1. Unsa ang usa ka rason kon ngano tingaling gitandi ni Jesus ang iyang mga sumusunod ngadto sa mga karnero?

GITANDI ni Jesus ang iyang relasyon sa iyang mga sumusunod ngadto sa suod nga relasyon tali sa magbalantay ug sa mga karnero niini. (Juan 10:14) Haom nâ nga pagtandi. Ang mga karnero nakaila sa ilang magbalantay ug mamati sa iyang tingog. Naobserbahan nâ mismo sa usa ka turista. Siya miingon: “Gusto namong letratohan ang mga karnero ug amo silang gitawag aron moduol namo. Pero wala sila moduol kay wala sila kaila sa among tingog. Dayon, miabot ang usa ka batang magbalantay. Pagtawag niya sa mga karnero, misunod dayon sila.”

2-3. (a) Sa unsang paagi ikapakita sa mga sumusunod ni Jesus nga namati sila sa iyang tingog? (b) Unsay atong hisgotan niining artikuloha ug sa sunod?

² Ang naobserbahan sa maong turista nagpahinumdom nato sa giingon ni Jesus bahin sa iyang mga karnero—ang iyang mga tinun-an. Siya miingon: “Sila mamati sa akong tingog.” (Juan 10:16) Pero si Jesus tua sa langit. Busa unsaon nato pagpamati kaniya? Ang usa ka importanteng paagi nga ikapakita nato nga namati ta sa tingog sa atong Agalon mao ang pagpadapat sa mga butang nga iyang gitudlo.—Mat. 7:24, 25.

³ Niining artikuloha ug sa sunod, atong hisgotan ang pipila sa mga butang nga gitudlo ni Jesus. Sa ato unyang mahibaloan, si Jesus nagtudlo kanato nga angayng hunongon ang pagbuhat sa pipila ka butang ug angayng buhaton ang ubang butang. Hisgotan una nato ang duha ka butang nga giingon sa maayong magbalantay nga angay natong hunongon.

4. Sumala sa Lucas 12:29, unsay posibleng hinungdan sa “sobrang pagkabalaka”?

⁴ Basaha ang Lucas 12:29. Gidasig ni Jesus ang iyang mga sumusunod nga ‘mohunong na sa sobrang pagkabalaka’ bahin sa ilang materyal nga panginahanglan. Nahibalo ta nga ang tambag  ni Jesus kanunayng maalamon ug husto. Gusto nato ning ipadapat, pero usahay malisdan tingali ta. Ngano?

5. Nganong ang pipila mabalaka tingali bahin sa ilang materyal nga panginahanglan?

 ⁵ Ang pipila tingali mabalaka bahin sa ilang materyal nga panginahanglan—pagkaon, sinina, ug puy-anan. Nagpuyo tingali sila sa nasod nga daghan ang pobre ug lisod makakitag trabaho. Basin ang ilang kita dili makasapar sa panginahanglan sa ilang pamilya. O kaha namatay ang nanginabuhi para sa pamilya maong wala na silay kuwarta para sa ilang panginahanglan. Dugang pa, daghan tingali ang nawad-ag trabaho ug panginabuhi tungod sa COVID-19 pandemic. (Eccl. 9:11) Kon naeksperyensiyahan nato ang bisan hain niini nga mga kalisdanan o ang uban pang kalisdanan, unsaon nato pagsunod ang tambag ni Jesus nga mohunong na sa pagkabalaka?

6. Unsay nahitabo kang apostol Pedro usa ka higayon niana?

⁶ Usa ka higayon niana, si apostol Pedro ug ang ubang apostoles naabtan ug unos samtang didto sila sa Dagat sa Galilea sakay sa usa ka sakayan. Dayon, nakita nila si Jesus nga naglakaw ibabaw sa dagat. Si Pedro miingon: “Ginoo, kon ikaw gyod kana, palakwa ko ibabaw sa tubig paingon nimo.” Si Jesus miingon: “Dali ngari!” Busa, si Pedro mikawas sa sakayan ug “milakaw ibabaw sa tubig paingon kang Jesus.” Matikdi ang sunod nga nahitabo. “Pagkakita niya sa unos, siya nahadlok. Dihang siya nagakaunlod na, siya misinggit: ‘Ginoo, luwasa ko!’” Gikuptan ni Jesus ang iyang kamot ug giluwas siya. Angay natong hinumdoman nga sa dihang si Pedro padayong nagtan-aw kang Jesus, nakalakaw siya ibabaw sa dagat nga gikusokuso sa unos. Pero dihang si Pedro mitan-aw sa unos, gidaog siya sa kahadlok ug  pagduhaduha ug misugod pagkaunlod.—Mat. 14:24-31.

