Natawo ko sa Quebec City, sa nagsultig French nga probinsiya sa Canada, ang Quebec. Gimatuto ko sa akong mahigugmaong ginikanan, si Louis ug Zélia. Ang akong papa hilomon ug himasa. Ganahan kong magsulat ug nangandoy ko nga mahimong journalist inigdako nako.

Dihang mga 12 anyos ko, giduaw mi sa kauban ni Papa sa trabaho nga si Rodolphe Soucy ug sa iyang higala. Mga Saksi ni Jehova sila. Wala kaayo koy nahibaloan bahin sa mga Saksi ug dili ko interesado sa ilang relihiyon. Pero nakadayeg ko sa ilang lohikal nga paagi sa pagtubag sa among mga pangutana gamit ang Bibliya. Nakadayeg sab ang akong ginikanan, maong misugot ming mag-Bible study.

Niadtong panahona, nag-eskuwela ko sa Katoliko nga eskuwelahan. Usahay makig-estorya ko sa akong mga klasmet bahin sa akong nakat-onan sa Bibliya. Ngadtongadto, nahibaloan ni sa akong mga maestro nga mga pari. Imbes gamiton ang Bibliya aron pamatud-an nga sayop ko, giakusahan ko sa usa kanila atubangan sa klase nga rebelyoso kuno ko! Bisag na-stress kaayo ko ato, nahimo tong panalangin kay nakatabang to nga makita nako nga ang gitudlo sa eskuwelahan bahin sa relihiyon dili diay uyon sa Bibliya. Nakahunahuna ko nga dili na mosulod niadtong eskuwelahana. Gitugtan ko sa akong ginikanan nga mobalhig eskuwelahan.

Nagpadayon ko pagtuon sa Bibliya, pero wala kaayo ko mouswag kay mahadlok kong mamalaybalay. Ang Simbahang Katoliko impluwensiyado ug supak kaayo sa atong buluhatong pagsangyaw. Si Maurice Duplessis, ang premier sa Quebec, suod nga kaalyado sa simbahan. Suportado niya ang mga tawo nga magsamoksamok ug mangatake sa mga Saksi. Niadtong panahona,  nagkinahanglan gyod ug kaisog ang pagsangyaw.

Ang usa ka brader nga nakatabang nako nga mawala ang akong kahadlok mao si John Rae, graduwado sa ikasiyam nga klase sa Gilead. Siya eksperyensiyado kaayo pero lumo, mapainubsanon, ug daling duolon. Panagsa ra ko niyang tambagan nga direkta, pero daghan kog nakat-onan sa iyang maayong ehemplo. Maglisod siya pagsultig French, maong sagad ako siyang ubanan sa ministeryo ug tabangan nga makakat-on sa maong pinulongan. Ang pirme namong pag-uban ni John nakatabang nako nga mobarog gyod sa kamatuoran. Napulo ka tuig human ko masangyawi, nabawtismohan ko niadtong Mayo 26, 1951.

Halos mga payunir ang membro sa gamay namong kongregasyon sa Quebec City. Tungod sa ilang maayong impluwensiya, napalihok ko sa pagpayunir. Sa una, Bibliya ray among gamiton sa pagsangyaw. Kay dili mi mogamit ug literatura, kinahanglang mas epektibo ming mogamit sa Kasulatan. Busa naningkamot ko nga mapamilyar sa mga teksto sa Bibliya nga magamit nako sa pagdepensa sa kamatuoran. Pero daghan ang dili mobasa bisan sa Bibliya kon wala niy imprimatur, o opisyal nga pag-uyon, sa Simbahang Katoliko.

Niadtong 1952, naminyo ko kang Simone Patry, usa ka matinumanong sister sa among lugar. Namalhin mi sa Montreal, ug wala pay usa ka tuig human sa among kasal, nakabaton mig anak nga babaye, si Lise. Bisag miundang ko pagpayunir sa hapit na ming magminyo, naningkamot mi ni Simone nga himoong simple ang among kinabuhi aron mas daghan mig panahon sa mga buluhaton sa kongregasyon ingong pamilya.

Human sa 10 ka tuig, naghunahuna ko nga mobalik pagpayunir. Pagka-1962, miadto ko sa Canada Bethel aron moeskuwelag usa ka bulan sa Kingdom Ministry School para sa mga ansiyano, ug nakauban nako sa kuwarto si Brader Camille Ouellette. Nakadayeg gyod ko sa kadasig ni Camille sa ministeryo, ilabina kay pamilyado siya. Kaniadto, gamay ra kaayo ang mga igsoon sa Quebec nga magpayunir samtang magpadakog anak, pero mao nay tumong ni Camille. Sa panahon nga nagkauban mi, iya kong gidasig nga pamalandongon ang akong situwasyon. Human lang sa pipila ka bulan, nakita nako nga makaregular payunir ko pag-usab. Gikuwestiyon sa uban ang akong desisyon, pero mipadayon gyod  ko, kay kombinsido ko nga panalanginan ni Jehova ang akong mga paningkamot sa pagpauswag sa akong ministeryo.

