Ang mga Panalangin Gumikan sa Maayong Balita

“Si Jehova nagdihog kanako sa pagsulti sa maayong balita ngadto sa mga maaghop. Siya nagpadala kanako aron sa pagbugkos sa mga may gun-ob nga kasingkasing, . . . sa paghupay sa tanang nagbangotan.”—ISAIAS 61:1, 2.

1, 2. (a) Gipadayag ni Jesus nga unsa siya, ug sa unsang paagi? (b) Unsang mga panalangin ang gidala sa maayong balita nga giwali ni Jesus?

 USA ka adlawng igpapahulay sa sinugdan sa iyang ministeryo, si Jesus didto niadto sa sinagoga sa Nasaret. Segun sa talaan, “ang linukot nga basahon sa manalagnang Isaias gitunol kaniya, ug iyang gibuksan ang linukot nga basahon ug nakaplagan ang dapit diin nahisulat kini: ‘Ang espiritu ni Jehova ania kanako, tungod kay siya nagdihog kanako aron sa pagpahayag sa maayong balita.’” Gipadayon ni Jesus ang pagbasa sa matagnaong mga kasulatan. Dayon siya milingkod ug miingon: “Karong adlawa kining kasulatan nga bag-o lang ninyo nga nadungog natuman.”—Lucas 4:16-21.

² Sa ingon nga paagi, gipadayag ni Jesus nga siya mao ang gitagnang tig-ebanghelyo, ang tigsulti sa maayong balita ug ang tigdalag kahupayan. (Mateo 4:23) Ug tinuod gayong maayong balita ang igawali ni Jesus! Iyang giingnan ang iyang mga mamiminaw: “Ako mao ang kahayag sa kalibotan. Siya nga magasunod kanako dili gayod magalakaw sa kangitngit, apan makabaton sa kahayag sa kinabuhi.” (Juan 8:12) Miingon usab siya: “Kon magpabilin kamo sa akong pulong, kamo tinuod gayod nga akong mga tinun-an, ug kamo mahibalo sa kamatuoran, ug ang kamatuoran magpagawas kaninyo.” (Juan 8:31, 32) Oo, si Jesus nakabaton sa “mga pulong mahitungod sa kinabuhing walay kataposan.” (Juan 6:68, 69) Kahayag, kinabuhi, kagawasan—sa pagkamatuod kini maoy mga panalangin nga pagamahalon!

3. Unsang maayong balita ang giwali sa mga tinun-an ni Jesus?

 ³ Human sa Pentekostes 33 K.P., gipadayon sa mga tinun-an ang buluhatong pag-ebanghelyo ni Jesus. Ilang giwali ang “maayong balita sa gingharian” ngadto sa mga Israelinhon ug sa katawhan sa mga nasod. (Mateo 24:14; Buhat 15:7; Roma 1:16) Ang mga misanong nakadangat sa pagkaila kang Jehova nga Diyos. Sila napahigawas gikan sa relihiyosong kaulipnan ug nahimong bahin sa bag-ong espirituwal nga nasod, ‘ang Israel sa Diyos,’ kansang mga membro may paglaom sa pagmando sa walay kataposan sa langit kauban sa ilang Ginoo, si Jesu-Kristo. (Galacia 5:1; 6:16; Efeso 3:5-7; Colosas 1:4, 5; Pinadayag 22:5) Pagkabililhon gayod ang maong mga panalangin!

