1-2. (a) Kanus-a ta ilabinang mahinumdom sa atong namatay nga minahal? (b) Unsay gisugdan ni Jesus sa gabii una siya mamatay?

 BISAG unsa na ka dugay namatay ang atong mga minahal, mahinumdom gihapon ta nila. Ilabinang mahinumdoman nato sila panahon sa anibersaryo sa ilang kamatayon.

² Kada tuig, apil ta sa minilyon sa tibuok kalibotan nga magtigom panahon sa anibersaryo sa kamatayon sa usa nga gimahal nato pag-ayo—si Jesu-Kristo. (1 Ped. 1:8) Magtigom ta isip paghandom sa usa nga naghatag sa iyang kinabuhi ingong lukat aron luwason ta gikan sa sala ug kamatayon. (Mat. 20:28) Gani, gusto ni Jesus nga handomon sa iyang mga sumusunod ang iyang kamatayon. Sa gabii una siya mamatay, iyang gisugdan ang usa ka espesyal nga panihapon ug siya nagsugo: “Ipadayon ninyo ang pagbuhat niini sa paghandom kanako.”—Luc. 22:19.

3. Unsay atong hisgotan niining artikuloha?

³ Gamay ra niadtong motambong sa Memoryal sa kamatayon sa Kristo ang dunay langitnong paglaom. Minilyon sa motambong dunay yutan-ong paglaom. Niining artikuloha, atong hisgotan ang mga rason kon nganong ang duha ka grupo naghinamhinam nga motambong sa Memoryal kada tuig. Susihon sab nato kon sa unsang paagi makabenepisyo ta sa pagtambong niana. Sugdan nato ni pinaagi sa pagkonsiderar sa pipila ka rason kon nganong motambong ang mga dinihogan.

4. Nganong ang mga dinihogan makig-ambit sa tinapay ug bino panahon sa Memoryal?

⁴ Kada tuig, ang mga dinihogan naghinamhinam nga motambong sa Memoryal aron makig-ambit sa mga emblema. Nganong haom nga makig-ambit sila sa tinapay ug bino? Aron matubag kana, konsiderahon nato ang nahitabo sa kataposang gabii ni Jesus dinhi sa yuta. Human sa panihapon sa Paskuwa, gisugdan ni Jesus ang gitawag karon ug Panihapon sa Ginoo. Iyang gipasa ang tinapay ug bino ngadto sa iyang 11 ka matinumanong apostoles ug giingnan sila nga mokaon ug moinom. Gisultihan sila ni Jesus bahin sa duha ka pakigsaad, o kasabotan—ang bag-ong pakigsaad ug ang pakigsaad sa Gingharian. b (Luc. 22:19, 20, 28-30) Kini nga mga pakigsaad nagpaposible nga ang maong mga apostoles ug ang limitadong gidaghanon sa uban pa mahimong mga hari ug saserdote sa langit. (Pin. 5:10; 14:1) Ang nahibiling mga dinihogan, c kinsa apil niining duha ka pakigsaad, mao ray makig-ambit sa tinapay ug bino panahon sa Memoryal.

5. Unsay nahibaloan sa mga dinihogan bahin sa ilang paglaom?

⁵ Niay laing rason kon nganong ang mga dinihogan naghinamhinam nga motambong sa Memoryal: Kini nga okasyon maghatag nilag kahigayonan sa pagpamalandong sa ilang paglaom. Si Jehova naghatag nilag talagsaong paglaom—sila makabaton ug imortal ug dili madunot nga kinabuhi didto sa langit, magmando kauban sa nahimayang si Jesu-Kristo ug sa ubang membro sa 144,000 ug, labaw sa tanan, mag-alagad diha sa presensiya mismo ni Jehova nga Diyos! (1 Cor. 15:51-53; 1 Juan 3:2) Ang mga dinihogan nahibalo nga sila gidapit nga makatagamtam sa maong mga pribilehiyo didto sa langit. Pero aron makasulod sa langit, kinahanglan silang magmatinumanon hangtod sa kamatayon. (2 Tim. 4:7, 8) Malipay kaayo ang mga dinihogan nga mamalandong bahin sa ilang langitnong paglaom. (Tito 2:13) Komosta ang “ubang mga karnero”? (Juan 10:16) Unsa ang pipila ka rason kon nganong motambong sila sa Memoryal?

