1-2. (a) Nganong daghan karon ang wala kaayoy pagsalig sa mga tawo nga naay awtoridad? (b) Unsay atong hisgotan niining artikuloha?

 KARON, daghan ang wala kaayoy pagsalig sa mga tawo nga naay awtoridad. Nakita nila nga ang mga gobyerno ug mga balaod sagad mopabor sa mga dato ug impluwensiyado, ug dili mohatag ug hustisya sa mga pobre. Husto gyod ang giingon sa Bibliya: “Ang tawo nagmando sa tawo alang sa iyang ikadaot.” (Eccl. 8:9) Naa poy mga lider sa relihiyon nga dili maayog binuhatan. Tungod niini, ang ubang tawo nawad-ag pagsalig sa Diyos. Busa kon naay magpa-Bible study nato, kinahanglan nato siyang tabangan nga mosalig kang Jehova ug sa mga representante Niya dinhi sa yuta.

² Siyempre, dili lang ang mga Bible study ang kinahanglang makakat-on sa pagsalig kang Jehova ug sa iyang organisasyon. Bisan kita nga dugay na sa kamatuoran kinahanglang padayong mosalig nga ang pamaagi ni Jehova mao gyod ang pinakamaayo. Usahay, naay mga situwasyon nga posibleng magsulay sa atong pagsalig kang Jehova. Niining artikuloha, atong hisgotan ang tulo sa maong mga situwasyon: (1) dihang mobasa tag mga estorya sa Bibliya, (2) dihang makadawat tag direksiyon gikan sa organisasyon ni Jehova, ug (3) dihang makaatubang tag kalisdanan sa umaabot.

3. Nganong masulayan usahay ang atong pagsalig kang Jehova dihang magbasa tag estorya sa Bibliya?

 ³ Dihang magbasa ta sa Pulong sa Diyos, makapangutana tingali  ta bahin sa pagtratar ni Jehova sa pipila ka tawo ug bahin sa pipila niya ka desisyon. Pananglitan, sa basahon sa Numeros, atong mabasa nga gisentensiyahan ni Jehova ug kamatayon ang usa ka Israelinhon nga nangahoy panahon sa Igpapahulay. Sa basahon sa Ikaduhang Samuel, atong nakat-onan nga gatosan ka tuig sa ulahi, gipasaylo ni Jehova si Haring David sa iyang sala nga pagpanapaw ug pagpatay. (Num. 15:32, 35; 2 Sam. 12:9, 13) Tingali maghunahuna ta, ‘Nganong gipasaylo man ni Jehova ang pagpatay ug pagpanapaw ni David pero gisentensiyahan Niyag kamatayon ang usa ka tawo tungod sa sala nga morag dili ra kaayo bug-at?’ Aron matubag ni nga pangutana, konsiderahon nato ang tulo ka butang nga angay natong hinumdoman dihang magbasa tag Bibliya.

4. Nganong ang Genesis 18:20, 21 ug Deuteronomio 10:17 makapalig-on sa atong pagsalig sa mga desisyon ni Jehova?

⁴ Dili kanunayng ihatag sa Bibliya ang tanang detalye. Pananglitan, nahibalo ta nga si David tinuod gyod nga naghinulsol sa iyang mga sala. (Sal. 51:2-4) Pero unsang klaseha sa tawo kadtong milapas sa balaod sa Igpapahulay? Nagbasol ba siya sa iyang gihimo? Gisupak na ba niya sa una ang balaod ni Jehova? Gipasidan-an na ba siya sa una pero wala niya ni tagda? Walay giingon ang Bibliya. Pero makaseguro ta niini: “Walay inhustisya” kang Jehova. (Deut. 32:4) Dihang mohimo siyag desisyon, iyang konsiderahon ang tanang detalye. Dili siya parehas sa mga tawo nga sagad modesisyon base lang sa mga estorya-estorya, diskriminasyon, o sa bisan unsa, nga maoy hinungdan nga masayop sila sa ilang konklusyon. (Basaha ang Genesis 18:20, 21; Deuteronomio 10:17.) Dihang mas molawom ang atong kahibalo bahin kang Jehova ug sa iyang mga sukdanan, mas molig-on pod ang atong pagsalig sa iyang mga desisyon. Bisag naa tay mga pangutana nga dili pa matubag karon, ang atong nahibaloan bahin sa atong Diyos igo na nga makaingon ta nga siya “matarong sa tanan niyang buhat.”—Sal. 145:17.

