“Umari Kanako, . . . ug Ako Magapalagsik Kaninyo”

“Buhaton Nato ang Maayo Ngadto sa Tanan”

ANG pagsangyaw ug pagtudlo sa maayong balita sa Gingharian sa Diyos mao ang pangunang buluhaton ni Jesus. (Marcos 1:14; Lucas 8:1) Tungod kay ang mga sumusunod ni Kristo gustong mosundog kaniya, ilang giisip ang buluhaton sa pagtudlo sa mensahe sa Bibliya bahin sa Gingharian sa Diyos nga mao ang ilang pangunang buluhaton sa kinabuhi. (Lucas 6:40) Makapadasig gayod alang sa mga Saksi ni Jehova ang pagkakita kon sa unsang paagi ang mensahe sa Gingharian magdalag dumalayong kahupayan niadtong modawat niana—sama sa nahimo niini sa dinhi pa si Jesus sa yuta.—Mateo 11:28-30.

Gawas pa sa pagtudlo sa Pulong sa Diyos, si Jesus naghimo ug ubang maayong mga buhat, sama sa pag-ayo sa masakiton ug pagpakaon sa gigutom. (Mateo 14:14-21) Sa samang paagi, giabagan sa mga Saksi ni Jehova ang ilang buluhaton sa pagtudlo sa Bibliya ug mga buhat nga makatabang sa mga tawong nanginahanglan. Sa pagkatinuod, ang Kasulatan nagsangkap sa mga Kristohanon “alang sa tanang maayong buhat” ug nag-awhag kanila sa pagbuhat sa “maayo ngadto sa tanan.”—2 Timoteo 3:16, 17; Galacia 6:10.

“Didto ang Among mga Igsoon”

Sa Septiyembre 1999, ang Taiwan gitay-og sa usa ka malaglagong linog. Pipila ka bulan sa ulahi, tungod sa kusog nga mga pagbunok sa ulan ug mga pagdahili, nahitabo ang usa sa kinagrabehang mga katalagman sa kasaysayan sa Venezuela. Di pa dugay, ang grabeng mga baha nagpayhag sa nasod sa Mozambique. Niining tulo ka mga kahimtang, ang mga Saksi ni Jehova miabot dayon sa lugar nga nagdalag mga abiyo sa pagkaon, tubig, medisina, besti, mga tolda, ug mga gamit sa pagluto alang sa mga biktima. Ang mga boluntaryo nga makamaong manambal nagtukod ug temporaryong mga klinika aron matambalan ang mga nangaangol, ug ang mga boluntaryo sa konstruksiyon nagtukod ug bag-ong mga balay alang niadtong nawad-ag mga puy-anan.

Ang mga biktima natandog pag-ayo sa dihadihang tabang nga ilang nadawat. “Sa dihang kami nanginahanglan pag-ayo sa tabang, didto ang among mga igsoon,” matod ni Malyori, kansang balay gibanlas sa Venezuela. Human matukod sa mga boluntaryo  ang bag-ong balay alang sa iyang pamilya, si Malyori mipatugbaw: “Dili matapos ang among pagpasalamat kang Jehova sa tanan nga iyang gihimo alang kanamo!” Ug sa dihang ang mga biktima sa baha sa Mozambique midawat sa mga yawi sa ilang bag-ong natukod nga mga balay, ang enterong grupo mihugyaw sa pag-awit sa alawiton sa Gingharian nga “Si Jehova ang Among Dangpanan.” a

Ang pagtabang sa mga nanginahanglan nakapahupay usab sa mga boluntaryo. “Ako nalipay nga nakatabang niining mga igsoon nga grabeng nag-antos,” matod ni Marcelo, nga nagsirbing nars sa usa ka kampo sa mga kagiw sa Mozambique. Si Huang, usa ka boluntaryo sa Taiwan, miingon: “Makapalipay gayod ang pagpakigbahin sa paghatod ug pagkaon ug mga tolda ngadto sa nanginahanglang mga igsoon. Makapalig-on kadto sa pagtuo.”

