Mga Pangutana Gikan sa mga Magbabasa

Sa unsang paagi balansehon sa usa ka Kristohanong asawa ang pagkamaunongon sa Diyos uban sa pagkamapinasakopon sa iyang dili-magtutuong bana kon ang iyang bana makigbahin sa mga kalihokan sa pangilin?

Ang pagbuhat niya sa ingon nagkinahanglag kaalam ug taktika. Apan ginabuhat niya ang hustong butang sa pagpaningkamot nga mabalanse ang duha niya ka obligasyon. Nagtambag si Jesus mahitungod sa kaamgid nga kahimtang: “Busa, ibayad ninyo kang Cesar ang mga butang ni Cesar, apan ang mga butang sa Diyos ngadto sa Diyos.” (Mateo 22:21) Tinuod nga si Jesus naghisgot bahin sa mga obligasyon ngadto sa mga gobyerno, nga niana giingnan ang mga Kristohanon sa ulahi nga magpasakop. (Roma 13:1) Bisan pa niana, ang iyang tambag mapadapat usab sa pagbalanse sa usa ka asawa sa iyang obligasyon ngadto sa Diyos uban sa iyang Kasulatanhong pagpasakop ngadto sa iyang bana, bisan pag siya dili-magtutuo.

Walay usang sinati sa Bibliya ang makalimod nga kini nagpasiugda nga ang unang obligasyon sa usa ka Kristohanon maoy ngadto sa Diyos nga Labing Gamhanan, nga magmaunongon kaniya sa tanang panahon. (Buhat 5:29) Apan, sa daghang kahimtang ang usa ka matuod nga magsisimba makahatag ug konsiderasyon sa mga hangyo o mga kinahanglanon sa usa ka dili-magtutuo nga anaa sa awtoridad samtang dili makigbahin sa paglapas sa hataas nga mga balaod sa Diyos.

Makaplagan nato ang matulon-anong panig-ingnan diha sa tulo ka Hebreohanon, sumala sa giasoy sa Daniel kapitulo 3. Ang ilang labaw diha sa gobyerno, si Nabukodonosor, nagmando nga sila ug ang uban moadto sa kapatagan sa Dura. Kay nakaamgo nga gieskedyul ang bakak nga pagsimba, lagmit ang  tulo ka Hebreohanon dili gustong moadto didto. Tingali si Daniel may katarongan nga dili moadto, apan ang tulo wala. a Busa sila misugot nga moadto, apan sila dili gayod—ug wala gayod—makigbahin sa bisan unsang sayop nga buhat.—Daniel 3:1-18.

Sa samang paagi, panahon sa mga pangilin ang usa ka dili-magtutuong bana mahimong mohangyo o magbaod nga ang iyang Kristohanong asawa mohimo sa butang nga buot likayan sa iyang asawa. Tagda ang pipila ka pananglitan: Sugoon sa bana ang asawa nga maglutog usa ka potahe sa adlaw nga siya ug ang uban magsaulog sa usa ka pangilin. O siya mohangyo nga ang pamilya (lakip sa iyang asawa) moduaw sa iyang mga paryente sa adlaw sa pangilin aron mangaon o bisag moduaw lang. O bisan sa dili pa ang pangilin, siya tingali moingon nga samtang mamalit ang iyang asawa, kinahanglang mamalit usab siya alang kaniya—mga linaing pagkaon alang sa pangilin, mga iregalo, o mga igpuputos nga papel ug mga kard nga gamiton uban sa iyang mga regalo.

Sa makausa pa, ang Kristohanong asawa angayng magmadeterminado nga dili makigbahin sa bakak nga relihiyosong mga kalihokan, apan unsay buhaton labot sa maong mga hangyo? Ang bana mao ang ulo sa pamilya, ug ang Pulong sa Diyos nag-ingon: “Kamong mga asawa, magpasakop sa inyong mga bana, sanglit kini maoy angay diha sa Ginoo.” (Colosas 3:18) Niining mga kasoha, makapasakop ba siya ingong asawa nga sa samang higayon magmaunongon ngadto sa Diyos? Siya ang angayng mohukom kon unsaon pagbalanse sa pagkamasinugtanon ngadto sa iyang bana uban sa iyang mas labawng pagkamasinugtanon ngadto kang Jehova.

Sa ubang mga panahon nga dili pangilin, ang iyang bana mahimong mohangyo kaniya nga maglutog usa ka potahe, mahimong tungod kay paborito niya kini o tungod kay naandan niyang duna nianang pagkaona sa usa ka partikular nga panahon. Buot niyang mopakitag gugma alang sa iyang bana ug moila sa iyang pagkaulo. Puwede ba niyang himoon kini bisan pag ang iyang bana naghangyo niini panahon sa usa ka pangilin? Ang ubang Kristohanong mga asawa makahimo tingali sa pagbuhat sa ingon uban ang maayong tanlag, nga yanong mag-isip niini ingong normal nga buluhaton sama sa pagluto ug pagkaon sa adlaw-adlaw. Dayag nga walay maunongong Kristohanon ang maghunahuna nga nalangkit kini sa usa ka pangilin, bisan pag mao kiniy gihunahuna sa iyang bana. Sa samang paagi, mahimong paubanon siya sa iyang bana dihang moduaw siya sa iyang mga paryente sa lainlaing panahon kada bulan o tuig. Makahimo ba siya niini bisag adlaw kini sa pangilin? O sama sa naandan kinabubut-on ba siyang mopalit sa mga butang nga gihangyo sa iyang bana, nga dili hunahunaon kon unsay giplanong buhaton sa iyang bana sa mga butang nga iyang pamaliton alang niya samtang siya namalit?

Siyempre, ang usa ka Kristohanong asawa angayng maghunahuna sa uban—sa epekto niini nganha kanila. (Filipos 2:4) Buot likayan sa asawa nga makahatag ug bisan unsang ideya nga siya nalangkit sa pangilin, sama ra nga ang tulo ka Hebreohanon lagmit dili gustong makita sila sa uban nga miadto sa kapatagan sa Dura. Busa sa kamataktikanhon ang asawa mahimong mangatarongan sa iyang bana nga susihon kon, agig pagtagad sa mga pagbati sa iyang asawa, mahimo bang ang bana na lang ang mohimo sa pipila ka mga butang nga nalangkit sa pangilin aron hatagag konsiderasyon ang asawa nga nahigugma ug nagtahod kaniya. Basin masabtan sa bana nga maalamon ang dili pagbutang kanilang duha sa posibleng makauulaw nga kahimtang kon ang iyang asawa modumili sa pag-apil-apil sa bakak nga relihiyosong mga kalihokan. Oo, ang paghisgot daan niini sa kalmadong paagi mahimong motultol ngadto sa malinawong solusyon.—Proverbio 22:3.

Sa kaulahian, ang matinumanong Kristohanon angayng magtimbangtimbang sa mga impormasyon ug dayon mohukom kon unsay pagabuhaton. Ang pagkamasinugtanon ngadto sa Diyos mao ang angayng unahon, sama sa gihimo sa tulo ka Hebreohanon. (1 Corinto 10:31) Apan uban niana sa hunahuna, ang matag usa ka Kristohanon kinahanglang mohukom kon unsang dili-makapakompromisong mga butang ang mahimo kon mohangyo ang usang adunay awtoridad diha sa pamilya o diha sa komunidad.

[Footnote]