1-2. (a) Unsay gihimo ni Jesus sa gabii una siya mamatay? (b) Unsang mga pangutana ang atong konsiderahon niini nga artikulo?

 KADTO maoy Huwebes sa gabii, Nisan 14, 33 C.E., ug si Jesus hapit nang budhian, husayon, sentensiyahan, paantoson, ug patyon. Bag-o lang nahuman ang kataposang panihapon ni Jesus uban sa iyang matinumanong mga apostoles sa itaas nga lawak. Dayon gipalig-on ni Jesus ang iyang mga apostoles. Sa wala pa sila mibiya sa maong lawak, si Jesus nag-ampo. Kana nga pag-ampo girekord ni apostol Juan nga atong mabasa sa Juan kapitulo 17.

² Niini nga artikulo, atong hisgotan kon unsay atong makat-onan sa pag-ampo ni Jesus. Unsa ang iyang gikabalak-an sa hapit na siyang mamatay? Unsay pinakaimportante niya panahon sa iyang ministeryo dinhi sa yuta? Atong makita ang mga tubag niana diha sa iyang pag-ampo.

“AKONG GIPAILA KANILA ANG IMONG NGALAN”

3. Unsay giingon ni Jesus bahin sa ngalan ni Jehova, ug unsay iyang gipasabot? (Juan 17:​6, 26)

³ Sa pag-ampo ni Jesus, siya miingon: “Akong gipaila kanila ang imong ngalan.” Gani, kaduha siya miingon nga iyang gipaila ang ngalan ni Jehova sa iyang mga tinun-an. (Basaha ang Juan 17:​6, 26.) Unsay iyang gipasabot? Nagpaila ba siyag ngalan nga wala nila mailhi? Hinumdomi nga Hudiyo ang mga tinun-an ni Jesus, maong nahibalo na sila nga ang ngalan sa Diyos maoy Jehova. Kana nga ngalan mabasa sa Hebreohanong Kasulatan sa halos 7,000 ka beses. Busa dili personal  nga ngalan sa Diyos ang gipasabot ni Jesus, kondili kon unsay girepresentahan niana nga ngalan—sama sa Iyang katuyoan, mga hiyas, ug mga gibuhat ug pagabuhaton. Nahimo kana ni Jesus kay nailhan niya pag-ayo si Jehova.

4-5. (a) Paghatag ug pananglitan kon sa unsang paagi makaingon ta nga mas nailhan na nato ang usa ka tawo. (b) Sa unsang paagi mas nailhan sa mga tinun-an ni Jesus ang ngalan ni Jehova?

⁴ Ibutang ta nga naay ansiyano sa inyong kongregasyon nga ginganlag David, ug usa siya ka doktor. Dugay na nimo siyang nailhan. Usa ka adlaw, naaksidente ka ug gidala sa ospital diin nagtrabaho ang maong brader. Gihimo niya ang iyang maarangan maong naluwas ka. Busa unsa na may imong mahunahunaan karon kon makadungog ka sa iyang ngalan? Para nimo, si David dili lang basta ansiyano nga imong nailhan. Siya ang doktor nga nagluwas nimo.

⁵ Sa samang paagi, ang mga tinun-an ni Jesus nakaila nang daan sa ngalan ni Jehova. Pero mas nailhan pa gyod nila kanang ngalana kay gitabangan sila ni Jesus. Nganong makaingon ta ana? Kay sa tanang gisulti ug gibuhat ni Jesus, iyang gisundog ang personalidad sa iyang Amahan. Busa mas ‘nailhan’ sa mga tinun-an si Jehova pinaagi sa pag-obserbar kon sa unsang paagi nanudlo ug nakiglabot si Jesus sa mga tawo.—Juan 14:9; 17:3.

