1-2. Unsang mga panalangin ang madawat sa usa human sa iyang bawtismo?

 MALIPAY kaayo ta dihang mabawtismohan ta ug mahimong bahin sa pamilya ni Jehova. Kadtong nakabaton nianang talagsaong pribilehiyo mouyon gyod sa giingon ni salmistang David kang Jehova: “Malipayon ang tawo nga imong pilion ug paduolon aron mopuyo sa imong mga hawanan.”—Sal. 65:4.

² Dili kay si bisan kinsa lang ang papuy-on ni Jehova sa iyang hawanan. Sama sa nahisgotan sa nag-unang artikulo, makigsuod lang siya niadtong naningkamot nga makabaton ug suod nga relasyon kaniya. (Sant. 4:8) Dihang magpahinungod ka kang Jehova ug magpabawtismo, mas masuod ka kaniya sa espesyal nga paagi. Makaseguro ka nga human sa imong bawtismo, iyang “ibubo [kanimo] ang panalangin hangtod nga wala nay makulang.”—Mal. 3:10; Jer. 17:​7, 8.

3. Unsay seryosong responsibilidad sa dedikado ug bawtismadong mga Kristohanon? (Ecclesiastes 5:​4, 5)

³ Ang bawtismo sinugdanan pa lang. Human sa bawtismo, maningkamot ka nga tumanon ang imong panaad sa pagpahinungod, bisag makaatubang kag mga tentasyon o pagsulay. (Basaha ang Ecclesiastes 5:​4, 5.) Ingong tinun-an ni Jesus, sundon nimo pag-ayo ang iyang ehemplo ug mga sugo kutob sa imong maarangan. (Mat. 28:​19, 20; 1 Ped. 2:21) Kini nga artikulo motabang nimo sa paghimo niana.

 ‘PADAYONG SUNDA’ SI JESUS BISAN PA SA MGA PAGSULAY UG TENTASYON

4. Unsay gipasabot ni Jesus dihang siya miingon nga ang iyang mga tinun-an magpas-an ug “estaka sa pagsakit”? (Lucas 9:23)

⁴ Ang pagpabawtismo wala magpasabot nga dili na ka makaatubang ug mga problema. Giklaro ni Jesus nga ang iyang mga tinun-an magpas-an ug “estaka sa pagsakit.” Gani, siya miingon nga ila nang himoon “matag adlaw.” (Basaha ang Lucas 9:23.) Gipasabot ba ni Jesus nga ang iyang mga sumusunod kanunayng mag-antos? Wala. Gipasiugda lang niya nga gawas sa mga panalangin nga madawat sa iyang mga sumusunod, makaatubang silag mga pagsulay. Ang uban niini nga mga pagsulay basin lisod pa gani kaayo.—2 Tim. 3:12.

5. Unsang mga panalangin ang gisaad ni Jesus niadtong naghimog mga sakripisyo?

⁵ Tingali gisupak ka sa mga membro sa imong pamilya, o kaha gisakripisyo nimo ang mga kahigayonan nga makabaton ug dugang materyal nga mga butang aron unahon ang Gingharian. (Mat. 6:33) Kon mao, makaseguro ka nga nakita ni Jehova ang tanan nimong gihimo para niya. (Heb. 6:10) Tingali, naeksperyensiyahan nimo nga tinuod ang giingon ni Jesus: “Kadtong mibiya sa iyang balay o mga igsoon o inahan o amahan o mga anak o kaumahan tungod kanako ug sa maayong balita, makabaton karon ug 100 ka pilo niini—mga balay, igsoon, inahan, anak, ug kaumahan, uban ang mga paglutos—ug sa umaabot nga sistema sa mga butang, kinabuhing walay kataposan.” (Mar. 10:​29, 30) Ang mga panalangin nga imong nadawat mas labaw gyod kon itandi sa mga sakripisyo nga imong gihimo.—Sal. 37:4.

