1. Unsay makahupay nato dihang mobati tang nag-inusara o nabug-atan sa mga problema? (Salmo 118:5-7)

 MIBATI ka na ba sukad nga nag-inusara, nga walay makatabang nimo sa imong problema? Daghan ang mibatig ingon niana, apil na ang matinumanong mga alagad ni Jehova. (1 Hari 19:14) Kon mahitabo nâ nimo, hinumdomi ang saad ni Jehova: “Dili gyod ka nako biyaan, ug dili gyod ka nako talikdan.” Busa masaligon tang makaingon: “Si Jehova ang akong magtatabang; dili ko mahadlok.” (Heb. 13:5, 6) Gisulat ni apostol Pablo kanang mga pulonga ngadto sa mga Kristohanon sa Judea niadtong 61 C.E. Ang iyang giingon magpahinumdom nato sa gisulat sa salmista diha sa Salmo 118:5-7.​—Basaha.

2. Unsay atong hisgotan niining artikuloha, ug ngano?

² Sama sa salmista, nahibalo si Pablo nga si Jehova ang iyang Magtatabang kay kadaghan na siya tabangi ni Jehova. Pananglitan, kapig duha ka tuig una siya mosulat sa mga Hebreohanon, si Pablo mibiyahe latas sa dagat nga gikusokuso sa kusog nga bagyo. (Buh. 27:4, 15, 20) Sa maong biyahe ug sa mga tuig una pa niana, gitabangan ni Jehova si Pablo sa lainlaing paagi. Hisgotan nato ang tulo niana. Si Jehova nagtaganag tabang pinaagi kang Jesus ug sa mga anghel, mga tawong dunay awtoridad, ug mga isigkamagtutuo. Ang pagsusi niini nga mga hitabo sa kinabuhi ni Pablo makapalig-on sa atong pagsalig sa saad sa Diyos nga tubagon Niya ang atong mga hangyo alang sa tabang.

3. Unsa tingali gihunahuna ni Pablo, ug ngano?

³ Si Pablo nagkinahanglag tabang. Niadtong mga 56 C.E., gipugos  siya pagdala sa mga tawo pagawas sa templo sa Jerusalem ug misulay sila sa pagpatay kaniya. Pagkaugma, dihang gidala si Pablo atubangan sa Sanhedrin, halos mawataswatas na siya sa iyang mga kaaway. (Buh. 21:30-32; 22:30; 23:6-10) Nianang tungora, naghunahuna tingali si Pablo, ‘Hangtod kanus-a kaha nako maagwanta kini nga pagmaltratar?’

4. Giunsa pagtabang ni Jehova si Pablo pinaagi kang Jesus?

⁴ Unsang tabang ang nadawat ni Pablo? Sa gabii human madakpi si Pablo, “ang Ginoo,” si Jesus, mibarog duol kaniya ug miingon: “Magmaisogon! Kay sama nga naghatag kag bug-os nga pagpamatuod bahin kanako sa Jerusalem, kinahanglang magpamatuod usab ka sa Roma.” (Buh. 23:11) Tayming kaayo to nga pagdasig! Gikomendahan ni Jesus si Pablo sa iyang pagpamatuod sa Jerusalem. Ug gisaaran niya si Pablo nga luwas kining makaabot sa Roma, diin mohatag kinig dugang pamatuod. Human siya pasaligi, seguradong mibating luwas si Pablo, sama sa usa ka bata nga gikugos sa iyang amahan.

5. Giunsa pagtabang ni Jehova si Pablo pinaagi sa usa ka anghel? (Tan-awa ang hulagway sa atubangan sa magasin.)

⁵ Unsa pang kalisdanan ang giatubang ni Pablo? Mga duha ka tuig human sa maong mga panghitabo sa Jerusalem, si Pablo nagsakayg barko padulong sa Italya dihang nakasugat silag kusog nga bagyo. Kusog kaayo ni mao nga abi sa mga tripulante ug pasahero nga mangamatay na sila. Pero, wala mahadlok si Pablo. Ngano? Giingnan niya ang tanan diha sa barko: “Niining gabhiona ang Diyos nga akong gisimba ug gihatagan ug sagradong pag-alagad nagpadalag anghel ug kini mibarog tapad kanako ug miingon: ‘Ayawg kahadlok, Pablo. Kinahanglang moatubang ka sa Cesar, ug tan-awa! luwason ka sa Diyos ug ang mga naglawig uban kanimo.’” Si Jehova migamit ug usa ka anghel aron isulti pag-usab ang pasalig nga gihatag Niya kang Pablo pinaagi kang Jesus. Ug tuod man, nakaabot si Pablo sa Roma.​—Buh. 27:20-25; 28:16.

