TUN-ANANG ARTIKULO 23
AWIT 2 Jehova ang Imong Ngalan
Ngalan ni Jehova—Unsa Kini ka Importante Para Nimo?
“‘Kamo ang akong mga saksi,’ miingon si Jehova.”—ISA. 43:10.
POKUS
Kon unsaon nato pagbalaan ug pagbindikar ang ngalan ni Jehova.
1-2. Unsa ka importante para kang Jesus ang ngalan ni Jehova?
PARA kang Jesus, ang ngalan ni Jehova mao ang pinakaimportante sa tanan. Siya ang pangunang nagpaila sa ngalan sa iyang Amahan. Sama sa gihisgotan sa miaging artikulo, si Jesus andam mamatay alang sa ngalan ni Jehova ug aron pamatud-an nga husto ang tanang paagi sa iyang Amahan. (Mar. 14:36; Heb. 10:7-9) Ug human sa iyang Usa ka Libo ka Tuig nga Pagmando, ibalik ni Jesus ang tanang awtoridad ngadto sa iyang Amahan, kay gusto niya nga ang tanang himaya maadto kang Jehova. (1 Cor. 15:26-28) Ang tanang gihimo ug andam himoon ni Jesus para sa ngalan ni Jehova nagpamatuod nga gihigugma gyod niya pag-ayo ang iyang Amahan.
2 Si Jesus mianhi sa yuta aron sultihan ang mga tawo bahin sa iyang Amahan. (Juan 5:43; 12:13) Iyang gipaila ang ngalan sa iyang Amahan ngadto sa iyang mga sumusunod. (Juan 17:6, 26) Nanudlo siya ug naghimog mga milagro sa ngalan ni Jehova. (Juan 10:25) Gani gihangyo ni Jesus si Jehova nga bantayan ang iyang mga tinun-an “tungod sa [Iyang] ngalan.” (Juan 17:11) Busa kay ingon ana ka importante kang Jesus ang ngalan ni Jehova, di ba haom lang nga ang usa nga nangangkong sumusunod sa Kristo angayng makaila ug mogamit sa ngalan sa iyang Amahan?
3. Unsay atong hisgotan niini nga artikulo?
3 Ingong mga Kristohanon, naningkamot ta sa pagsundog kang Jesus pinaagi sa paghigugma ug pagtahod sa ngalan ni Jehova. (1 Ped. 2:21) Niini nga artikulo, atong tan-awon kon sa unsang paagi ang mga nagsangyaw sa “maayong balita sa Gingharian” nagdala sa ngalan ni Jehova. (Mat. 24:14) Ato pong hisgotan kon unsaon nato pagpakita nga importante para nato ang ngalan ni Jehova.
“USA KA KATAWHAN ALANG SA IYANG NGALAN”
4. (a) Unsay gisugo ni Jesus sa iyang mga tinun-an sa wala pa siya mobalik sa langit? (b) Unsang pangutana ang atong hisgotan bahin niana nga sugo?
4 Sa wala pa mobalik si Jesus sa langit, iyang giingnan ang iyang mga tinun-an: “Makadawat mog gahom dihang mokunsad kaninyo ang balaang espiritu, ug kamo mahimong akong mga saksi sa Jerusalem, sa tibuok Judea ug Samaria, ug hangtod sa kinalay-ang bahin sa yuta.” (Buh. 1:8) Busa ang maayong balita isangyaw dili lang didto sa Israel, kondili sa uban pong mga lugar. Sa ngadtongadto, ang mga tawo sa kanasoran mahatagan ug kahigayonan nga mahimong sumusunod ni Jesus. (Mat. 28:19, 20) Pero si Jesus miingon: “Kamo mahimong akong mga saksi.” Nagpasabot ba ni nga ang bag-ong mga tinun-an igo rang mahimong mga saksi ni Jesus, ug dili na sila kinahanglang mahibalo sa ngalan ni Jehova? Ang panghitabo nga gihisgotan sa Buhat kapitulo 15 makatabang nato sa pagtubag niana nga pangutana.
