1-2. Kinsa si Zadok? (1 Cronicas 12:​22, 26-28)

 IMADYINA ang nahitabo. Kapig 340,000 ka lalaki ang nagtigom aron himoon si David nga hari sa tibuok Israel. Sulod sa tulo ka adlaw, malipayon silang nag-estoryahanay ug nag-awit ug mga pagdayeg nga naglanoglanog sa tibuok bungtod duol sa Hebron. (1 Cron. 12:39) Ang batan-ong lalaki nga si Zadok naa didto, pero tungod sa kadaghan sa tawo wala tingali siya mamatikdi sa uban. Bisan pa ana, namatikdan siya ni Jehova ug gusto niyang mahibalo ta nga naa si Zadok didto. (Basaha ang 1 Cronicas 12:​22, 26-28.) Kinsa si Zadok?

² Si Zadok maoy usa ka saserdote nga kauban sa Hataas nga Saserdoteng si Abiatar. Si Zadok makakitag panan-awon ug makasabot sa kabubut-on sa Diyos. Gihatagan pod siya sa Diyos ug talagsaong kaalam. (2 Sam. 15:27) Ang mga tawo moduol kang Zadok aron mangayog tambag. Maisogon pod siya, ug kini nga hiyas ni Zadok ang atong hisgotan niini nga artikulo.

3. (a) Nganong ang mga alagad ni Jehova kinahanglang magmaisogon? (b) Unsay atong hisgotan niini nga artikulo?

³ Niining kataposang mga adlaw, gipangusgan pag-ayo ni Satanas ang iyang pag-atake sa katawhan sa Diyos. (1 Ped. 5:8) Kinahanglan tang magmaisogon samtang naghulat nga laglagon ni Jehova si Satanas ug ang iyang daotang sistema. (Sal. 31:24) Hisgotan nato ang tulo ka paagi nga atong masundog ang kaisog ni Zadok.

 SUPORTAHI ANG GINGHARIAN SA DIYOS

4. Nganong ang mga alagad ni Jehova nagkinahanglag kaisog aron masuportahan ang Gingharian sa Diyos? (Tan-awa sab ang hulagway.)

⁴ Ingong katawhan ni Jehova, kinasingkasing natong gisuportahan ang Gingharian sa Diyos. Pero nagkinahanglag kaisog ang paghimo niana. (Mat. 6:33) Pananglitan, niining daotang kalibotan, nagkinahanglan tag kaisog aron masunod nato ang mga sukdanan ni Jehova ug masangyaw ang maayong balita sa Gingharian. (1 Tes. 2:2) Nagkinahanglan pod ug kaisog ang pagpabiling neyutral, ilabina kay mas nagkabahinbahin ang mga tawo karon tungod sa politika. (Juan 18:36) Daghang alagad ni Jehova ang nawad-ag trabaho, gikulata, o gipriso kay wala sila mag-apil-apil sa politika o magsundalo.

5. Nganong nagkinahanglag kaisog si Zadok aron masuportahan si David?

⁵ Si Zadok wala moadto sa Hebron aron lang maglipaylipay tungod sa pagkahari ni David. Miadto siya didto dala ang iyang hinagiban ug andam makiggubat. (1 Cron. 12:38) Andam siyang makig-away uban kang David ug depensahan ang Israel. Tingali dili eksperyensiyado si Zadok ingong sundalo, pero maisogon siya.

6. Nganong maayong ehemplo si David kang Zadok kon bahin sa kaisog? (Salmo 138:3)

⁶ Kang kinsa nakakat-on ug kaisog ang saserdoteng si Zadok? Daghan siyag nailhan nga mga lalaki nga kusgan ug isog. Seguradong nakakat-on siya sa ilang ehemplo. Pananglitan, si David maisogong “nanguna sa Israel sa pagpakiggubat,” ug ang iyang ehemplo nakadasig sa tibuok Israel nga bug-os siyang suportahan. (1 Cron. 11:​1, 2) Si David kanunayng misalig sa tabang ni Jehova aron mapildi ang iyang mga kaaway. (Sal. 28:7; basaha ang Salmo 138:3.) Naay uban pang ehemplo nga nakatabang kang Zadok nga magmaisogon—pananglitan, si Jehoiada, ang iyang anak nga sundalo nga si  Benaias, ug ang 22 ka pangulo sa mga banay nga midapig kang David. (1 Cron. 11:​22-25; 12:​26-28) Kini nga mga lalaki determinado nga mosuporta sa pagkahari ni David.

