“Pakigbugno sa Maayong Pakigbugno sa Pagtuo”

MAHANDURAW mo ba si bisan kinsang sundalo panahon sa gubat nga maguol kon mandoan: “Makapauli ka sa inyo ug makagugol ug pipila ka panahon uban sa imong asawa ug pamilya”?

Si Urias nga Hitihanon, nga usa ka sundalo sa panahon ni Haring David sa Israel, nakadawat sa maong mando. Gipatawag siya sa hari mismo ug giawhag nga mopauli. Apan, midumili si Urias sa pagpauli sa iyang balay. Sa dihang gipangutana bahin sa iyang lahi nga panggawi, si Urias mitubag nga ang arka sa pakigsaad, nga naghawas sa presensiya sa Diyos, ug ang kasundalohan sa Israel anaa pa sa natad panggubatan. “Ug ako,” siya nangutana, “ako mopauli ba sa akong balay aron sa pagkaon ug sa pag-inom ug sa pagdulog sa akong asawa?” Alang kang Urias, dili kadto makataronganon nianang malisod nga panahon.—2 Samuel 11:8-11.

Ang panggawi ni Urias nagpatunghag hinungdanong mga pangutana, tungod kay kita usab nagkinabuhi sa panahon sa gubat. Usa ka gubat ang gisangka karon nga lahi sa bisan unsang gubat nga gisangka sa mga nasod sa kalibotan. Kining gubata maghimo sa duha ka gubat sa kalibotan nga morag dili ra hinungdanon kon itandi, ug ikaw nalangkit niining gubata. Kini peligroso kaayo ug ang kaaway makalilisang. Niining gubata, walay pusil nga pabuthon, walay bomba nga ihulog, apan gikinahanglan gihapon ang gamhanang mga estratehiya sa gubat.

Sa dili ka pa moapil niining gubata, kinahanglan kang masayod kon kini ba husto sa moral nga paagi ug kon unsay imong gipakig-awayan. Takos  ba sa sakripisyo ang maong gubat? Ang katuyoan niining maong talagsaon nga gubat gipatin-aw ni apostol Pablo diha sa iyang sulat ngadto kang Timoteo: “Pakigbugno sa maayong pakigbugno sa pagtuo.” Oo, niining gubata kinahanglan mong depensahan, dili ang usa ka kuta, kondili ang “pagtuo”—ang kabug-osan sa Kristohanong kamatuoran sumala sa gibutyag diha sa Bibliya. Dayag nga bug-os mong tuohan ang maong “pagtuo” aron makapakig-away alang niana ug magmadaogon.—1 Timoteo 6:12.

Ang usa ka maalamong manggugubat maningkamot sa pag-ila sa iyang kaaway. Niining gubata, ang kaaway aduna nay hataas nga kasinatian sa estratehiya sa gubat, uban sa daghang kahinguhaan ug mga hinagiban nga iyang magamit. Siya usab labaw-tawhanon. Siya daotan, mapintas, ug walay-prinsipyo; siya mao si Satanas. (1 Pedro 5:8) Ang pisikal nga mga hinagiban maingon man ang lipatlipat ug panglingla sa tawo dili magpulos batok ning maong kaaway. (2 Corinto 10:4) Unsay imong gamiton aron makahimo ka sa pagpakiggubat?

Ang pangunang hinagiban mao “ang espada sa espiritu, nga mao, ang pulong sa Diyos.” (Efeso 6:17) Gipakita ni apostol Pablo kon unsa kini ka epektibo: “Ang pulong sa Diyos buhi ug gamhanan ug mahait pa kay sa espada nga duhay-sulab ug modulot bisan hangtod sa pagbahin sa kalag ug sa espiritu, ug sa mga lutahan ug sa ilang uyok, ug makatugkad sa mga hunahuna ug mga tuyo sa kasingkasing.” (Hebreohanon 4:11, 12) Ang usa ka hinagiban nga hait ug tukma kaayo nga kini makalagbas ngadto sa kinasuloran sa hunahuna ug mga motibo sa usa ka tawo kinahanglang gamiton gayod uban ang kahanas ug pag-amping.