6. Nganong kinahanglan nga padayon natong suklan ang “tinguha sa unod” human sa bawtismo?

⁶ Kinahanglan gihapon kang maningkamot nga suklan ang “tinguha sa unod” human sa bawtismo. (1 Juan 2:16) Tungod na kay makasasala gihapon ka. Usahay bation tingali nimo ang gibati ni apostol Pablo, kinsa misulat: “Sa akong kasingkasing nalipay gyod ko sa balaod sa Diyos, apan nakita nako sa akong lawas nga naay laing balaod nga nakig-away sa balaod sa akong hunahuna ug nagbihag nako sa balaod sa sala nga ania sa akong lawas.” (Roma 7:​22, 23) Maluya tingali ka tungod sa imong sayop nga mga tinguha. Pero kon imong hunahunaon ang imong panaad kang Jehova dihang nagpahinungod ka kaniya, molig-on ang imong determinasyon nga suklan ang tentasyon. Ang tinuod, ang imong panaad sa pagpahinungod dakog tabang aron dili ka malisdan sa pagsukol sa mga tentasyon. Ngano?

7. Nganong ang imong pagpahinungod kang Jehova makatabang aron makapabilin kang matinumanon kaniya?

⁷ Dihang nagpahinungod ka kang Jehova, imo nang gidumilian ang imong kaugalingon. Nagpasabot na nga gisalikway na nimo ang mga tinguha ug ambisyon nga dili makapalipay kang Jehova. (Mat. 16:24) Busa dihang mag-atubang kag pagsulay, dili na ka kinahanglang magsigeg hunahuna kon unsay himoon. Nakadesisyon na ka nga dumilian kanang tanan ug magpabiling matinumanon kang Jehova. Determinado ka nga lipayon siya. Pinaagi ana, imong gisundog si Job. Bisag nag-atubang siyag lisod kaayo nga mga pagsulay, siya determinadong miingon: “Dili gyod nako wad-on ang akong integridad!”—Job 27:5.

8. Sa unsang paagi ang pagpamalandong sa imong pag-ampo dihang nagpahinungod ka makatabang nimo nga masuklan ang tentasyon?

⁸ Ang pagpamalandong sa imong pag-ampo dihang nagpahinungod ka kang Jehova makapalig-on nimo sa pagsukol sa bisan unsang tentasyon. Pananglitan, makig-flirt ba ka sa minyo na? Siyempre dili! Nakadesisyon na ka  daan nga dili gyod na nimo buhaton. Pinaagi ana, malikayan nimo ang pait nga resulta kon makig-flirt ka. Busa dili gyod nimo tugotan nga ayha pa ka molihok dihang nakagamot na ang sayop nga mga pagbati. ‘Mopalayo’ ka sa “dalan sa daotan.”—Prov. 4:​14, 15.

9. Sa unsang paagi ang pagpamalandong sa imong pag-ampo dihang nagpahinungod ka makatabang pod nimo nga padayong unahon ang espirituwal nga mga kalihokan?

⁹ Komosta kon gitanyagan kag trabaho nga makababag sa imong regular nga pagtambong sa mga tigom? Dili na ka magduhaduha kon unsay imong himoon, kay kaniadto pa lang, nakadesisyon na ka nga dili dawaton ang ingon ana nga mga tanyag. Busa dili ka matental nga dawaton ang maong trabaho ug maghunahuna nga makaalagad ra gihapon ka kang Jehova. Sama kang Jesus kinsa determinado nga mapalipay ang iyang Amahan, suklan dayon nimo ang bisan unsa nga dili makapalipay sa Diyos kay naa kay panaad Kaniya.—Mat. 4:10; Juan 8:29.

10. Sa unsang paagi ka tabangan ni Jehova nga “padayong mosunod” kang Jesus human sa imong bawtismo?

¹⁰ Sa tinuod lang, ang mga pagsulay ug mga tentasyon naghatag nimog kahigayonan sa pagpakita nga determinado ka nga “padayong mosunod” kang Jesus. Ug makaseguro ka nga tabangan ka ni Jehova sa paghimo niana. Ang Bibliya nag-ingon: “Ang Diyos kasaligan, ug dili niya itugot nga tentalon mo nga labaw sa inyong maantos, apan uban sa tentasyon siya magtaganag kalingkawasan aron makalahutay mo niini.”—1 Cor. 10:13.

