtong moboluntaryo sa pagtabang sa usa ka kongregasyon nga nagsultig langyawng pinulongan kinahanglang timbang usab sa ilang mga panahom sa uban. Si Rick, nga usa ka ansiyano niana nga kongregasyon, nagpatin-aw: “Ang pipila ka bag-ong Saksi nga sakop niining kongregasyona lagmit wala pa kaayo mabansay sa organisasyonal nga mga kahikayan kon itandi niadtong sakop sa mga kongregasyon nga naggamit sa lokal nga pinulongan. Apan ang kakulang nila ug kahanas sagad mahulipan nila sa ilang gugma ug kadasig. Ug daghang interesado ang nakadangat sa kamatuoran.” Pinaagi sa pagtambong kanunay sa mga kalihokan sa kongregasyon ug paghimo sa tanan nimong maarangan, ikaw makatabang gayod sa kongregasyon, bisag nagtuon ka pa lang sa bag-ong pinulongan. Pinaagi sa pagtinabangay, ang tanan makatampo sa espirituwal nga kauswagan sa kongregasyon.

Paghupot ug Espirituwal nga Kalig-on

Usa ka igsoong lalaki nga bag-ohan pa lang diha sa usa ka kongregasyon nga nagsultig langyawng pinulongan nakadungog sa usa ka inahan nga nagtabang sa iyang anak sa pag-andam ug komento. “Kanang mubo ra Ma,” mihangyo ang bata. “Dili, pangga,” ingon sa inahan. “Atong igahin ang mugbong mga tubag sa mga igsoon nga nagtuon sa atong pinulongan.”

Alang sa mga hamtong na, ang pagkadili-larinong mosulti sa bag-ong pinulongan sulod sa daghang bulan ug mga tuig pa gani makapaluya sa mental, emosyonal, ug sa espirituwal. “Dali ra kong  maluya tungod kay maglisod ko sa pagpakigsulti” nahinumdom si Janet, nga karon larino nang mosulti ug Kinatsila. Si Hiroko, nga nakakat-on ug Iningles, nahinumdom nga naghunahuna siya ug ingon niini: ‘Mas makasabot pa ug Iningles ang mga iro ug iring sa teritoryo kay kanako.’ Ug si Kathie nag-ingon: “Kaniadto daghan kog gitun-an sa Bibliya ug mga balik-duaw, apan sa dihang mibalhin ko sa Kinatsila nga kongregasyon, wala na bisag usa. Akong gibati nga wala koy nahimo.”

Sa maong kahimtang kinahanglang magmapositibo. Sa dihang nawad-an siyag kadasig, si Hiroko nangatarongan: “Kon nahimo kini sa uban, ako usab kining mahimo.” Si Kathie miingon: “Akong gihunahuna ang akong bana, nga miuswag pag-ayo ug daghag nahimo diha sa kongregasyon. Kini nakatabang kanako sa pagbuntog sa mga kalisdanan ug sa pagpadayon sa pag-uswag. Kinahanglan gihapon akong maghago, apan inanay akong nakakat-on sa pagsangyaw ug pagpanudlo, ug kana nakapalipay kanako.” Ang iyang bana, si Jeff, miingon: “Makapahigawad gayod kon dili nako masabtan ang tanang gisulti diha sa mga pahibalo ug sa mga miting sa mga ansiyano. Ako kinahanglang magmatinud-anon ug magmapainubsanon ug mangutana sa mga detalye, apan ang mga igsoon malipay sa pagpasabot kanako.”

Aron dili maluya sa espirituwal samtang nakigtambayayong sa usa ka kongregasyon nga nagsultig langyawng pinulongan, una sa tanan kinahanglang atimanon nimo ang imong espirituwal nga kahimsog. (Mateo 5:3) Si Kazuyuki, nga nag-alagad sulod na sa daghang tuig sa Portuges-ug-pinulongan nga kongregasyon nag-ingon: “Hinungdanon nga makakaon kita ug igong espirituwal nga pagkaon. Mao nga ingong pamilya, kami magtuon ug mangandam alang sa tigom diha sa among kaugalingong sinultihan ug sa pinulongang Portuges usab.” Ang uban motambong usahay sa mga tigom nga gipahigayon diha sa ilang kaugalingong pinulongan. Dugang pa, hinungdanon ang pagbaton ug igong pahulay.—Marcos 6:31.

Pagtimbangtimbang sa mga Sakripisyo nga Nalangkit

Kon naghunahuna kang mobalhin ngadto sa usa ka kongregasyon nga nagsultig langyawng pinulongan, kinahanglang timbangtimbangon nimo ang mga sakripisyo nga nalangkit. (Lucas 14:28) Niining bahina, ang labing hinungdanong butang nga angayng tagdon mao ang imong espirituwalidad ug ang imong relasyon kang Jehova. Iampo ang imong kahimtang. Hisgoti kini uban sa imong kapikas ug mga anak. Pangutan-a ang imong kaugalingon, ‘Anaa ba ako sa kahimtang ug aduna ba akoy lig-on nga espirituwalidad ug emosyon nga gikinahanglan sa pagtuon ug langyawng pinulongan nga mogugol ug taas nga panahon?’ Maalamon ang pagbuhat kon unsay labing maayo para sa imong espirituwalidad ug sa imong pamilya. Dako ang buluhaton ug dako ang kalipay nga imong matagamtam bisan asa ka mag-alagad ingong magmamantala sa Gingharian.

Alang niadtong makaalagad sa langyawg-pinulongan nga kongregasyon, dakong balos ang ilang madawat. “Usa kini sa labing malipayong kasinatian sa akong kinabuhi,” matod pa ni Barbara, kinsa uban sa iyang bana mibalhin sa Kinatsila nga kongregasyon. “Kami samag nagsugod na usab pagtuon sa kamatuoran. Ako mapasalamaton kaayo niini nga kahigayonan, ilabina kay dili kami makaalagad ingong mga misyonaryo sa laing nasod.”

Sa tibuok kalibotan, libolibo ka ordinaryong mga tawo nga lainlain ug pangedaron ang midawat sa hagit sa pagtuon ug langyawng pinulongan aron ipakaylap ang maayong balita. Kon ikaw usa kanila, padayong hupti ang putling motibo ug positibong tinamdan. Labaw sa tanan, salig kang Jehova nga panalanginan ang imong mga paningkamot.—2 Corinto 4:7.

[Hulagway sa panid 18]

Ang pagtambong ug mga klase bahin sa pinulongan nga may kuwalipikadong magtutudlo makapadali ug makapasayon sa pagkat-on

[Hulagway sa panid 20]

Ang imong espirituwal nga kahimsog dili angayng ipameligro samtang ikaw nagtuon ug usa ka langyawng pinulongan