Espirituwalidad ug ang Imong Kaayohan

LAGMIT migugol kag dakong panahon sa pag-atiman sa imong pisikal nga kahimsog. Matag adlaw, mahimong mogugol kag walo ka oras sa pagkatulog, daghang oras sa pagluto ug sa pagkaon niana, ug walo ka oras o kapin pa sa pagtrabaho aron ibayad sa imong abang sa balay ug sa imong kalan-on. Kon ikaw masakit, lagmit mogugol kag panahon ug salapi sa pagpadoktor o sa pag-andam ug usa ka naandang tambal. Ikaw manghinlo sa balay, maligo, ug tingali regular nga mag-ehersisyo, nga tanan gihimo alang sa imong maayong panglawas.

Apan, ang paghupot ug maayong panglawas naglakip ug labaw pa kay sa pag-atiman lamang sa imong pisikal nga mga panginahanglan. Aduna pay laing butang nga nagdulag hinungdanong papel alang sa imong kaayohan. Ang medikal nga panukiduki nagpakita nga ang imong pisikal nga kahimsog nalangkit pag-ayo sa imong espirituwalidad.

Direktang Kalangkitan

“Ang kadaghanang orihinal nga mga artikulo nga nanukiduki bahin niining ulohana nakakaplag ug direktang kalangkitan tali sa aktibong espirituwalidad ug sa mas maayong panglawas,” matod ni Propesor Hedley G. Peach sa University of Melbourne, Australia. Nagkomento bahin niining maong mga kaplag, ang The Medical Journal of Australia (MJA) nag-ingon: “Ang pagkarelihiyoso nalangkit usab sa . . . pag-us-os sa presyon sa dugo, kolesterol . . . ug bisan pag-us-os sa kanser sa tinai.”

 Sa susama, sa Tinipong Bansa, nakaplagan sa usa ka pagtuon sa tuig 2002 sa 6,545 ka tawo nga gidumala sa University of California (UC), Berkeley, nga “ang mga tawong tigtambongan sa relihiyosong mga serbisyo kas-a sa usa ka semana mas taas ug kinabuhi kon itandi niadtong talagsa ra o dili gayod motambong.” Si Doug Oman, pangunang awtor sa pagtuon ug tigpakigpulong sa UC Berkeley’s School of Public Health, miingon: “Among nakaplagan kining maong kalainan bisan human namo konsideraha ang mga kahimtang sama sa relasyon diha sa katilingban ug sa mga batasan sa panglawas, lakip ang panigarilyo ug pag-ehersisyo.”

Sa pag-ila sa ubang mga kaayohan sa mga tawong dunay espirituwal nga panglantaw sa kinabuhi, ang MJA nag-ingon: “Nakaplagan sa mga pagtuon sa Australia nga ang mga tawong relihiyoso dunay mas lig-ong panagtiayon, menos nga paggamit sa alkoholikong mga ilimnon ug gidili nga droga, talagsa ra kaayong maghunahuna sa paghikog, menos nga kabalaka ug depresyon, ug manggihatagon.” Dugang pa, ang BMJ (kanhi nailhang The British Medical Journal) nagtaho: “Ang mga tawo nga nag-angkong relihiyoso morag mas dali ug mas bug-os nga maulian sa ilang kaguol human sa kamatayon sa usa ka suod nga tawo kay sa mga tawong dili relihiyoso.”

Adunay nagkalainlaing ideya kon unsa gayod ang tinuod nga espirituwalidad. Apan, ang imong kahimtang sa espirituwal makaapektar sa imong pisikal ug mental nga kahimsog. Kini nga ebidensiya nahiuyon sa mga pulong nga gibungat ni Jesu-Kristo duolan na sa 2,000 ka tuig kanhi. Siya miingon: “Malipayon kadtong mahunahunaon sa ilang espirituwal nga panginahanglan.” (Mateo 5:3) Sanglit ang imong kahimsog ug kalipay apektado sa imong kahimtang sa espirituwal, makataronganon ang pagpangutana: ‘Asa man nako makaplagan ang kasaligang espirituwal nga giya? Ug unsay nalangkit sa pagkahimong usa ka espirituwal nga tawo?’

 [Picture Credit Lines sa panid 2]

Photo Credits: Page 18: Mao Tse-tung and Golda Meir: Hulton/Archive by Getty Images; Francis Ferdinand: From the book The War of the Nations; Hirohito, Lindbergh, & Einstein: U.S. National Archives photo; Stalin: U.S. Army photo; Roosevelt: Franklin D. Roosevelt Library; Churchill: The Trustees of the Imperial War Museum (MH 26392)