1. Unsay angayng buhaton sa usa sa dili pa magtukod ug balay?

 IMADYINA nga ang usa ka tawo naghunahunang magtukod ug balay. Nahibalo siya kon unsang klaseha sa balay ang iyang gustong tukoron. Angay bang mopalit dayon siyag materyales ug magsugod ug tukod? Dili. Sa dili pa siya magtukod, naa pa siyay kinahanglang himoon​—ang pagkuwenta sa gasto. Ngano? Kay kinahanglan siyang mahibalo kon igo ba ang iyang kuwarta nga ikapahuman sa balay. Kon kuwentahon niyag maayo ang gasto sa dili pa magtukod, posibleng mahuman niya pagpatukod ang iyang bag-ong balay.

2. Sumala sa Lucas 14:27-30, unsay kinahanglan nimong hunahunaon pag-ayo una magpabawtismo?

² Ang imo bang gugma ug apresasyon kang Jehova nagpalihok nimo sa paghunahuna nga magpabawtismo? Kon mao, kinahanglan kang mohimog desisyon nga parehas nianang tawo nga gustong magtukod ug balay. Nganong makaingon ta niana? Konsideraha ang giingon ni Jesus diha sa Lucas 14:27-30. (Basaha.) Gihisgotan ni Jesus kon unsay kahulogan sa pagkahimong tinun-an. Aron mahimong iyang tinun-an, kinahanglang andam tang moabaga sa ‘galastohan’​—ang mga kalisdanan ug sakripisyo. (Luc. 9:23-26; 12:51-53) Busa una magpabawtismo, kinahanglang hunahunaon nimo pag-ayo kon unsay apil sa pagkahimong tinun-an. Pinaagi niana, mas andam ka sa pag-alagad nga matinumanon sa Diyos ingong bawtismadong Kristohanon.

3. Unsay atong hisgotan niining artikuloha?

³ Ang ato bang pagkahimong bawtismadong tinun-an sa Kristo angayan sa atong paglahutay ug pagsakripisyo? Siyempre! Ang bawtismo moresultag daghang panalangin karon ug sa umaabot. Hisgotan nato ang pipila ka importanteng pangutana bahin sa bawtismo. Makatabang nâ nimo sa pagtubag sa pangutanang “Andam na ba kong magpabawtismo?”

4. (a) Unsa ang pagpahinungod? (b) Unsay kahulogan sa ‘pagdumili’ sa kaugalingon, nga gihisgotan sa Mateo 16:24?

⁴ Unsa ang pagpahinungod? Sa dili ka pa magpabawtismo, kinahanglan kang magpahinungod. Sa dihang magpahinungod ka kang Jehova, kinasingkasing kang moampo ug mosulti kaniya nga gamiton nimo ang imong kinabuhi sa pag-alagad kaniya hangtod sa hangtod. Sa dihang magpahinungod ka sa Diyos, imong “dumilian” ang kaugalingon. (Basaha ang Mateo 16:24.) Iya ka na ni Jehova, ug dako kini nga pribilehiyo. (Roma 14:8) Sultian nimo siya nga sugod nianang adlawa, magpokus ka na sa pag-alagad kaniya ug dili sa pagpahimuot sa imong kaugalingon. Ang imong pagpahinungod maoy seryosong panaad nimo sa Diyos. Dili ta pugson ni Jehova sa paghimo niana nga panaad. Pero kon himoon nato kana, dahomon niya nga tumanon nato ang atong gisaad.​—Sal. 116:12, 14.

5. Sa unsang paagi ang pagpahinungod konektado sa bawtismo?

⁵ Sa unsang paagi ang pagpahinungod konektado sa bawtismo? Ang imong pagpahinungod maoy personal ug pribado; tali lang nâ kanimo ug kang Jehova. Ang bawtismo maoy publiko; himoon ni atubangan sa uban, sagad panahon sa asembliya o kombensiyon. Sa dihang magpabawtismo ka, imong gipakita sa uban nga nagpahinungod ka na kang Jehova. b Busa ang imong bawtismo magpahibalo sa uban nga gihigugma nimo si Jehova nga imong Diyos sa tibuok nimong kasingkasing, kalag, hunahuna, ug kusog ug determinado kang moalagad kaniya hangtod sa hangtod.​—Mar. 12:30.

6-7. Sumala sa 1 Pedro 3:18-22, unsa ang duha ka rason kon nganong kinahanglan tang magpabawtismo?

