Mga Magmamantala sa Gingharian Nagtaho

Tabang sa Pagdepensa sa Pagkasagrado sa Dugo

SA TIBUOK yuta ang mga alagad ni Jehova nagmaunongon sa Diyos bahin sa pagkasagrado sa dugo. (Buhat 15:28, 29) Ang tabang alang sa Kristohanong kapunongan gitagana sa matinumanon ug maalamong ulipon nga matang. (Mateo 24:45-47) Atong susihon kon unsay gisangpotan dinhi sa Pilipinas.

Ang sangang buhatan sa Pilipinas nagtaho: “Niadtong 1990 kami gipahibalo nga ang mga hawas gikan sa Bethel sa Brooklyn maghimog seminar dinhi sa Pilipinas. Ang mga igsoon gidapit gikan sa daghang sangang buhatan sa Asia, lakip ang Korea, Taiwan, ug Hong Kong. Ang katuyoan mao ang pagtabang nga matukod ang Hospital Information Services diha sa ilang mga sangang buhatan ug sa paghikay usab ug mga Hospital Liaison Committee. Sa Pilipinas ang mga komite unang gitukod diha sa upat ka dagkong siyudad.” Ang mga komite naningkamot sa pagpangitag mga doktor nga andam motambayayong kanato bahin sa Kristohanong baroganan maylabot sa dugo. Motabang usab sila sa mga igsoon sa dihang motungha ang mga suliran nga maglangkit sa dugo.

Si Remegio gipili sa pag-alagad diha sa Hospital Liaison Committee sa Baguio. Sa paglabay sa panahon, ang mga doktor misugod sa pagkamatikod sa mga kalihokan sa maong komite. Nahinumdoman ni Remegio ang usa ka okasyon sa dihang ang daghang doktor nakigtagbo sa Hospital Liaison Committee nga nagpakisayod kon unsaon pagtambal ang mga pasyente nga Saksi nga modumili ug dugo. Si Remegio miingon: “Nagsugod pagpangutana ang mga doktor, apan wala dayon ako makatubag kay teknikal kaayo ang ilang mga pangutana.” Nag-ampo siya kang Jehova sa tabang aron sa pagsagubang sa maong suliran. Si Remegio nagpadayon: “Human sa matag pangutana, ang ubang mga doktor miisa sa ilang mga kamot ug misugilon kon giunsa nila pagsagubang ang susamang kahimtang.” Nalipay si Remegio sa maong tabang, ilabina kay ang maong pangutanag tubag gidangtag duha ka oras.

Sa pagkakaron aduna nay 21 ka komite sa tibuok nasod, nga may 77 ka igsoong lalaki nga nag-alagad diha niana. Si Danilo, nga usa ka Saksi nga doktor, miingon: “Nasabtan sa mga doktor nga ang mga pasyente nga Saksi gipaluyohan sa usa ka organisasyon nga mahigugmaong nag-atiman kanila.” Dihay doktor nga sa sinugdan nagpanuko sa pag-opera sa usa ka igsoong lalaki nga dili magpaabonog dugo. Bisan pa niana, lig-on nga mibarog ang igsoon. Ang pag-opera gihimo ug nagmalamposon. Ang Hospital Information Services nagtaho: “Ang doktor natingala pag-ayo sa pagkaayo sa igsoon. Siya miingon: ‘Pinasukad sa nahitabo dinhi, kon kamo dunay mga membro nga kinahanglang operahan ug sama niini nga walay dugo, malipay ako sa pagbuhat niana.’”