Pagka-1964, kami ni Simone giasayn ingong mga espesyal payunir sa among lugar sa Quebec City, ug nag-alagad mi didto sa misunod nga pipila ka tuig. Niadtong panahona, arang-arang na ang kahimtang sa pagsangyaw, pero nakasinati gihapon mig pagsupak.

Usa ka Sabado sa hapon niana, gidakop ko sa Sainte-Marie, gamayng lungsod duol sa Quebec City. Gidala ko sa usa ka polis sa presinto ug gipriso ko kay namalaybalay kuno ko nga walay permit. Sa ulahi, gipaatubang ko nila sa huwes nga si Baillargeon, nga isog kaayong tan-awon. Iya kong gipangutana kon kinsay akong abogado. Pag-ingon nako nga si Glen How, * nga iladong Saksi nga abogado, siya gikulbaan ug miingon: “Siya? Ayay!” Ilado kaayo si Glen How sa pagdepensa sa mga Saksi niadtong panahona. Wala madugay, giingnan ko sa korte nga dili na idayon ang kaso.

Tungod sa pagsupak sa atong buluhaton didto sa Quebec, lisod pod kaayong mangitag kaabangang tigomanan. Ang nakita lang sa among kongregasyon mao ang daang garahe nga walay heater. Aron mainitan mi panahon sa tingtugnaw, ang mga igsoon mogamit ug oil heater. Sagad mag-alirong mi niana mga pipila ka oras sa dili pa magsugod ang tigom aron mag-estorya bahin sa makapadasig nga mga eksperyensiya.

Makapalipay gyod nga makita ang pag-uswag sa pagsangyaw sulod sa katuigan. Sa katuigan sa 1960, diha ray pipila ka gagmayng kongregasyon sa Quebec City, sa rehiyon sa Côte-Nord, ug sa Gaspé Peninsula. Karon, duna nay kapig duha ka sirkito niining mga dapita, ug ang mga igsoon magtigom na sa nindot nga mga Kingdom Hall.

Pagka-1970, kami ni Simone gidapit sa sirkitong buluhaton. Dayon pagka-1973, giasayn mi sa distritong buluhaton. Niadtong mga panahona, daghan kog nakat-onan sa eksperyensiyadong mga brader sama ni Laurier Saumur * ug David Splane, * nga parehong naa kaniadto sa nagapanawng buluhaton. Kada humag asembliya, magbayloay mi ni Brader Splane ug mga sugyot kon unsaon pagpauswag sa among pagpanudlo. Kahinumdom ko nga kas-a giingnan ko niya: “Léonce, ganahan ko sa imong kataposang pakigpulong. Maayo imong pagkahatag, pero kon ako to, tulo ka pakigpulong ang akong mahimo sa tanan nimong gihisgotan!” Sagad, daghan ra kaayo kog iapil nga impormasyon sa akong mga pakigpulong. Kinahanglang makakat-on ko nga menosan ang mga detalye.

Ang mga tigdumala sa distrito giasayn nga modasig sa mga tigdumala sa sirkito. Pero nailhan  kaayo ko sa daghang igsoon sa Quebec. Dihang mobisita mig mga sirkito, gusto nilang makigpartner nako sa pagsangyaw. Ganahan kong mosangyaw uban nila, pero wala kaayo nako mahatagig panahon ang tigdumala sa sirkito. Usa ka higayon niana, gipahinumdoman ko sa usa ka buotang tigdumala sa sirkito: “Maayo man nga mohatag kag panahon sa mga igsoon, pero ayawg kalimti nga akoy imong giduaw aning semanaha. Nagkinahanglan pod kog pagdasig!” Kining maayong tambag nakatabang nako nga mahimong mas balanse.

