1-2. Sa unsang paagi ang giingon ni Jehova sa Isaias 65:16, 17 makadasig nato nga padayong molahutay?

 “PADAYON SA PAGLAHUTAY!” Kana ang makapadasig nga tema sa 2017 nga programa sa rehiyonal nga kombensiyon. Ang programa naghisgot kon sa unsang paagi ta makalahutay sa mga problema nga atong maatubang. Upat ka tuig na ang milabay sukad niadto, ug karon, padayon gihapon tang milahutay sa atong kinabuhi niining daotang sistema sa mga butang.

² Unsang mga problema ang imong giatubang? Namatyan ba kag membro sa pamilya o minahal nga higala? Duna ba kay grabeng sakit nga posibleng makamatay? Nalisdan ba ka kay nagkatigulang ka? Naapektohan ba ka sa kalamidad, kapintasan, o paglutos? O nag-antos ba ka tungod sa sakit sama sa COVID-19 pandemic? Nangandoy gyod ta sa panahon dihang kining tanang problema matapos na—malimtan na ug dili na gyod mahitabo pag-usab!—Basaha ang Isaias 65:16, 17.

3. Unsay kinahanglan natong buhaton karon, ug ngano?

³ Lisod ang kinabuhi niining sistemaha, ug tingali makaatubang tag mas grabe pa ganing mga kalisdanan sa umaabot. (Mat. 24:21) Busa, kinahanglan nga padayon tang molahutay. Ngano? Tungod kay si Jesus miingon: “Pinaagi sa inyong paglahutay, maluwas ang inyong kinabuhi.” (Luc. 21:19) Ang paghunahuna kon sa unsang paagi ang uban nakalahutay sa mga kalisdanan nga susama sa atoa makatabang nato sa paglahutay.

4. Nganong makaingon ta nga si Jehova ang kinamaayohang ehemplo sa paglahutay?

⁴ Kinsa ang kinamaayohang ehemplo sa paglahutay? Si Jehova nga Diyos. Tingali wala ka magdahom nga kana ang tubag. Pero kon imo ning hunahunaon, masabtan nimo kon ngano. Ang kalibotan gikontrolar sa Yawa, busa daghan kaayo nig problema. Si  Jehova may gahom nga taposon dayon kini, pero nagpaabot siya sa hustong panahon sa pagbuhat niana. (Roma 9:22) Sa kasamtangan, ang atong Diyos padayong milahutay hangtod moabot kanang panahona. Atong hisgotan ang siyam ka butang nga gilahutay ni Jehova.

5. Sa unsang paagi gipasipalahan ang ngalan sa Diyos, ug unsay imong gibati niana?

⁵ Ang pagpasipala sa iyang ngalan. Gimahal ni Jehova ang iyang ngalan, ug gusto niya nga tahoron kini sa tanan. (Isa. 42:8) Pero sulod na sa mga 6,000 ka tuig, ang iyang maayong ngalan gipasipalahan. (Sal. 74:10, 18, 23) Nagsugod ni sa tanaman sa Eden dihang ang Yawa (nagkahulogang “Tigbutangbutang”) miingon nga gihikaw kuno sa Diyos kang Adan ug Eva ang butang nga makahatag nilag kalipay. (Gen. 3:1-5) Sukad niadto, si Jehova sayop nga giakusahan nga gihikawan kuno niya ang mga tawo sa kon unsa gyoy ilang gikinahanglan. Si Jesus nabalaka kay ang ngalan sa iyang Amahan gipasipalahan. Tungod niana, gitudloan niya ang iyang mga tinun-an sa pag-ampo: “Amahan namo nga anaa sa mga langit, balaanon unta ang imong ngalan.”—Mat. 6:9.

6. Nganong gitugotan ni Jehova nga molabay ang taas nga panahon una husayon ang isyu sa iyang pagkasoberano?

⁶ Ang pagsupak sa iyang pagkasoberano. Si Jehova lang ang may katungod nga magmando sa mga langit ug sa yuta, ug ang iyang paagi sa pagmando mao ang kinamaayohan. (Pin. 4:11) Pero naningkamot ang Yawa nga malimbongan ang mga anghel ug mga tawo sa paghunahuna nga ang Diyos wala niana nga katungod. Nagkinahanglag panahon ang pagpamatuod nga si Jehova ang may katungod nga magmando ug nga siya ang kinamaayohang magmamando. Busa, ang Diyos maalamong nagtugot sa mga tawo nga magmando sa taas nga panahon aron ilang makita nga dili sila molampos sa pagmando sa ilang kaugalingon kon walay giya sa Maglalalang. (Jer. 10:23) Tungod sa pailob sa Diyos, kini nga isyu bug-os nga mahusay. Siya mabindikar kay mapamatud-an niya nga ang iyang Gingharian lang ang makapatunghag tinuod nga kalinaw ug kasegurohan sa yuta.