⁶ Kinahanglan ba gyod nga magpabawtismo? Tagda ang giingon sa 1 Pedro 3:18-22. (Basaha.) Maingon nga ang arka maoy makitang pamatuod sa pagtuo ni Noe, ang imong bawtismo maoy makitang ebidensiya sa imong pagpahinungod kang Jehova. Pero gikinahanglan ba gyod ang bawtismo? Oo. Gisulti ni Pedro kon ngano. Una, kini ‘nagaluwas kaninyo.’ Ang bawtismo makaluwas kanato kon gihimo na nato ang importanteng mga lakang sa pagpakita nga may pagtuo ta kang Jesus ug mituo ta nga siya namatay alang kanato, gibanhaw ngadto sa langit, ug karon “naa sa tuong kamot sa Diyos.”

⁷ Ikaduha, ang bawtismo moresulta sa “maayong konsensiya.” Sa dihang magpahinungod ta sa Diyos ug magpabawtismo, misulod ta sa usa ka espesyal nga relasyon kaniya. Tungod sa atong sinserong paghinulsol ug sa atong pagtuo sa lukat, gipasaylo sa Diyos ang atong mga sala. Busa makabaton ta ug maayong konsensiya atubangan niya.

8. Unsay angayng basehanan sa imong desisyon nga magpabawtismo?

⁸ Unsay angayng basehanan sa imong desisyon nga magpabawtismo? Ingong resulta sa imong seryosong pagtuon sa Bibliya, daghan kag nakat-onan bahin kang Jehova​—sa iyang personalidad ug mga paagi. Tungod sa imong nakat-onan bahin kaniya, ang imong kasingkasing natandog ug napalihok sa paghigugma pag-ayo kaniya. Ang imong gugma kang Jehova angay nga maoy pangunang basehanan sa imong desisyon nga magpabawtismo.

9. Unsay kahulogan sa pagpabawtismo sa ngalan sa Amahan ug sa Anak ug sa balaang espiritu, sumala sa Mateo 28:19, 20?

⁹ Ang imong desisyon nga magpabawtismo angay sab nga ibase sa mga kamatuoran sa Bibliya nga imo nang gidawat. Tagda ang giingon ni Jesus sa dihang gihatag niya ang sugo nga maghimog mga tinun-an. (Basaha ang Mateo 28:19, 20.) Sumala kang Jesus, kadtong magpabawtismo kinahanglang mohimo niana “sa ngalan sa Amahan ug sa Anak ug sa balaang espiritu.” Unsay gipasabot niini? Kinahanglang tibuok kasingkasing kang motuo sa mga  kamatuoran sa Bibliya bahin kang Jehova; sa iyang Anak, si Jesus; ug sa balaang espiritu. Kini nga mga kamatuoran gamhanan kaayo ug mahimong makapatandog pag-ayo sa imong kasingkasing. (Heb. 4:12) Hisgotan nato pag-usab ang pipila niana.

10-11. Unsang mga kamatuoran bahin sa Amahan ang imong nakat-onan ug gidawat?

¹⁰ Hinumdomi ang higayon sa dihang nakat-onan nimo kini nga mga kamatuoran bahin sa Amahan: Ang iyang “ngalan maoy Jehova,” siya “ang Labing Hataas ibabaw sa tibuok yuta,” ug siya lamang “ang matuod nga Diyos.” (Sal. 83:18; Isa. 37:16) Siya ang atong Maglalalang, ug “ang kaluwasan iya ni Jehova.” (Sal. 3:8; 36:9) Siya naghimog kahikayan aron maluwas ta gikan sa sala ug kamatayon ug siya naghatag kanatog paglaom nga mabuhi sa walay kataposan. (Juan 17:3) Ang imong pagpahinungod ug bawtismo magpaila nga ikaw usa sa mga Saksi ni Jehova. (Isa. 43:10-12) Mahimo kang bahin sa tibuok kalibotang pamilya sa mga magsisimba kinsa mapasigarbohon nga tawgon sa ngalan sa Diyos ug magpahibalo niana ngadto sa uban.​—Sal. 86:12.

¹¹ Pagkadakong pribilehiyo nga masabtan ang ginatudlo sa Bibliya bahin sa Amahan! Sa dihang dawaton nimo kining bililhong mga kamatuoran, ang imong kasingkasing magpalihok nimo sa pagpahinungod sa imong kaugalingon kang Jehova ug sa pagpabawtismo.

12-13. Unsang mga kamatuoran bahin sa Anak ang imong nakat-onan ug gidawat?