Pagwali sa Maayong Balita Karon

4. Sa unsang paagi ginatuman karong adlawa ang sugo sa pagwali sa maayong balita?

⁴ Karon, ang dinihogang mga Kristohanon, nga gisuportahan sa nag-usbawng “dakong panon” sa “ubang mga karnero,” nagpadayon sa pagtuman sa sugo sa pagpanagna nga unang gihatag kang Jesus. (Pinadayag 7:9; Juan 10:16) Ingong resulta, ang maayong balita ginawali sa gidak-ong wala pa sukad makita. Sa 235 ka nasod ug teritoryo, ang mga Saksi ni Jehova nanglakaw aron “sa pagsulti sa maayong balita ngadto sa mga maaghop . . . , aron sa pagbugkos sa mga may gun-ob nga kasingkasing, sa pagmantala ug kagawasan niadtong mga gidalang binihag ug sa pagpabuka pag-ayo sa mga mata bisan sa mga binilanggo; sa pagmantala sa tuig sa maayong kabubut-on sa bahin ni Jehova ug sa adlaw sa panimalos sa bahin sa atong Diyos; sa paghupay sa tanang nagbangotan.” (Isaias 61:1, 2) Busa, ang Kristohanong buluhaton sa pag-ebanghelyo nagpadayon sa pagdalag mga panalangin alang sa daghang tawo ug matuod nga kahupayan alang “kanila nga anaa sa bisan unsang matang sa kasakitan.”—2 Corinto 1:3, 4.

5. Mahitungod sa pagwali sa maayong balita, sa unsang paagi lahi ang mga Saksi ni Jehova sa mga iglesya sa Kakristiyanohan?

⁵ Tinuod nga ang mga iglesya sa Kakristiyanohan nagpasiugdag nagkalainlaing mga paagi sa pagwali sa maayong balita. Daghang iglesya ang nagpadala ug mga misyonaryo sa paghimog mga kinabig diha sa ubang mga nasod. Pananglitan, ang The Orthodox Christian Mission Center Magazine nagtaho bahin sa kalihokan sa Ortodoksong mga misyonaryo sa Madagascar, habagatang Aprika, Tanzania, ug Zimbabwe. Hinuon, sa Ortodoksong Iglesya, ingon man sa ubang mga iglesya sa Kakristiyanohan, ang kinabag-ang mga membro wala makigbahin nianang buluhatona. Sa kaatbang, ang tanang nagpahinungod nga mga Saksi ni Jehova naningkamot sa pagpakigbahin sa pag-ebanghelyo. Sila nakasabot nga ang pagsangyaw sa maayong balita maoy usa ka ilhanan sa pagkatiunay sa ilang pagtuo. Si Pablo miingon: “Pinaagi sa kasingkasing ang usa nagapasundayag ug pagtuo alang sa pagkamatarong, apan pinaagi sa baba ang usa nagahimog pagpahayag sa dayag alang sa kaluwasan.” Ang pagtuo nga dili motukmod sa usa ka tawo sa paglihok, sa pagkatinuod, maoy patay.—Roma 10:10; Santiago 2:17.

Maayong Balita nga Magdalag Walay-Kataposang mga Panalangin

6. Unsang maayong balita ang ginawali karon?

⁶ Ang mga Saksi ni Jehova nagawali sa posible nga labing maayong balita. Ilang paklion ang ilang mga Bibliya ug ipakita sa mosanong nga mga tawo nga gihalad ni Jesus ang iyang kinabuhi aron ihatag sa mga tawo ang usa ka dalan sa pagduol sa Diyos, ang kapasayloan sa mga sala, ug ang paglaom sa walay-kataposang kinabuhi. (Juan 3:16; 2 Corinto 5:18, 19) Sila nagpahayag nga ang Gingharian sa Diyos natukod na sa langit ubos sa dinihogang Hari, si Jesu-Kristo, ug sa dili na madugay kini magwagtang sa pagkadaotan gikan sa yuta ug magdumala sa pagpasig-uli sa Paraiso. (Pinadayag 11:15; 21:3, 4) Isip katumanan sa tagna ni Isaias, sila nagpahibalo sa ilang mga silingan nga karon mao ang “tuig sa maayong kabubut-on sa bahin ni Jehova” sa dihang ang mga tawo makasanong pa sa maayong balita. Sila nagpasidaan usab nga sa dili na madugay moabot na ang “adlaw sa panimalos sa bahin sa atong Diyos” sa dihang si Jehova maglaglag sa dili-mahinulsolong mga mamumuhat ug daotan.—Salmo 37:9-11.

7. Unsang kasinatian ang nagpasundayag sa panaghiusa sa mga Saksi ni Jehova, ug nganong nagtagamtam sila sa maong panaghiusa?