7. (a) Kinsay apil sa maayong ehemplo sa kaisog karon? (b) Base sa video, unsay atong makat-onan kang Brader Nsilu?

⁷ Maugmad nato ang kaisog kon atong konsiderahon ang ehemplo niadtong mga maisogong misuporta sa pagmando ni Jehova. Ang atong Hari, si Kristo Jesus, wala gyod magpadala sa presyur nga moapil sa politikal nga sistema ni Satanas. (Mat. 4:​8-11; Juan 6:​14, 15) Kanunay siyang misalig kang Jehova alang sa kaisog. Makakat-on pod ta sa ehemplo sa batan-ong mga brader karon nga wala gyod magpadala sa presyur nga magsundalo o moapil sa mga kalihokan sa politika. Puwede nimong basahon ang ilang mga eksperyensiya sa jw.org. a

TABANGI ANG MGA IGSOON

8. Kanus-a tingali magkinahanglag kaisog ang mga ansiyano aron mahatagan ug praktikal nga tabang ang mga igsoon?

⁸ Ang katawhan ni Jehova andam motabang sa usag usa. (2 Cor. 8:4) Pero usahay, nagkinahanglag kaisog ang paghimo niana. Pananglitan, dihang naay mahitabo nga giyera, ang mga ansiyano nahibalo nga ang mga igsoon nagkinahanglag pagdasig ug tabang, ilabina kon bahin sa ilang espirituwal ug materyal nga panginahanglan. Kay gimahal sa mga ansiyano ang mga igsoon, andam silang motabang nila bisag mameligro ang ilang kinabuhi. (Juan 15:​12, 13) Gisundog gyod nila ang kaisog ni Zadok.

9. Base sa 2 Samuel 15:​27-29, unsay gisugo ni David kang Zadok? (Tan-awa sab ang hulagway.)

⁹ Nameligro ang kinabuhi ni David. Ang iyang anak nga si Absalom determinado nga patyon siya aron mailog ang trono. (2 Sam. 15:​12, 13) Kinahanglang mobiya dayon si David sa Jerusalem! Giingnan niya ang mga alagad:  “Tana, mangalagiw ta, kay wala unyay makaikyas kanato gikan kang Absalom!” (2 Sam. 15:14) Samtang nangikyas sila, nakahunahuna si David nga kinahanglang naay magpabilin aron makareport sa mga plano ni Absalom. Busa giingnan niya si Zadok ug ang ubang mga saserdote nga mobalik sa siyudad aron mangespiya para niya. (Basaha ang 2 Samuel 15:​27-29.) Kinahanglan gyod silang mag-amping, kay gawas nga delikado ang gisugo ni David kanila, puwede pod silang mamatay. Hunahunaa lang ang posibleng himoon sa bayolente, hakog, ug traydor nga si Absalom kon iyang mahibaloan nga si Zadok ug ang ubang mga saserdote maoy mga espiya ni David!

10. Sa unsang paagi giprotektahan ni Zadok ug sa iyang mga kauban si David?

¹⁰ Naay gihimong plano si David uban kang Zadok ug Husai, nga usa pod ka maunongong higala ni David. (2 Sam. 15:​32-37) Gisunod nila ang plano—nagpakaaron-ingnon si Husai nga dapig siya kang Absalom. Tungod ana, nakuha ni Husai ang pagsalig ni Absalom ug misugyot siyag estratehiya nga maghatag kang David ug panahon nga makapangandam sa pag-atake ni Absalom. Human niana, giingnan ni Husai si Zadok ug Abiatar sa iyang gisugyot. (2 Sam. 17:​8-16) Dayon silang duha nagpadalag mensahe kang David bahin sa plano. (2 Sam. 17:17) Sa tabang ni Jehova, si Zadok ug ang iyang kaubang mga saserdote dako kaayog nahimo aron maprotektahan ang kinabuhi ni David.—2 Sam. 17:​21, 22.