5. Kay dili ta perpekto, sa unsang paagi ni makaapektar sa atong konklusyon sa usa ka situwasyon? (Tan-awa sab ang kahong “ Sayop nga Konklusyon kay Dili Perpekto.”)

⁵ Dili kanunayng husto ang atong konklusyon kay dili ta perpekto. Gihimo ta sa larawan sa  Diyos, maong gusto nato nga patas ang pagtratar sa mga tawo. (Gen. 1:26) Pero kay dili ta perpekto, puwedeng masayop ang atong konklusyon, bisan pag naghunahuna ta nga nahibalo ta sa tanang detalye. Pananglitan, hinumdomi nga si Jonas wala gyod malipay sa desisyon ni Jehova nga pakitaag kaluoy ang mga tawo sa Nineve. (Jon. 3:10–4:1) Pero unsay resulta sa desisyon ni Jehova? Kapig 120,000 ka mahinulsolong tawo sa Nineve ang naluwas! Klaro nga si Jonas ang nasayop, dili si Jehova.

6. Nganong dili obligado si Jehova nga mohatag ug eksplinasyon sa iyang mga desisyon?

⁶ Si Jehova dili obligado nga mohatag ug eksplinasyon sa iyang mga desisyon. Tinuod, gitugotan ni Jehova ang iyang mga alagad sa una nga isulti ang ilang gibati bahin sa mga desisyon nga iyang gihimo o himoon. (Gen. 18:25; Jon. 4:2, 3) Ug dihay mga higayon nga mihatag siyag eksplinasyon sa iyang desisyon. (Jon. 4:10, 11) Pero si Jehova dili obligado nga mohimo niana. Kay siya ang atong Maglalalang, dili siya kinahanglang mangonsulta nato bahin sa iyang gihimo o himoon.—Isa. 40:13, 14; 55:9.

7. Sa unsa tingali ta malisdan, ug ngano?

⁷ Uyon gyod ta nga kanunayng husto ang ginahimo ni Jehova. Pero malisdan tingali ta nga mosalig niadtong gitudlo niya nga manguna kanato. Basig maghunahuna ta kon kadtong nanguna sa organisasyon ni Jehova milihok ba gyod base sa direksiyon ni Jehova o base lang sa ilang kaugalingong desisyon. Tingali mao nay gihunahuna sa ubang tawo sa kapanahonan sa Bibliya. Konsideraha ang mga pananglitan nga gihisgotan sa  parapo 3. Ang paryente niadtong milapas sa balaod sa Igpapahulay tingali naghunahuna kon gikonsulta ba gyod ni Moises si Jehova sa wala pa ipakanaog ang sentensiya nga kamatayon. Ug ang higala ni Urias nga Hitihanon, kansang asawa nanapaw uban kang David, posibleng naghunahuna nga gigamit ni David ang iyang posisyon ingong hari aron dili siya masilotag kamatayon. Si Jehova naay pagsalig niadtong iyang gitudlo nga manguna sa organisasyon ug sa kongregasyon. Busa kon wala tay pagsalig nila, dili ta makaingon nga naa tay pagsalig kang Jehova.

