Kita ang Matang nga May Pagtuo

Pagpahayag sa Gingharian sa Diyos sa mga Isla sa Fiji

SI Jesu-Kristo naghisgot kanhi bahin sa duha ka dalan. Ang usa maoy luag ug motultol ngadto sa kamatayon. Ang laing dalan maoy sigpit apan motultol ngadto sa kinabuhi. (Mateo 7:13, 14) Aron sa pagtabang sa mga tawo sa pagpili sa hustong dalan, katuyoan ni Jehova nga Diyos nga ang maayong balita sa Gingharian igasangyaw sa tibuok kalibotan. (Mateo 24:14) Busa, ang mga tawo bisan diin nagapaminaw sa mensahe sa Gingharian, ug ang uban mipili sa kinabuhi pinaagi sa pagkahimong “ang matang nga adunay pagtuo ngadto sa pagtipig nga buhi sa kalag.” (Hebreohanon 10:39) Dapiton ka namo sa pagbasa bahin sa pagpili alang sa kinabuhi nga gihimo sa uban sa Fiji ug sa ubang kasikbit nga mga isla sa Habagatang Pasipiko.

Nagsalig Sila Kang Jehova

Nag-eskuyla pa lang si Mere sa dihang nadungog niya sa unang higayon ang mensahe sa Gingharian sa 1964. Tungod kay nagpuyo siya sa usa ka hilit nga isla, wala kaayo siyay pakigkontak sa mga Saksi ni Jehova. Apan, sa ngadtongadto nakabaton siyag tukma nga kahibalo sa Bibliya. Nianang panahona, naminyo na siya sa usa ka lalaki nga lider sa banay diha sa iyang baryo. Tungod sa desisyon ni Mere sa pagkinabuhi subay sa mga prinsipyo sa Bibliya, gimaltrato siya sa iyang bana ug sa mga paryente sa iyang bana, ug giayran siya sa iyang mga katagibaryo. Bisan pa niana, gibawtismohan siya sa 1991.

Wala madugay human niana, ang bana ni Mere, si Josua, nalukmay ug misugod pa gani sa pagtambong sa panaghisgot sa Bibliya nga himoon ni Mere uban sa ilang mga anak. Mihunong si Josua sa pagsimba sa Methodist Church. Apan, ingong lider, nagdumala gihapon siya sa senemanang mga miting sa baryo. Para sa mga tagabaryo, mabudhion si Josua, tungod kay ang Methodist Church maoy usa ka dakong bahin sa kinabuhi diha sa baryo sa Fiji. Busa, gihaylo sa lokal nga pastor si Josua sa pagbalik ngadto sa iyang kanhing relihiyon.

Maisogong gisulti ni Josua nga siya ug ang iyang pamilya nakahimo na sa ilang pagpili ug determinado sila sa pagsimba kang Jehova nga Diyos “pinaagi sa espiritu ug kamatuoran.” (Juan 4:24) Pagkasunod nga miting sa baryo, gipalayas sa kinalabwang pangulo gikan sa baryo si Josua ug ang iyang pamilya ingong mga sinalikway. Gitagalan silag pito ka adlaw sa pagbiya sa isla ug sa ilang balay, yuta, ug mga pananom—oo, sa tanan nilang panginabuhi.

Ang espirituwal nga mga igsoon sa laing isla miabag kang Josua ug sa iyang pamilya, nga mitabang kanila aron dunay kapuy-an ug yuta nga katamnan. Si Josua ug ang iyang kamagulangang anak nga lalaki bawtismado na karon, ug ang laing anak nga lalaki nag-alagad ingong dili-bawtismado nga magmamantala sa maayong balita. Si Mere di pa dugayng nagpalista ingong regular payunir (bug-os-panahong magmamantala sa Gingharian). Ang ilang pagpili sa pag-alagad kang Jehova miresulta sa pagkawala sa posisyon ug materyal nga mga kabtangan, apan sama ni apostol Pablo, ila kining giisip nga wala ra sa kumingking kon itandi sa ilang naangkon.—Filipos 3:8.

Usa ka Pagpili nga Naglangkit sa Tanlag

Ang pagpili sa pagsunod sa binansay-sa-Bibliya nga tanlag nagkinahanglag pagtuo ug kaisog. Mao gayod kini ang kahimtang sa bag-ong nabawtismohan nga si Suraang, usa ka batan-ong babaye nga nagpuyo sa Tarawa, usa sa mga isla sa Kiribati. Si Suraang nananghid nga dili na lang niya buhaton ang usa ka bahin sa iyang trabaho ingong nars sa ospital. Wala maangayi ang iyang hangyo, nga miresulta sa pagpadala kaniya ngadto sa usa ka hilit nga isla aron sa pagbantay sa gamayng klinika diin nabulag siya gikan sa uban nga sama niyag tinuohan.