⁷ Sa usa ka kalibotan nga gisakit sa trahedya ug katalagman, kini lamang ang maayong balita nga may walay-kataposang mga kaayohan. Ang mga modawat niini mahimong bahin sa usa ka nahiusa, tibuok-kalibotang kapunongan sa mga Kristohanon nga wala magtugot sa nasodnon, tribonhon, o ekonomikanhong mga kalainan sa pagbahin kanila. Ilang ‘gisul-oban ang ilang kaugalingon  sa gugma, kay kini maoy usa ka hingpit nga bugkos sa panaghiusa.’ (Colosas 3:14; Juan 15:12) Nakita kini sa miaging tuig sa usa ka nasod sa Aprika. Usa ka buntag ang kaulohang siyudad nahigmata tungod sa butobuto sa pusil. Ang pagtinguha nga pukanon ang gobyerno nagkahitabo diay. Sa dihang ang mga panghitabo napunting sa etnikong mga isyu, usa ka pamilyang Saksi gisaway tungod kay nagpapuyo ug kaubang mga Saksi nga iya sa lahing etnikong grupo. Mitubag ang pamilya: “Mga Saksi ni Jehova lamang ang nagpuyo sa among balay.” Alang kanila, ang etnikong mga kalainan dili hinungdanon; ang Kristohanong gugma—nga nagahupay niadtong nagkinahanglan—mao ang hinungdanon. Usa ka paryenteng dili-Saksi mikomento: “Ang mga membro sa tanang relihiyon nagtraydor sa ilang mga isigkamagsisimba. Mga Saksi ni Jehova lamang ang wala magtraydor.” Ang daghang ingon nga mga panghitabo nga gitaho gikan sa mga nasod nga nabungkag tungod sa sibilyang panag-away nagpakita nga ang mga Saksi ni Jehova tinuod nga ‘nakabaton ug gugma alang sa tibuok kapunongan sa mga igsoon.’—1 Pedro 2:17.

Ang Maayong Balita Makapabag-o sa mga Tawo

8, 9. (a) Unsang mga pagbag-o ang gihimo niadtong midawat sa maayong balita? (b) Unsang mga kasinatian ang naghulagway sa gahom sa maayong balita?

⁸ Ang maayong balita adunay kalabotan sa gitawag ni Pablo nga “kinabuhi karon ug sa umaabot.” (1 Timoteo 4:8) Kini mohatag dili lamang sa kahibulongan, seguradong paglaom sa umaabot kondili modala usab ug mga kauswagan sa “kinabuhi karon.” Sa tinagsatagsa, ang mga Saksi ni Jehova ginatultolan sa Pulong sa Diyos, ang Bibliya, aron ang ilang kinabuhi mapahiuyon sa kabubut-on sa Diyos. (Salmo 119:101) Ang ilang mga pagkatawo mismo ginabag-o samtang ginaugmad nila ang mga hiyas sama sa pagkamatarong ug pagkamaunongon.—Efeso 4:24.

⁹ Tagda ang pananglitan ni Franco. Siya masuk-anon. Sa dihang may magkasinayop, ang iyang kasuko mosilaob ug mamuak siyag mga butang. Ang iyang asawa nagtuon sa Bibliya uban sa mga Saksi ni Jehova, ug ang ilang Kristohanong panig-ingnan anam-anam nga nakatabang kang Franco sa pagsabot nga siya kinahanglang magbag-o. Siya nagtuon sa Bibliya uban nila ug sa kadugayan nakapadayag sa mga bunga sa balaang espiritu nga pakigdait ug pagpugong-sa-kaugalingon. (Galacia 5:22, 23) Usa siya sa 492 nga nabawtismohan sa Belgium sa 2001 tuig sa pag-alagad. Tagda, usab, si Alejandro. Ang maong batan-ong lalaki naadik pag-ayo sa mga droga nga midangat siya sa pagpanginabuhi na lamang sa labayanan ug basura, nga nangita kon unsay ikabaligya aron makasuportar sa iyang bisyo sa droga. Sa dihang siya 22 anyos na, giawhag si Alejandro sa mga Saksi ni Jehova sa pagtuon sa Bibliya, ug siya miuyon. Gibasa niya ang Bibliya adlaw-adlaw ug nagtambong siya sa Kristohanong mga tigom. Dali kaayo siyang nakahinlo sa iyang kinabuhi nga wala dangtig unom ka bulan, nakapakigbahin na siya sa buluhaton sa pag-ebanghelyo—usa sa 10,115 nga naghimo niana sa miaging tuig sa Panama.

