1. Unsang importanteng desisyon ang kinahanglang himoon sa tanang tawo?

 ANG mga tawo karon kinahanglang mohimog importanteng desisyon. Ila bang suportahan si Jehova nga Diyos ingong tinuod nga Magmamando sa uniberso, o ila bang dapigan ang iyang pintas nga kaaway, si Satanas nga Yawa? Dili puwede nga neyutral ang mga tawo bahin ani. Ang ilang desisyon maoy basehan kon mabuhi ba sila hangtod sa hangtod o dili. (Mat. 25:31-33, 46) Panahon sa “dakong kasakitan,” sila markahan para sa kaluwasan o para sa kalaglagan.​—Pin. 7:14; 14:9-11; Ezeq. 9:4, 6.

2. (a) Unsay gidasig sa Hebreohanon 10:35-39 nga atong himoon? (b) Sa unsang paagi ang Pinadayag makatabang nato?

² Basaha ang Hebreohanon 10:35-39. Kon midesisyon ka nga suportahan ang pagmando ni Jehova, maayo kaayo ang imong desisyon. Ug seguradong gusto nimong tabangan ang uban nga makahimog saktong desisyon. Aron mahimo nâ, puwede nimong gamiton ang impormasyon nga naa sa Pinadayag. Gipakita nianang makapainteres nga basahon kon unsay mahitabo niadtong dili magpasakop sa pagmando ni Jehova ug kon unsang mga panalangin ang madawat niadtong mounong niya. Angay gyod natong tun-an kining importanteng mga kamatuoran, kay makapalig-on ni sa atong determinasyon nga padayong moalagad kang Jehova. Magamit pod nato ang atong makat-onan aron tabangan ang uban nga moalagad kang Jehova ug magmaunongon kaniya.

3. Unsay atong hisgotan niining artikuloha?

³ Niining artikuloha, atong tubagon kini nga mga pangutana: Unsay madawat niadtong mosuportar sa pagmando sa Diyos? Sa laing bahin, unsay mahitabo niadtong modesisyon  nga mosuportar sa hayag-pula nga pintas nga mananap nga gihisgotan sa Pinadayag?

4. Sa panan-awon nga nakita ni apostol Juan, unsa nga grupo ang kauban ni Jesus sa langit?

⁴ Sa panan-awon, nakita ni apostol Juan ang duha ka grupo nga nagsuportar sa pagmando ni Jehova ug mapanalanginan ug kinabuhing walay kataposan. Ang unang grupo naay gidaghanong 144,000. (Pin. 7:4) Sila gikuha gikan sa yuta aron maporma ang usa ka gobyerno, o Gingharian, uban ni Jesus sa langit. Uban niya, ilang mandoan ang yuta. (Pin. 5:9, 10; 14:3, 4) Sa panan-awon, nakita sila ni Juan nga nagbarog uban ni Jesus sa langitnong Bukid sa Zion.​—Pin. 14:1.

5. Unsay hapit nang mahitabo sa mga nahibilin sa 144,000?

⁵ Sukad sa panahon sa mga apostoles, linibo na ang gipili nga mahimong bahin sa 144,000. (Luc. 12:32; Roma 8:17) Pero si Juan giingnan nga pipila lang, o mga nahibilin lang, nianang grupoha ang buhi dinhi sa yuta panahon sa kataposang mga adlaw. Kining “mga nahibilin” makadawat sa ilang kataposang “selyo” sa pag-uyon ni Jehova sa dili pa magsugod ang dakong kasakitan. (Pin. 7:2, 3; 12:17) Dayon, panahon sa dakong kasakitan, kini nga mga nahibilin dad-on ngadto sa langit aron moduyog sa ubang membro sa 144,000 kinsa namatay nga matinumanon. Sila mahimong kaubang magmamando ni Jesus sa Gingharian sa Diyos.​—Mat. 24:31; Pin. 5:9, 10.

6-7. (a) Unsang grupo ang sunod nga nakita ni Juan, ug unsay atong nahibaloan bahin nila? (b) Nganong ang mga nahibilin ug ang “dakong panon” angayng mainteres sa Pinadayag kapitulo 7?