7. Unsay atong makat-onan sa nahitabo kang Pedro?

⁷ Duna tay makat-onan sa nahitabo kang Pedro. Pagkawas ni Pedro sa sakayan, gusto gyod niyang molakaw ibabaw sa tubig hangtod nga makaabot siya sa iyang Agalon. Wala siya maghunahuna nga mahadlok siya sa unos ug mosugod sa pag-unlod. Pero imbes magpadayog tan-aw kang Jesus, nabalaka siya sa unos. Karon, dili ta makalakaw ibabaw sa tubig, pero nag-atubang tag mga pagsulay sa atong pagtuo. Kon dili ta padayong magpokus kang Jehova ug sa iyang mga saad, mosugod ta pag-unlod sa espirituwal. Bisag unsang simbolikong unos ang atong maatubang, kinahanglang padayon tang magpokus kang Jehova ug sa iyang katakos sa pagtabang kanato. Sa unsang paagi mahimo nato kana?

8. Unsay makatabang aron dili ta sobrang mabalaka bahin sa atong materyal nga panginahanglan?

⁸ Makabenepisyo ta kon ang kabalaka pulihan natog pagsalig. Hinumdomi nga ang atong mahigugmaong Amahan, si Jehova, nagsaad nga iyang itagana ang atong materyal nga panginahanglan kon unahon nato ang espirituwal nga mga butang. (Mat. 6:32, 33) Kanunay niyang gituman ang maong saad. (Deut. 8:4, 15, 16; Sal. 37:25) Kon gitagan-an ni Jehova ang mga langgam ug mga bulak, seguradong dili ta angayng mabalaka kon unsay atong kan-on o isul-ob! (Mat. 6:26-30; Filip. 4:6, 7) Sama nga ang gugma nagpalihok sa mapinanggaong mga ginikanan sa pagtagana sa materyal nga panginahanglan sa ilang mga anak, ang gugma magpalihok sa atong langitnong Amahan sa pagtagana sa materyal nga panginahanglan sa iyang katawhan. Oo, makaseguro ta nga atimanon ta ni Jehova!

9. Unsay imong makat-onan sa eksperyensiya sa usa ka magtiayon?

⁹ Konsideraha ang usa ka eksperyensiya nga nagpakita kon sa unsang paagi si Jehova makatagana sa atong materyal nga panginahanglan. Usa ka magtiayong payunir ang nagdrayb ug kapig usa ka oras sa ilang daang sakyanan aron kuhaon ang pipila ka sister nga nagpuyo sa refugee camp ug dad-on sila sa tigom. Ang brader miingon: “Human sa tigom, among gidapit ang mga sister nga mangaon, pero naamgohan namo nga wala diay mi ikadalit nila.” Unsay sunod nga nahitabo? Ang brader mipadayon: “Pag-abot namo sa balay, dihay duha ka dagkong bag nga punog pagkaon sa gawas sa among pultahan. Wala mi mahibalo kon kinsay nagbilin ato. Gitagana ni Jehova ang among panginahanglan.” Sa ulahi, naguba ang sakyanan sa magtiayon. Gikinahanglan kaayo nila kini sa ilang ministeryo pero wala silay kuwarta nga ikapaayo niini. Ila ning gidala sa repair shop aron mahibaloan kon pilay magasto sa pagpaayo. Dayon, dihay tawo nga miabot ug nangutana: “Kang kinsa ning sakyanan?” Ang brader miingon nga siyay tag-iya niini ug kinahanglan ning ayohon. Ang tawo mitubag: “Way problema. Mao ni gusto sa akong asawa nga model ug kolor sa sakyanan. Pila may baligya nimo ani?” Ang gibayad sa maong tawo igong ikapalit ug laing sakyanan. Ang brader miingon: “Nalipay kaayo mi niadtong adlawa. Dili to kay naatol lang. Gitabangan gyod mi ni Jehova.”