 Ang Maayong Balita—Usa ka Panalangin Alang sa Maaghop

10. Kinsay mosanong sa maayong balita, ug sa unsang paagi mabag-o ang ilang panglantaw?

¹⁰ Gitagna ni Isaias nga ang maayong balita igawali ngadto sa mga maaghop. Kinsa ba ang maong mga maaghop? Sila ang gibatbat diha sa basahon sa Mga Buhat ingong “hustong nakiling alang sa kinabuhing walay kataposan.” (Buhat 13:48) Sila maoy mapainubsanong mga tawo nga makaplagan diha sa tanang hut-ong sa katilingban nga mosanong sa mensahe sa kamatuoran. Ang maong mga tawo nahibalo nga ang pagbuhat sa kabubut-on sa Diyos modalag mga ganting mas bililhon kay sa bisan unsa nga ginatanyag sa sekular nga kalibotan. (1 Juan 2:15-17) Apan, sa unsang paagi ang mga Saksi ni Jehova makatandog sa mga kasingkasing diha sa ilang buluhaton sa pag-ebanghelyo?

11. Sumala kang Pablo, sa unsang paagi angayng iwali ang maayong balita?

¹¹ Buweno, tagda ang panig-ingnan ni apostol Pablo, kinsa misulat ngadto sa mga taga-Corinto: “Sa dihang ako mianha kaninyo, mga igsoon, ako wala moanha nga may paghinobra sa sinultihan o sa kaalam sa pagpahayag sa sagradong tinago sa Diyos nganha kaninyo. Kay gihukom ko ang dili pagkahibalo sa bisan unsa bahin kaninyo gawas kang Jesu-Kristo, ug kaniya nga gilansang.” (1 Corinto 2:1, 2) Si Pablo wala magtinguha nga magpadayeg sa iyang mga mamiminaw tungod sa iyang kahibalo. Ang gitudlo lang niya mao ang mga kamatuoran nga gipasalig sa Diyos, mga kamatuoran nga nahitala karon sa Bibliya. Matikdi, usab, ang pagdasig ni Pablo sa iyang kaubang tig-ebanghelyo nga si Timoteo: “Iwali ang pulong, magmadali diha niini.” (2 Timoteo 4:2) Kinahanglang iwali ni Timoteo “ang pulong,” ang mensahe sa Diyos. Si Pablo misulat usab kang Timoteo: “Buhata ang kutob sa imong maarangan nga itanyag ang imong kaugalingon sa Diyos ingong inuyonan, usa ka mamumuo nga walay angayng ikaulaw, nga nagagamit sa pulong sa kamatuoran sa hustong paagi.”—2 Timoteo 2:15.

12. Sa unsang paagi ang mga Saksi ni Jehova karon nagasunod sa mga pulong ug panig-ingnan ni Pablo?

¹² Ginasunod sa mga Saksi ni Jehova ang panig-ingnan ni Pablo, ingon man ang iyang mga pulong kang Timoteo. Sila nakaila sa gahom sa Pulong sa Diyos ug naggamit gayod niini samtang sila nagtinguha sa pagpakita sa ilang mga silingan sa nahiangayng mga pulong bahin sa paglaom ug kahupayan. (Salmo 119:52; 2 Timoteo 3:16, 17; Hebreohanon 4:12) Tinuod, ilang gigamit kanunay ang literatura sa Bibliya aron ang mga interesado makabatog mas dakong kahibalo sa Bibliya sa ilang kombenyenteng panahon. Apan sila nagtinguha kanunay nga ipakita sa mga tawo ang mga pulong sa Kasulatan. Nahibalo sila nga ang inspiradong Pulong sa Diyos motukmod sa mga kasingkasing sa mga mapainubsanon. Ug ang paggamit niini sa maong paagi maglig-on usab sa ilang pagtuo.

