“Duol sa Diyos, ug Siya Moduol Kaninyo”

Kaniadto ug Karon—Ang Iyang Kinabuhi Nausab sa Bug-os

PAGKAWAY-NADA ug pagkaway-kahulogan sa kinabuhi ni Matsepang! Siya maoy usa ka batang babaye kaniadto sa Lesotho, usa ka nasod diha sa sentro sa Habagatang Aprika. Si Matsepang gimatuto nga usa ka Katoliko. Apan, imbes matabangan nga masuod sa Diyos, sa daghang tuig giabusohan siya sa mga madre nga naghiphip kaniya aron mahaylo siya sa paghimog imoral nga mga buhat.

Tungod niini, si Matsepang nahigawad sa relihiyon ug dili makatuo nga dunay mahigugmaong Maglalalang nga tinuod nga nahingawa sa iyang tawhanong mga linalang. Tungod sa pagpasagad ug pag-abuso nga iyang naagoman, si Matsepang may lalom nga emosyonal nga mga samad ug iyang gibati nga wala gayod siyay pulos. Siya midako nga mapintas ug agresibo kaayo. Miresulta kini sa kriminal nga panggawi.

Sa ngadtongadto si Matsepang nahimong membro sa usa ka gang nga nanulis ug mga pasahero sa tren. Siya gidakop ug gisentensiyahan nga mabilanggo sa Habagatang Aprika. Sa ulahi, gihinginlan siya ngadto sa iyang yutang natawhan, sa Lesotho, diin siya nagpadayon sa paghimog krimen, paghuboghubog, kapintasan, ug imoralidad.

Sa makaguol kaayo nga kahimtang sa iyang kinabuhi, si Matsepang kinasingkasing gayod nga miampo alang sa tabang sa Diyos. Siya misaad, “Diyos ko, kon mabuhi ako, himoon ko ang tanan sa pag-alagad kanimo.”

Wala madugay, giduol si Matsepang sa mga misyonaryo nga mga Saksi ni Jehova. Mitanyag sila sa pagtuon sa Bibliya uban kaniya. Sa iyang pagtuon, iyang nasayran nga ang Diyos diay may pagtagad ug kahingawa. Sa pagkatinuod, iyang nasabtan nga si Satanas, “ang amahan sa bakak,” naggamit ug malansison ug malimbongon nga mga taktika aron palamboon ang pagbati diha sa pipila nga sila walay-pulos ug patuohon sila nga dili gayod sila mahimong isipon ni Jehova nga hiligugmaon.—Juan 8:44; Efeso 6:11.

Sa kasukwahi, pagkadako sa kahupayang gibati ni Matsepang sa dihang iyang nahibaloan nga kita mahimong makabaton ug pagtahod sa kaugalingon kon atong hinulsolan ang atong mga sala kaniadto, mangayog pasaylo sa Diyos, ug maningkamot sa pagpahimuot kaniya! Natabangan siya nga masabtan nga “ang Diyos mas labaw kay sa atong mga kasingkasing” ug naglantaw kanato sa paagi nga tingali lahi gayod sa atong paagi sa paglantaw sa atong kaugalingon.—1 Juan 3:19, 20.

Nalipay kaayo si Matsepang sa pagbasa niining mga pulonga ni salmistang David: “Si Jehova haduol niadtong mga dugmok ug kasingkasing; ug siya magaluwas niadtong mga nahugno sa espiritu.” (Salmo 34:18) Ingong usa niadtong “nahugno sa espiritu,” iyang naamgohan nga dili talikdan ni Jehova ang iyang mga alagad, bisan ug ang pipila kanila mahimong masulub-on o mobating dili hinungdanon. Nakapalipay sa iyang kasingkasing  ang pagkahibalo nga ang Diyos may kahingawa sa tanan niyang karnero ug nagsapnay kanila sa malisod nga mga panahon. (Salmo 55:22; 1 Pedro 5:6, 7) Natandog siya ilabina niining mga pulonga: “Duol sa Diyos, ug siya moduol kaninyo.”—Santiago 4:8.

Wala madugay, ang gahom sa Pulong sa Diyos, ang Bibliya, nadayag diha sa kinabuhi ni Matsepang. Iyang gisugdan ang pagtambong kanunay sa Kristohanong mga tigom ug gibiyaan ang iyang di-Kasulatanhong mga buhat. Ang resulta? Wala na niya batia nga siya dili takos sa gugma ug pabor sa Diyos. Sukad sa iyang pagpabawtismo ingong usa sa mga Saksi ni Jehova, siya naggugol ug libolibong oras diha sa Kristohanong ministeryo ingong magwawali sa maayong balita sa Gingharian. Bisan pa sa iyang emosyonal nga mga samad tungod sa iyang kaagi, si Matsepang nakaangkon karon ug malipayon ug makahuloganon nga kinabuhi. Pagkatalagsaong pasundayag sa gahom sa Bibliya sa pagpauswag sa kinabuhi!—Hebreohanon 4:12.

[Blurb sa panid 9]

“Diyos ko, kon mabuhi ako, himoon ko ang tanan sa pag-alagad kanimo”

[Kahon sa panid 9]

Epektibong mga Prinsipyo sa Bibliya

Ang mga prinsipyo sa Bibliya nga nakahupay sa mga biktima sa pag-abuso naglakip sa mosunod:

“Sa dihang ang makapatugaw nga mga hunahuna midaghan sa akong kahiladman, ang imong [Diyos] mga paghupay mihapohap sa akong kalag.” (Salmo 94:19) Ang “mga paghupay” ni Jehova nga makaplagan diha sa iyang Pulong maoy tuboran sa dakong kahupayan. Ang paghunahuna bahin niini panahon sa pagpamalandong ug pag-ampo makatabang sa pagsanta sa makapatugaw nga mga hunahuna ug makapalig-on sa atong pagsalig sa Diyos ingong usa ka masinabotong Higala.

“Siya [Jehova] nagaayo sa mga may gun-ob nga kasingkasing, ug nagabugkos sa ilang masakit nga mga bahin.” (Salmo 147:3) Kon kita mapasalamaton sa kaluoy ni Jehova ug sa iyang tagana sa pagtabon sa atong mga sala pinaagi sa halad lukat ni Jesus, kita makaduol nga masaligon sa Diyos nga dili na mobati nga hinukman sa atong kasingkasing. Kini makahatag ug dili-hitupngang kahupayan ug kalinaw sa hunahuna.

“Walay tawo nga makaari kanako [Jesu-Kristo] gawas kon ang Amahan, kinsa nagpadala kanako, magkabig kaniya; ug pagabanhawon ko siya sa kataposang adlaw.” (Juan 6:44) Pinaagi sa iyang balaang espiritu ug pinaagi sa buluhaton nga pagsangyaw sa Gingharian, si Jehova mismo maoy magpasuod kanato ngadto sa iyang Anak ug mohatag kanato sa paglaom nga mabuhi sa walay kataposan.