5. Giunsa pagpakita sa mga apostoles ug sa mga ansiyano sa Jerusalem nga ang tanan kinahanglang makaila sa ngalan ni Jehova? (Tan-awa sab ang hulagway.)
5 Niadtong 49 C.E., ang mga apostoles ug mga ansiyano sa Jerusalem nagmiting aron hisgotan kon unsay kinahanglang himoon sa dili tinuli nga mga Hentil aron dawaton sila ingong mga Kristohanon. Sa hapit nang matapos ang ilang panaghisgot, si Santiago nga igsoon ni Jesus miingon: “Giasoy pag-ayo ni [Pedro] kon sa unsang paagi giliso sa Diyos sa unang higayon ang iyang pagtagad ngadto sa kanasoran aron magkuha gikan kanila ug usa ka katawhan alang sa iyang ngalan.” Kang kinsang ngalan ang gitumong ni Santiago? Gikutlo niya ang mga pulong ni propetang Amos ug miingon: “Aron nga ang mga tawong mahibilin kinasingkasing nga mangita kang Jehova, uban sa katawhan sa tanang kanasoran, ang katawhan nga gitawag sa akong ngalan, miingon si Jehova.” (Buh. 15:14-18) Busa gawas nga mahibaloan sa bag-ong mga tinun-an ang ngalan ni Jehova, sila pod ‘tawgon sa iyang ngalan.’ Nagpasabot ni nga ilang ipaila ang ngalan sa Diyos ngadto sa uban ug sila mailhan nianang ngalana.
Sa usa sa mga miting sa nagamandong lawas sa unang siglo, nasabtan nila pag-ayo nga ang mga Kristohanon angayng magpaila sa ngalan sa Diyos ug mailhan nianang ngalana (Tan-awa ang parapo 5)
6-7. (a) Nganong mianhi si Jesus sa yuta? (b) Unsa pay mas importanteng rason kon nganong mianhi si Jesus sa yuta?
6 Ang ngalan ni Jesus nagkahulogang “Si Jehova Maoy Kaluwasan,” ug siya ang gigamit ni Jehova aron luwason kadtong magpakitag pagtuo. Mianhi si Jesus sa yuta aron ihatag ang iyang kinabuhi alang sa katawhan. (Mat. 20:28) Pinaagi sa lukat, iyang gipaposible nga maluwas ta ug makabaton ug kinabuhing walay kataposan.—Juan 3:16.
7 Pero nganong kinahanglan mang luwason ang katawhan? Tungod sa nahitabo sa tanaman sa Eden. Sa nahisgotan na sa miaging artikulo, ang atong unang mga ginikanan, si Adan ug Eva, mirebelde kang Jehova ug nawad-ag kahigayonan nga mabuhi hangtod sa hangtod. (Gen. 3:6, 24) Pero naa pay mas importante kay sa kaluwasan sa makasasalang katawhan. Hinumdomi nga ang ngalan ni Jehova gidaot. (Gen. 3:4, 5) Busa ang kaluwasan sa mga kaliwat ni Adan ug Eva konektado sa mas dakong isyu—ang pagbalaan sa ngalan ni Jehova. Ug kay si Jesus nagrepresentar kang Jehova ug nagdala sa Iyang ngalan, dako kaayo siyag papel sa pagbalaan sa ngalan ni Jehova.
Di ba haom lang nga ang usa nga nangangkong sumusunod sa Kristo angayng makaila ug mogamit sa ngalan sa iyang Amahan?
