Kinsa ang Matuod nga mga Kristohanon?

“ANG Kristiyanidad motunhay lamang sa dihang ang kahibalo bahin kang Jesu-Kristo gitudlo ug gipadapat sa mga tawo.” (On Being a Christian) Pinaagi nianang mga pulonga, ang Swekong teologo nga si Hans Küng nagpahayag ug usa ka tin-awng kamatuoran: Ang matuod nga Kristiyanidad motunhay lamang sa dihang ang sinserong mga indibiduwal nagpadapat sa mga pagtulon-an ni Jesus.

Nan, komosta kon ang mga indibiduwal o mga institusyon mag-angkon nga sila mga sumusunod ni Kristo, apan sa pagkatinuod, wala magbuhat kon unsay gitudlo ni Jesus? Si Jesus mismo ang nag-ingon nga daghan ang mag-angkon nga sila mga Kristohanon. Ilang ipunting ang ilang lainlaing kalihokan aron sa pagpamatuod nga sila nag-alagad kaniya, nga nag-ingon: “Wala ba kami managna sa imong ngalan, ug naghingilin sa mga demonyo sa  imong ngalan, ug naghimog daghang gamhanang mga buhat sa imong ngalan?” Apan, unsay reaksiyon ni Jesus? Ang iyang tatawng mga pulong nagpahayag sa iyang paghukom: “Wala gayod ako makaila kaninyo! Pahilayo gikan kanako, kamong mga mamumuhat sa kalapasan.”—Mateo 7:22, 23.

Pagkabug-at nga pasidaan alang sa “mga mamumuhat sa kalapasan” nga nag-angkon nga nagsunod kang Jesus! Tagda ang duha ka pangunang mga kinahanglanon nga kinahanglang tumanon sa mga tawo aron sila dawaton ni Jesus ingong matuod nga mga Kristohanon inay nga isalikway sila ingong mga mamumuhat sa kalapasan.

“Kon Kamo Adunay Gugma sa Inyong Taliwala”

Ang usa ka kinahanglanon nga gilatid ni Jesus mao kini: “Ako magahatag kaninyog bag-ong sugo, nga kamo maghigugmaay sa usag usa; ingon sa akong paghigugma kaninyo, nga kamo usab maghigugmaay sa usag usa. Pinaagi niini ang tanan makaila nga kamo akong mga tinun-an, kon kamo adunay gugma sa inyong taliwala.”—Juan 13:34, 35.

Si Jesus nagbaod sa iyang mga sumusunod nga magbaton ug tiunay nga gugma alang sa usag usa ug alang sa katawhan sa katibuk-an. Daghang Kristohanon ang nagtuman niana nga kinahanglanon sulod sa daghang siglo sukad nga si Jesus nagkinabuhi sa yuta. Apan komosta ang kadaghanan sa relihiyosong mga organisasyon nga nag-angkon nga naghawas kang Kristo? Ang ila bang kasaysayan nagpakita nga sila adunay gugma? Wala gayod. Hinunoa, sila ang nanguna sa daghang gubat ug panagbangi diin giula ang dugo sa mga inosente.—Pinadayag 18:24.

Tinuod gayod kana bisan hangtod sa modernong mga panahon. Ang mga nasod nga nag-angkong Kristohanon nanguna sa pagpamatay nga maoy timailhan sa duha ka gubat sa kalibotan sa ika-20ng siglo. Di pa dugay, ang mga membro sa mga relihiyong nag-angkong Kristohanon maoy nanguna sa kapintasan ug sa pagsulay sa pagpuo sa kaliwat nga nahitabo sa Rwanda sa 1994. Nagsulat ang kanhing Anglikanong arsobispo nga si Desmond Tutu nga “kadtong nahimong mabatokon sa usag usa sa mabangis nga paagi managsamag tinuohan. Ang kadaghanan nag-angkon nga sila mga Kristohanon.”