“IMONG NGALAN NGA IMONG GIHATAG KANAKO”

6. Unsay gipasabot nga gihatag ni Jehova ang iyang ngalan kang Jesus? (Juan 17:​11, 12)

⁶ Si Jesus nag-ampo para sa iyang mga tinun-an: “Palihog bantayi sila tungod sa imong ngalan nga imong gihatag kanako.” (Basaha ang Juan 17:​11, 12.) Nagpasabot ba ni nga ang ngalan ni Jesus mahimo nang Jehova? Wala. Matikdi nga sa iyang pag-ampo, si Jesus miingon ug “imong ngalan” nga nagtumong sa ngalan ni Jehova. Busa ang ngalang Jehova wala maadto kang Jesus, kang Jehova ra gyod na. Pero unsay gipasabot ni Jesus dihang miingon siya nga ang ngalan sa Diyos gihatag kaniya? Una, si Jesus mao ang representante ug Tigpamaba ni Jehova. Siya mianhi sa ngalan sa iyang Amahan ug mihimog mga milagro pinaagi nianang ngalana. (Juan 5:43; 10:25) Dugang pa, ang ngalang Jesus nagkahulogang “Si Jehova Maoy Kaluwasan.” Oo, ang ngalan sa Diyos konektado kaayo sa ngalan ni Jesus.

7. Nganong si Jesus makasulti sa uban pinasukad sa ngalan ni Jehova? Iilustrar.

⁷ Sa pag-ilustrar, ang ambassador nagrepresentar sa hari. Busa ang iyang isulti isipon nga gikan sa maong hari. Sa samang paagi, si Jesus nagrepresentar kang Jehova ug siya misulti sa mga tawo pinasukad sa ngalan sa iyang Amahan.—Mat. 21:9; Luc. 13:35.

8. Sa unsang paagi ang ngalan ni Jehova “naa” kang Jesus sa wala pa siya mianhi sa yuta? (Exodo 23:​20, 21)

⁸ Ang Bibliya nagtawag kang Jesus nga ang Pulong, kay siya ang Tigpamaba ni Jehova. Siya ang gigamit ni Jehova sa pagsulti sa Iyang mensahe ngadto sa mga anghel ug mga tawo. (Juan 1:​1-3) Posible nga si Jesus ang anghel nga gipadala ni Jehova sa pag-atiman sa mga Israelinhon dihang mibiya sila sa Ehipto ug samtang naa sila sa kamingawan. Giingnan ni Jehova ang mga Israelinhon nga angay nilang tumanon ang maong anghel. Ngano? Si Jehova miingon: “Kay ang akong ngalan naa niya.” a  (Basaha ang Exodo 23:​20, 21.) “Naa” kang Jesus ang ngalan ni Jehova kay siya ang nagrepresentar kang Jehova ug siya ang pangunang nagbindikar ug nagbalaan sa ngalan sa iyang Amahan.

“AMAHAN, HIMAYAA ANG IMONG NGALAN”

9. Nganong makaingon ta nga importante gyod kang Jesus ang ngalan ni Jehova? Ipatin-aw.

⁹ Sa ato nang nahisgotan, bisan sa wala pa mianhi si Jesus sa yuta, ang ngalan ni Jehova ang pinakaimportante para niya. Ug sa dihang mianhi na si Jesus sa yuta, ang tanan niyang gihimo nagpakita nga importante kaayo para niya ang ngalan ni Jehova. Dihang hapit nang matapos ang iyang ministeryo, si Jesus miampo: “Amahan, himayaa ang imong ngalan.” Dihadiha, mitubag si Jehova pinaagig kusog nga tingog gikan sa langit: “Gihimaya na nako kini, ug himayaon nako kini pag-usab.”—Juan 12:28.

10-11. (a) Sa unsang paagi gihimaya ni Jesus ang ngalan ni Jehova? (Tan-awa sab ang hulagway.) (b) Nganong kinahanglang balaanon ug ibindikar ang ngalan ni Jehova?

¹⁰ Gihimaya pod ni Jesus ang ngalan sa iyang Amahan. Sa unsang paagi? Pinaagi sa pagsulti sa uban bahin sa nindot nga mga hiyas sa iyang Amahan ug sa maayong mga butang nga Iyang gihimo. Pero naa pa siyay dugang gihimo aron mahimaya ang ngalan sa iyang Amahan. Iya ning gibalaan ug gibindikar. b Gipakita ni Jesus kon unsa ni ka importante dihang iyang gitudloan ang iyang mga tinun-an sa modelong pag-ampo.  Siya miingon: “Amahan namo nga anaa sa mga langit, balaanon unta ang imong ngalan.”—Mat. 6:9.