6. Unsang saad ni Jesus ang makapalig-on nato, ug ngano?

⁶ Unsang tabang ang atong madawat? Si Jesus motabang nato, sama sa iyang gibuhat kang Pablo. Pananglitan, si Jesus nagsaad sa tanan nga mosunod kaniya: “Ako magauban kaninyo sa tanang adlaw hangtod sa hinapos sa sistema sa mga butang.” (Mat. 28:20) Makapadasig kanato ang gisulti ni Jesus. Ngano? Tungod kay may mga adlaw nga malisdan ta sa paglahutay. Pananglitan, dihang mamatay ang usa ka minahal, mobati tag kaguol dili lang sulod sa pipila ka adlaw kondili sulod tingali sa daghang katuigan. Ang pipila dunay lisod nga mga adlaw tungod sa ilang  katigulangon. Ug ang uban dunay lisod kaayo nga mga adlaw tungod sa depresyon. Bisan pa niana, nakalahutay ta kay nahibalo ta nga si Jesus nagauban kanato “sa tanang adlaw,” apil na sa lisod kaayong mga adlaw, sa atong kinabuhi.​—Mat. 11:28-30.

7. Sumala sa Pinadayag 14:6, unsaon ta pagtabang ni Jehova karon?

⁷ Ang Pulong sa Diyos nagpasalig kanato nga si Jehova motabang nato pinaagi sa iyang mga anghel. (Heb. 1:7, 14) Pananglitan, ang mga anghel motabang ug mogiya kanato dihang isangyaw nato ang “maayong balita sa Gingharian” ngadto sa mga tawo sa “matag nasod ug tribo ug pinulongan.”​—Mat. 24:13, 14; basaha ang Pinadayag 14:6.

8. Giunsa pagtabang ni Jehova si Pablo pinaagi sa komander sa militar?

⁸ Unsang tabang ang nadawat ni Pablo? Niadtong 56 C.E., gipasaligan ni Jesus si Pablo nga makaabot siya sa Roma. Pero, dihay pipila ka Hudiyo sa Jerusalem nga nagplanong atangan si Pablo aron patyon. Sa dihang ang komander sa militar sa Roma nga si Claudio Lisias nahibalo bahin sa plano, gitabangan niya si Pablo. Gipadala dayon ni Claudio si Pablo​—uban ang daghang sundalo—​ngadto sa Cesarea, sa ruta nga mga 105 kilometros gikan sa Jerusalem. Sa Cesarea, si Gobernador Felix nagsugo nga “pabantayan [si Pablo] didto sa palasyo ni Herodes.” Layo na siya niadtong gustong mopatay niya.​—Buh. 23:12-35.

9. Giunsa pagtabang ni Gobernador Festo si Pablo?

⁹ Duha ka tuig sa ulahi, si Pablo napriso gihapon sa Cesarea. Si Felix gipulihan na ni Festo ingong gobernador. Ang mga Hudiyo mihangyo kang Festo nga ipadala si Pablo sa Jerusalem aron husayon, pero wala mosugot si Festo. Tingali nahibalo ang gobernador nga ang mga Hudiyo “nagplano . . . nga atangan si Pablo sa dalan ug patyon.”​—Buh. 24:27–25:5.

10. Unsay gibuhat ni Gobernador Festo dihang mihangyo si Pablo nga moapelar kang Cesar?

¹⁰ Sa ulahi, gihusay si Pablo sa Cesarea. Tungod kay si Festo “nagtinguhang mauyonan sa mga Hudiyo,” nangutana siya kang Pablo: “Gusto ba nimong motungas sa Jerusalem ug hukman didto atubangan kanako?” Nahibalo si Pablo nga posibleng patyon siya didto sa Jerusalem, ug nahibalo pod siya kon unsay iyang buhaton aron maluwas ang iyang kinabuhi, makaabot sa Roma, ug makapadayon sa iyang ministeryo. Siya miingon: “Moapelar ko sa Cesar!” Human makig-estorya si Festo sa iyang mga magtatambag, iyang giingnan si Pablo: “Sa Cesar ka miapelar; sa Cesar ka moadto.” Ang paborableng desisyon ni Festo nagluwas kang Pablo gikan sa iyang mga kaaway. Sa ngadtongadto, si Pablo makaabot na sa Roma​—nga layo sa mga Hudiyo nga gustong mopatay niya.​—Buh. 25:6-12.