“Kon Magpabilin Kamo sa Akong Pulong”

Ang ikaduhang pangunang kinahanglanon alang sa matuod nga Kristiyanidad gipatin-aw ni Jesus sa dihang siya miingon: “Kon magpabilin kamo sa akong pulong, kamo tinuod gayod nga akong mga tinun-an, ug kamo mahibalo sa kamatuoran, ug ang kamatuoran magpagawas kaninyo.”—Juan 8:31, 32.

Gidahom ni Jesus nga ang iyang mga sumusunod magpabilin sa iyang pulong—sa ato pa, magsunod sa iyang mga pagtulon-an. Hinunoa, ang relihiyosong mga magtutudlo nga nag-angkong nagsunod kang Kristo “anam-anam nga misagop sa Gregong mga ideya,” nag-ingon ang teologo nga si Küng. Ang mga ideya sama sa pagkadili-mamatay sa kalag, pagtuo bahin sa purgatoryo, pagsimba kang Maria, ug ang klero nga matang—mga ideya nga naggikan sa paganong mga relihiyon ug mga pilosopo—maoy ilang gipuli sa mga pagtulon-an ni Jesus.—1 Corinto 1:19-21; 3:18-20.

Gitudlo usab sa relihiyosong mga magtutudlo ang dili-masabtang doktrina sa Trinidad, nga nagtuboy kang Jesus ngadto sa usa ka posisyon nga wala gayod niya angkona. Tungod nianang doktrinaha, ilang gipahilayo ang mga tawo gikan sa usa kinsa kanunayng gitumong ni Jesus nga angayng simbahon —ang iyang Amahan, si Jehova. (Mateo 5:16; 6:9; Juan 14:28; 20:17) “Sa dihang si Jesus maghisgot bahin sa Diyos,” nagsulat si Hans Küng, “ang iyang gipasabot mao ang Diyos kaniadto sa mga patriarka nga si Abraham, Isaac ug Jacob: si Yahweh . . . Alang kaniya kini mao ang usa ug bugtong nga Diyos.” Unsa ka daghang tawo karon ang maglangkit dayon sa Diyos ug Amahan ni Jesus kang Yahweh, o Jehova, nga maoy komon nga pagsulat sa iyang ngalan diha sa pinulongang Cebuano?

Ang mga lider sa relihiyon bug-os nga mitipas sa sugo ni Jesus nga magpabiling neyutral maylabot sa mga kalihokan sa politika. Sa adlaw ni Jesus, ang Galilea “mao ang sentro sa etnikong nasyonalismo,” nag-ingon ang magsusulat nga si Trevor Morrow. Daghang patriotiko nga mga Hudiyo ang miapil sa armadong pagpakigbugno aron maangkon ang kagawasan sa politika ug relihiyon. Giingnan ba ni Jesus ang iyang mga tinun-an nga moapil niana nga pagpakigbugno? Wala. Sa kasukwahi, iyang giingnan sila: ‘Kamo dili bahin sa kalibotan.’ (Juan 15:19; 17:14) Apan, imbes magpabiling neyutral, ang mga lider sa relihiyon nagmugnag “mabatokon ug politikanhon nga mga pagtulon-an sa iglesya” nga maoy paghubit niini sa Irlandes nga magsusulat nga si Hubert Butler. Siya nagsulat nga “ang politikanhong Kristiyanidad halos kanunayng hubiton usab nga militaryong Kristiyanidad ug sa dihang ang mga politiko ug mga lider sa relihiyon magkasabot, sagad mahitabo nga, ingong bugti sa pipila ka benepisyo, bendisyonan sa Simbahan ang kasundalohan sa estado.”

