Nahinumdom Ka Ba?

Nalingaw ka ba sa pagbasa sa di pa dugayng mga isyu sa Ang Bantayanang Torre? Buweno, tan-awa kon makatubag ka ba sa mosunod nga mga pangutana:

• Unsang personal nga programa nga naglangkit sa Sermon sa Bukid ang mahimo nimong gamiton aron mahupay ang kahigwaos?

Matag adlaw, makabasa ka ug usa sa paninugdang mga pagtulon-an ni Jesus nga gihatag sa maong sermon o bisan asa diha sa mga Ebanghelyo. Pinaagi sa pagpamalandong sa maong pagtulon-an ug pagpaningkamot nga mapadapat kana sa personal, lagmit madugangan ang imong kalipay ug mamenosan ang imong kahigwaos.—12/15, mga panid 12-14.

• Unsa ang tulo ka maayong mga katarongan nga bansayon sa mga ansiyano sa kongregasyon ang ministeryal nga mga alagad sa pagdumalag dugang mga responsabilidad?

Tungod sa pag-uswag sa gidaghanon sa mga Saksi ni Jehova, gikinahanglan ang dugang responsableng mga lalaki aron tabangan ang bag-ong mga nabawtismohan nga mouswag. Ang katigulangon o mga sakitsakit sa lawas maglimite na karon sa mahimo sa pipila ka dugay nang mga ansiyano. Ug ang ubang takos nga mga ansiyano nagpas-ag mga responsabilidad dili lang diha sa kaugalingon nilang kongregasyon, mao nga dili na sama ka dako kaniadto ang ilang mahimo diha sa ilang kongregasyon.—1/1, panid 29.

• Sa unsang paagi nagasalig ang mga tawo sa mga diyos nga dili tinuod?

Daghan ang nagsimba sa mga diyos sa ilang relihiyon, apan kini tingali mao lamay mga diyos nga walay kinabuhi nga dili makaluwas sama kang Baal sa adlaw ni Elias. (1 Hari 18:26, 29; Salmo 135:15-17) Ang uban nagsimba sa inilang mga tawo sa natad sa kalingawan o esport, nga dili makataganag bisan unsang tinuod nga paglaom alang sa umaabot. Sa kasukwahi, si Jehova tinuod nga naglungtad ug magtuman sa iyang mga katuyoan.—1/15, mga panid 3-5.

• Unsay atong makat-onan gikan sa reaksiyon ni Cain sa pasidaan sa Diyos?

Ang Diyos naghatag kanatog kagawasan sa pagpili, ug makapili kita sa pagbuhat kon unsay matarong inay motalikod sa pagbuhat ug maayo, nga maoy reaksiyon ni Cain. Ang asoy sa Bibliya nagpakita usab nga si Jehova magpahamtang gayod sa iyang mga paghukom nganha sa dili mahinulsolon.—1/15, mga panid 22-3.

• Nganong hinungdanon kaayo ang kahinlo karon?

Duyog sa nag-usab-usab nga mga estilo sa kinabuhi sa katilingban, namenosan ang panahon nga gigugol sa daghang tawo sa pagpanghinlo sa ilang balay kay sa naandan. Ang dili pagpakabana sa kahinlo labot sa pagkaon ug tubig makapatunghag mga kapeligrohan sa panglawas. Gawas pa sa pisikal nga kahinlo, ang Bibliya nagpasiugda nga hatagag pagtagad ang espirituwal, moral, ug mental nga kahinlo.—2/1, mga panid 3-6.

• Mahitungod sa una-Kristohanong mga saksi, si Pablo nag-ingon nga sila “dili mahingpit nga bulag kanato.” Sa unsang paagi? (Hebreohanon 11:40)

Sulod sa umaabot nga Milenyo, si Kristo ug ang iyang dinihogang mga igsoon sa langit, nga mag-alagad ingong mga hari ug mga saserdote, maghatag sa mga kaayohan sa lukat ngadto sa mga binanhaw. Busa, ang maong mga matinumanon sumala sa giingon sa Hebreohanon kapitulo 11 “mahingpit.”—2/1, panid 23.

• Unsay gipasabot ni Pablo sa dihang giingnan niya ang mga Hebreohanon: “Kamo wala pa gayod makasukol hangtod sa dugo”? (Hebreohanon 12:4)

Ang iyang gipasabot mao ang pagsukol hangtod sa kamatayon. Adunay mga panig-ingnan sa kasaysayan bahin niadtong nagmatinumanon hangtod sa kamatayon. Bisan tuod ang mga Hebreohanon nga gisulatan ni Pablo wala pa masulayi hangtod nianang puntoha, sila kinahanglang mouswag ngadto sa pagkahamtong, nga magpalig-on sa ilang pagtuo aron makalahutay bisag unsa pay modangat.—2/15, panid 29.

• Nganong mas maayong likayan ang pag-ingon nga ang hustisya ni Jehova gipagaan sa iyang kaluoy?

Diha sa pipila ka pinulongan, ang “gipagaan” mahimong magpasabot ug puypoyon o pugngan. Si Jehova maoy Diyos sa hustisya ug kaluoy, ug timbang ang iyang pagpasundayag sa maong mga hiyas. (Exodo 34:6, 7; Deuteronomio 32:4; Salmo 116:5; 145:9) Ang hustisya ni Jehova dili kinahanglang lukmayon o pagaanon sa kaluoy.—3/1, panid 30.

• Husto ba alang sa usa ka Kristohanon nga ipaembalsamar ang lawas sa usa ka minahal nga namatay?

Ang pag-embalsamar maoy usa ka paagi aron mapreserbar ang patayng lawas. Ang pipila ka karaang mga tawo nag-embalsamar tungod sa relihiyosong mga katarongan. Dili ingon niana ang rason sa matuod nga mga magsisimba. (Ecclesiastes 9:5; Buhat 24:15) Ang pag-embalsamar magpadugay lamang sa butang nga dili kalikayan, ang pagbalik sa lawas ngadto sa abog. (Genesis 3:19) Apan walay katarongan nga mabalaka kon ang balaod nagkinahanglan sa pag-embalsamar, kon ang pipila ka membro sa pamilya gusto niana, o gikinahanglan kana tungod kay ang ubang membro sa pamilya kinahanglang mobiyaheg layolayo sa pagtambong sa paglubong.—3/15, mga panid 29-31.

• Unsang mga panig-ingnan sa Bibliya ang nagtudlo kanato nga ang Diyos nagadawat sa mga tawo sa tanang kanasoran?

Gipadala ni Jehova ang manalagnang si Jonas aron pasidan-an ang mga taga-Nineve, ug giawhag sa Diyos si Jonas sa pagdawat sa ilang paghinulsol. Pinaagi sa pulong ug panig-ingnan, si Jesus nagdasig sa pagpakitag gugma ngadto sa mga Samarianhon. Si apostol Pedro ug si apostol Pablo adunay papel sa pagdala sa maayong balita ngadto sa mga dili-Hudiyo. Gikan sa maong mga panig-ingnan, atong masabot ang panginahanglan sa pagtabang sa mga tawo sa tanang kagikan.—4/1, mga panid 21-4.