¹¹ Nganong kinahanglang balaanon ug ibindikar ang ngalan ni Jehova? Tungod kay gitamay ug gibutangbutangan ni Satanas nga Yawa si Jehova nga Diyos didto sa tanaman sa Eden. Si Satanas miingon nga si Jehova bakakon ug nga naa Siyay gihikaw nga maayong butang kang Adan ug Eva. (Gen. 3:​1-5) Samag miingon si Satanas nga dili husto ang mga paagi ni Jehova. Kining sayop nga mga akusasyon ni Satanas nagdaot sa reputasyon, o ngalan, ni Jehova. Ug sa panahon ni Job, si Satanas miingon nga ang mga tawo nag-alagad lang kang Jehova tungod sa mga kaayohan nga ilang nadawat gikan Niya. Miingon pa gani ang Yawa nga walay tawo nga tinuod nga mahigugma kang Jehova ug padayong moalagad Kaniya dihang naa sa pagsulay. (Job 1:​9-11; 2:4) Nagkinahanglag panahon aron mapamatud-an kon kinsa gyod ang bakakon, si Jehova ba o si Satanas.

“ITUGYAN NAKO ANG AKONG KINABUHI”

12. Unsay andam himoon ni Jesus tungod sa iyang gugma sa ngalan ni Jehova?

¹² Tungod sa gugma ni Jesus kang Jehova, andam niyang himoon ang iyang maarangan sa pagbalaan ug pagbindikar sa ngalan ni Jehova. Si Jesus miingon: “Itugyan nako ang akong kinabuhi.” (Juan 10:​17, 18) Oo, andam pa gani siyang mamatay alang sa ngalan ni Jehova. c Ang unang hingpit nga mga tawo, si Adan ug Eva, mirebelde kang Jehova ug midapig kang Satanas. Sa laing bahin, si Jesus kinabubut-ong mianhi sa yuta ug gipamatud-an ang iyang gugma kang Jehova. Iya nang gihimo pinaagi sa iyang bug-os nga pagkamatinumanon kang Jehova. (Heb. 4:15; 5:​7-10) Nagpabilin siyang matinumanon sa tibuok niyang kinabuhi, hangtod sa iyang kamatayon diha sa estaka sa pagsakit. (Heb. 12:2) Pinaagi niini, gipamatud-an niya ang iyang gugma kang Jehova ug sa Iyang ngalan.

13. Nganong si Jesus ang makahatag ug pinakalig-ong pamatuod nga bakakon si Satanas? (Tan-awa sab ang hulagway.)

¹³ Sa tibuok kinabuhi ni Jesus, iya gyong gipamatud-an nga si Satanas ang bakakon, dili si Jehova. (Juan 8:44) Walay laing mas nakaila kang Jehova gawas kang Jesus. Kon naa may gamayng katinuoran sa mga akusasyon ni Satanas kang Jehova, seguradong mahibalo gyod si Jesus niana. Pero kay bakak man tong tanan, lig-ong gidepensahan ni Jesus ang reputasyon, o ngalan, ni Jehova. Bisan sa panahon nga morag gitalikdan siya ni Jehova, gipili gihapon ni  Jesus nga mamatay imbes motalikod sa iyang mahigugmaong Amahan.—Mat. 27:46. d

“NATAPOS NAKO ANG BULUHATON NGA IMONG GIHATAG KANAKO”

14. Unsa nga mga ganti ang gihatag ni Jehova kang Jesus tungod sa iyang pagkamatinumanon?

¹⁴ Sa gabii una siya mamatay, si Jesus miingon diha sa iyang pag-ampo: “Natapos nako ang buluhaton nga imong gihatag kanako.” Si Jesus masaligon nga gantihan ni Jehova ang iyang pagkamatinumanon. (Juan 17:​4, 5) Ug wala gyod siya masayop sa iyang pagsalig sa iyang Amahan. Wala tugoti ni Jehova nga magpabilin siya sa lubnganan. (Buh. 2:​23, 24) Iya siyang gibanhaw ug gihatagag mas taas nga posisyon didto sa langit. (Filip. 2:​8, 9) Sa ngadtongadto, si Jesus nagsugod pagmando ingong Hari sa Gingharian sa Diyos. Unsay himoon niana nga Gingharian? Ang ikaduhang bahin sa modelong pag-ampo nag-ingon: “Paanhia ang imong Gingharian. Matuman unta ang [kabubut-on ni Jehova], maingon sa langit, mao man usab sa yuta.”—Mat. 6:10.