Ang Mini nga mga Magtutudlo Naglimod Kang Jesus

Nagpasidaan si apostol Pablo bahin sa pagbulag gikan sa matuod nga Kristiyanidad. Siya nag-ingon nga human sa iyang kamatayon, ang “malupigong mga lobo” gikan sa taliwala sa nag-angkong mga Kristohanon ‘magsultig tinuis nga mga butang aron ipahilayo ang mga tinun-an ug mosunod kanila.’ (Buhat 20:29, 30) Sila ‘magpahayag sa dayag nga sila nakaila sa Diyos,’ apan sa pagkatinuod sila ‘maglimod kaniya pinaagi sa ilang mga buhat.’ (Tito 1:16) Sa susama si apostol Pedro nagpasidaan nga ang mini nga mga magtutudlo “sa hilom magpasulod ug malaglagong mga sekta ug magalimod pa gani sa tag-iya nga nagpalit kanila.” Siya nag-ingon nga tungod sa ilang daotang panggawi, ang mga tawo magsultig ‘pasipala’ bahin sa “dalan sa kamatuoran.” (2 Pedro 2:1, 2) Ang paglimod kang Jesus niining paagiha, sumala pa sa Gregong eskolar nga si W. E. Vine, nagpasabot ug “paglimod sa Amahan ug sa Anak, pinaagi sa pagkahimong apostata ug pagpakaylap sa makadaot nga mga pagtulon-an.”

Unsa kahay reaksiyon ni Jesus kon ang nag-angkong mga tinun-an sa tinuyo mapakyas sa ‘pagpabilin sa iyang pulong’ ug sa pagkab-ot sa ubang mga kinahanglanon nga iyang gilatid? Siya nagpasidaan: “Si bisan kinsa nga dili moangkon kanako atubangan sa mga tawo, ako usab dili moangkon kaniya atubangan sa akong Amahan nga anaa sa mga langit.” (Mateo 10:33) Siyempre, dili ilimod ni Jesus ang usa nga nakahimog sayop bisan pa sa iyang kinasingkasing nga tinguha nga magmatinumanon. Pananglitan, bisan tuod si Jesus gilimod ni apostol Pedro sa makatulo ka higayon, si Pedro naghinulsol ug gipasaylo. (Mateo 26:69-75) Hinunoa, dili ilhon ni Jesus ang mga indibiduwal o mga institusyon nga sa tinuoray maoy mga lobo nga nagsul-ob ug sapot sa karnero—nagpakaaron-ingnon nga nagsunod kang Kristo apan sa tinuyo nagpadayon sa pagsalikway sa iyang mga pagtulon-an. Bahin nianang mini nga mga magtutudlo, si Jesus miingon: “Pinaagi sa ilang mga bunga kamo makaila niadtong mga tawhana.”—Mateo 7:15-20.

Namatay ang mga Apostoles, ug Mitungha ang Apostasya

Kanus-a nagsugod ang mini nga mga Kristohanon sa paglimod kang Kristo? Wala magdugay human sa kamatayon ni Jesus. Siya mismo ang nagpasidaan nga si Satanas nga Yawa kalit nga mosapaw pagpugas ug “mga bunglayon,” o mini nga mga Kristohanon, taliwala sa “maayong binhi,” o matuod nga mga Kristohanon, nga gitanom ni Jesus panahon sa iyang ministeryo. (Mateo 13:24, 25, 37-39) Nagpasidaan si apostol Pablo nga ang malimbongong mga magtutudlo aktibo na sa iyang adlaw. Siya nag-ingon nga ang pangunang hinungdan sa ilang pagtipas gikan sa mga pagtulon-an ni Jesu-Kristo maoy tungod kay sila walay tinuod nga “gugma sa kamatuoran.”—2 Tesalonica 2:10.

Napugngan ang pagkaylap sa apostasya sa dihang buhi pa ang mga apostoles ni Jesu-Kristo. Apan, human sa kamatayon sa mga apostoles ang mga lider sa relihiyon nga naggamit sa “tanang gamhanang mga buhat ug bakak nga mga ilhanan ug . . . sa tanang dili-matarong nga panglimbong” aron sa pagpahisalaag  sa daghan nagpahilayo sa daghan pang tawo gikan sa kamatuoran nga gitudlo ni Jesus ug sa iyang mga apostoles. (2 Tesalonica 2:3, 6-12) Nagsulat ang pilosopong Ingles nga si Bertrand Russel nga sa ngadtongadto ang orihinal nga Kristohanong kongregasyon nahimong usa ka relihiyosong organisasyon nga “posibleng makapakurat kang Jesus, ug bisan kang Pablo.”