8. Unsay kinahanglang masabtan sa tanang magpakitag pagtuo kang Jesus?
8 Kinahanglang masabtan sa tanang magpakitag pagtuo kang Jesus, Hudiyo man sila o Hentil, nga ang ilang kaluwasan maggikan sa Amahan ni Jesus, si Jehova nga Diyos. (Juan 17:3) Ug sama kang Jesus, mailhan sila sa ngalan ni Jehova. Kinahanglan pod nilang masabtan ang kahinungdanon sa pagbalaan sa ngalan ni Jehova. Ang ilang kaluwasan nagdepende niana. (Buh. 2:21, 22) Busa dili lang si Jesus ang angayng mailhan sa tanan niyang matinumanong mga sumusunod. Kinahanglan pod silang makaila kang Jehova. Kanay hinungdan kon nganong gitapos ni Jesus ang iyang pag-ampo nga narekord sa Juan kapitulo 17 pinaagi sa pag-ingon: “Akong gipaila kanila ang imong ngalan ug padayon pa kining ipaila, aron ilang higugmaon ang uban sama sa imong paghigugma kanako ug aron ako mahiusa kanila.”—Juan 17:26.
“KAMO ANG AKONG MGA SAKSI”
9. Unsaon nato pagpakita nga importante para nato ang ngalan ni Jehova?
9 Ingong tinuod nga mga sumusunod ni Jesus, angay tang maningkamot sa pagbalaan sa ngalan ni Jehova. (Mat. 6:9, 10) Angay natong isipon ang ngalan ni Jehova nga pinakaimportante sa tanan. Siyempre, kinahanglan nato ning ipakita sa atong binuhatan. Pero sa unsang paagi mabalaan nato ang ngalan ni Jehova ug mapamatud-an nga bakak ang mga akusasyon ni Satanas batok kaniya?
10. Unsang simbolikong kaso ang gihisgotan sa Isaias kapitulo 42 ngadto sa 44? (Isaias 43:9; 44:7-9) (Tan-awa sab ang hulagway.)
10 Sa Isaias kapitulo 42 ngadto sa 44, atong mabasa kon unsay atong mahimo sa pagbalaan sa ngalan ni Jehova. Kini nga mga kapitulo naghisgot sa simbolikong kaso sa korte diin gihusay ang isyu bahin sa kon kinsa ang tinuod nga Diyos. Gihagit ni Jehova kadtong nangangkong mga diyos nga pamatud-an nga tinuod sila nga mga diyos. Nangutana pod siya kon duna bay gustong motestigo para sa maong mga diyos. Pero wala gyoy mitestigo!—Basaha ang Isaias 43:9; 44:7-9.
Kita maoy mga testigo ni Jehova sa usa ka simbolikong kaso (Tan-awa ang parapo 10-11)
11. Unsay gisulti ni Jehova sa iyang katawhan nga narekord sa Isaias 43:10-12?
11 Basaha ang Isaias 43:10-12. Gisultihan ni Jehova ang iyang katawhan: “Kamo ang akong mga saksi, . . . ug ako ang Diyos.” Gipangutana sila ni Jehova: “Duna pa bay laing Diyos gawas kanako?” (Isa. 44:8) Naa tay pribilehiyo nga tubagon kana nga pangutana. Pinaagi sa atong mga pulong ug binuhatan, pamatud-an nato nga si Jehova lang ang tinuod nga Diyos ug wala nay lain. Ang iyang ngalan ang kinalabwan sa tanan. Pamatud-an pod nato pinaagi sa atong pagkinabuhi nga gihigugma gyod nato si Jehova ug maunongon ta kaniya, bisag unsa pay buhaton ni Satanas kanato. Nianang paagiha, makatabang ta nga mabalaan ang ngalan ni Jehova.
