Gipalig-on gyod ni Jehova kining madasigong mga magsasangyaw. Nianang tuiga, midaghan ang mga colporteur, o payunir​—gikan sa 225 ngadto sa 350. Ug sa unang higayon, kapig 8,000 ka class worker, o magmamantala, ang nagreport sa ilang pagsangyaw ngadto sa hedkuwarter. Daghan kaayo ang naminaw sa mensahe, nga nagpamatuod nga gipanalanginan sila ni Jehova.

Niadtong Marso 21, 1920, si Joseph F. Rutherford, nga maoy nanguna sa mga Estudyante sa Bibliya niadtong panahona, mihatag ug pakigpulong nga nag-ulohang “Minilyong Buhi Karon Dili na Gayod Mamatay.” Ang mga Estudyante sa Bibliya naningkamot pag-ayo sa pagpangimbitar aron ang mga interesado makapaminaw niini nga pakigpulong. Giabangan nila ang usa sa kinadak-ang teatro sa New York City ug nanagtag silag mga 320,000 ka imbitasyon.

Mas daghan ang mitambong kay sa ilang gidahom. Ang teatro nga kapig 5,000 lang ang kapasidad napuno, ug mga 7,000 pa ang wala makasulod. Ang The Watch Tower nag-ingon nga “usa [ni] sa labing malamposong mga tigom nga gihimo sukad sa International Bible Students.”

Ang mga Estudyante sa Bibliya nailhan tungod sa ilang pagsangyaw nga “minilyong buhi karon dili na gayod mamatay.” Nianang panahona, wala nila masabti nga ang mensahe sa Gingharian kinahanglan pang isangyaw sa mas daghang dapit. Bisan pa niana, talagsaon ang ilang kadasig. Si Ida Olmstead, kinsa nagsugod pagtambong sa tigom niadtong 1902, nahinumdom, “Nahibalo mi nga daghang panalangin ang nagpaabot sa tanang katawhan, ug gipaningkamotan gyod namong isangyaw kining maayong balita niadtong among maestorya sa ministeryo.”

Aron maseguro nga pirmeng naay suplay sa espirituwal nga pagkaon, ang mga igsoon sa Bethel mao nay nag-imprenta sa pipila ka literatura. Nagpalit silag imprentahanan ug giinstalar nila kini sa inabangang bilding sa 35 Myrtle Avenue, Brooklyn, New York, pipila ka bloke gikan sa Bethel.

Si Leo Pelle ug Walter Kessler mireport sa Bethel niadtong Enero 1920. Si Walter nahinumdom, “Pag-abot namo, gitan-aw mi sa tigdumala sa imprentahanan ug giingnan, ‘Naa pay usa ka oras ug tunga una maniudto.’ Gisultihan mi niya nga hakoton ang mga karton nga punog libro gikan sa basement.”

 Si Leo nahinumdom sa nahitabo pagkaugma: “Among asaynment ang paglimpiyo sa bungbong sa unang andana sa bilding. Kadto ang kinahugawang trabaho nga akong nasulayan. Pero buluhaton kadto sa Ginoo, mao nga malipayon ra ko.”

Sulod lang sa pipila ka semana, ang The Watch Tower giimprenta na sa kugihang mga boluntaryo. Saysenta mil ka kopya sa Pebrero 1, 1920 nga The Watch Tower ang giimprenta diha sa ikaduhang andana. Sa basement, ang mga igsoon nag-instalar ug imprentahanan nga gitawag nilag Battleship. Sugod sa Abril 14, 1920 nga isyu, didto na pod giimprenta ang The Golden Age. Klaro nga gipanalanginan ni Jehova ang paningkamot niadtong kugihan nga mga boluntaryo.

Ang maunongong katawhan ni Jehova nadasig pag-usab sa buluhaton ug nakatagamtam ug malipayong pag-ubanay. Pero, dihay pipila ka Estudyante sa Bibliya nga mibiya sa organisasyon panahon sa gubot nga katuigan sa 1917 hangtod sa 1919. Unsay mahimo sa pagtabang kanila?

Ang The Watch Tower sa Abril 1, 1920 dunay artikulo nga nag-ulohang “Mag-uban Ta nga Malinawon.” Kini mahigugmaong nag-awhag: “Segurado mi . . . nga ang tanan nga nakabaton sa espiritu sa Ginoo . . . andam nga kalimtan ang nangagi, . . . aron mag-uban nga may panaghiusa ug magpadayon sa pag-alagad ingong nahiusa nga lawas.”

Daghan ang misanong niining mahigugmaong awhag. Usa ka magtiayon misulat: “Giangkon namo ang among sayop, kay sa miaging mga tuig wala mi gihimo samtang ang uban nagsangyaw. . . . Determinado mi nga dili na mahisalaag.” Daghang buluhaton ang nagpaabot niining nakabalik nga mga magmamantala.

Niadtong Hunyo 21, 1920, gisugdan sa mga Estudyante sa Bibliya ang dakong kampanya sa pagpanagtag sa “ZG,” ang papel ug hapin (paperback) nga edisyon sa The Finished Mystery. *  Daghan silag napondo niining libroha dihang gidili kini niadtong 1918.