6. Nganong ang ubang mga karnero motambong sa Memoryal kada tuig?

⁶ Ang ubang mga karnero motambong sa Memoryal dili aron makig-ambit, kondili ingong mga tigpaniid. Niadtong 1938, kadtong dunay yutan-ong paglaom gidapit sa unang higayon sa pagtambong sa Memoryal. Ang Watchtower sa Marso 1, 1938 nag-ingon: “Haom lang nga ang [ubang mga karnero] motambong sa maong tigom ug maniid kon unsay ginahimo didto. . . . Sila sab angayng magsadya nianang panahona.” Samag dinapit nga mga bisita nga malipayng motambong sa seremonyas sa kasal, ang ubang mga karnero malipayng motambong sa Memoryal.

7. Nganong ang ubang mga karnero naghinamhinam nga maminaw sa pakigpulong sa Memoryal?

⁷ Ang ubang mga karnero pod mamalandong sa ilang paglaom. Naghinamhinam silang maminaw sa pakigpulong sa Memoryal kay magpokus ni sa kon unsay himoon sa Kristo ug sa iyang 144,000 nga kaubang magmamando alang sa matinumanong mga tawo panahon sa Usa ka Libo ka Tuig nga Pagmando. Ubos sa pagpanguna sa ilang Hari, si Jesu-Kristo,  ang maong langitnong mga magmamando motabang sa paghimo sa yuta nga paraiso ug motabang sa katawhan nga mahimong hingpit. Makapalipay kaayo alang sa milyonmilyong tigpaniid panahon sa Memoryal nga imadyinon ang umaabot nga katumanan sa mga tagna sa Bibliya, sama nianang makita sa Isaias 35:5, 6; 65:21-23; ug Pinadayag 21:3, 4. Pinaagi sa pag-imadyin sa ilang kaugalingon nga naa na sa bag-ong kalibotan uban sa ilang mga minahal, gipalig-on nila ang ilang paglaom sa umaabot ug ang ilang determinasyon nga dili gyod mohunong sa pag-alagad kang Jehova.—Mat. 24:13; Gal. 6:9.

8. Unsay laing rason kon nganong ang ubang mga karnero motambong sa Memoryal?

⁸ Konsideraha ang laing rason kon nganong ang ubang mga karnero motambong sa Memoryal. Gusto nilang ipakita nga ilang gimahal ug gisuportahan ang mga dinihogan. Ang Pulong sa Diyos nagtagna nga ang mga dinihogan ug kadtong dunay yutan-ong paglaom masuod sa usag usa. Sa unsang paagi? Hisgotan nato ang pipila ka pananglitan.

9. Unsay gipakita sa tagna sa Zacarias 8:23 bahin sa pagbati sa ubang mga karnero ngadto sa mga dinihogan?

⁹ Basaha ang Zacarias 8:23. Niini nga tagna, nindot kaayo ang pagkahulagway sa pagbati sa ubang mga karnero ngadto sa ilang dinihogang mga igsoon. Ang mga ekspresyong “usa ka Hudiyo” ug “kaninyo” nagtumong sa mao ra nga grupo—ang nahibiling mga dinihogan. (Roma 2:28, 29) Ang “10 ka tawo gikan sa tanang pinulongan sa mga nasod” nagrepresentar sa ubang mga karnero. Sila “mogunit pag-ayo,” o mounong, sa mga dinihogan, nga moduyog kanila sa putling pagsimba. Busa sa gabii sa Memoryal, ipakita sa ubang mga karnero ang ilang kasuod sa mga dinihogan pinaagi sa pagtambong.