12. Sa unsang paagi natuman ang tagna sa Isaias 40:3, 5?
12 Dihang depensahan nato ang ngalan, o reputasyon, ni Jehova, atong gisundog si Jesu-Kristo. Si Isaias nagtagna nga dunay usa nga ‘maghawan [o sa footnote, ‘mag-andam’] sa dalan ni Jehova.’ (Isa. 40:3) Sa unsang paagi natuman kini nga tagna? Si Juan nga Tigbawtismo nag-andam sa dalan para kang Jesus, kinsa mianhi sa ngalan ni Jehova ug nagsulti pinaagi niana nga ngalan. (Mat. 3:3; Mar. 1:2-4; Luc. 3:3-6) Si Isaias nagtagna sab: “Ang himaya ni Jehova mapadayag.” (Isa. 40:5) Sa unsang paagi? Dihang mianhi si Jesus sa yuta, bug-os gyod niyang gituman ang iyang papel ingong representante ni Jehova, nga sama bag si Jehova mismo ang mianhi sa yuta.—Juan 12:45.
13. Sa unsang paagi masundog nato si Jesus?
13 Sama kang Jesus, kita mga saksi ni Jehova. Nagdala ta sa ngalan ni Jehova ug atong gisultihan ang mga tawo bahin sa maayong mga butang nga iyang gihimo. Pero aron mahimo nato ni sa epektibong paagi, kinahanglan pod natong sultihan ang mga tawo bahin sa importanteng papel ni Jesus sa pagbalaan sa ngalan ni Jehova. (Buh. 1:8) Si Jesus ang pangunang Saksi ni Jehova, ug kita nagsundog sa iyang ehemplo. (Pin. 1:5) Pero unsaon nato pagpakita nga importante para nato ang ngalan ni Jehova?
KON UNSAON NATO PAGPAKITA NGA IMPORTANTE PARA NATO ANG NGALAN NI JEHOVA
14. Sumala sa gipakita sa Salmo 105:3, unsay atong pagbati sa ngalan ni Jehova?
14 Atong gipasigarbo ang ngalan ni Jehova. (Basaha ang Salmo 105:3.) Malipay gyod si Jehova kon ipanghambog nato ang iyang ngalan. (Jer. 9:23, 24; 1 Cor. 1:31; 2 Cor. 10:17) Ang ‘pagpanghambog diha kang Jehova’ nagpasabot nga proud ta nga si Jehova ang atong Diyos. Para nato, pribilehiyo gyod ang pagpasidungog sa iyang ngalan ug pagdepensa sa iyang reputasyon. Dili gyod ta angayng maulaw nga sultihan ang atong mga katrabaho, classmate, silingan, ug ang uban nga kita mga Saksi ni Jehova! Gusto sa Yawa nga pahunongon ta sa pagsangyaw bahin sa ngalan sa Diyos. (Jer. 11:21; Pin. 12:17) Gani, naningkamot si Satanas ug ang iyang mga sakop nga malimtan sa mga tawo ang ngalan ni Jehova. (Jer. 23:26, 27) Pero gimahal nato ang Iyang ngalan ug “tibuok adlaw” tang nagsadya tungod niini.—Sal. 5:11; 89:16.
15. Unsay gipasabot sa pagtawag sa ngalan ni Jehova?
15 Padayon tang nagtawag sa ngalan ni Jehova. (Joel 2:32; Roma 10:13, 14) Ang pagtawag sa ngalan ni Jehova wala lang magpasabot nga nakaila ug naggamit ta sa ngalan sa Diyos. Nagpasabot sab ni nga nahibalo ta sa iyang personalidad, misalig kaniya, ug nagalaom sa iyang tabang ug giya. (Sal. 20:7; 99:6; 116:4; 145:18) Ato pong gisangyaw sa uban ang iyang ngalan ug nindot nga mga hiyas, ug gidasig nato sila nga maghinulsol ug molihok aron ilang madawat ang pag-uyon ni Jehova.—Isa. 12:4; Buh. 2:21, 38.