“Paghupay sa Tanang Nagbangotan”

13. Sa tuig 2001, unsang mga panghitabo ang nagpatungha sa kaylap nga panginahanglan sa paghupay sa mga nagbangotan?

¹³ Nahitabo sa tuig 2001 ang daghang katalagman, ug ingong resulta, daghang tawo ang nagkinahanglag paghupay. Sa miaging Septiyembre may usa ka dakong pananglitan sa Tinipong Bansa, tungod sa mga pag-atake sa terorista sa World Trade Center sa New York ug sa Pentagon duol sa Washington, D.C. Ang maong mga pag-atake nakapakurat gayod sa tibuok nasod! Bisan pa sa maong mga panghitabo, ang mga Saksi ni Jehova naningkamot sa pagtuman sa ilang tinudlong-buluhaton sa pagtanyag ug ‘paghupay sa tanang nagbangotan.’ Ang pipila ka kasinatian mag-ilustrar kon giunsa nila paghimo kini.

14, 15. Sa unsang paagi ang mga Saksi sa duha ka nagkalainlaing mga okasyon nakaarang sa paggamit sa epektibong paagi sa mga kasulatan sa paghupay sa mga nagbangotan?

¹⁴ Usa ka Saksi nga bug-os-panahong tig-ebanghelyo miduol sa usa ka babaye sa aseras ug nangutana kon unsay iyang hunahuna bahin sa bag-o pang mga pag-atake sa terorista. Ang babaye misugod paghilak. Siya miingon nga siya naguol ug nanghinaot nga unta siya may ikatabang. Giingnan siya sa Saksi nga ang Diyos interesado kaayo kanatong tanan, ug iyang gibasa ang Isaias 61:1, 2. Ang maong inspirado sa Diyos nga mga pulong daw makataronganon alang sa babaye, nga miingon nga ang tanan nagbangotan. Midawat siyag usa ka tract ug mihangyo nga duawon siya sa Saksi sa iyang balay.

¹⁵ Duha ka Saksi nga nakigbahin sa buluhaton sa pag-ebanghelyo nakahibalag ug usa ka lalaking nagtrabaho diha sa iyang payag. Mitanyag sila nga ipakita kaniya ang mga pulong sa paghupay gikan sa Kasulatan tungod sa bag-o pang trahedya  sa World Trade Center. Uban sa iyang pagtugot ilang gibasa ang 2 Corinto 1:3-7, nga naglakip sa mga pulong: ‘Ang paghupay . . . nagadagaya pinaagi ni Kristo.’ Ang maong tawo mapasalamaton nga ang iyang Saksing mga silingan nagpakigbahin sa butang nga makahupay sa uban ug miingon: “Hinaot ang Diyos magapanalangin sa talagsaong buluhaton nga inyong ginabuhat.”

16, 17. Unsang duha ka kasinatian ang nagpasundayag sa gahom sa Bibliya sa pagtabang sa mga tawo nga nasubo o nabalaka pag-ayo tungod sa mga trahedya?

¹⁶ Usa ka Saksi nga mibalik pagduaw sa mga tawong interesado nakahinagbo sa anak lalaki sa usa ka babaye nga nagpakitag interes kanhi ug misaysay nga nabalaka siya sa kahimtang sa mga silingan human sa bag-o pang trahedya. Ang maong lalaki natingala nga ang Saksi migugol ug panahon sa pagduaw sa mga tawo ug sa pagsusi sa ilang kahimtang. Siya miingon nga siya nagtrabaho duol kaayo sa World Trade Center sa dihang nahitabo ang pag-atake ug nakakita sa tibuok hitabo. Sa dihang nangutana siya kon nganong gitugotan sa Diyos ang pag-antos, ang Saksi mibasag mga bersikulo gikan sa Bibliya, lakip ang Salmo 37:39, nga nag-ingon: “Ang kaluwasan sa mga matarong magagikan kang Jehova; siya ang ilang kuta sa panahon sa kasakitan.” Ang lalaki malulotong nangutana sa kahimtang sa Saksi ug sa iyang pamilya, midapit kaniya sa pagbalik, ug mipahayag ug kinasingkasing nga pagpasalamat tungod sa pagduaw.