Lagmit nahibalo ka nga nahuptan tingali sa kasundalohan ang kinabag-ohang mga hinagiban, apan ang maong mga hinagiban walay pulos kon ang mga sundalo kulang sa kahanas sa paggamit niana. Nagkinahanglan ka usab ug instruksiyon sa paggamit sa imong espada sa epektibong paagi. Makalilipay nga mabatonan ang pagbansay gikan sa labing eksperyensiyadong mga manggugubat. Si Jesus nagtawag niining maong eksperyensiyado nga mga manggugubat nga nagabansay sa uban ingong “matinumanon ug maalamong ulipon,” nga gipiyalan sa responsabilidad sa pagtaganag tukma-sa-panahong espirituwal nga pagkaon, o instruksiyon, alang sa iyang mga sumusunod. (Mateo 24:45) Mailhan nimo kining maong pundok sa mga ulipon pinaagi sa pagsusi sa makugihong paningkamot nga gihimo niini sa pagpanudlo ug paghatag ug nunot-sa-panahong mga pasidaan labot sa mga taktika sa kaaway. Ang ebidensiya nagpunting ngadto sa dinihogan-sa-espiritu nga mga membro sa Kristohanong kongregasyon sa mga Saksi ni Jehova.—Pinadayag 14:1.

Kining maong pundok sa mga ulipon wala lamang maghatag ug instruksiyon. Gipakita niini ang espiritu ni apostol Pablo, kinsa misulat ngadto sa kongregasyon sa Tesalonica: “Kami nahimong malumo sa inyong taliwala, sama sa usa ka nagpasusong inahan nga nagpangga sa iyang kaugalingong mga anak. Busa, kay may malumong pagmahal kaninyo, kami nahimuot nga ipaambit kaninyo, dili lamang ang maayong balita sa Diyos, kondili usab ang among kaugalingong mga kalag, tungod kay kamo nahimo man nga among hinigugma.” (1 Tesalonica 2:7, 8) Responsibilidad sa matag usa ka Kristohanong sundalo ang pagpahimulos sa mahigugmaong pagbansay nga gitagana.

Ang Kompletong Armadura

Ang kompletong mahulagwayon nga armadura gitagana alang sa imong proteksiyon. Makaplagan nimo ang listahan ning maong armadura diha sa Efeso 6:13-18. Ang usa ka mabinantayong sundalo dili mangarisgar pagsulong kon ang usa ka bahin sa iyang espirituwal nga armadura wala diha o kinahanglang ayohon.

Gikinahanglan sa usa ka Kristohanon ang tanan niyang nagapanalipod nga armadura, apan ang dakong taming sa pagtuo maoy ilabinang hinungdanon. Mao kanay hinungdan kon nganong si Pablo misulat: “Labaw sa tanang butang, dad-a ang dakong taming sa pagtuo, nga pinaagi niini kamo makapalong sa tanang nagdilaab nga mga udyong sa daotan.”—Efeso 6:16.

Ang dakong taming nga makasalipod sa tibuok lawas, naghawas sa kalidad sa pagtuo. Kinahanglang aduna kay lig-ong pagtuo sa pagtultol ni Jehova ug motuo nga walay pagduhaduha nga ang tanan niyang mga saad mamatuman. Angay nimong  bation nga morag nangatuman na kining mga saara. Ayaw gayod pagduhaduha nga ang tibuok sistema sa kalibotan ni Satanas malaglag sa dili madugay, nga ang yuta mahimong paraiso, ug nga ang katawhan nga maunongon sa Diyos ipasig-uli ngadto sa kahingpitan.—Isaias 33:24; 35:1, 2; Pinadayag 19:17-21.

Apan, sa talagsaong pakigbugno nga ginasangka karon, duna ka pay gikinahanglan—usa ka higala. Sa panahon sa gubat, ang suod nga panaghigalaay maugmad samtang ang mga isigkamanggugubat magdasig ug manalipod sa usag usa, usahay magluwas pa gani sa usag usa gikan sa kamatayon. Bisan tuod hinungdanon ang mga kauban, aron makalingkawas niining bugnoa, kinahanglan kang makighigala kang Jehova mismo. Mao kanay hinungdan nga gitapos ni Pablo ang iyang listahan sa naglangkob sa armadura niining mga pulonga: “Samtang uban ang tanang matang sa pag-ampo ug pangamuyo magpadayon kamo sa pag-ampo sa tanang higayon pinaagi sa espiritu.”—Efeso 6:18.

Gusto natong mahiuban sa usa ka suod nga higala. Maningkamot kita sa pagpakig-uban kaniya. Pinaagi sa regular nga pagpakig-estorya kang Jehova diha sa pag-ampo, siya mahimong tinuod kanato, usa ka kasaligang higala. Ang tinun-an nga si Santiago nagdasig kanato: “Duol sa Diyos, ug siya moduol kaninyo.”—Santiago 4:8.