Napasig-uli ang Matuod nga Kristiyanidad

Ang talaan tin-aw. Sukad sa kamatayon sa mga apostoles, ang mga pagtulon-an ni Kristo wala gayod mabanaag diha sa kadaghanang butang nga gibuhat sa ngalan sa Kristiyanidad. Apan, wala kana magpasabot nga napakyas si Jesus sa pagtuman sa iyang saad nga magauban sa iyang mga sumusunod “sa tanang adlaw hangtod sa kataposan sa sistema sa mga butang.” (Mateo 28:20) Makaseguro kita nga sukad nga gisulti niya kanang mga pulonga, diha nay matinumanong mga indibiduwal nga taliwala kanila “ang kahibalo bahin kang Jesu-Kristo gitudlo ug gipadapat.” Gituman gayod ni Jesu-Kristo ang iyang saad nga paluyohan ang maong mga indibiduwal tungod kay sila naningkamot sa pagpakita sa gugma nga maoy ilhanan sa matuod nga mga Kristohanon ug sa pagpabiling maunongon sa mga kamatuoran nga iyang gitudlo.

Dugang pa, si Jesus nagsaad nga sa kataposang mga adlaw niining sistema sa mga butang, iyang tigomon ang iyang matinumanong mga tinun-an ngadto sa daling mailhan nga Kristohanong kongregasyon nga iyang gamiton sa pagtuman sa iyang kabubut-on. (Mateo 24:14, 45-47) Sa pagkakaron siya naggamit niana nga kongregasyon sa pagtigom sa “usa ka dakong panon” sa mga lalaki, babaye, ug mga bata “gikan sa tanang kanasoran ug mga tribo ug katawhan ug mga pinulongan,” ug siya naghiusa kanila ubos sa iyang pagkaulo ngadto sa “usa ka panon” ilalom sa “usa ka magbalantay.”—Pinadayag 7:9, 14-17; Juan 10:16; Efeso 4:11-16.

Busa, biya na gikan sa bisan unsang institusyon o organisasyon nga nagpasipala sa ngalan ni Kristo ug nagdaot sa dungog sa Kristiyanidad sulod sa milabayng duha ka libo ka tuig. Kay kon dili, sumala sa gisulti ni Jesu-Kristo kang apostol Juan, ikaw “makadawat ug bahin sa [ilang] mga hampak” sa dihang ang Diyos magpahamtang sa iyang paghukom kanila sa dili na madugay. (Pinadayag 1:1; 18:4, 5) Magmadeterminado nga malakip niadtong gihisgotan ni manalagnang Miqueas sa dihang siya miingon nga sa “kaulahiang bahin sa mga adlaw,” ang matuod nga mga magsisimba—mga sumusunod sa matuod nga Kristiyanidad—mamati sa mga instruksiyon sa Diyos ug “magalakaw sa iyang mga alagianan” sa napasig-uling putling pagsimba. (Miqueas 4:1-4) Ang mga magpapatik niining magasina malipay sa pagtabang kanimo nga mailhan kanang matuod nga mga magsisimba.

[Mga hulagway sa panid 5]

Nganong ang matuod nga mga Kristohanon dili makigbahin sa gubat?

[Credit Lines]

Soldiers, left: U.S. National Archives photo; flamethrower, right: U.S. Army Photo

[Mga hulagway sa panid 7]

Ang ‘magbaton ug gugma sa inyong taliwala’ ug ‘magpabilin sa akong pulong’ maoy pangunang mga kinahanglanon nga gilatid ni Jesus alang sa matuod nga mga Kristohanon