⁶ Human makita ni Juan kini nga grupo sa langit, nakakita siyag “dakong panon.” Dili sama sa 144,000, kining grupoha walay espesipikong gidaghanon. (Pin. 7:9, 10) Unsay atong nahibaloan bahin nila? Si Juan giingnan: “Kini sila ang nakalabang sa dakong kasakitan, ug ilang gilabhan ang ilang tag-as nga besti ug gipaputi kini sa dugo sa Kordero.” (Pin. 7:14) Dihang ang “dakong panon” maluwas na sa dakong kasakitan, sila magpuyo sa yuta ug mag-enjoy sa nindot kaayong mga panalangin.​—Sal. 37:9-11, 27-29; Prov. 2:21, 22; Pin. 7:16, 17.

⁷ Gipili man ta nga moadto sa langit o magpabilin dinhi sa yuta, makita ba nato ang atong kaugalingon nga apil nianang gihisgotan sa Pinadayag kapitulo 7? Angay lang. Makapalipay kaayo nâ nga panahon para sa duha ka grupo sa mga alagad sa Diyos! Dili gyod ta magmahay sa atong desisyon nga suportahan ang pagmando ni Jehova. Unsa pay gisulti sa Pinadayag bahin sa dakong kasakitan?​—Mat. 24:21.

8. Unsay sinugdanan sa dakong kasakitan, ug unsay himoon sa kadaghanan?

⁸ Sa nahisgotan na sa miaging artikulo, ang politikal nga mga awtoridad niining kalibotana hapit nang moatake sa Bantogang Babilonya, ang tibuok kalibotang imperyo sa bakak nga relihiyon. (Pin. 17:16, 17) Kini nga pag-atake mao ang sinugdanan sa dakong kasakitan. Moresulta ba ni nga daghan ang modesisyon sa pagsimba kang Jehova? Dili. Ang Pinadayag kapitulo 6 nagpakita nga nianang panahona, ang mga tawo nga wala mag-alagad kang Jehova modangop sa politikal ug komersiyal nga mga sistema niining kalibotana, nga gipakasamag mga bukid. Kay dili sila  modapig sa Gingharian sa Diyos, isipon sila ni Jehova nga mga kaaway.​—Luc. 11:23; Pin. 6:15-17.

9. Panahon sa dakong kasakitan, nganong makita gyod nga lahi ang katawhan ni Jehova, ug unsay mahitabo kanila?

⁹ Pero nianang lisod kaayo nga panahon sa kasakitan, makita gyod nga lahi ang matinumanong mga alagad ni Jehova. Sama karon, sila lang unya sa tibuok yuta ang mag-alagad kang Jehova nga Diyos ug dili mosuportar sa “pintas nga mananap.” (Pin. 13:14-17) Tungod ana, masuko pag-ayo ang mga kaaway ni Jehova. Unya ang mga nasod mag-alyansa aron atakehon ang tanang alagad sa Diyos dinhi sa yuta. Sa Bibliya, gitawag nig pag-atake ni Gog sa Magog.​—Ezeq. 38:14-16.

10. Base sa Pinadayag 19:19-21, unsay reaksiyon ni Jehova dihang atakehon ang iyang katawhan?

¹⁰ Unsay reaksiyon ni Jehova niining pintas nga pag-atake? Siya miingon: “Ang akong dakong kasuko mosilaob.” (Ezeq. 38:18, 21-23) Ang Pinadayag kapitulo 19 nagsulti sa sunod nga mahitabo. Ipadala ni Jehova ang Iyang Anak aron depensahan ang Iyang katawhan ug pildihon ang ilang mga kaaway. Kauban ni Jesus ang “mga panon sa langit”​—ang matinumanong mga anghel ug ang 144,000. (Pin. 17:14; 19:11-15) Unsay resulta niini nga gubat? Ang tanang tawo ug organisasyon nga supak kang Jehova bug-os nga malaglag!​—Basaha ang Pinadayag 19:19-21.