Usa ka Programa sa Pagboluntaryo nga Misaler

Ang pagboluntaryo nagdala usab ug espirituwal nga kahupayan sa tinagpulo ka libong mga binilanggo sa tibuok-kalibotan. Sa unsang paagi? Sa di pa dugayng katuigan, ang mga Saksi ni Jehova nagtaganag mga literatura sa Bibliya sa kapin sa 30,000 ka tawo nga nabilanggo diha sa mga 4,000 ka bilanggoan sa Tinipong Bansa lamang. Dugang pa, kon posible, ang mga Saksi personal nga moduaw sa mga bilanggoan aron sa pagtuon sa Bibliya uban sa mga binilanggo ug pagdumalag Kristohanong mga tigom. Makabenepisyo ba ang mga binilanggo?

Ang ubang mga binilanggo nga nagtuon sa Bibliya misugod pagpaambit sa makapahupayng pagtulon-an sa Pulong sa Diyos uban sa mga isigka-binilanggo. Ingong resulta, diha sa daghang bilanggoan sa tibuok-kalibotan duna nay ginurupong mga binilanggo nga nagasimba kang Jehova. “Mauswagon ang among grupo,” nagtaho ang usa ka binilanggo sa Oregon, T.B.A., sa 2001. “Duna kamiy 7 ka magmamantala sa Gingharian ug nagdumalag 38 ka pagtuon sa Bibliya. Kapin sa 25 ka tawo ang nagtambongan sa pakigpulong publiko ug Pagtuon sa Bantayanang Torre, ug dihay 39 nga mitambong sa Memoryal [sa kamatayon ni Kristo]. Tulo pa ka tawo ang magpabawtismo sa di madugay!”

Mga Kaayohan ug mga Kalipay

Namatikdan sa mga opisyales sa bilanggoan nga misaler kining programa sa pagboluntaryo. Ang nakapadayeg pag-ayo sa mga opisyales mao ang layog-abot nga kaayohan niining programaha sa pagboluntaryo. Usa ka taho miingon: “Sa napulo ka tuig sukad gisugdan kining programaha, walay usa ka gibuhiang binilanggo nga nabawtismohan isip usa sa mga Saksi ni Jehova nga nabilanggo pag-usab—sukwahi sa 50-60 porsiyento nga nabilanggo pag-usab sa ubang mga grupo.” Kay natandog sa nahimo sa boluntaryong mga Saksi, usa ka tsaplin sa bilanggoan sa Idaho misulat ngadto sa tibuok-kalibotang hedkuwarter sa mga Saksi ni Jehova: “Bisan tuod dili ako mouyon sa inyong mga tinuohan, ako nakadayeg pag-ayo sa inyong organisasyon.”

Ang pagtabang sa mga binilanggo napamatud-an nga magantihon usab alang sa mga boluntaryo. Human magdumalag tigom sa usa ka grupo sa mga binilanggo nga miawit ug awit sa Gingharian sa unang higayon, usa ka boluntaryo misulat: “Makapadasig gayod ang paglantaw sa 28 ka lalaki nga nagdungan pag-awit ug mga pagdayeg kang Jehova. Ug pagkakusog nilang nanganta! Pagkadakong pribilehiyo ang pagtambong sa maong okasyon!” Usa ka boluntaryo nga miduaw sa mga bilanggoan sa Arizona miingon: “Pagkadakong panalangin ang pagpakig-ambit niining espesyal nga buluhaton!”

Ang boluntaryong mga Saksi sa tibuok-kalibotan mouyon kang Jesus, nga miingon: “Adunay labaw nga kalipay sa paghatag kay sa pagdawat.” (Buhat 20:35) Makapamatuod usab sila nga ang pagsunod sa tambag sa Bibliya sa pagbuhat ug maayo ngadto sa tanan makapahupay gayod kaayo.—Proverbio 11:25.

[Footnote]

[Hulagway sa panid 8]

Venezuela

[Hulagway sa panid 8]

Taiwan

[Hulagway sa panid 8]

Mozambique