¹⁷ Usa pa sa libolibong nagbangotan nga gihupay sa mga Saksi ni Jehova sa mga adlaw human sa mga pag-atake sa terorista mao ang usa ka babaye nga nahibalag sa mga Saksi samtang ilang giduaw ang ilang mga silingan. Siya nabalaka pag-ayo sa nahitabo ug namati samtang ilang gibasa ang Salmo 72:12-14: “Pagaluwason niya ang kabos nga nagatuaw alang sa tabang, ingon man ang sinakit ug si bisan kinsa nga walay magtatabang. Maluoy siya sa timawa ug sa kabos, ug pagaluwason niya ang mga kalag sa mga kabos. Gikan sa pagpanglupig ug sa kapintasan tubson niya ang ilang kalag, ug ang ilang dugo mahimong bililhon sa iyang mga mata.” Pagkamakahuloganon ang maong mga pulong! Ang babaye mihangyo nga basahon pag-usab sa mga Saksi ang mga bersikulo ug gipadayon sila sa iyang balay aron ipadayon ang panaghisgot. Pagkatapos sa kulokabildo, ang usa ka pagtuon sa Bibliya nasugdan na.

18. Sa unsang paagi ang usa ka Saksi mitabang sa iyang mga silingan sa dihang siya gidapit sa pag-ampo alang kanila?

¹⁸ Ang usa ka Saksi nagtrabaho sa usa ka restawran sa usa ka datoon nga komunidad diin ang mga tawo kanhi wala magpakitag dakong interes  sa maayong balita sa Gingharian. Human sa mga pag-atake sa terorista, ang komunidad daw nangurog. Sa gabii sa Biyernes human sa pag-atake, ang manedyer sa restawran midapit sa tanan sa paggawas ug pagdalag mga kandila, sa pag-obserbar sa usa ka gutlo sa hilom nga pamalandong isip paghinumdom sa mga biktima. Sa pagtahod sa ilang mga pagbati, ang Saksi migawas ug hilom nga mitindog sa aseras. Nahibalo ang manedyer nga siya usa ka ministro sa mga Saksi ni Jehova, busa human sa yugto sa pamalandong, iyang gihangyo siya nga maoy mohawas sa pag-ampo sa tanang presente. Misugot ang Saksi. Sa iyang pag-ampo, iyang gihisgotan ang kaylap nga pagbangotan apan miingon nga ang mga nagbangotan dili kinahanglang managsubo sa kawalay paglaom. Iyang gihisgotan ang usa ka panahon nga ang maong makalilisang nga mga hitabo mawala na ug siya miingon nga ang tanan mahimong makigsuod sa Diyos sa paghupay pinaagi sa tukmang kahibalo gikan sa Bibliya. Human sa paglitok ug “Amen,” ang manedyer—nga gisundan sa kapin ug 60 ka tawo nga didto sa gawas sa restawran—miduol sa Saksi, nagpasalamat kaniya, ug migakos kaniya, nga mikomento nga ang pag-ampo mao ang labing maayo nga iyang nadungog sukad.