Mga Taktika sa Kaaway

Ang pagpakigbugno niining kalibotana mahisama usahay sa paglakaw diha sa yuta nga gilubngan ug mga bomba. Ang pag-atake mahimong maggikan sa tanang direksiyon, ug ang kaaway mosulay sa pag-atake kanimo sa dihang ikaw wala makabantay. Apan, magmasaligon nga si Jehova magtagana sa tanang panalipod nga imong gikinahanglan.—1 Corinto 10:13.

Ang kaaway mahimong moatake pinaagi sa pagsaway sa mga kamatuoran sa Bibliya nga maoy patukoranan sa imong pagtuo. Mahimong gamiton sa mga apostata ang madanihong mga pulong, pag-ulog-ulog, ug tinuis nga pangatarongan aron sa pagpukan kanimo. Apan ang mga apostata wala maghunahuna sa imong kaayohan. Ang Proverbio 11:9 nag-ingon: “Pinaagi sa iyang baba ang usa ka apostata magalaglag sa iyang isigkatawo, apan pinaagi sa kahibalo ang mga matarong maluwas.”

Sayop gayod ang paghunahuna nga kinahanglan mong paminawon ang mga apostata o basahon ang ilang mga sinulat aron ipanghimakak ang ilang mga argumento. Ang ilang tinuis, makahilo nga mga pangatarongan makadaot sa espirituwalidad ug makahugaw sa imong pagtuo samag gangrena nga kusog nga mokuyanap. (2 Timoteo 2:16, 17) Hinunoa, sundoga ang reaksiyon sa Diyos batok sa mga apostata. Si Job miingon bahin kang Jehova: “Sa atubangan niya walay mosulod nga apostata.”—Job 13:16.

Mahimong sulayan sa kaaway ang laing taktika, usa nga medyo nagmalamposon. Kon ang usa ka sundalong nagmartsa mahaylo sa pagbulag sa pundok aron sa pagpangagpas sa mahilayon, imoral nga kagawian, kini makapahinabog kagubot.

Ang kalingawan sa kalibotan, sama sa imoral nga mga pelikula ug mga salida sa telebisyon ug walay-kontrol nga musika, maoy epektibong paon. Ang uban moingon nga sila makatan-aw ug imoral nga mga esena o makabasa ug imoral nga mga basahon nga dili ra maimpluwensiyahan. Apan ang usa ka tawo nga kanunayng nagtan-aw ug madayganon sa sekso nga mga pelikula prangkang miangkon: “Dili nimo malimtan ang maong mga esena, kon mas hunahunaon nimo kana mas ganahan kang mobuhat  kon unsay imong nakita . . . Ang maong mga salida makapahunahuna nimo nga aduna ka gayoy butang nga nasayloan.” Takos bang ipameligro ang kaugalingon nga masamdan pinaagi niining malipotong pag-atake?

Ang laing paagi sa pag-atake sa kaaway mao ang panghaylo sa materyalismo. Ang kapeligrohan mahimong lisod ilhon tungod kay kitang tanan adunay materyal nga mga panginahanglan. Nagkinahanglan kitag balay, pagkaon, ug besti, ug dili sayop ang pagbaton ug maanindot nga mga butang. Ang kapeligrohan nahiluna sa panglantaw sa usa. Ang salapi mahimong mas hinungdanon na kay sa espirituwal nga mga butang. Basin mahimo kitang mga mahigugmaon sa salapi. Angay natong pahinumdoman ang atong kaugalingon sa limitasyon sa bahandi. Kini lumalabay lamang, samtang ang espirituwal nga mga bahandi dumalayon.—Mateo 6:19, 20.

Kon kulang ug kadasig ang usa ka sundalo, ang mga kahigayonan sa pagdaog mous-os. “Naluya ka ba sa adlaw sa kasakit? Ang imong kusog diyutay ra.” (Proverbio 24:10) Ang kaluya sa buot maoy usa ka hinagiban nga epektibong gigamit ni Satanas. Ang pagsul-ob ‘ingong helmet sa paglaom sa kaluwasan’ motabang kanimo sa pagbuntog sa kaluya sa buot. (1 Tesalonica 5:8) Paningkamoting mahuptan ang imong paglaom nga sama ka lig-on sa iya ni Abraham. Sa dihang gihangyo sa paghalad sa iyang bugtong anak nga si Isaac, si Abraham wala mag-ukon-ukon. Siya nagtuo nga tumanon sa Diyos ang Iyang saad nga panalanginan ang tanang kanasoran pinaagi sa iyang binhi ug nga mabanhaw sa Diyos si Isaac gikan sa mga patay aron tumanon ang maong saad.—Hebreohanon 11:17-19.