7. Kinsay mirebelde kang Jehova, ug unsay iyang buhaton kanila?

⁷ Ang pagrebelde sa pipila niya ka anak. Gilalang ni Jehova ang iyang espirituhanon ug tawhanong mga anak nga hingpit ug walay bisan unsang depekto. Pero ang rebeldeng anghel nga si Satanas (nagkahulogang “Magsusupak”) misupak kang Jehova ug gikombinsir niya ang hingpit nga mga tawo, si Adan ug Eva, nga morebelde sab. Ang ubang anghel ug mga tawo mirebelde pod. (Jud. 6) Sa ulahi, bisan ang mga membro sa nasod sa Israel, ang piniling katawhan sa Diyos, nagsalikway kaniya ug misimba sa bakak nga mga diyos. (Isa. 63:8, 10) Gibati ni Jehova nga giluiban siya. Pero milahutay siya, ug padayon siyang molahutay hangtod moabot ang panahon nga laglagon niya ang tanang mirebelde kaniya. Kana maghatag ug kahupayan sa iyang maunongong katawhan, kinsa nagmalahutayon uban niya niining daotang sistema sa mga butang!

8-9. Unsang mga bakak ang gisulti bahin kang Jehova, ug unsay atong mahimo niana?

⁸ Ang mga bakak sa Yawa. Giakusahan ni Satanas si Job ug ang tanang matinumanong alagad ni Jehova nga sila nagsimba lang sa Diyos tungod sa hakog nga mga rason. (Job 1:8-11; 2:3-5) Ang Yawa padayong nag-akusar sa mga tawo hangtod karon. (Pin. 12:10) Makatabang ta sa pagpamatuod nga bakakon si Satanas kon molahutay ta sa atong mga kalisdanan ug magmaunongon kang Jehova tungod sa atong gugma Kaniya. Sama kang Job, panalanginan ta ni Jehova kon molahutay ta.—Sant. 5:11.

⁹ Gigamit ni Satanas ang mga lider sa bakak nga relihiyon sa pag-ingon nga si Jehova pintas ug maoy hinungdan sa pag-antos sa tawo. Ang  pipila moingon pa gani nga dihang ang mga bata mamatay, gikuha sila sa Diyos kay nagkinahanglan siyag dugang mga anghel sa langit. Pasipala gyod nâ sa Diyos! Nahibalo ta nga si Jehova mahigugmaon nga Amahan. Kon kita may grabeng sakit o kaha mamatyag minahal, dili gyod nato basolon ang atong Diyos. Hinunoa, kita nagtuo nga moabot ang adlaw nga iyang ayohon ang mga masakiton ug banhawon ang mga patay. Puwede natong sultian ang tanang maminaw kon unsa ka mahigugmaon nga Diyos si Jehova. Kana maghatag niyag maayong tubag sa usa nga nagtamay kaniya.—Prov. 27:11.

10. Unsay gipadayag sa Salmo 22:23, 24 bahin kang Jehova?

¹⁰ Ang pag-antos sa iyang minahal nga mga alagad. Si Jehova maluluy-on nga Diyos. Maguol kaayo siya kon makita niya nga kita nag-antos—tingali tungod sa paglutos, sakit, o sa atong pagkadili-hingpit. (Basaha ang Salmo 22:23, 24.) Si Jehova nakasabot sa kasakit nga atong gibati. Gusto niya kining taposon, ug taposon gyod niya kini. (Itandi ang Exodo 3:7, 8; Isaias 63:9.) Moabot ang panahon dihang iyang “pahiran ang matag luha sa [atong] mga mata, ug ang kamatayon mawala na, ug wala na unyay pagbangotan, pagtiyabaw, ug kasakit.”—Pin. 21:4.