Usa ka Panalangin Alang sa Komunidad

19. Unsang kasinatian ang nagpasundayag nga ang pipila nag-ila sa hataas nga mga sukdanan sa mga Saksi ni Jehova?

¹⁹ Karong mga adlawa ilabina, ang mga komunidad diin aktibo ang mga Saksi ni Jehova makabatog kaayohan gikan sa ilang pagkaanaa diha—sumala sa gikomento sa daghang tawo. Sa unsang paagi ang katawhan nga nagpasiugda sa pakigdait, pagkamatinud-anon, ug mahinlong moralidad dili maayong impluwensiya? Sa usa ka nasod sa Sentral Asia, ang mga Saksi nakahibalag ug usa ka retiradong opisyal sa kanhing ahensiya sa seguridad sa estado. Siya miingon nga siya kaniadto natudlo sa pag-imbestigar sa nagkalainlaing relihiyosong mga organisasyon. Sa dihang iyang giimbestigar ang mga Saksi ni Jehova, siya nahingangha sa ilang pagkamatinud-anon ug maayong pamatasan. Iyang gidayeg ang ilang lig-ong pagtuo ug ang kamatuoran nga ang ilang mga pagtulon-an gibase sa Kasulatan. Kadtong tawhana miuyon sa usa ka pagtuon sa Bibliya.

20. (a) Unsay gipakita sa kalihokan nga gitaho sa mga Saksi ni Jehova sa miaging tuig? (b) Unsay nagpaila nga adunay dako pa kaayong buluhaton, ug unsay pag-isip nato sa atong pribilehiyo sa pag-ebanghelyo?

²⁰ Gikan sa pipila ka kasinatian nga giasoy niining artikuloha, sa libolibo nga ikaasoy, tin-aw nga ang mga Saksi ni Jehova napuliki kaayo panahon sa 2001 tuig sa pag-alagad. a Nakigsulti sila sa milyonmilyong tawo, naghupay sa daghan nga nagbangotan, ug gipanalanginan ang ilang buluhaton sa pag-ebanghelyo. May 263,431 nga nagpasimbolo sa ilang pahinungod sa Diyos pinaagi sa pagpabawtismo. Sa tibuok kalibotan, ang gidaghanon sa mga tig-ebanghelyo miuswag ug 1.7 porsiyento. Ug ang kamatuoran nga 15,374,986 mitambong sa tinuig nga Memoryal sa kamatayon ni Jesus nagpaila nga ang buluhaton maoy dako pa gayod. (1 Corinto 11:23-26) Hinaot magpadayon kita sa pagpangita sa mga maaghop nga mosanong sa maayong balita. Ug samtang magpadayon pa ang tuig sa maayong kabubut-on ni Jehova, hinaot magpadayon kita sa paghupay sa “mga may gun-ob nga kasingkasing.” Pagkabulahan ang pribilehiyo nga atong nabatonan! Segurado nga ipalanog natong tanan ang mga pulong ni Isaias: “Sa walay pakyas ako magsadya diha kang Jehova. Ang akong kalag magakalipay diha sa akong Diyos.” (Isaias 61:10) Hinaot ang Diyos magpadayon sa paggamit kanato samtang iyang pagatumanon kining matagnaong mga pulong: “Ang Soberanong Ginoong Jehova magpaturok sa pagkamatarong ug sa pagdayeg sa atubangan sa tanang kanasoran.”—Isaias 61:11.

[Footnote]

Nahinumdom Ka Ba?

• Sa unsang paagi napanalanginan ang mga maaghop gumikan sa maayong balita nga giwali ni Jesus?

• Unsang mga panalangin ang nabatonan niadtong misanong sa buluhatong pag-ebanghelyo sa mga tinun-an ni Jesus sa unang siglo?

• Sa unsang paagi ang mga madinawaton karong adlawa napanalanginan gumikan sa maayong balita?

• Unsay pag-isip nato sa atong pribilehiyo sa pagkatig-ebanghelyo?

[Mga Pangutana sa Pagtuon]

 [Chart sa panid 19-22]

2001 TUIG SA PAG-ALAGAD NGA TAHO SA MGA SAKSI NI JEHOVA SA TIBUOK KALIBOTAN

 (Tan-awa ang bound volume)

[Mga hulagway sa panid 15]

Ang mga Saksi ni Jehova kanunayng mahinumdom sa ilang responsabilidad sa pag-ebanghelyo

[Mga hulagway sa panid 17]

Kadtong mosanong sa maayong balita mahimong bahin sa usa ka nahiusa, tibuok-kalibotan nga kapunongan