Nianang islaha naandan na para sa tanang bag-ong abot sa paghalad ngadto sa “engkanto” sa maong lugar. Ang mga tawo nagtuo nga mamatay ang dili mobuhat niini. Sanglit midumili si Suraang nga  tugotan kining maong buhat sa idolatriya nga himoon alang kaniya ug sa iyang mga kauban, naghulat ang mga tagabaryo nga tuk-on siya sa nasuko nga engkanto. Sa dihang walay daotang nahitabo kang Suraang o sa iyang mga kauban, daghang kahigayonan ang nabuksan aron makahatag siya ug maayong pamatuod.

Apan wala pa matapos ang mga pagsulay ni Suraang. Giisip sa pipila ka batan-ong mga lalaki nianang islaha nga usa ka hagit ang pagtental sa batan-ong mga babaye nga moduaw. Apan, wala mosaler kang Suraang ang ilang mga pagbirigbirig ug siya nakapabilin sa iyang integridad sa Diyos. Sa pagkatinuod, nakahimo siya sa pag-alagad ingong regular payunir, bisan pag 24 oras ang iyang pagserbisyo kada adlaw ingong nars.

Sa wala pa himoa ang usa ka salosalo para kang Suraang sa dihang hapit na siyang mobiya sa isla, ang mga tigulang sa baryo nag-ingon nga siya mao ang unang tinuod nga misyonaryo nga miduaw kanila. Tungod sa iyang lig-ong pagbarog alang sa mga prinsipyo sa Bibliya, ang ubang tawo sa maong isla nahimong madinawaton sa mensahe sa Gingharian.

Pisikal nga mga Sagubangonon

Tungod sa pagkahilit sa ubang mga baryo, ang katawhan ni Jehova kinahanglang maningkamot pag-ayo aron makapakigbahin sa ministeryo ug makatambong sa Kristohanong mga tigom. Tagda ang pananglitan sa upat ka bawtismadong mga Saksi—usa ka lalaki ug tulo ka babaye—kinsa mogugol ug daghang oras sa pagpadulong ug pagpauli gikan sa mga tigom. Ang ilang pagbaktas naglakip sa pagtabok ug tulo ka suba pagpadulong ug pagpauli. Kon dako ang tubig, ang igsoong lalaki maoy unang molangoy patabok, nga magguyod ug dakong kaldero nga gisudlan sa ilang mga bag, mga libro, ug mga sinina para sa tigom. Dayon molangoy siya pabalik sa pagtabang sa tulo ka igsoong babaye.

Ang laing gamayng grupo, nga motambong sa mga tigom sa hilit nga isla sa Nonouti sa Kiribati, nag-atubang ug lahi nga mga sagubangonon. Pito o walo lang ka tawo ang masulod sa balay nga ilang tigoman. Ang ubang manambong manglingkod sa gawas ug magtan-aw sa sulod nga dunay salipod nga alambreng bungbong. Ang tigomanan dayag nga makita sa ubang mga tagabaryo nga nagngadto-nganhi sa ilang dagkong mga simbahan. Siyempre, ang mga alagad ni Jehova nahibalo nga ang tinuod nga makapahimuot sa panglantaw ni Jehova mao ang mga tawo, dili mga tinukod. (Hageo 2:7) Ang nag-inusarang bawtismadong igsoong babaye sa isla tigulang na ug dili makalakaw ug layo. Apan, ginatabangan siya sa ministeryo sa usa ka batan-ong babaye, nga usa ka di-bawtismadong magmamantala nga maoy nagtulod sa kareton nga iyang sakyan. Pagkadako sa pagpabili nga ilang gipakita alang sa kamatuoran!

Ang kapin sa 2,100 ka magmamantala nga nag-alagad diha sa mga isla sa Fiji determinado sa pagpadayon sa pagmantala sa maayong balita sa Gingharian sa Diyos. Ug masaligon sila nga daghan pa ang mahimong “ang matang nga adunay pagtuo ngadto sa pagtipig nga buhi sa kalag.”

[Mapa sa panid 8]

(Alang sa aktuwal nga pagkahan-ay, tan-awa ang publikasyon)

Australia

Fiji