8. Base sa Buhat 16:4, 5, nganong makaingon ta nga ang pagdumala sa kongregasyon karon parehas niadtong sa unang siglo?

⁸ Karon, si Jehova naggiya sa yutan-ong bahin sa iyang organisasyon pinaagi sa “matinumanon ug maalamong ulipon.” (Mat. 24:45) Sama sa nagamandong lawas sa unang siglo, kini nga ulipon nagdumala sa katawhan sa Diyos sa tibuok kalibotan ug naghatag ug direksiyon sa mga ansiyano sa kongregasyon. (Basaha ang Buhat 16:4, 5.) Dayon, ipadapat sa mga ansiyano ang maong direksiyon diha sa kongregasyon. Ikapakita nato nga naa tay pagsalig sa pamaagi ni Jehova pinaagi sa pagsunod sa direksiyon nga atong madawat gikan sa organisasyon ug sa mga ansiyano.

9. Sa unsang situwasyon nga malisdan tingali ta sa pagsunod sa desisyon sa mga ansiyano, ug ngano?

⁹ Usahay, malisdan tingali ta sa pagsunod sa desisyon sa mga ansiyano. Pananglitan, sa milabayng mga tuig, naay gihimong kausaban sa pag-organisar sa daghang kongregasyon ug sirkito. Naay mga kahimtang nga gihangyo sa mga ansiyano ang mga igsoon nga mobalhin sa laing kongregasyon aron mapahimuslan pag-ayo ang bakanteng mga lingkoranan sa Kingdom Hall. Kon hangyoon ta nga  mobalhin ug kongregasyon, lisod tingali para nato nga biyaan ang atong mga higala ug pamilya. Giyahan ba sa balaang espiritu ang mga ansiyano kon asa iasayn ang matag igsoon? Dili. Tungod ana, tingali malisdan ta sa pagsunod sa direksiyon nga atong madawat. Pero gisalig ni Jehova sa mga ansiyano ang paghimo niana nga desisyon, mao nga kinahanglan pod tang mosalig nila. *

10. Base sa Hebreohanon 13:17, nganong angay tang magpasakop sa mga ansiyano?

¹⁰ Nganong kinahanglan tang mosuportar sa desisyon sa mga ansiyano bisag lahi unta ang atong gusto? Kay pinaagi niana, makatabang ta nga padayong magkahiusa ang katawhan sa Diyos. (Efe. 4:2, 3) Ang mga kongregasyon mouswag kon ang tanan mapainubsanong magpasakop sa desisyon sa mga ansiyano. (Basaha ang Hebreohanon 13:17.) Labaw sa tanan, ikapakita nato kang Jehova nga naa tay pagsalig niya dihang magpasakop ta niadtong iyang gipili nga mag-atiman kanato.—Buh. 20:28.

11. Unsay makapalig-on sa atong pagsalig sa desisyon sa mga ansiyano?

¹¹ Mapalig-on nato ang atong pagsalig sa desisyon sa mga ansiyano kon atong hinumdoman nga mangayo silag balaang espiritu dihang maghisgot ug mga butang nga makaapektar sa kongregasyon. Susihon pod nila pag-ayo ang mga prinsipyo sa Bibliya ug ang mga instruksiyon gikan sa organisasyon ni Jehova. Gusto gyod nilang mapalipay si Jehova ug maatiman pag-ayo ang iyang katawhan. Kining matinumanong mga brader nahibalo nga manubag sila sa Diyos sa ilang paagi sa pagtuman sa ilang responsibilidad. (1 Ped. 5:2, 3) Hunahunaa ni: Ang kalibotan nabahinbahin sa rasa, relihiyon, ug politika, pero ang katawhan ni Jehova nagkahiusa sa pagsimba sa bugtong matuod nga Diyos. Naposible lang ni tungod kay gipanalanginan ni Jehova ang iyang organisasyon!