KON UNSAON NGA PADAYON NATONG MASUNOD SI JESUS

11. Unsa ang usa sa pinakamaayong paagi nga padayon natong masunod si Jesus? (Tan-awa sab ang hulagway.)

¹¹ Sa dinhi pa si Jesus sa yuta, nag-alagad siya kang Jehova sa bug-os kasingkasing ug  nagpabiling suod Kaniya pinaagi sa pag-ampo. (Luc. 6:12) Busa usa sa pinakamaayong paagi nga imong masunod si Jesus human sa imong bawtismo mao ang padayong pagbuhat sa mga butang nga mas makapasuod nimo kang Jehova. Ang Bibliya nag-ingon: “Bisan unsang pag-uswag ang atong nahimo, ipadayon nato kini.” (Filip. 3:16) Usahay, makadungog kag mga eksperyensiya sa mga igsoon nga misakripisyo aron makahimog dugang sa pag-alagad. Tingali mieskuwela sila sa School for Kingdom Evangelizers o mibalhin sa lugar nga mas dakog panginahanglan. Kon posible na sa imong kahimtang, himoa nang tumong. Gusto gyod sa katawhan ni Jehova nga magpalapad sa ilang ministeryo. (Buh. 16:9) Pero komosta kon dili pa na nimo mahimo karon? Ayawg hunahunaa nga mas ubos ka kon itandi niadtong makahimo niana. Ang importante, molahutay ka sa pag-alagad. (Mat. 10:22) Hinumdomi nga gipabilhan ni Jehova ang imong pag-alagad kaniya sumala sa makaya sa imong kahimtang. Importante na nga paagi aron padayon nimong masunod si Jesus human sa imong bawtismo.—Sal. 26:1.

12-13. Unsay imong mahimo kon gibati nimo nga dili na kaayo ka dasig parehas kaniadto? (1 Corinto 9:​16, 17) (Tan-awa sab ang kahong “ Pabilin sa Lumba.”)

¹² Komosta kon mibati ka nga dili na kinasingkasing ang imong mga pag-ampo o dili na kaayo ka ganahang mosangyaw? Komosta kon wala na kaayo ka mag-enjoy sa pagbasa sa Bibliya kon itandi kaniadto? Kon mao ni ang imong gibati, ayawg hunahunaa nga wala na ka uyoni ni Jehova. Kay dili ka hingpit, mag-usab-usab ang imong emosyon. Kon dili na sama kaniadto ang imong kadasig, pamalandonga ang ehemplo ni apostol Pablo. Bisag naningkamot siya nga sundogon si Jesus, nahibalo siya nga usahay wala siyay gana nga himoon kon unsay gikinahanglan. (Basaha ang 1 Corinto 9: 16, 17.) Siya miingon: “Bisan kon ginabuhat nako kini nga supak sa akong kabubut-on, gitugyanan gihapon kog buluhaton.” Sa ato pa, determinado si Pablo nga tumanon ang iyang ministeryo bisag unsa pay iyang gibati nianang higayona.

¹³ Sa susama, ayawg tugoti nga ang imong emosyon maoy modiktar sa imong mga desisyon. Magmadeterminado nga himoon kon unsay husto bisag unsa pay imong gibati. Kon padayon nimong himoon kon unsay husto, sa ngadtongadto mausab ra pod ang imong gibati. Ang maayong espirituwal nga rutina makatabang aron padayon nimong masunod si Jesus human sa bawtismo. Ang imong paningkamot nga padayon ning himoon makadasig pod sa mga igsoon.—1 Tes. 5:11.

“PADAYONG SULAYI . . . PADAYONG PAMATUD-I”

14. Unsay angay nga regular nimong susihon, ug ngano? (2 Corinto 13:5)

¹⁴ Makatabang pod kon human sa imong bawtismo, regular nimong susihon ang imong kaugalingon. (Basaha ang 2 Corinto 13:5.) Matag karon ug unya, susiha kon regular ba ang imong pag-ampo, pagbasa ug pagtuon sa Bibliya, pagtambong sa mga tigom, ug pagpakigbahin sa ministeryo. Pangitag mga paagi nga mas mag-enjoy ug mas makabenepisyo ka niini nga mga bahin sa imong pagsimba. Pananglitan, pangutan-a ang imong kaugalingon: ‘Kaya ba nakong ipatin-aw ang pangunang mga pagtulon-an sa Bibliya? Naa pa ba koy mahimo aron mas magmalipayon ang akong ministeryo? Unsa ka espesipiko ang akong mga pag-ampo, ug nagpakita ba ni nga bug-os ang akong pagsalig kang Jehova? Regular ba kong nagatambong sa mga tigom? Unsay akong himoon aron mas makapokus ug mas makakomento ko sa tigom?’