Ang tanang class worker, dili lang mga colporteur, gidapit nga managtag. “Ang matag dedikado [bawtismado] nga indibiduwal sa matag kongregasyon nga makaarang sa pag-apil angay nga kinabubut-ong mohimo niana. Hinaot nga mao ni ang motto sa matag usa karon: ‘Usa ka butang ang akong himoon’​—managtag ug ZG.” Si Edmund Hooper nahinumdom nga para sa daghan, kini nga kampanya mao ang una nilang pagpamalaybalay. Siya midugang, “Bug-os namong nasabtan kon unsay naapil sa buluhaton nga mokaylap labaw pa sa among gidahom.”

Lisod ang pagpakigkomunikar sa mga Estudyante sa Bibliya sa ubang nasod panahon sa Gubat sa Kalibotan I. Tungod niana, gusto ni Brader Rutherford nga dasigon ang maong mga igsoon ug organisahon pag-usab ang buluhatong pagsangyaw. Busa niadtong Agosto 12, 1920, siya ug ang upat pa ka brader mibiyahe paingon sa Britain, Continental Europe, ug sa Middle East.

Pag-adto ni Rutherford sa Britain, ang mga Estudyante sa Bibliya nagpahigayon ug tulo ka kombensiyon ug 12 ka miting publiko. Gibanabana nga ang katibuk-ang nanambong miabot ug 50,000. Sa pagsumaryo sa maong pagduaw, ang The Watch Tower miingon: “Ang mga igsoon nalig-on ug nadasig. Sila mas nagkahiusa sa gugma ug sa pag-alagad, ug daghang magul-anon ang nalipay.” Sa Paris, si Brader Rutherford mihatag gihapon sa pakigpulong nga “Minilyong Buhi Karon Dili na Gayod Mamatay.” Pagsugod sa pakigpulong, puno na ang tigomanan. Tulo ka gatos ang nangayog dugang nga impormasyon.

Sa misunod nga mga semana, dihay pipila ka brader nga miduaw sa Athens, Cairo, ug Jerusalem. Aron mapaloap ang interesadong mga tawo niining mga lugara, si Brader Rutherford nag-establisar ug pondohanag literatura sa lungsod sa Ramallah, duol sa Jerusalem. Dayon, mibalik siya sa Europe ug giestablisar niya ang Central European Office. Gihikay sab niya ang pag-imprentag mga literatura didto.

Niadtong Septiyembre 1920, gi-release sa mga Estudyante sa Bibliya ang Num. 27 nga The Golden Age, usa ka espesyal nga isyu nga nagpadayag sa paglutos sa mga Estudyante sa Bibliya niadtong 1918. Ang Battleship, nga gihisgotan ganina, adlaw ug gabii nga nag-imprentag  kapin sa upat ka milyong kopya niini nga magasin.

Nahibaloan sa mga magbabasa niana nga magasin ang talagsaong kaso ni Emma Martin. Si Sister Martin maoy colporteur sa San Bernardino, California. Niadtong Marso 17, 1918, siya ug ang tulo ka brader, si E. Hamm, E. J. Sonnenburg, ug E. A. Stevens, mitambong sa usa ka gamayng tigom sa mga Estudyante sa Bibliya.

Niana nga tigom, dihay lalaki nga mitambong pero dili aron mokat-on sa Bibliya. “Mitambong ko . . . kay gisugo ko sa opisina sa piskaliya,” siya mitestigos sa ulahi. “Miadto ko sa tuyo nga makakuhag ebidensiya.” Nakuha niya ang “ebidensiya” nga iyang gipangita, usa ka kopya sa The Finished Mystery. Pipila ka adlaw sa ulahi, si Sister Martin ug ang tulo ka brader gidakop. Gikasohan sila sa paglapas kuno sa Espionage Act pinaagi sa pagpanagtag sa gidili nga libro.

Si Emma ug ang mga brader gihukmang sad-an ug gisentensiyahag tulo ka tuig nga pagkapriso. Kadaghan sila miapelar hangtod nga wala na silay mahimo, mao nga niadtong Mayo 17, 1920, sila gipriso. Pero wala madugay, nausab ang kahimtang.

Ang ilang eksperyensiya giestorya ni Brader Rutherford panahon sa kombensiyon sa San Francisco niadtong Hunyo 20, 1920. Ang mga nanambong nakurat sa naeksperyensiyahan sa maong mga igsoon, maong nagpadala silag telegrama sa presidente sa United States. Sila misulat: “Giisip namo ang pagsentensiya . . . kang Mrs. Martin . . . ubos sa balaod sa Espionage ingong dili makataronganon . . . Ang gihimo sa mga opisyales sa gobyerno nga paggamit sa awtoridad sa ilang opisina aron . . . lit-agon . . . si Mrs. Martin . . . ug dayon himohimoag kaso sa tuyo nga mapriso siya giisip namo nga . . . daotan kaayo.”

Pagkaugma dayon, gikunhoran ni Presidente Woodrow Wilson ang sentensiya ni Sister Martin ug ni Brader Hamm, Sonnenburg, ug Stevens. Natapos ang ilang dili makataronganong pagkapriso.

Sa hinapos sa 1920, ang mga Estudyante sa Bibliya daghag rason nga magmalipayon. Ang buluhaton sa hedkuwarter padayong miuswag, ug ang tinuod nga mga Kristohanon mas nagkugi pa sa pagsangyaw nga ang Gingharian sa Diyos mao ang solusyon sa mga problema sa katawhan. (Mat. 24:14) Pagkasunod tuig, sa 1921, mas miuswag pa ang pagsangyaw sa kamatuoran bahin sa Gingharian.