Mga Magmamantala sa Gingharian Nagtaho

Ang Latvia Misanong sa Maayong Balita

TIN-AWNG gipakita sa Bibliya nga kabubut-on sa Diyos nga ang “tanang matang sa mga tawo mangaluwas ug makadangat sa tukmang kahibalo sa kamatuoran.” (1 Timoteo 2:4) Kadtong kinsa sulod sa daghang tuig gihikawan sa kahigayonan nga makadungog sa maayong balita sa pagkakaron nakadungog na niana! Sa Latvia, sama sa ubang mga bahin sa kalibotan, ang katawhan sa tanang pangedaron ug lainlaing mga kagikan misanong sa mensahe, sumala sa gipakita sa mosunod nga mga eksperyensiya.

• Sa Rēzekne, usa ka lungsod sa sidlakang Latvia, usa ka inahan ug ang iyang tin-edyer nga anak nga babaye nangutana sa usa ka babaye diha sa dalan bahin sa adres nga ilang gipangita. Human ihatag kanila ang impormasyon, ang babaye, kinsa usa diay sa mga Saksi ni Jehova, midapit kanila sa mga tigom sa mga Saksi.

Sanglit ang inahan ug anak parehong relihiyoso, sila mihukom nga motambong sa tigom. Paingon sa tigom, nagkasabot sila nga kon may makaplagan sila nga dili maayo didto, sila mobiya dihadiha. Apan, ang tigom makaiikag kaayo nga wala na sila makahunahuna sa pagbiya. Ilang gidawat ang tanyag nga magtuon sa Bibliya ug misugod pagtambong sa mga tigom nga regular. Sulod sa tulo ka bulan, sila mipahayag sa ilang tinguha nga moduyog sa buluhatong pagsangyaw ug nagpaabot nga mabawtismohan.

• Sa usa ka siyudad sa kasadpang Latvia, gikahibalag sa usa ka Saksi ang 85-anyos nga si Anna, kinsa nagpakitag tinuod nga interes ug miuyon nga magtuon sa Bibliya. Ang iyang anak nga babaye ug ubang mga membro sa pamilya misupak pag-ayo kaniya. Apan wala kana tugoti ni Anna o ang iyang pagkaedaran ug dili maayong panglawas nga mopugong kaniya sa pagpadayon sa iyang pagtuon sa Bibliya.

Usa ka adlaw niana, gisultihan ni Anna ang iyang anak nga babaye nga magpabawtismo na siya. “Kon magpabawtismo ka, ipadala ti ka sa nursing home,” miingon ang anak ni Anna. Bisan pa niana, kini nga hulga wala makapugong kang Anna. Tungod sa iyang kahimtang sa lawas, siya gibawtismohan diha sa iyang balay.

Unsay reaksiyon sa anak ni Anna niini? Nausab ang iyang tinamdan, ug iyang gilutoan ug espesyal nga pagkaon ang iyang inahan human sa bawtismo. Dayon iyang gipangutana ang iyang inahan, “Karon nga nabawtismohan ka na, unsay imong gibati?” Ang tubag ni Anna? “Sama sa usa ka bag-ong nahimugso!”

• Sa Disyembre 1998, nahibalag sa duha ka Saksi ang usa ka retiradong opisyal sa kasundalohan sa kanhing Unyon Sobyet. Sanglit nagtuo siya sa usa ka Maglalalang, gidawat niya ang usa ka pagtuon sa Bibliya, ug miduyog ang iyang asawa sa ulahi. Tulin ang ilang pag-uswag ug wala magdugay sila nahimong dili-bawtismadong mga magmamantala. Sa misunod nga ting-init, ang kanhing opisyal nabawtismohan. Kining dakong gugma sa magtiayon sa espirituwal nga mga butang nahimong usa ka pangpadasig alang sa tanan diha sa kongregasyon. Dugang pa, miboluntaryo sila sa pagbag-o sa usa ka puy-anan sa ilang dapit aron mahimong nindot nga Kingdom Hall.