11. Unsa ang pinakaimportanteng hitabo nga gihisgotan sa Pinadayag?

¹¹ Imadyina kon unsay bation sa matinumanong mga alagad sa Diyos dinhi sa yuta dihang maluwas sila sa kalaglagan sa iyang mga kaaway! Mag-awas-awas gyod ang ilang kalipay! Pero bisag maninggit sa kalipay ang naa sa langit dihang laglagon ang Bantogang Babilonya, naa pay makahatag ug mas dakong kalipay. (Pin. 19:1-3) Mao ni ang pinakaimportanteng hitabo nga gihisgotan sa Pinadayag​—“ang kasal sa Kordero.”​—Pin. 19:6-9.

12. Base sa Pinadayag 21:1, 2, kanus-a mahitabo ang kasal sa Kordero?

¹² Kanus-a mahitabo ang kasal? Ang 144,000 kompleto na sa langit sa dili pa magsugod ang gubat sa Armagedon. Pero dili pa nâ ang panahon sa kasal sa Kordero. (Basaha ang Pinadayag 21:1, 2.) Ang kasal sa Kordero mahitabo human sa gubat sa Armagedon dihang malaglag na ang tanang kaaway sa Diyos.​—Sal. 45:3, 4, 13-17.

13. Unsay mahitabo sa kasal sa Kordero?

¹³ Unsay mahitabo sa kasal sa Kordero? Sama sa literal nga kasal nga maghiusa sa lalaki ug babaye, kining simbolikong kasal maghiusa sa Hari, si Jesu-Kristo, ug sa iyang “pangasaw-onon,” ang 144,000. Kining importanteng hitabo mao ang sinugdanan sa bag-ong gobyerno nga magmando sa yuta sulod sa 1,000 ka tuig.​—Pin. 20:6.

14-15. Base sa Pinadayag kapitulo 21, sa unsa gipakasama ang 144,000? (Tan-awa ang hulagway sa atubangan sa magasin.)

¹⁴ Dayon, ang Pinadayag kapitulo 21 naghisgot nga ang 144,000 samag nindot kaayong siyudad nga gitawag ug “Bag-ong Jerusalem.” (Pin. 21:2, 9) Kini nga siyudad naay 12 ka bato nga pundasyon, ug nasulat niana ang “12 ka ngalan sa 12 ka apostoles sa Kordero.” Nganong nainteres si Juan niini? Kay nakita niya nga nasulat ang iyang ngalan sa usa sa maong mga bato. Pagkadakong pribilehiyo!​—Pin. 21:10-14; Efe. 2:20.

¹⁵ Kining simbolikong siyudad lahi kaayo sa  ubang mga siyudad. Kini naay dako nga dalan nga purong bulawan, 12 ka ganghaan nga perlas, ug paril ug pundasyon nga gidekorasyonan ug bililhong mga bato​—ug ang mga sukod niini balanse kaayo. (Pin. 21:15-21) Pero morag naay kulang! Matikdi ang sunod nga giingon ni Juan: “Wala koy nakitang templo diha niini, kay ang Labing Gamhanang Diyos nga si Jehova mao ang templo niini, mao man usab ang Kordero. Ug ang siyudad wala magkinahanglan sa adlaw o sa bulan nga modan-ag niini, kay gidan-agan kini sa himaya sa Diyos, ug ang lampara niini mao ang Kordero.” (Pin. 21:22, 23) Si Jehova makauban na unya niadtong apil sa Bag-ong Jerusalem. (Heb. 7:27; Pin. 22:3, 4) Busa si Jehova ug Jesus ang templo niana nga siyudad.