11. Unsaon nato pagsundog ang kaisog ni Zadok dihang motabang sa mga igsoon?

¹¹ Unsaon nato pagsundog ang kaisog ni Zadok dihang motabang ta sa mga igsoon panahon sa peligrosong mga kahimtang? (1) Sunda ang direksiyon. Niini nga mga kahimtang, importante nga magkahiusa ta. Sunda ang direksiyon gikan sa inyong sangang buhatan. (Heb. 13:17) Kinahanglang regular nga susihon sa mga ansiyano ang mga instruksiyon kon unsaon nga  makapangandam sa kalamidad ug kon unsay himoon panahon sa kalamidad. (1 Cor. 14:​33, 40) (2) Magmaisogon, pero pag-amping. (Prov. 22:3) Hunahunaa pag-ayo ang imong himoon. Magmaalamon aron dili ka mameligro. (3) Salig kang Jehova. Hinumdomi nga gusto kaayo ni Jehova nga luwas ka ug ang mga igsoon. Giyahan ka niya aron luwas nimong matabangan ang mga igsoon.

12-13. Unsay atong makat-onan sa eksperyensiya ni Viktor ug Vitalii? (Tan-awa sab ang hulagway.)

¹² Konsideraha ang eksperyensiya sa duha ka ansiyano nga si Viktor ug Vitalii. Naghatod silag pagkaon ug tubig sa mga igsoon sa Ukraine. Si Viktor miingon: “Nangita mig pagkaon bisan asa.” Siya midugang: “Usahay duol kaayo ang mga engkuwentro. Naay usa ka brader nga nakapondog pagkaon, ug iya ning gi-donate. Nakatabang ni sa mga igsoon nga maka-survive niadtong panahona. Samtang nagkarga mi sa mga pagkaon sa trak, naay bomba nga mitugpa mga 20 metros (66 feet) gikan namo. Maayo na lang kay wala ni mibuto. Tibuok adlaw kong naghangyo kang Jehova nga hatagan kog kaisog aron padayon kong makatabang sa mga igsoon.”

¹³ “Nagkinahanglan gyod mig kaisog,” miingon si Vitalii. “Ang una nga biyahe miabot ug 12 ka oras. Ug samtang gabiyahe, nagsige kog ampo kang Jehova.” Si Vitalii nagpakitag kaisog pero nag-amping pod siya. Siya mipadayon: “Kanunay kong naghangyo kang Jehova nga hatagan kog kaalam ug giya aron magmahunahunaon ko sa safety. Didto lang ko miagi sa mga dalan nga gitugot sa awtoridad. Nalig-on gyod ang akong pagtuo dihang nakita nako nga ang mga igsoon nagtinabangay. Gipanguha nila ang mga babag nga naa sa dalan, gihakot ang mga hinabang, ug gitagan-an mig pagkaon ug lugar nga kapahulayan.”

PABILING MAUNONGON KANG JEHOVA

14. Unsa tingali ang atong bation kon ang suod nato nga membro sa pamilya o higala mobiya kang Jehova?

¹⁴ Makapaguol gyod kon ang usa ka membro sa pamilya o higala mobiya kang Jehova. (Sal. 78:40; Prov. 24:10) Lisod ning dawaton ilabina kon suod kaayo ta niya. Kon nakaeksperyensiya ka niana, seguradong mapalig-on ka sa pagkamaunongon ni Zadok.

15. Nganong nagkinahanglag kaisog si Zadok aron makapabiling maunongon kang Jehova? (1 Hari 1:​5-8)

¹⁵ Si Zadok nagpabiling maunongon kang Jehova bisan pag ang iyang suod nga higala nga si Abiatar mipili nga mobiya kang Jehova. Nahitabo ni sa kataposang bahin sa paghari ni David. Sa hapit nang mamatay si David, ang iyang anak nga si Adonias misulay sa pag-ilog sa trono nga gisaad ni Jehova kang Solomon. (1 Cron. 22:​9, 10) Si Abiatar mipili nga suportahan si Adonias. (Basaha ang 1 Hari 1:​5-8.) Busa wala siya magmaunongon kang David ug labaw na gyod kang Jehova! Imadyina kon unsa to kasakit para kang Zadok. Seguradong naguol siya pag-ayo sa gihimo ni Abiatar. Kapig 40 ka tuig silang nag-uban ingong saserdote. (2 Sam. 8:17) Nag-uban sila sa pag-atiman sa “Kaban sa matuod nga Diyos.” (2 Sam. 15:29) Pareho pod silang misuportar sa pag-entrono kang David ingong hari, ug daghan pa silag gihimo nga magkauban.—2 Sam. 19:​11-14.