15. Unsa pay himoon ni Jesus sa umaabot?

¹⁵ Sa dili na madugay, si Jesus makiggubat sa mga kaaway sa Diyos ug iyang laglagon ang mga daotan sa Armagedon. (Pin. 16:​14, 16; 19:​11-16) Dayon, iyang itambog si Satanas “sa kahiladman,” usa ka kahimtang nga samag nabilanggo si Satanas ug dili makahimog kadaot sa katawhan. (Pin. 20:​1-3) Panahon sa Usa ka Libo ka Tuig nga Pagmando ni Jesus, iyang ipasig-uli ang kalinaw ug mahimong hingpit ang mga tawo. Iyang banhawon ang mga patay ug himoong paraiso ang tibuok yuta. Matuman na gyod ang katuyoan ni Jehova!—Pin. 21:​1-4.

16. Unsay mapalampos sa hinapos sa Usa ka Libo ka Tuig nga Pagmando sa Kristo?

¹⁶ Unsay atong madahom nga mahitabo sa hinapos sa Usa ka Libo ka Tuig nga Pagmando sa Kristo? Mawagtang na ang sala ug ang pagkadili-hingpit. Ang mga tawo dili na kinahanglang  mangayog pasaylo pinasukad sa lukat; dili na pod sila magkinahanglan ug tigpataliwala ug saserdote. Ug “ang kataposang kaaway, ang [Adanikong] kamatayon,” nawagtang na. Wala nay mga lubnganan. Ang mga patay nabanhaw na. Ang tanang tawo sa yuta hingpit na.—1 Cor. 15:​25, 26.

17-18. (a) Unsay mahitabo human sa Usa ka Libo ka Tuig nga Pagmando? (b) Unsay buhaton ni Jesus human sa iyang pagmando? (1 Corinto 15:​24, 28) (Tan-awa sab ang hulagway.)

¹⁷ Unsay mahitabo human sa Usa ka Libo ka Tuig nga Pagmando? Nianang panahona, wala na gyoy mokuwestiyon sa pagkabalaan sa ngalan ni Jehova. Makapalipay kaayo na! Hinumdomi nga sa tanaman sa Eden, nangangkon si Satanas nga bakakon si Jehova ug nga dili mahigugmaon ang Iyang paagi sa pagmando. Pero ang mga alagad ni Jehova nga nagpasidungog ug nagtahod niya kanunayng nagbalaan sa iyang ngalan. Busa human sa Usa ka Libo ka Tuig nga Pagmando, ang reputasyon ni Jehova bug-os nang mabindikar. Si Jehova mapamatud-an na ingong mahigugmaong langitnong Amahan.

¹⁸ Nianang panahona, mapamatud-an na gyod nga bakak ang tanang akusasyon ni Satanas batok kang Jehova. Dayon, unsay buhaton ni Jesus human sa iyang pagmando? Sundogon ba niya si Satanas ug morebelde kang Jehova? Dili gyod! (Basaha ang 1 Corinto 15:​24, 28.) Itugyan ug balik ni Jesus ang Gingharian ngadto sa iyang Amahan. Magpasakop siya sa pagmando ni Jehova. Dili sama kang Satanas, andam ihatag ni Jesus ang tanan tungod sa iyang gugma kang Jehova.

19. Unsa ka importante kang Jesus ang ngalan ni Jehova?

¹⁹ Dili ikatingala nga kinabubut-ong gihatag ni Jehova kang Jesus ang iyang ngalan! Gipamatud-an ni Jesus nga siya ang pinakakuwalipikado nga morepresentar sa iyang Amahan. Unsa ka importante kang Jesus ang ngalan ni Jehova? Para niya, kini ang pinakaimportante sa tanan. Andam siyang mamatay para niana nga ngalan, ug andam niyang ibalik ang tanan kang Jehova human sa iyang Usa ka Libo ka Tuig nga Pagmando. Unsaon nato pagsundog ang ehemplo ni Jesus? Atong hisgotan ang tubag niana sa sunod nga artikulo.