1. Unsay giingon sa mga tinun-an ni Jesus ngadto sa daghang tawo nga nangabot sa Jerusalem?

DAGHANG lalaki ug babaye gikan sa lainlaing nasod ug nagsultig lainlaing pinulongan ang nangabot sa Jerusalem. Dunay talagsaong nahitabo nianang adlawa. Kalit lang nga ang usa ka grupo sa ordinaryong mga Hudiyo makasulti na sa lainlaing pinulongan sa mga bisita! Nahingangha ang mga tawo, pero mas nahingangha pa gyod sila sa giingon sa mga Hudiyo kanila ug sa giingon ni apostol Pedro sa tanan. Apil niini ang mensahe nga puwede silang maluwas kon magpakita silag pagtuo kang Jesu-Kristo. Natandog pag-ayo ang mga tawo niana nga mensahe. Gani, sila nangutana: “Unsay angay namong buhaton?” Si Pedro mitubag: “Ang matag usa kaninyo magpabawtismo.”—Buh. 2:37, 38.

2. Unsay atong hisgotan niining artikuloha? (Tan-awa ang hulagway sa atubangan sa magasin.)

² Talagsaon kaayo ang sunod nga nahitabo. Mga 3,000 ang nabawtismohan nianang adlawa ug nahimong mga tinun-an sa Kristo. Kini ang sinugdanan sa dakong buluhaton sa paghimog mga tinun-an nga gisugo ni Jesus sa iyang mga sumusunod. Kana nga buluhaton nagpadayon hangtod sa atong panahon. Pero karon, imposible nga matabangan dayon nato ang usa ka tawo nga mabawtismohan kon bag-o ra nato siyang naestorya. Tingali dangtan pag mga bulan, tuig, o kapin pa gani una magpabawtismo ang study. Ang paghimog mga tinun-an nagkinahanglag paningkamot, sama sa imong nahibaloan kon duna kay gidumalahag pagtuon sa Bibliya. Niining artikuloha,  atong hisgotan kon unsay imong mahimo aron matabangan ang imong Bible study nga mabawtismohan.

3. Sumala sa Mateo 28:19, 20, unsay angayng buhaton sa study aron mabawtismohan?

³ Sa dili pa mabawtismohan, kinahanglang ipadapat sa Bible study ang iyang nakat-onan sa Bibliya. (Basaha ang Mateo 28:19, 20.) Kon ipadapat sa study ang iyang nakat-onan, maparehas siya sa “tawong maalamon” sa ilustrasyon ni Jesus kinsa nagkalot ug lawom ug nagtukod sa iyang balay diha sa bato. (Mat. 7:24, 25; Luc. 6:47, 48) Sa unsang paagi matabangan nato ang study sa pagpadapat sa iyang nakat-onan? Hisgotan nato ang tulo ka sugyot.

4. Sa unsang paagi matabangan nato ang study nga makab-ot ang tumong nga magpabawtismo? (Tan-awa sab ang kahong “ Tabangi ang Imong Study sa Pagtakdag mga Tumong ug Pagkab-ot Niana.”)

⁴ Tabangi ang study sa pagtakdag mga tumong. Nganong kinahanglan nimo nang himoon? Tagda ni nga ilustrasyon: Kon magdrayb ka paingon sa layong lugar, tingali mohunong ka sa nindot nga mga dapit nga imong maagian. Kon buhaton nâ nimo, dili na kaayo ka layoan sa imong adtoan. Sa susama, kon ang Bible study magtakdag mga tumong nga dali ra niyang makab-ot, posibleng makita niya nga kaya ra niyang kab-oton ang tumong nga magpabawtismo. Gamita ang kahong “Sulayi Kini” sa librong Mabuhi Ka Hangtod sa Hangtod! aron tabangan ang imong study sa pagtakdag mga tumong. Inigkahuman sa matag leksiyon, hisgoti kon sa unsang paagi ang tumong konektado sa bag-o lang nakat-onan sa imong study. Kon duna kay lahi nga tumong para sa imong study, isulat kini sa seksiyong “O kaha.” Regular nga gamita kining bahina sa libro aron masusi nimo uban sa imong study ang mga tumong nga iyang makab-ot sa mubong panahon ug ang mga tumong nga nagkinahanglag taastaas nga panahon.