11. Unsay gibati ni Jehova sa maunongon niyang mga alagad nga nangamatay na?

¹¹ Ang pagkanahimulag niya sa iyang mga higala nga nangamatay. Unsay pagbati ni Jehova niadtong matinumanong mga lalaki ug babaye nga nangamatay? Nangandoy siyang makita sila pag-usab! (Job 14:15) Seguradong naghinamhinam si Jehova nga makita pag-usab ang iyang higalang si Abraham. (Sant. 2:23) O si Moises, kang kinsa siya “direktang nakigsulti.” (Ex. 33:11) Ug seguradong naghinamhinam siyang madungog si David ug ang ubang salmista nga mokanta sa ilang nindot nga mga awit sa pagdayeg! (Sal. 104:33) Bisag nangamatay na ang maong mga higala ni Jehova, siya  wala malimot kanila. (Isa. 49:15) Naa sa iyang panumdoman ang tanang detalye sa ilang personalidad. Ang Bibliya nag-ingon nga “para niya silang tanan buhi.” (Luc. 20:38) Moabot ang adlaw nga banhawon niya sila, ug sa makausa pa, iyang madungog ang ilang kinasingkasing nga mga pag-ampo ug dawaton ang ilang pagsimba. Kon namatyan kag minahal, hinaot nga mahupay ka niini nga mga kamatuoran.

12. Unsay ilabinang makapaguol kang Jehova niining daotan nga kataposang mga adlaw?

¹² Ang pagdaogdaog nga ginahimo sa mga daotan. Sa dihang nagsugod ang rebelyon sa Eden, nahibalo si Jehova nga ang kahimtang mograbe pa una kini moarang-arang. Gidumtan ni Jehova ang pagkadaotan, inhustisya, ug kapintasan sa kalibotan karon. Ilabinang maluoy siya niadtong mga huyang ug dili makapanalipod sa kaugalingon—pananglitan, ang mga bata nga walay ginikanan, maingon man ang mga biyuda. (Zac. 7:9, 10) Maguol sab kaayo si Jehova dihang iyang makita nga gidaogdaog ug gipriso ang iyang matinumanong mga alagad. Makaseguro mo nga gimahal niya kamong tanan nga nagmalahutayon uban kaniya.

13. Unsang imoral nga mga buhat sa tawo ang nakita sa Diyos, ug unsay iyang himoon bahin niana?

¹³ Ang pagkahugno sa moralidad sa mga tawo. Ang mga tawo gilalang sumala sa larawan sa Diyos, pero giimpluwensiyahan sila ni Satanas sa paghimog imoral nga mga buhat. Dihang nakita ni Jehova nga “grabe na ang pagkadaotan sa mga tawo” sa panahon ni Noe, siya ‘nagbasol nga iyang gihimo ang mga tawo sa yuta, ug nasakitan ang iyang kasingkasing.’ (Gen. 6:5, 6, footnote, 11) Miarang-arang ba ang kahimtang sukad niadto? Wala gyod! Seguradong nalipay ang Yawa dihang nakita niya nga misamot kagrabe ang tanang klase sa seksuwal nga imoralidad, apil ang imoral nga mga buhat tali sa mga tawo nga dili parehas ug sekso ug sa mga tawo nga parehas ug sekso! (Efe. 4:18, 19) Ilabinang malipay si Satanas kon ang mga tawo nga nagsimba kang Jehova mahaylo niya sa paghimog seryosong sala. Dihang matapos na ang pailob ni Jehova, iyang ipakita nga gidumtan niya ang imoral nga mga buhat pinaagi sa paglaglag sa tanang imoral nga mga tawo nga wala gyod magbag-o.

14. Unsay ginahimo sa mga tawo ngadto sa yuta ug sa mga hayop?

¹⁴ Ang pagdaot sa iyang kalalangan. Gawas nga ang mga tawo ‘nagmando sa mga tawo alang sa ilang ikadaot,’ wala pod nila tumana ang sugo ni Jehova nga atimanon ang yuta ug ang mga hayop. (Eccl. 8:9; Gen. 1:28) Ang pipila ka siyentista miingon nga tungod sa ginahimo sa mga tawo, usa ka milyon pang espisye b ang posibleng mapuo sa mosunod nga mga tuig. Kanay hinungdan nga ang mga tawo nabalaka sa atong environment! Pero mapasalamaton ta nga si Jehova nagsaad nga iyang ‘laglagon ang mga nagalaglag sa yuta’ ug himoong paraiso ang tibuok yuta.—Pin. 11:18; Isa. 35:1.