10. Unsay gipahinabo ni Jehova ingong katumanan sa tagna sa Ezequiel 37:15-19, 24, 25?

¹⁰ Basaha ang Ezequiel 37:15-19, 24, 25. Ingong katumanan niini nga tagna, gipahinabo ni Jehova nga ang mga dinihogan ug ang ubang mga karnero bug-os nga magkahiusa. Ang tagna naghisgot ug duha ka estik. Kadtong dunay langitnong paglaom samag estik “alang sa Juda” (ang tribo diin naggikan ang mga hari sa Israel), ug kadtong dunay yutan-ong paglaom samag estik “ni Epraim.” d Hiusahon ni Jehova ang duha ka grupo aron mahimo silang “usa ka estik.” Nagpasabot ni nga mag-alagad sila nga nagkahiusa ubos sa ilang usa ka Hari, si Kristo Jesus. Kada tuig, ang mga dinihogan ug ang ubang mga karnero motambong sa Memoryal, dili ingong duha ka lainlaing grupo, kondili ingong “usa ka panon” ubos sa “usa ka magbalantay.”—Juan 10:16.

11. Sa unsang paagi “ang mga karnero” nga gihisgotan sa Mateo 25:31-36, 40 pangunang nagsuportar sa mga igsoon sa Kristo?

¹¹ Basaha ang Mateo 25:31-36, 40. “Ang mga karnero” niini nga ilustrasyon nagrepresentar sa mga matarong panahon sa kataposan kinsa dunay yutan-ong paglaom—ang ubang mga karnero. Sila maunongong nagsuportar sa nahibilin sa dinihogang mga igsoon sa Kristo ilabina sa pagtabang kanila sa pagtuman sa bug-at kaayong responsibilidad—ang buluhatong pagsangyaw ug paghimog mga tinun-an sa tibuok kalibotan.—Mat. 24:14; 28:19, 20.

12-13. Sa unsa pang mga paagi nga gipakita sa ubang mga karnero ang ilang pagsuportar sa mga igsoon sa Kristo?

¹² Sa mga semana una pa ang tinuig nga Memoryal, gipakita sa ubang mga karnero ang ilang pagsuportar sa mga igsoon sa Kristo pinaagi  sa bug-os nga pagpakigbahin sa tibuok kalibotang kampanya sa pagpangimbitar sa mga interesado nga motambong sa Memoryal. (Tan-awa ang kahong “ Nangandam Ka ba Alang sa Memoryal?”) Motabang sab sila sa paghimog gikinahanglang mga kahikayan aron ang Memoryal mapahigayon sa tanang kongregasyon sa tibuok kalibotan, bisag walay makig-ambit sa emblema sa kadaghanang kongregasyon. Ang ubang mga karnero malipay sa pagsuportar sa mga igsoon sa Kristo nianang mga paagiha. Nahibalo sila nga ang ilang ginahimo alang sa dinihogang mga igsoon ni Jesus isipon niya nga samag ginahimo alang kaniya mismo.—Mat. 25:37-40.

¹³ Unsa ang uban pang rason kon nganong kitang tanan, bisag unsa pay atong paglaom, motambong sa Memoryal?

14. Sa unsang paagi si Jehova ug Jesus nagpakitag dakong gugma kanato?

¹⁴ Mapasalamaton ta sa gugma nga gipakita ni Jehova ug Jesus. Si Jehova nagpakita sa iyang gugma kanato sa daghang paagi. Pero ang kinalabwan niana mao ang paghatag sa iyang pinalanggang Anak aron mag-antos ug mamatay alang kanato. (Juan 3:16) Ug nahibalo ta nga gipakita sab ni Jesus ang dakong gugma pinaagi sa kinabubut-ong paghatag sa iyang kinabuhi alang kanato. (Juan 15:13) Dili gyod nato mabayran si Jehova ug si Jesus sa gugma nga ilang gipakita. Pero ikapakita nato ang atong pagkamapasalamaton diha sa paagi sa atong pagkinabuhi kada adlaw. (Col. 3:15) Ug motambong ta sa Memoryal aron hinumdoman ang ilang gugma kanato ug ipakita ang atong gugma kanila.

15. Nganong gipabilhan pag-ayo sa mga dinihogan ug sa ubang mga karnero ang regalo nga lukat?

¹⁵ Gipabilhan nato pag-ayo ang regalo nga lukat. (Mat. 20:28) Gipabilhan sa mga dinihogan ang lukat kay tungod niana, nabatonan nila ang nindot kaayong paglaom. Tungod sa ilang pagtuo sa halad sa Kristo, gipahayag sila ni Jehova nga matarong ug gisagop ingong iyang mga anak. (Roma 5:1; 8:15-17, 23) Ang ubang mga karnero mapasalamaton sab sa lukat. Tungod sa ilang pagtuo sa giulang dugo sa Kristo, makabaton silag hinlong baroganan atubangan sa Diyos, makahatag niyag sagradong pag-alagad, ug makabatog paglaom nga ‘makalabang sa dakong kasakitan.’ (Pin. 7:13-15) Ang usa ka paagi nga ikapakita sa mga dinihogan ug sa ubang mga karnero ang ilang pagkamapasalamaton sa lukat mao ang pagtambong sa Memoryal kada tuig.