11. Unsang makapadasig nga mga pulong ni Isaias ang posibleng gipamalandong ni Pablo?

¹¹ Samtang naghulat si Pablo sa iyang biyahe paingon sa Italya, posibleng gipamalandong niya ang pasidaan nga gihatag ni propetang Isaias ngadto sa mga tawong nagsupak kang Jehova: “Pagplano mo, apan kini mapakyas! Sulti kon unsay inyong gusto, apan dili kini molampos, kay ang Diyos nagauban kanamo!” (Isa. 8:10) Nahibalo si Pablo nga tabangan siya sa Diyos, ug kini seguradong nakapalig-on niya sa paglahutay sa umaabot nga mga kalisdanan.

12. Giunsa pagtratar ni Julio si Pablo, ug unsay posibleng naamgohan ni Pablo?

¹² Niadtong 58 C.E., nagsugod si Pablo sa iyang biyahe paingon sa Italya. Kay piniriso, nailalom siya sa awtoridad sa usa ka opisyal sa kasundalohan sa Roma nga si Julio. Tungod niana,  puwedeng maltratahon ni Julio si Pablo o kaha pakitaag kaayo. Giunsa niya paggamit ang iyang awtoridad? Pagkaugma, dihang midunggo sila, “gipakitaag kaayo ni Julio si Pablo ug gitugotan siyang moadto sa iyang mga higala.” Sa ulahi, giluwas pa gani ni Julio ang kinabuhi ni Pablo. Sa unsang paagi? Gustong patyon sa mga sundalo ang tanang piniriso nga naa sa barko, pero gipugngan sila ni Julio. Ngano? Kay siya “determinado . . . nga luwason si Pablo.” Posibleng naamgohan ni Pablo nga gigamit ni Jehova ang buotang opisyal aron tabangan ug protektahan siya.​—Buh. 27:1-3, 42-44.

13. Sa unsang paagi tingali gamiton ni Jehova ang mga tawong dunay awtoridad?

¹³ Unsang tabang ang atong madawat? Kon uyon sa iyang katuyoan, puwedeng gamiton ni Jehova ang iyang gamhanang balaang espiritu aron himoon sa mga tawong dunay awtoridad ang iyang gusto. Si Haring Solomon misulat: “Ang kasingkasing sa usa ka hari samag agos sa sapa sa kamot ni Jehova. Iya ning giyahan bisan asa Niya gusto.” (Prov. 21:1) Unsay gipasabot niini? Ang mga tawo puwedeng magkalot ug kanal aron patipason ang tubig sa sapa ngadto sa direksiyon nga gusto nila. Sa susama, pinaagi sa iyang espiritu, puwedeng patipason ni Jehova ang hunahuna sa mga magmamando aron molihok sila uyon sa iyang katuyoan. Kon mahitabo kana, ang mga tawong dunay awtoridad mapalihok sa paghimog mga desisyon nga makahatag ug kaayohan sa katawhan sa Diyos.​—Itandi ang Esdras 7:21, 25, 26.

14. Base sa Buhat 12:5, kinsay puwede natong iampo?

¹⁴ Unsay atong mahimo? Puwede natong iampo ‘ang mga hari ug ang tanan nga may awtoridad’ dihang sila kinahanglang mohimog mga desisyon nga makaapektar sa atong Kristohanong kinabuhi ug ministeryo. (1 Tim. 2:1, 2, footnote; Neh. 1:11) Sama sa mga Kristohanon sa unang siglo, kita tim-os ug mapinadayonong nag-ampo sa Diyos para sa atong mga igsoon nga napriso. (Basaha ang Buhat 12:5; Heb. 13:3) Dugang pa, puwede natong iapil sa pag-ampo ang mga guwardiya sa prisohan nga nagbantay sa atong mga igsoon. Makahangyo ta kang Jehova nga impluwensiyahan ang panghunahuna sa maong mga indibiduwal aron molihok sila sama kang Julio ug trataron ang napriso natong mga igsoon uban ang “gugma sa isigkatawo.”​—Buh. 27:3, footnote.

15-16. Giunsa pagtabang ni Jehova si Pablo pinaagi kang Aristarko ug Lucas?

¹⁵ Unsang tabang ang nadawat ni Pablo? Sa iyang biyahe paingon sa Roma, si Pablo kadaghan nakadawat sa tabang ni Jehova pinaagi sa  iyang mga isigkamagtutuo. Hisgotan nato ang pipila ka pananglitan.