5. Sumala sa Marcos 10:17-22, unsay giingon ni Jesus nga kinahanglang buhaton sa tawong dato, ug ngano?

 ⁵ Tabangi ang study nga makahimog mga kausaban sa iyang kinabuhi. (Basaha ang Marcos 10:17-22.) Nahibalo si Jesus nga lisod para sa tawong dato nga ibaligya ang tanan niyang kabtangan. (Mar. 10:23) Pero giingnan ni Jesus ang tawo sa paghimo niining dakong kausaban sa iyang kinabuhi. Ngano? Tungod kay gimahal siya ni Jesus. Usahay, magduhaduha tingali ta sa pagdasig sa study nga ipadapat ang iyang nakat-onan kay naghunahuna ta nga dili pa siya andam sa paghimo sa gikinahanglang kausaban. Nagkinahanglan tingalig panahon ang mga tawo sa paghukas sa daang mga kinaiya ug pagsul-ob sa bag-ong personalidad. (Col. 3:9, 10) Pero kon sultian dayon nimo siya sa kausaban nga kinahanglan niyang himoon, posibleng makasugod dayon siya sa pagbag-o. Pinaagi niana, imong gipakita nga gimahal nimo siya.—Sal. 141:5; Prov. 27:17.

6. Nganong angay tang mogamit ug mga pangutana nga makapukaw sa hunahuna?

⁶ Importante nga pangutan-on nato ang study kon unsay iyang hunahuna bahin sa usa ka topiko. Pinaagi niini, imong mahibaloan kon unsay nasabtan ug gituohan sa imong study. Kon pirme nimo ning himoon, mas sayon na para nimo ang paghisgot sa mga topiko nga tingali maglisod siya pagdawat. Ang librong Mabuhi Ka Hangtod sa Hangtod! dunay daghang pangutana nga makapukaw sa hunahuna. Pananglitan, ang leksiyon 04 dunay pangutana: “Unsa kahay bation ni Jehova kon gamiton nimo ang iyang ngalan?” Ang leksiyon 09 may pangutana: “Unsa ang mga butang nga gusto nimong iampo?” Sa sinugdan, malisdan tingali ang imong study sa pagtubag sa ingon niana nga mga pangutana. Makatabang ka pinaagi sa pagbansay kaniya sa pagkonsiderar sa mga teksto ug sa mga hulagway diha sa libro.

7. Sa unsang paagi epektibo natong magamit ang mga eksperyensiya sa uban?

⁷ Sa dihang masabtan na sa imong study kon unsay kinahanglan niyang buhaton, gamita ang mga eksperyensiya sa uban aron madasig siya sa paghimo niana. Pananglitan, kon ang imong study maglisod pagtambong sa mga tigom, puwede nimong ipakita kaniya ang video nga Gimahal Ko ni Jehova, diha sa seksiyong “Susiha” sa leksiyon 14. Daghan sa mga leksiyon sa librong Mabuhi Ka Hangtod sa Hangtod! ang dunay mga eksperyensiya. Makita ni diha sa seksiyong “Tun-ig Dugang” o sa “Susiha.” * Ayawg ikomparar ang imong study sa uban pinaagi sa pag-ingon, “Kon nahimo nâ niya, mahimo sab nâ nimo.” Pasagdi ang study nga maoy makahunahuna niana. Imbes ikomparar siya, hisgoti ang espesipikong mga punto nga nakatabang sa igsoon diha sa video sa pagpadapat sa mga pagtulon-an sa Bibliya. Puwede tingali nimong hisgotan ang usa ka importanteng teksto o kaha ang praktikal nga butang nga gibuhat sa igsoon. Kutob sa mahimo, ipasiugda kon sa unsang paagi gitabangan ni Jehova ang maong igsoon.

8. Sa unsang paagi matabangan nato ang atong study nga makakat-on sa paghigugma kang Jehova?

⁸ Tabangi ang imong study nga makakat-on sa paghigugma kang Jehova. Sa unsang paagi? Pangitag mga kahigayonan nga mapasiugda ang mga hiyas ni Jehova. Tabangi ang imong study nga masabtan nga si Jehova usa ka malipayong Diyos nga nagatabang niadtong nahigugma kaniya. (1 Tim. 1:11; Heb. 11:6) Ipakita sa study nga makabenepisyo siya sa pagpadapat sa impormasyon, ug ipatin-aw nga kini nagpamatuod sa gugma ni Jehova kaniya. (Isa. 48:17, 18)  Samtang nagkadako ang iyang gugma kang Jehova, mas mapalihok siya sa paghimo sa gikinahanglang mga kausaban.—1 Juan 5:3.

9. Sumala sa Marcos 10:29, 30, unsay makatabang sa usa ka tawo sa paghimog mga sakripisyo aron mokuwalipikar sa bawtismo?