15-16. Unsay imong makat-onan sa eksperyensiya sa usa ka brader bahin sa pagsukol sa tentasyon?

¹⁵ Importante pod nga matinud-anon nimong susihon kon unsay imong mga kahuyangan. Ang brader nga si Robert naghisgot ug eksperyensiya nga nagpasiugda niana nga punto: “Niadtong mga 20 anyos ko, naa koy part-time nga trabaho. Usa ka adlaw, gipaadto ko sa akong katrabaho nga babaye sa ilang balay. Miingon siya nga kami ra daw duha didto ug mag-enjoy gyod mi. Sa primero, mihatag ra kog mga pasumangil, pero sa ulahi mibalibad na gyod ko ug akong gipatin-aw kon ngano.” Nasuklan ni Robert ang tentasyon, ug maayo kaayo to. Pero sa ulahi, dihang gihunahuna niya ang maong hitabo, nakita niya nga naa pa unta siyay angayng gihimo sa pag-atubang sa maong situwasyon. Siya miangkon: “Wala  nako sundoga si Jose kinsa midumili dayon ug lig-ong nagsalikway sa asawa ni Potipar. (Gen. 39:​7-9) Gani, wala ko magdahom nga malisdan ko sa pagbalibad. Tungod ani nga hitabo, nakita nako nga kinahanglan nakong palig-onon ang akong relasyon kang Jehova.”

¹⁶ Makabenepisyo pod ka kon susihon nimo ang imong kaugalingon sama sa gihimo ni Robert. Bisan dihang milampos ka sa pagsalikway sa tentasyon, pangutan-a ang imong kaugalingon, ‘Mibalibad ba dayon ko?’ Kon makita nimo nga naa pa kay kinahanglang pauswagon, ayawg kaluya. Hinuon, angay kang malipay nga nakita nimo ang imong kahuyangan. Iampo ni kang Jehova, ug paningkamot nga palig-onon ang imong determinasyon nga sundon ang iyang moral nga mga sukdanan.—Sal. 139:​23, 24.

17. Kay nagmatinumanon si Robert, unsay epekto niana sa ngalan ni Jehova?

¹⁷ Naa pa tay makat-onan sa eksperyensiya ni Robert. Siya miingon: “Dihang gibalibaran nako akong katrabaho, giingnan ko niya, ‘Nakapasar ka!’ Gipangutana nako siya kon unsay iyang gipasabot. Mitubag siya nga ang iyang amiga, nga Saksi kaniadto, miingon nga ang tanang batan-ong Saksi doble ug pagkinabuhi ug mohimo silag daotan kon naay kahigayonan. Maong giingnan niya ang iyang amiga nga iya kong sulayan. Nalipay kaayo ko kay napasidunggan nako ang ngalan ni Jehova.”

18. Unsay determinado nimong himoon human sa imong bawtismo? (Tan-awa sab ang kahong “ Serye nga Ma-enjoy Gyod Nimo.”)

¹⁸ Dihang nagpahinungod ka kang Jehova ug nagpabawtismo, gipakita nimo nga gusto nimong balaanon ang iyang ngalan bisag unsa pay mahitabo. Ug makaseguro ka nga nahibalo si Jehova sa mga pagsulay nga imong giatubang ug sa mga tentasyon nga imong gisuklan. Panalanginan niya ang imong mga paningkamot nga magmatinumanon. Salig nga pinaagi sa iyang balaang espiritu, hatagan ka niyag kusog sa paghimo niana. (Luc. 11:​11-13) Sa tabang ni Jehova, padayon nimong masunod si Jesus human sa imong bawtismo.