¹⁶ Duha ka maunongong higala ni Pablo, si Aristarko ug Lucas, ang midesisyon nga mobiyahe uban kaniya paingon sa Roma. b Ang Bibliya walay giingon nga gipasaligan ni Jesus si Aristarko ug Lucas nga luwas silang makaabot sa Roma. Busa gipameligro nila ang ilang kinabuhi niana nga biyahe. Pero, andam silang mohimo niana aron tabangan si Pablo. Ayha pa nila nahibaloi nga maluwas sila dihang gikusokuso sa bagyo ang ilang barko. Busa, dihang si Aristarko ug Lucas misakay sa barko didto sa Cesarea, posibleng kinasingkasing nga nag-ampo si Pablo kang Jehova, nga nagpasalamat kaniya sa tabang nga iyang gitagana pinaagi niining duha ka maisogong isigkamagtutuo.​—Buh. 27:1, 2, 20-25.

17. Giunsa pagtabang ni Jehova si Pablo pinaagi sa iyang mga isigkamagtutuo?

¹⁷ Panahon sa iyang biyahe, si Pablo kadaghan tabangi sa iyang mga isigkamagtutuo. Pananglitan, pagdunggo nila sa siyudad sa Sidon, gitugotan ni Julio si Pablo nga “moadto sa iyang mga higala ug makapahimulos sa ilang pag-atiman.” Ug sa ulahi, sa siyudad sa Puteoli, si Pablo ug ang iyang mga kauban ‘nakakaplag ug mga igsoon ug sila giawhag nga magpabilin sulod sa pito ka adlaw uban kanila.’ Samtang giatiman sa mga Kristohanon sa maong mga dapit ang panginahanglan ni Pablo ug sa iyang mga kauban, seguradong nakapalipay pag-ayo si Pablo kanila pinaagi sa pag-estoryag makapalig-ong mga eksperyensiya. (Itandi ang Buhat 15:2, 3.) Human niadtong makapadasig nga pagbisita, si Pablo ug ang iyang mga kauban nagpadayon sa ilang biyahe.​—Buh. 27:3; 28:13, 14.

18. Nganong si Pablo nagpasalamat sa Diyos ug nadasig?

¹⁸ Samtang nagpaingon si Pablo sa Roma, tingali naghunahuna siya sa iyang gisulat ngadto sa kongregasyon nianang lugara tulo ka tuig ang milabay: “Sa daghang tuig nangandoy ko nga moanha ninyo.” (Roma 15:23) Pero, wala siya magdahom nga moabot siya ingong piniriso.  Seguradong nadasig siya dihang nakita niya ang mga igsoon sa Roma nga naghulat kaniya diha sa dalan! “Pagkakita ni Pablo kanila, siya nagpasalamat sa Diyos ug nadasig.” (Buh. 28:15) Matikdi nga gipasalamatan ni Pablo ang Diyos tungod sa mga igsoon nga naghulat didto. Ngano? Tungod kay nakita na sab ni Pablo nga gitabangan siya ni Jehova pinaagi sa iyang mga isigkamagtutuo.

19. Sumala sa 1 Pedro 4:10, unsaon ta paggamit ni Jehova sa pagtabang niadtong nanginahanglan?

¹⁹ Unsay atong mahimo? May nahibaloan ka bang mga igsoon sa inyong kongregasyon nga nag-antos tungod sa sakit o sa ubang mga problema? O tingali namatyan silag minahal. Kon mahibaloan nato nga dunay igsoon nga nanginahanglan, puwede tang moampo kang Jehova nga tabangan tang mosulti o mohimog maayo niana nga igsoon. Basin ang atong pulong ug buhat mao ang pagdasig nga gikinahanglan sa atong igsoon. (Basaha ang 1 Pedro 4:10.) c Kon tabangan nato sila, basin mahibalik ang ilang bug-os nga pagsalig nga ang saad ni Jehova nga “dili gyod ka nako biyaan, ug dili gyod ka nako talikdan” mapadapat sa ilang kahimtang. Seguradong makapalipay gyod nâ nimo!

20. Nganong masaligon tang makaingon: “Si Jehova ang akong magtatabang”?

²⁰ Sama kang Pablo ug sa iyang mga kauban, makasinati sab tag mga problema. Pero dili ta mahadlok kay si Jehova nagauban kanato. Siya nagtabang kanato pinaagi kang Jesus ug sa mga anghel. Dugang pa, kon uyon sa iyang katuyoan, puwede tang tabangan ni Jehova pinaagi sa mga tawong dunay awtoridad. Ug sama sa naeksperyensiyahan sa daghan kanato, si Jehova naggamit sa iyang balaang espiritu aron palihokon ang kasingkasing sa iyang mga alagad sa pagtabang sa ilang mga igsoon. Busa, sama kang Pablo, duna tay maayong rason nga masaligong moingon: “Si Jehova ang akong magtatabang; dili ko mahadlok. Unsay mabuhat sa tawo kanako?”​—Heb. 13:6.