¹² Unsay imong reaksiyon sa dihang nakat-onan nimo ang mosunod nga mga kamatuoran bahin sa Anak? Si Jesus ang ikaduha nga labing importanteng persona sa uniberso. Siya ang atong Manlulukat. Kinabubut-on niyang gihatag ang iyang kinabuhi alang kanato. Sa dihang ipakita nato sa atong mga binuhatan nga nagtuo ta sa lukat, kita mahimong mapasaylo sa atong mga sala, makaugmad ug suod nga relasyon sa Diyos, ug makabatog kinabuhing walay kataposan. (Juan 3:16) Si Jesus ang atong Hataas nga Saserdote. Gusto ta niyang tabangan nga makabenepisyo sa lukat ug masuod sa Diyos. (Heb. 4:15; 7:24, 25) Ingong Hari sa Gingharian sa Diyos, siya ang gamiton ni Jehova sa pagbalaan sa Iyang ngalan, pagtapos sa pagkadaotan, ug paghatag ug walay kataposang mga panalangin sa umaabot nga Paraiso. (Mat. 6:9, 10; Pin. 11:15) Si Jesus mao ang atong sulondan. (1 Ped. 2:21) Nagpakita siyag ehemplo kanato sa paggamit sa iyang kinabuhi sa pagbuhat sa kabubut-on sa Diyos.​—Juan 4:34.

¹³ Kon dawaton nimo ang gitudlo sa Bibliya bahin kang Jesus, makakat-on ka sa paghigugma sa pinalanggang Anak sa Diyos. Ang maong gugma magpalihok nimo sa paggamit sa imong kinabuhi sa pagbuhat sa kabubut-on sa Diyos, sama sa gihimo ni Jesus. Ingong resulta, mapalihok ka sa pagpahinungod sa imong kaugalingon kang Jehova ug sa pagpabawtismo.

14-15. Unsang mga kamatuoran bahin sa balaang espiritu ang imong nakat-onan ug gidawat?

¹⁴ Unsay imong gihunahuna sa dihang nakat-onan nimo ang mosunod nga mga kamatuoran bahin sa balaang espiritu? Kini dili persona kondili aktibong gahom sa Diyos. Gigamit ni Jehova ang balaang espiritu sa paggiya sa mga tawo sa pagsulat sa Bibliya, ug ang espiritu motabang nato sa pagsabot ug pagpadapat sa atong mabasa. (Juan 14:26; 2 Ped. 1:21) Pinaagi sa iyang espiritu, si Jehova naghatag kanatog “gahom nga labaw sa kasarangan.” (2 Cor. 4:7) Ang espiritu naghatag kanatog kusog sa pagsangyaw sa maayong balita, pagsukol sa tentasyon, pag-atubang sa kaluya sa buot, ug paglahutay sa mga pagsulay. Makatabang ni nato sa pagpakita sa nindot nga mga hiyas nga bahin sa “bunga sa espiritu.” (Gal. 5:22) Ang Diyos dagayang maghatag sa iyang espiritu niadtong mosalig kaniya ug sinserong mangayo niana.​—Luc. 11:13.

¹⁵ Makapahupay kaayo ang pagkahibalo nga ang mga magsisimba ni Jehova makasalig sa  balaang espiritu sa pagtabang kanila sa pag-alagad sa Diyos! Sa dihang dawaton nimo ang mga kamatuoran nga imong nakat-onan bahin sa balaang espiritu, mapalihok ka sa pagpahinungod sa imong kaugalingon sa Diyos ug sa pagpabawtismo.

16. Unsay atong nakat-onan sa atong nahisgotan?

¹⁶ Ang imong desisyon nga magpahinungod sa imong kaugalingon sa Diyos ug magpabawtismo importante kaayo. Sa ato nang nakat-onan, kinahanglang andam kang moabaga sa galastohan​—ang mga kalisdanan ug sakripisyo. Pero ang galastohan wala ra sa kumingking kon itandi sa mga panalangin nga imong madawat. Ang bawtismo makaluwas nimo, ug kini moresulta sa maayong konsensiya atubangan sa Diyos. Kinahanglan nga ang pangunang basehanan sa imong desisyon nga magpabawtismo mao ang imong gugma kang Jehova nga Diyos. Kinahanglang kinasingkasing sab kang motuo sa mga kamatuoran nga imong nakat-onan bahin sa Amahan, Anak, ug balaang espiritu. Human nimo mapamalandong ang atong nahisgotan, unsay imong tubag sa pangutanang, “Andam na ba kong magpabawtismo?”