⁹ Aron mokuwalipikar sa bawtismo, ang study kinahanglang mohimog mga sakripisyo. Sama sa tawong dato nga gihisgotan ganina, kinahanglan tingaling isakripisyo sa pipila ka study ang ilang materyal nga mga butang. Kon ang ilang trabaho supak sa mga prinsipyo sa Bibliya, basin kinahanglan pa gani silang mangitag laing trabaho. Daghan tingali ang kinahanglang mobiya sa ilang mga higala nga wala mahigugma kang Jehova. Basin ang uban talikdan sa mga membro sa pamilya nga dili ganahan sa mga Saksi ni Jehova. Si Jesus miingon nga lisod tingali para sa pipila ang paghimo sa maong mga sakripisyo. Pero nagsaad siya nga kadtong mosunod niya dili madismayar. Sila panalanginan ug mahigugmaong espirituwal nga pamilya. (Basaha ang Marcos 10:29, 30.) Sa unsang paagi matabangan nimo ang imong study nga makabenepisyo niining nindot nga regalo?

10. Unsay imong nakat-onan sa eksperyensiya ni Manuel?

¹⁰ Paningkamot nga mahimo nimong higala ang imong study. Importante nga ipakita nimo sa imong study nga gimahal nimo siya. Ngano? Matikdi ang giingon ni Manuel, nga taga-Mexico. Sa paghinumdom niadtong panahon nga siya giestadihan pa lang, siya miingon: “Sa dili pa magsugod ang pagtuon, komostahon ko sa nag-study nako. Gitabangan ko niya nga mobating komportable ug gihatagan ko niyag higayon nga mosulti bahin sa ubang butang. Gibati nako nga gimahal gyod ko niya.”

11. Sa unsang paagi ang atong mga study makabenepisyo kon mogahin tag panahon sa pagpakig-uban nila?

¹¹ Paggahin ug panahon nga makauban ang imong mga Bible study, sama sa gihimo ni Jesus sa iyang mga sumusunod. (Juan 3:22) Kon haom, imbitaha ang imong mauswagong Bible  study sa inyong balay aron mangape, mangaon, o motan-aw sa usa sa mga binulang programa sa JW Broadcasting^®. Ilabinang maapresyar sa imong study ang maong imbitasyon sa mga panahon nga tingali mobati siyang nag-inusara kay ang iyang pamilya ug mga higala nakigbahin sa mga selebrasyon nga supak sa Bibliya. “Gawas sa among pagtuon, daghan pod kog nakat-onan bahin kang Jehova sa akong pagpakig-uban sa nag-study nako,” miingon si Kazibwe, nga taga-Uganda. “Nakita nako kon unsa ka dako ang gugma ni Jehova sa iyang katawhan ug kon unsa sila ka malipayon. Gusto pod nako nang maeksperyensiyahan.”

12. Nganong angay tang mag-uban ug lainlaing igsoon sa atong pag-Bible study?

¹² Pag-uban ug lainlaing igsoon sa inyong pag-study. Usahay, mobati tingali ta nga mas sayon ang pag-study nga kita ra o kaha ang pag-uban ug mao ra gihapon nga igsoon. Bisan tingalig mas kombenyente nâ, mas makabenepisyo ang atong study kon lainlaing igsoon ang atong iuban. “Ang kada igsoon nga miuban sa pag-study nako lainlaig paagi sa pagpatin-aw sa mga butang,” miingon si Dmitrii, nga taga-Moldova. “Nakatabang nâ nako nga makita ang lainlaing anggulo sa among gitun-an. Wala na sab kaayo ko maulaw dihang mitambong ko sa tigom sa unang higayon, kay daghan na man kog kailang mga igsoon.”

13. Nganong angay natong tabangan ang atong study sa pagtambong sa mga tigom?

¹³ Tabangi ang imong study sa pagtambong sa mga tigom. Ngano? Tungod kay gisugo ni Jehova ang iyang mga magsisimba nga magtigom; kini bahin sa atong pagsimba. (Heb. 10:24, 25) Dugang pa, ang atong mga igsoon maoy atong espirituwal nga pamilya. Kon kauban nato sila sa mga tigom, sama rag nag-uban ta sa usa ka balay ug nangaon ug lami nga pagkaon. Sa dihang tabangan nimo ang imong Bible study sa pagtambong sa mga tigom, gitabangan nimo siya sa paghimo sa usa sa pinakaimportanteng butang aron mabawtismohan. Pero lisod tingali para niya ang pagsugod ug tambong sa mga tigom. Sa unsang paagi ang librong Mabuhi Ka Hangtod sa Hangtod! makatabang sa imong study sa pag-atubang sa bisan unsang problema nga tingali nakapugong niya sa pagtambong?