16. Unsa tingali ang nakatabang kang Zadok nga magpabiling maunongon?

¹⁶ Si Zadok nagpabiling maunongon kang Jehova bisan pa sa gihimo ni Abiatar. Wala gyod magduhaduha si David sa pagkamaunongon ni Zadok. Dihang nahibaloan ang daotang plano ni Adonias, gipatawag ni David si Zadok, Natan, ug Benaias aron dihogan si Solomon ingong hari. (1 Hari 1:​32-34) Ang pagpakig-uban sa maunongong mga magsisimba  ni Jehova, sama kang Natan ug sa uban pa nga misuporta kang Haring David, seguradong nakapalig-on ug nakadasig kang Zadok. (1 Hari 1:​38, 39) Dihang si Solomon nahimong hari, iyang “gitudlo . . . si Zadok nga saserdote puli kang Abiatar.”—1 Hari 2:35.

17. Unsaon nimo pagsundog si Zadok kon ang suod nimo nga membro sa pamilya o higala mobiya kang Jehova?

¹⁷ Unsaon nimo pagsundog si Zadok? Kon ang suod nimo nga membro sa pamilya o higala mopili nga mobiya kang Jehova, ipakita nga si Jehova gyod ang imong gipili nga unongan. (Jos. 24:15) Hatagan ka ni Jehova ug kusog ug kaisog nga imong gikinahanglan sa paghimo kon unsay husto. Salig niya pinaagi sa pag-ampo, ug pabiling suod sa maunongong mga alagad ni Jehova. Gipabilhan ni Jehova ang imong pagkamaunongon, ug gantihan ka niya tungod niana.—2 Sam. 22:26.

18. Unsay imong makat-onan sa eksperyensiya ni Marco ug Sidse?

¹⁸ Konsideraha ang eksperyensiya ni Marco ug sa iyang asawa nga si Sidse dihang ang ilang duha ka anak nga babaye mibiya sa kamatuoran. Si Marco miingon: “Gimahal nimo pag-ayo ang imong mga anak sukad sa ilang pagkatawo. Ug himoon nimo ang tanan aron protektahan sila. Maong sakit gyod kaayo kon mobiya sila kang Jehova.” Siya mipadayon: “Pero kanunay ming gitabangan ni Jehova aron makalahutay. Giseguro niya nga kon luya ko, lig-on ang akong asawa, ug kon luya siya, lig-on ko.” Si Sidse miingon pod: “Dili gyod mi makalahutay kon wala pa mi hatagi ni Jehova sa kusog nga among gikinahanglan. Naguol kaayo ko ug gibati nako nga akoy hinungdan kon nganong miundang sa pag-alagad ang akong mga anak, maong giampo nako ni kang Jehova. Wala madugay, naay sister nga miduol nako ug dugay na ming wala magkita. Gigunitan ko niya sa abaga, mitan-aw nako, ug miingon: ‘Hinumdomi Sidse, dili nimo ni sala.’ Sa tabang ni Jehova, nakapabilin kong malipayon sa pag-alagad kaniya.”

19. Unsay determinado nimong himoon?

¹⁹ Gusto ni Jehova nga ang tanan niyang mga alagad magmaisogon sama kang Zadok. (2 Tim. 1:7) Pero gidahom niya nga mosalig ta kaniya, imbes sa atong kaugalingong kusog. Busa, kon naa ka sa usa ka situwasyon nga nagkinahanglan kag kaisog, pangayog tabang kang Jehova. Makaseguro ka nga tabangan ka niya nga magmaisogon sama kang Zadok!—1 Ped. 5:10.