15-16. Unsay angayng magpalihok nato sa paglahutay uban kang Jehova? Iilustrar.

¹⁵ Hunahunaa ang tanang makapaguol nga problema nga gilahutay sa atong langitnong Amahan sa libolibo na ka katuigan. (Tan-awa ang kahong “ Ang Gilahutay ni Jehova.”) Puwedeng taposon ni Jehova kining daotang sistema sa mga butang bisan kanus-a. Pero panalangin gyod kanato ang iyang pagpailob! Hunahunaa ni nga ilustrasyon. Ibutang ta nga ang usa ka magtiayon gisultian nga ang ilang wala pa matawo nga bata dunay seryosong pisikal nga mga problema ug inigkatawo sa bata, lisod ang kinabuhi niini ug mamatay nig sayo. Pero bisag malisdan kaayo sila sa pag-atiman sa bata, malipay ang ginikanan inigkatawo niini. Kay gimahal nila ang ilang anak, molahutay sila sa bisan unsang kalisdanan  aron matagan-an kini sa kinamaayohang kinabuhi kutob sa itugot sa kahimtang.

¹⁶ Sa susama, ang tanang kaliwat ni Adan ug Eva dili hingpit dihang gipanganak sila. Bisan pa niana, sila gihigugma ug gipangga ni Jehova. (1 Juan 4:19) Ug dili sama sa tawhanong ginikanan sa atong ilustrasyon, makahimo si Jehova sa pagtapos sa pag-antos sa iyang mga anak. Nagtakda siyag panahon nga taposon ang tanang pag-antos sa tawo. (Mat. 24:36) Samtang wala pa moabot kanang panahona, ang atong gugma kang Jehova angayng magpalihok nato sa paglahutay uban kaniya.

17. Sa unsang paagi ang giingon sa Hebreohanon 12:2, 3 bahin kang Jesus magdasig nato nga padayong molahutay?

¹⁷ Si Jehova ang hingpit nga ehemplo sa paglahutay. Nasundog ni Jesus ang pagkamalahutayon sa iyang Amahan. Sa dinhi pa si Jesus sa yuta, iyang gilahutay ang pagsupak, kaulawan, ug estaka sa pagsakit alang kanato. (Basaha ang Hebreohanon 12:2, 3.) Ang ehemplo ni Jehova sa paglahutay seguradong nakatabang kang Jesus sa paglahutay. Makatabang sab nâ kanato.

18. Sa unsang paagi ang 2 Pedro 3:9 makatabang nato sa pagsabot kon unsay nalampos tungod sa pagpailob ni Jehova?

¹⁸ Basaha ang 2 Pedro 3:9. Nahibalo si Jehova sa kinamaayohang panahon nga taposon kining daotang kalibotan. Tungod sa pagpailob ni Jehova, natigom ang dakong panon nga karon miabot nag minilyon. Sila nagsimba ug nagdayeg kaniya. Silang tanan nalipay sa taas nga pailob ni Jehova kay sila natawo pa, nakakat-on sa paghigugma kaniya, ug nakapahinungod sa ilang kaugalingon kaniya. Madayag nga husto ang desisyon ni Jehova nga molahutay sa dihang malipayon niyang gantihan ang minilyon kanato nga nakalahutay hangtod sa kataposan!

19. Unsay angay natong determinasyon, ug unsang ganti ang atong madawat?

¹⁹ Atong nakat-onan kang Jehova kon unsaon paglahutay uban ang kalipay. Bisan pa sa tanang kagul-anan ug pag-antos nga gipahinabo ni Satanas, si Jehova malipayon gihapon nga Diyos. (1 Tim. 1:11) Makapabilin sab tang malipayon samtang mapailobon tang magpaabot nga si Jehova magbalaan sa iyang ngalan, magbindikar sa iyang pagkasoberano, magtapos sa tanang pagkadaotan, ug magwagtang sa tanan natong problema karon. Hinaot nga magmadeterminado ta nga molahutay ug makabatog kahupayan sa pagkahibalo nga ang atong langitnong Amahan nagmalahutayon sab. Kon buhaton nato kana, kini nga mga pulong mahimong tinuod sa matag usa kanato: “Malipayon ang tawo nga padayong milahutay ubos sa pagsulay, kay dihang mabatonan niya ang pag-uyon madawat niya ang korona sa kinabuhi, nga gisaad ni Jehova niadtong padayong nahigugma Kaniya.”—Sant. 1:12.