17. Unsay pipila sa mga lakang nga himoon una magpabawtismo?

¹⁷ Kon gibati nimong andam ka nang magpabawtismo, seguradong nakahimo ka nag pipila ka lakang sa pagpalig-on sa imong relasyon kang Jehova. c Ingong resulta sa imong regular nga pagtuon sa Bibliya, daghan kag nahibaloan bahin kang Jehova ug Jesus. Naugmad na nimo ang pagtuo. (Heb. 11:6) Bug-os kang misalig sa mga saad ni Jehova nga naa sa Bibliya, ug kombinsido ka nga ang imong pagtuo sa halad ni Jesus makaluwas nimo gikan sa sala ug kamatayon. Naghinulsol ka na sa imong mga sala; naguol ka pag-ayo sa mga sayop nga imong nahimo, ug nangayo kag pasaylo kang Jehova. Nagbag-o ka na; gisalikway na gyod nimo ang imong kanhing daotang pagkinabuhi ug nagkinabuhi na karon sa paagi nga makapahimuot sa Diyos. (Buh. 3:19) Gusto nimong isulti sa uban ang imong pagtuo. Mikuwalipikar ka nga mahimong dili bawtismadong magmamantala ug nagsugod ka nag sangyaw uban sa kongregasyon. (Mat. 24:14) Si Jehova mapasigarbohon kanimo kay gihimo nimo kining importanteng mga lakang. Gilipay gyod nimo ang iyang kasingkasing.​—Prov. 27:11.

18. Unsa pay kinahanglan nimong buhaton una ka mabawtismohan?

¹⁸ Una ka mabawtismohan, duna pay pipila ka butang nga kinahanglan nimong buhaton. Sa ato nang nahisgotan, kinahanglan kang magpahinungod sa Diyos. Pag-ampo kaniya nga kinasingkasing samtang mag-inusara ug panaad kaniya nga gamiton nimo ang imong kinabuhi sa pagbuhat sa iyang kabubut-on. (1 Ped. 4:2) Dayon pahibaloa ang koordinetor sa mga ansiyano nga gusto nimong magpabawtismo. Hangyoon niya ang pipila ka ansiyano sa pagpakig-estorya  kanimo. Palihog ayawg kabalaka. Walay duhaduha nga kining minahal nga mga igsoon nakaila na nimo ug nagmahal nimo. Ilang repasohon uban nimo ang importanteng mga pagtulon-an sa Bibliya nga imong nakat-onan. Gusto nilang seguroon nga imong nasabtan ang maong mga pagtulon-an ug ang kaimportante sa pagpahinungod ug bawtismo. Kon nakita nila nga andam ka na, pahibaloon ka nila nga puwede kang magpabawtismo sa sunod nga asembliya o kombensiyon.

19-20. Unsay kinahanglan nimong buhaton human sa imong bawtismo, ug sa unsang paagi mahimo nimo kana?

¹⁹ Human ka mabawtismohi, unsay kinahanglan nimong buhaton? d Hinumdomi nga ang pagpahinungod maoy usa ka panaad ug gidahom ni Jehova nga imo ning tumanon. Busa human sa imong bawtismo, kinahanglang tumanon nimo ang imong pagpahinungod. Sa unsang paagi mahimo nimo kana?

²⁰ Magpabiling suod sa kongregasyon. Ingong bawtismadong Kristohanon, bahin ka na karon sa panag-igsoonay. (1 Ped. 2:17) Ang mga igsoon sa kongregasyon mao ang imong espirituwal nga pamilya. Pinaagi sa regular nga pagtambong sa mga tigom, mas masuod ka kanila. Basaha ang Pulong sa Diyos ug palandonga kini adlaw-adlaw. (Sal. 1:1, 2) Human magbasag usa ka bahin sa Bibliya, paggahin ug panahon sa paghunahuna pag-ayo sa imong nabasa. Pinaagi niana, matandog ang imong kasingkasing. “Padayon . . . sa pag-ampo.” (Mat. 26:41) Ang imong kinasingkasing nga mga pag-ampo mas makapasuod nimo kang Jehova. “Unaha kanunay ang pagpangita sa Gingharian.” (Mat. 6:33) Mahimo nimo kana kon himoon nimong prayoridad ang buluhatong pagsangyaw. Pinaagi sa regular nga pagsangyaw, padayong molig-on ang imong pagtuo, ug lagmit matabangan nimo ang uban nga makabaton ug paglaom nga mabuhi sa walay kataposan.​—1 Tim. 4:16.

21. Ang imong pagpabawtismo magbukas sa dalan ngadto sa unsa?

²¹ Ang desisyon nga magpahinungod kang Jehova ug magpabawtismo mao ang labing importanteng desisyon nga imong mahimo. Tinuod nga dunay nalangkit nga mga kalisdanan ug sakripisyo. Pero angayan ba kana sa imong paglahutay ug pagsakripisyo? Oo! Ang bisan unsang kalisdanan nga imong maatubang niining daan nga kalibotan “kadiyot lang ug gaan.” (2 Cor. 4:17) Pero, ang imong pagpabawtismo magbukas sa dalan ngadto sa mas malipayong kinabuhi karon ug sa “tinuod nga kinabuhi” sa umaabot. (1 Tim. 6:19) Busa palihog, mainampoong palandonga, “Andam na ba kong magpabawtismo?”