16. Unsay laing rason kon nganong motambong ta sa Memoryal?

¹⁶ Ang laing rason kon nganong motambong ta sa Memoryal mao nga gusto tang motuman kang Jesus. Bisag unsay atong paglaom, gusto natong sundon ang sugo nga gihatag ni Jesus sa gabii nga gisugdan niya ang Memoryal: “Ipadayon ninyo ang pagbuhat niini sa paghandom kanako.”—1 Cor. 11:23, 24.

17. Sa unsang paagi ang Memoryal makatabang nato nga mas masuod kang Jehova?

¹⁷ Mas masuod ta kang Jehova. (Sant. 4:8) Sa ato nang nakat-onan, ang Memoryal maghatag natog kahigayonan sa paghunahuna bahin sa paglaom nga gihatag ni Jehova kanato ug sa pagpamalandong sa dakong gugma nga iyang gipakita. (Jer. 29:11; 1 Juan 4:8-10) Dihang atong palandongon ang atong seguradong paglaom ug ang way paglubad nga gugma sa Diyos kanato, mas molalom ang atong gugma kang Jehova ug mas masuod ta kaniya.—Roma 8:38, 39.

18. Ang pagpamalandong sa gibuhat ni Jesus magpalihok nato sa paghimo sa unsa?

 ¹⁸ Mapalihok ta sa pagsundog kang Jesus. (1 Ped. 2:21) Sa mga adlaw una ang Memoryal, magpokus ta sa mga asoy sa Bibliya bahin sa kataposang semana ni Jesus dinhi sa yuta, sa iyang kamatayon, ug sa iyang pagkabanhaw. Dayon, sa gabii sa Memoryal, ang pakigpulong magpahinumdom nato sa gugma ni Jesus alang kanato. (Efe. 5:2; 1 Juan 3:16) Samtang basahon nato ang gihimo ni Jesus nga pagsakripisyo sa kaugalingon ug palandongon kana, mapalihok ta nga “magpadayon sa paglakaw sama sa iyang paglakaw.”—1 Juan 2:6.

19. Sa unsang paagi makapabilin ta sa gugma sa Diyos?

¹⁹ Mahimo tang mas determinado nga magpabilin sa gugma sa Diyos. (Jud. 20, 21) Makapabilin ta sa gugma sa Diyos pinaagi sa paghimo sa tanan natong maarangan sa pagtuman kaniya, pagbalaan sa iyang ngalan, ug paglipay sa iyang kasingkasing. (Prov. 27:11; Mat. 6:9; 1 Juan 5:3) Ang pagtambong sa Memoryal maghimo natong mas determinado nga magkinabuhi kada adlaw sa paagi nga sama bag giingnan nato si Jehova, ‘Gusto nakong magpabilin sa imong gugma hangtod sa hangtod!’

20. Unsa ang maayong mga rason nga motambong ta sa Memoryal?

²⁰ Naglaom man ta nga mabuhi sa walay kataposan didto sa langit o dinhi sa yuta, duna tay maayong mga rason nga motambong sa Memoryal. Kada tuig, dihang magtigom ta nianang adlawa, atong gihandom ang kamatayon sa usa nga atong gimahal, si Jesu-Kristo. Labaw sa tanan, atong gihinumdoman ang kinadak-ang ekspresyon sa gugma—ang gugma nga gipakita ni Jehova kanato pinaagi sa paghatag sa iyang Anak ingong lukat. Niining tuiga, ang Memoryal himoon sa gabii sa Biyernes, Abril 15, 2022. Gimahal nato si Jehova ug ang iyang Anak. Busa sa anibersaryo sa kamatayon ni Jesus, wala nay mas importante pa kanato kay sa pagtambong sa Memoryal.