14. Unsaon nato pagdasig ang atong study sa pagtambong sa tigom?

¹⁴ Gamita ang leksiyon 10 sa librong Mabuhi Ka Hangtod sa Hangtod! aron matabangan ka sa pagdasig sa imong study. Sa wala pa mahuman ang libro, gihangyo ang pipila ka eksperyensiyadong magmamantala nga gamiton kini nga leksiyon uban sa ilang mga study. Sila miingon nga kini epektibo kaayo ug nakatabang sa ilang mga study sa pagtambong sa mga tigom. Siyempre, bisag wala pa mo makaabot sa leksiyon 10, puwede na nimong imbitahon ang imong study sa pagtambong sa mga tigom. Kutob sa mahimo, imbitaha dayon siya ug regular kanang himoa. Ang lainlaing Bible study nag-atubang ug lainlaing problema. Busa hatagig pagtagad ang mga panginahanglan sa imong study, ug tan-awa kon makahatag ka bag praktikal nga tabang. Ayawg kadismayar kon dili dayon motambong ang imong study. Magmapailobon ug ayawg hunong sa pag-imbitar kaniya.

15. Unsa tingali gikahadlokan sa atong study?

¹⁵ Niadtong nag-study pa ka, tingali nahadlok pod ka nga mahimong Saksi ni Jehova. Basin mibati ka nga dili gyod ka makahimo sa pagsangyaw sa balay ug balay. O tingali nahadlok ka nga supakon ka sa imong pamilya o mga higala. Kon mao, makasabot ka sa gibati sa imong study. Si Jesus miingon nga ang uban mobatig ingon niana nga kahadlok. Pero, gidasig niya ang iyang mga sumusunod nga dili tugotan  ang kahadlok nga mopugong nila sa pag-alagad kang Jehova. (Mat. 10:16, 17, 27, 28) Giunsa pagtabang ni Jesus ang iyang mga sumusunod nga madaog ang ilang kahadlok? Ug unsaon nimo siya pagsundog?

16. Unsaon nato pagbansay ang atong study sa pagsulti sa uban bahin sa iyang pagtuo?

¹⁶ Anam-anam nga bansaya ang imong study sa pagsulti sa uban bahin sa iyang pagtuo. Ang mga tinun-an ni Jesus tingali gikulbaan dihang gipadala niya sila aron mosangyaw. Pero gitabangan sila ni Jesus pinaagi sa pagtudlo kanila kon kinsay sangyawan ug kon unsay isangyaw. (Mat. 10:5-7) Unsaon nimo pagsundog si Jesus? Tabangi ang imong study nga makita kon kinsay puwede niyang sangyawan. Pananglitan, pangutan-a siya kon duna ba siyay nailhan nga posibleng matabangan kon makakat-on sa usa ka espesipikong kamatuoran sa Bibliya. Dayon, tabangi siya sa pag-andam sa iyang isulti pinaagi sa pagpakita kaniyag simpleng paagi sa pagsulti sa uban niana nga kamatuoran. Kon haom, puwede ninyong gamiton sa inyong praktis sesyon ang gihisgotan sa seksiyong “Ang Uban Moingon” ug “Kon Naay Mangutana,” diha sa librong Mabuhi Ka Hangtod sa Hangtod! Sa dihang magpraktis mo, himoang tumong nga mabansay ang imong study sa paghatag ug simple ug mataktikanhong mga tubag gamit ang Bibliya.

17. Unsaon nato paggamit ang Mateo 10:19, 20, 29-31 sa pagtabang sa study nga mosalig kang Jehova?

¹⁷ Tabangi ang imong study nga mosalig kang Jehova. Gipasaligan ni Jesus ang iyang mga tinun-an nga tabangan sila ni Jehova kay gimahal Niya sila. (Basaha ang Mateo 10:19, 20, 29-31.) Pahinumdomi ang imong study nga tabangan sab siya ni Jehova. Matabangan nimo siya nga mosalig kang Jehova pinaagi sa paghisgot sa iyang mga tumong dihang mag-ampo ka uban niya. “Dihang mag-ampo ang nag-study nako, pirme niyang iapil ang akong mga tumong,” miingon si Franciszek, nga taga-Poland. “Sa dihang nakita nako nga gitubag ni Jehova ang pag-ampo sa nag-study nako, misugod dayon ko sa pag-ampo. Gibati nako nga gitabangan gyod ko ni Jehova dihang kinahanglan kong mananghid nga mo-day off sa akong bag-ong trabaho aron motambong sa mga tigom ug kombensiyon.”

18. Unsay gibati ni Jehova sa buluhatong pagpanudlo nga ginahimo sa mga Kristohanon?

¹⁸ Gimahal kaayo ni Jehova ang atong mga Bible study. Nahibalo siya nga naningkamot pag-ayo ang Kristohanong mga magtutudlo sa pagtabang sa mga tawo nga masuod kaniya, ug gimahal niya sila tungod niana. (Isa. 52:7) Kon wala kay gidumalahag pagtuon sa Bibliya karon, makatabang gihapon ka sa mga Bible study nga mouswag ug magpabawtismo pinaagi sa pagkuyog sa ubang magmamantala sa ilang mga study.