12. Unsay angayng konsiderahon sa mga ansiyano aron mahibaloan kon mahinulsolon ba ang nakasala?

¹² Gihatagan ni Jehova ang mga ansiyano ug bug-at nga responsibilidad sa pagmentinar sa kahinlo sa kongregasyon. Kon ang usa ka Kristohanon makahimog seryosong sala, gidahom ni Jehova nga susihon sa mga ansiyano kon angay ba siyang magpabilin sa kongregasyon. Kinahanglan pod nilang susihon kon naghinulsol ba gyod siya sa iyang sala. Moingon tingali siya nga naghinulsol siya, pero gidumtan ba gyod niya ang iyang gihimo? Naningkamot ba siya nga dili otrohon ang iyang sala? Kon naimpluwensiyahan siya sa pagpakasala tungod sa dili maayong mga higala, andam ba siyang mobiya nila? Ang mga ansiyano mag-ampo kang Jehova, ug ilang konsiderahon ang detalye sa nahitabo base sa giingon sa Bibliya. Susihon pod nila kon unsay gibati sa nakasala bahin sa iyang gihimo. Dayon modesisyon sila kon ang nakasala angay bang magpabilin sa kongregasyon. Naay mga kahimtang nga kinahanglan gyod siyang i-disfellow.—1 Cor. 5:11-13.

13. Unsa tingali atong mahunahunaan kon ma-disfellow ang atong higala o paryente?

¹³ Sa unsang paagi tingali masulayan ang atong pagsalig sa mga ansiyano? Kon ang gi-disfellow dili nato suod nga higala o paryente, madawat ra tingali dayon nato ang desisyon sa mga ansiyano. Pero unsay atong bation kon suod nato ang na-disfellow? Maghunahuna tingali ta nga wala konsideraha sa mga ansiyano ang tanang detalye, o kaha magduhaduha ta kon ang ilang desisyon mao  ba gyod ang desisyon ni Jehova. Unsay makatabang aron padayon tang mosalig sa desisyon sa mga ansiyano?

14. Unsay makatabang nato kon modesisyon ang mga ansiyano nga i-disfellow ang atong higala o paryente?

¹⁴ Angay natong hinumdoman nga ang pag-disfellow maoy kahikayan ni Jehova. Makahatag nig kaayohan sa kongregasyon ug posibleng makatabang pod sa nakasala. Kon ang makasasala nga dili mahinulsolon magpabilin sa kongregasyon, puwede niyang maimpluwensiyahan ang uban. (Gal. 5:9) Gawas pa, maghunahuna tingali siya nga dili ra seryoso ang iyang sala ug dili tingali siya maningkamot nga bag-ohon ang iyang panghunahuna ug binuhatan aron mabalik ang iyang maayong relasyon kang Jehova. (Eccl. 8:11) Makaseguro ta nga dili sayonsayonon sa mga ansiyano ang pagdesisyon kon angay bang i-disfellow ang usa ka tawo. Nahibalo sila nga sama sa mga maghuhukom sa karaang Israel, sila “maghukom dili alang sa tawo kondili alang kang Jehova.”—2 Cron. 19:6, 7.

15. Nganong kinahanglan nga mas mosalig ta karon sa direksiyon ni Jehova?

¹⁵ Hapit na kaayo ang kataposan niining daotang kalibotan, maong mas labaw na nga kinahanglan tang mosalig karon sa pamaagi ni Jehova. Ngano? Sa dakong kasakitan, makadawat tingali tag mga instruksiyon nga morag dili haom o dili praktikal. Siyempre, dili direktang makig-estorya nato si Jehova. Posibleng maghatag siyag direksiyon pinaagi sa mga brader nga iyang gitudlo nga manguna kanato. Dili nâ ang panahon nga magduhaduha sa direksiyon o moingon, ‘Desisyon ba gyod ni ni Jehova, o ila ra ning kaugalingong desisyon?’ Nianang importante kaayong panahon, mosalig ba ka kang Jehova ug sa iyang organisasyon? Ang tubag magdepende sa kon unsay imong pag-isip karon sa mga direksiyon sa organisasyon. Kon mosalig ug mosunod dayon ka sa mga direksiyon karon, posibleng mao pod nay imong buhaton panahon sa dakong kasakitan.—Luc. 16:10.