16. Unsay maeksperyensiyahan sa mga tawo panahon sa Usa ka Libo ka Tuig nga Pagmando sa Gingharian sa Diyos?

¹⁶ Malipay gyod ang mga dinihogan nga maghunahuna niini nga siyudad. Pero kadtong naay yutan-ong paglaom angay pong mainteres niini. Sa Usa ka Libo ka Tuig nga Pagmando sa Gingharian sa Diyos, ang Bag-ong Jerusalem magtaganag daghan kaayong panalangin. Nakita ni Juan nga kini nga mga panalangin nag-agos nga samag “suba sa tubig sa kinabuhi.” Sa isigkadaplin sa suba, naay “mga kahoy sa kinabuhi” ug ang mga dahon niini maoy “tambal alang sa kanasoran.” (Pin. 22:1, 2) Ang tanang tawo nga buhi nianang panahona naay kahigayonan nga makabenepisyo sa maong mga panalangin. Ang tanang matinumanong tawo anam-anam nga mahimong perpekto. Wala na unyay masakit, mag-antos, ug mohilak sa kaguol.​—Pin. 21:3-5.

17. Base sa Pinadayag 20:11-13, kinsay makabenepisyo sa Usa ka Libo ka Tuig nga Pagmando?

¹⁷ Kinsay makabenepisyo niining nindot kaayong mga panalangin? Ang una mao ang dakong panon nga maluwas sa Armagedon ug ang ilang mga anak nga matawo sa bag-ong kalibotan. Pero ang Pinadayag kapitulo 20 nagsaad pod nga ang mga patay banhawon. (Basaha ang Pinadayag 20:11-13.) Ang namatay nga mga “matarong” apil ang mga “dili matarong”​—kinsa wala makabaton ug kahigayonan nga makakat-on bahin kang Jehova—​mabuhi pag-usab dinhi sa yuta. (Buh. 24:15; Juan 5:28, 29) Buot bang ipasabot nga  sa Usa ka Libo ka Tuig nga Pagmando, ang tanan banhawon? Dili. Kadtong tinuyong naghimog daotan ug wala gyod magpahimulos sa kahigayonan nga moalagad kang Jehova sa wala pa sila mamatay, dili banhawon. Gipamatud-an nila nga dili sila angayang mabuhi sa Paraisong yuta.​—Mat. 25:46; 2 Tes. 1:9; Pin. 17:8; 20:15.

18. Unsa na unyay kahimtang dinhi sa yuta sa kataposan sa 1,000 ka tuig?

¹⁸ Sa kataposan sa 1,000 ka tuig, ang tanang tawo sa yuta mahimo nang perpekto. Wala na ang tanang epekto sa sala nga atong napanunod kang Adan. (Roma 5:12) Wala na ang tunglo sa sala ni Adan. Niana nga diwa, ang mga tawo sa yuta “mabuhi,” kay sila mahimong perpekto sa kataposan sa 1,000 ka tuig.​—Pin. 20:5.

19. Nganong gikinahanglan ang kataposang pagsulay?

¹⁹ Nahibalo ta nga si Jesus wala gyod mokompromiso bisan pa sa mga paningkamot ni Satanas. Nagpabilin siyang matinumanon. Pero ang tanan bang perpektong tawo magmatinumanon kang Jehova kon hatagan si Satanas ug kahigayonan nga sulayan sila? Ang matag usa makatubag nianang pangutanaha dihang buhian si Satanas gikan sa kahiladman sa kataposan sa 1,000 ka tuig. (Pin. 20:7) Kadtong magmatinumanon sa kataposang pagsulay mabuhi sa walay kataposan ug makabaton ug tinuod nga kagawasan. (Roma 8:21) Kadtong morebelde laglagon uban sa Yawa ug sa iyang mga demonyo.​—Pin. 20:8-10.

20. Unsay imong gibati sa kahibulongang mga tagna nga gihisgotan sa Pinadayag?

²⁰ Unsa may imong gibati human nato ma-review ang Pinadayag? Dili ba eksayted kaayo ka nga nakita nimo ang imong kaugalingon niining nindot kaayo nga mga tagna? Dili ba nadasig ka nga imbitahan ang uban nga moapil sa putling pagsimba sa atong Diyos? (Pin. 22:17) Nahimong buhi sa atong hunahuna ang kahibulongang panghitabo sa umaabot ug natandog ang atong kasingkasing, maong eksayted pod tang mosulti sa giingon ni apostol Juan: “Amen! Dali, Ginoong Jesus.”​—Pin. 22:20.