16. Sa unsang paagi mapamatud-an nato nga bakakon si Satanas?
16 Andam tang mag-antos alang sa ngalan ni Jehova. (Sant. 5:10, 11) Kon magpabilin tang maunongon kang Jehova bisan sa lisod nga mga kahimtang, mapamatud-an nato nga bakakon si Satanas. Sa panahon ni Job, kini ang akusasyon ni Satanas bahin niadtong mga nag-alagad kang Jehova: “Ang tawo maghatag sa tanan niyang nabatonan alang sa iyang kinabuhi.” (Job 2:4) Si Satanas miingon nga ang mga tawo moalagad lang kang Jehova kon maayo ang kahimtang, pero kon magkalisod na gani sila, ilang biyaan si Jehova. Pero si Job nagmatinumanon, ug iyang gipamatud-an nga sayop ang maong akusasyon. Sama kang Job, naa tay kahigayonan nga pamatud-an nga bisag unsa pay buhaton ni Satanas kanato, dili gyod ta mobiya kang Jehova. Makasalig ta nga bantayan ta ni Jehova tungod sa iyang ngalan.—Juan 17:11.
17. Base sa 1 Pedro 2:12, unsa pay laing paagi nga mahimaya nato ang ngalan ni Jehova?
17 Atong gitahod ang ngalan ni Jehova. (Prov. 30:9; Jer. 7:8-11) Kay kita nagrepresentar kang Jehova ug nagdala sa iyang ngalan, ang atong mga pulong ug buhat puwedeng makadayeg o makapasipala niini. (Basaha ang 1 Pedro 2:12.) Busa gusto natong himoon ang tanan natong maarangan aron madayeg nato si Jehova pinaagi sa atong sinultihan ug binuhatan. Niining paagiha, mahimaya nato ang iyang ngalan bisag dili ta hingpit.
18. Unsay laing paagi nga mapamatud-an nato nga importante para nato ang ngalan ni Jehova? (Tan-awa sab ang footnote.)
18 Mas importante para nato ang ngalan ni Jehova kay sa atong reputasyon. (Sal. 138:2) Tungod sa atong gugma sa ngalan ni Jehova, basin biaybiayon o tamayon ta sa uban. a Pananglitan, si Jesus nakaatubang ug makauulawng kamatayon ingong kriminal, pero andam siyang mamatay nianang paagiha aron mapasidunggan ang ngalan ni Jehova. Iyang ‘gibalewala ang kaulawan’ kay wala siya sobrang mabalaka sa kon unsay hunahunaon sa uban bahin kaniya. (Heb. 12:2-4) Nagpokus siya sa pagbuhat sa kabubut-on sa Diyos.—Mat. 26:39.
19. Unsay imong pagbati bahin sa ngalan ni Jehova, ug ngano?
19 Atong gipasigarbo ang ngalan ni Jehova, ug proud ta nga tawgong mga Saksi ni Jehova. Mao nga andam natong antoson ang bisan unsang pagbiaybiay nga atong maatubang. Para nato, ang ngalan ni Jehova mas importante kay sa atong reputasyon. Busa magmadeterminado ta nga padayong dayegon ang ngalan ni Jehova bisan pa sa mga pagsupak ni Satanas. Pinaagi niana, atong gisundog si Jesu-Kristo ug atong mapamatud-an nga ang ngalan ni Jehova ang pinakaimportante para nato.
AWIT 10 Dayega si Jehova nga Atong Diyos!
a Bisan ang matinumanong si Job naapektohan pag-ayo dihang gidaot sa iyang tulo ka nagpakaaron-ingnong higala ang iyang reputasyon. Sa primero, dihang namatay ang iyang mga anak ug nawad-an siya sa tanan niyang kabtangan, “si Job wala makasala ug wala niya basola ang Diyos.” (Job 1:22; 2:10) Pero dihang giakusahan si Job nga naghimog sala, ‘nagpasagad na lang siyag sulti.’ Mas nagpokus siya sa pagdepensa sa iyang reputasyon imbes sa pagbalaan sa ngalan, o reputasyon, sa Diyos.—Job 6:3; 13:4, 5; 32:2; 34:5.