Pero niadtong 1976, dihay makapaguol ug wala damhang panghitabo sa among kinabuhi. Ang akong pinalanggang asawa, si Simone, grabeng nasakit ug namatay. Maayo kaayo siya nga asawa kay andam siyang mosakripisyo ug gihigugma niya pag-ayo si Jehova. Kay nagkugi kog maayo sa ministeryo, nalahutay nako ang akong kagul-anan. Mapasalamaton ko kang Jehova sa iyang mahigugmaong tabang nianang lisod nga panahon. Sa ulahi, naminyo ko kang Carolyn Elliott, usa ka kugihang payunir nga Iningles ug sinultihan nga miadto sa Quebec aron mag-alagad sa dapit diin dako ang panginahanglan. Dali siyang duolon ug interesado kaayo sa uban, ilabina sa mga maulawon o magul-anon. Dako gyong panalangin nga nakauban nako siya sa nagapanawng buluhaton.

Niadtong Enero 1978, giasayn ko nga motudlo sa unang Pioneer Service School sa Quebec. Gikulbaan kaayo ko kay ang kurikulum bag-o sa ako ug sa mga estudyante. Maayo na lang kay ang unang klase nga akong gitudloan daghag eksperyensiyadong payunir. Bisag ako ang instruktor, daghan kog nakat-onan sa mga estudyante!

Sa 1978, ang “Madaogong Pagtuo” Internasyonal nga Kombensiyon gihimo diha sa Olympic Stadium sa Montreal. Kadto ang kinadak-ang kombensiyon sukad sa Quebec, ug kapig 80,000 ang nanambong. Naasayn ko sa News Service  Department. Nakig-estorya ko sa daghang journalist ug nalipay ko kay daghan silag positibong report bahin kanato. Giinterbiyo mi nila para sa programa sa TV ug radyo, nga tanantanan miabot ug kapig 20 ka oras, ug gatosan ka report bahin nato ang migawas sa mga mantalaan. Dako gyod to nga pamatuod!

Sukad sa akong bawtismo, didto ko nag-alagad sa Quebec diin French ang sinultihan. Pero pagka-1996, dihay dakong kausaban. Naasayn ko sa Iningles ug sinultihan nga distrito sa Toronto. Gibati nako nga dili ko kuwalipikado ug nahadlok kong mopakigpulong kay dili kaayo ko maayong mo-Iningles. Nagkinahanglan kog dugang pa nga mga pag-ampo ug mas mosalig pa gyod kang Jehova.

Kaniadto, gikulbaan kaayo ko dihang naasayn ko niana nga distrito, pero karon makaingon ko nga makapalipay gyod kadtong duha ka tuig nga pag-alagad nako sa Toronto. Si Carolyn mapailobong mitabang nako nga makabatog kompiyansa sa pagsultig Iningles, ug ang mga igsoon matinabangon kaayo ug makapadasig. Dali ra ming nakabaton ug bag-ong mga higala.

Gawas sa ubang kalihokan ug sa mga pagpangandam para sa asembliya sa hinapos sa semana, sagad mamalaybalay kog mga usa ka oras sa Biyernes sa gabii. Ang uban tingali moingon, ‘Nganong mosangyaw pa man nga asembliya na man inigkaugma?’ Pero para nako, makapadasig kaayo ang ministeryo. Bisan karon, makapalipay gihapon nako ang pagsangyaw.

Niadtong 1998, kami ni Carolyn gireasayn ingong mga espesyal payunir sa Montreal. Sa daghang katuigan, apil sa akong asaynment ang pag-organisar ug special public witnessing ug ang pagkontak sa news media aron matul-id ang sayop nga mga impormasyon bahin sa mga Saksi ni Jehova. Karon, nag-enjoy kaayo mi ni Carolyn sa pagsangyaw sa mga foreigner nga bag-ong namalhin sa Canada ug sagad ganahang mokat-on sa Bibliya.

Dihang mamalandong ko sa akong 68 ka tuig nga pag-alagad kang Jehova ingong bawtismadong Kristohanon, gibati nako nga gipanalanginan gyod ko. Nalipay kaayo ko kay nakakat-on ko nga mahalon ang ministeryo ug daghan kog natabangan nga mahibalo sa kamatuoran. Dihang nanagko na ang akong mga apo, ang akong anak nga si Lise ug ang iyang bana nagregular payunir. Malipay kaayo kong magtan-aw niya nga madasigon gihapon sa ministeryo. Ilabinang mapasalamaton ko sa mga igsoon kinsa pinaagi sa ilang maayong ehemplo ug maalamong tambag nakatabang nako nga mouswag sa espirituwal ug makaatiman sa lainlaing pribilehiyo sa pag-alagad. Nakita nako nga makapabilin lang tang matinumanon sa atong asaynment kon mosalig ta sa gamhanang balaang espiritu ni Jehova. (Sal. 51:11) Mapasalamaton gihapon ko kang Jehova kay gihatagan ko niyag pribilehiyo nga dayegon ang iyang ngalan!​—Sal. 54:6.