Ayaw Paghunong sa Pagpakigbugno

Ang uban nga maisogong nakigbugno sulod sa dugay nang panahon mahimong gikapoyan na ug busa wala na makigbugno uban sa samang pagkamabinantayon. Ang panig-ingnan ni Urias, nga gihisgotan sa sinugdanan niining artikuloha, makatabang sa tanang miapil niining bugnoa sa paghupot ug hustong panglantaw. Daghan sa atong Kristohanong mga manggugubat ang kinahanglang molahutay sa kawalad-on, naladlad sa kapeligrohan, o nag-antos sa katugnaw ug kagutom. Sama kang Urias, dili maayong hunahunaon nato ang tanang kahamugaway nga ato tingaling gipahimuslan karon o magpadala sa tinguha sa pagkinabuhi ug sayon nga kinabuhi. Gusto natong magpabilin uban sa tibuok-kalibotang kasundalohan sa maunongong mga manggugubat ni Jehova ug magpadayon sa pagpakigbugno hangtod atong matagamtam ang kahibulongang mga panalangin nga giandam alang kanato.—Hebreohanon 10:32-34.

Peligroso nga kita mohunong sa pagbantay, tingali maghunahuna nga ang pangataposang pag-atake dugay pang mahitabo. Ang pananglitan ni Haring David nagpasiugda sa maong kapeligrohan. Tungod sa usa ka hinungdan wala siya mahiuban sa iyang kasundalohan didto sa panggubatan. Tungod niana, si David nakahimog grabeng sala nga nakapahinabo kaniyag hilabihang kaguol  ug pag-antos sa nahibiling bahin sa iyang kinabuhi.—2 Samuel 12:10-14.

Maayo bang moapil niining bugnoa, mosagubang sa kalisdanan sa gubat, moantos sa pagbiaybiay, ug isalikway ang kuwestiyonableng mga kalipayan sa kalibotan? Kadtong malamposong nakapadayon sa pagpakigbugno mouyon nga ang ikatanyag sa kalibotan morag madanihon, samag naggilakgilak nga butang, apan kon imong susihon pag-ayo, kini walay bili. (Filipos 3:8) Dugang pa, ang maong mga kalipayan subsob nga makahatag lamang ug kasakit ug kahigawad.

Ang mga Kristohanon nga anaa niining espirituwal nga bugno nagpahimulos ug suod nga panag-ubanay sa tinuod nga mga higala, usa ka hinlong konsensiya, ug usa ka kahibulongang paglaom. Ang dinihogan-sa-espiritung mga Kristohanon naglaom sa imortal nga kinabuhi sa langit uban ni Kristo Jesus. (1 Corinto 15:54) Ang kadaghanan sa Kristohanong mga manggugubat naglaom sa hingpit nga kinabuhi diha sa usa ka yutan-ong paraiso. Dayag nga ang maong mga ganti takos sa bisan unsang pagsakripisyo. Ug lahi sa kalibotanong mga gubat, seguradong magmadaogon kita niining gubata basta magpabilin kitang maunongon. (Hebreohanon 11:1) Apan, kining kalibotan nga ilalom sa pagkontrolar ni Satanas seguradong malaglag sa bug-os.—2 Pedro 3:10.

Samtang magpadayon ka niining bugnoa, hinumdomi ang mga pulong ni Jesus: “Magmaisogon! Gidaog ko na ang kalibotan.” (Juan 16:33) Siya nagmadaogon pinaagi sa pagpabiling nagtukaw ug paghupot sa integridad ilalom sa pagsulay. Kita makahimo usab niana.

[Blurb sa panid 27]

Walay pusil nga pabuthon, walay bomba nga ihulog, apan gikinahanglan gihapon ang gamhanang mga estratehiya sa gubat

[Blurb sa panid 30]

Seguradong magmadaogon kita niining gubata basta kita magmaunongon

[Hulagway sa panid 26]

Ang helmet sa kaluwasan motabang kanato sa pagsagubang sa pagkaluya sa buot

Gamita ang dakong taming sa pagtuo aron sa pagsagang sa “nagdilaab nga mga udyong” ni Satanas

[Hulagway sa panid 28]

“Duol sa Diyos, ug siya moduol kaninyo”

[Hulagway sa panid 29]

Angay kitang motuo nga matuman ang mga saad sa Diyos