16. Sa umaabot, sa unsang paagi masulayan ang atong pagsalig sa paghukom ni Jehova?

¹⁶ Naa pay laing butang nga angay natong konsiderahon—ang paghukom ni Jehova dihang taposon niya kining daotang kalibotan. Karon, naglaom ta nga daghan niadtong wala mag-alagad kang Jehova, apil ang atong dili Saksing mga paryente, modesisyon nga moalagad niya. Pero sa Armagedon, si Jehova, pinaagi kang Jesus, maoy modesisyon kon unsay ilang dangatan. (Mat. 25:31-33; 2 Tes. 1:7-9) Dili kitay modesisyon  kon kinsay makadawat sa kaluoy ni Jehova ug kon kinsay dili. (Mat. 25:34, 41, 46) Mosalig ba unya ta sa paghukom ni Jehova o moundang tag alagad niya kay dili ta mouyon sa iyang desisyon? Klaro nga kinahanglan natong palig-onon ang atong pagsalig kang Jehova karon aron bug-os tang mosalig niya sa umaabot.

17. Sa unsang paagi makabenepisyo ta sa paghukom ni Jehova dihang taposon niya kining daotang kalibotan?

¹⁷ Imadyina kon unsay atong bation sa bag-ong kalibotan sa Diyos dihang atong makita ang resulta sa paghukom ni Jehova. Wala na ang bakak nga relihiyon ug ang hakog nga sistema sa negosyo, apil ang mga gobyerno nga nagdaogdaog ug nagpaantos pag-ayo sa mga tawo sukad pa sa una. Wala na pod unya ang mga problema sa panglawas ug pagkatigulang, ug dili na mamatay ang atong mga minahal. Si Satanas ug ang mga demonyo dili na unya makahimog kadaot sulod sa usa ka libo ka tuig. Ang tanang daotang epekto sa ilang pagrebelde mawala na. (Pin. 20:2, 3) Nianang panahona, mapasalamaton gyod kaayo ta kay misalig ta sa pamaagi ni Jehova!

18. Base sa Numeros 11:4-6 ug 21:5, unsang mga leksiyon ang atong makat-onan sa mga Israelinhon?

¹⁸ Sa bag-ong kalibotan, masulayan kaha ang atong pagsalig sa pamaagi ni Jehova? Pananglitan, konsideraha ang nahitabo dili dugay human makagawas ang mga Israelinhon gikan sa pagkaulipon sa Ehipto. Ang uban mireklamo kay gimingaw sila sa preskong pagkaon didto sa Ehipto ug giluod na sa mana nga gihatag ni Jehova. (Basaha ang Numeros 11:4-6; 21:5.) Maghunahuna pod kaha tag ingon ana human sa dakong kasakitan? Wala ta mahibalo kon unsa ka dakong trabaho ang paghinlo sa yuta ug ang anam-anam nga paghimo niini nga Paraiso. Tingali sa sinugdanan, daghan kaayog trabaho ug dili dayon hayahay ang kinabuhi. Moreklamo ba ta sa itagana ni Jehova nianang panahona? Usa ka butang ang segurado: Kon atong apresyahon ang tagana ni Jehova karon, dakog posibilidad nga ato pong apresyahon ang iyang mga tagana nianang panahona.

19. Unsaon nimo pagsumaryo ang pangunang mga punto niining artikuloha?

¹⁹ Ang pamaagi ni Jehova kanunayng husto. Kinahanglang kombinsido ta niana. Kinahanglang mosalig pod ta niadtong gisaligan ni Jehova sa pagpatuman sa iyang mga instruksiyon. Ayawg kalimti ang giingon ni Jehova pinaagi kang propetang Isaias: “Mahimo mong kusgan kon magpabilin mong kalmado ug mosalig mo.”—Isa. 30:15.