10. Nganong ang Salmo 37:5 makadasig nato nga dili mabalaka bahin sa atong materyal nga panginahanglan?

¹⁰ Kon mamati ta sa maayong magbalantay ug mohunong na sa sobrang pagkabalaka bahin sa materyal nga panginahanglan, makaseguro ta nga tagan-an ta ni Jehova. (Basaha ang Salmo 37:5; 1 Ped. 5:7) Konsideraha ang mga kalisdanan nga gihisgotan sa  parapo 5. Tingali sukad sa una, gigamit ni Jehova ang ulo sa pamilya o ang atong amo aron tabangan ta sa atong mga panginahanglan kada adlaw. Pero kon ang ulo sa pamilya dili na makahimo niana o kon nawad-an tag trabaho, si Jehova magtagana  sa atong mga panginahanglan sa laing mga paagi. Makaseguro gyod ta niana. Hisgotan nato karon ang lain pang butang nga giingon sa maayong magbalantay nga angay natong hunongon.

11. Sumala sa Mateo 7:1, 2, unsay giingon ni Jesus nga angay natong hunongon, ug nganong lisod ning buhaton?

¹¹ Basaha ang Mateo 7:1, 2. Nahibalo si Jesus nga ang dili hingpit nga mga tawo dunay tendensiya nga magpokus sa kasaypanan sa uban. Matikdi ang iyang giingon: “Ayaw na panghukom.” Tingali naningkamot ta nga dili hukman ang mga igsoon. Pero, kitang tanan dili hingpit. Unsay atong buhaton kon mamatikdan nato nga nagpokus na ta sa kasaypanan sa uban? Pamati kang Jesus ug paningkamot nga dili na manghukom.

12-13. Sa unsang paagi ang pagpamalandong sa panglantaw ni Jehova kang Haring David makatabang nato nga dili na manghukom?

¹² Makabenepisyo ta sa pagpamalandong sa ehemplo ni Jehova. Nagpokus siya sa maayong hiyas sa mga tawo. Makita nato ni sa iyang pagpakiglabot kang Haring David, kinsa nakahimog seryosong mga sala. Pananglitan, si David nanapaw uban kang Bat-seba, ug iya pa ganing gipapatay ang bana niini. (2 Sam. 11:2-4, 14, 15, 24) Tungod niana, napasakitan ni David dili lang ang iyang kaugalingon, kondili ang iya pong pamilya, apil na ang uban niyang mga asawa. (2 Sam. 12:10, 11) Sa laing higayon, si David wala magpakitag bug-os nga pagsalig kang Jehova dihang gimando niya nga iphon ang kasundalohan sa Israel, butang nga wala isugo ni Jehova. Tingali gibuhat to niya tungod sa iyang garbo ug pagsalig sa gidaghanon sa iyang kasundalohan. Unsay resulta? Mga 70,000 ka Israelinhon ang nangamatay!—2 Sam. 24:1-4, 10-15.

¹³ Kon nabuhi ka sa Israel niadtong panahona, unsa kahay imong panglantaw kang David? Maghunahuna kaha ka nga dili siya angayng pasayloon ni Jehova? Lahi ang panglantaw ni Jehova kaniya. Nagpokus si Jehova sa katibuk-ang rekord ni David sa pagkamatinumanon ug sa iyang kinasingkasing nga paghinulsol. Busa, gipasaylo ni Jehova si David sa iyang seryosong mga sala. Nahibalo siya nga si David nahigugma pag-ayo kaniya ug gustong mohimo kon unsay husto. Mapasalamaton kaayo ta nga ang atong Diyos nagpokus sa atong maayong mga hiyas ug panggawi.—1 Hari 9:4; 1 Cron. 29:10, 17.

14. Unsay nakatabang sa mga Kristohanon nga dili na manghukom?

¹⁴ Kay si Jehova wala magdahom ug kahingpitan kanato, dili pod ta angayng magdahom ug kahingpitan sa uban, kondili magpokus ta sa ilang maayong mga hiyas. Sagad, dali ra natong makita ang kahuyangan sa uban ug manaway nila. Pero ang espirituwal nga tawo maningkamot gihapon nga makabatog maayong relasyon sa uban bisag makita niya ang ilang mga kahuyangan. Ang wala pa mahashasi nga diamante dili tingali nindot tan-awon, pero ang maalamong tawo nahibalo nga mahimo ning nindot ug bililhon kaayo nga bato kon matabas ug mahashasan na kini. Sama kang Jehova ug Jesus, dili ta angayng magpokus sa mga kahuyangan sa uban kondili sa ilang maayong mga hiyas.

15. Sa unsang paagi ang paghunahuna sa kahimtang sa mga tawo makatabang nato nga dili manaway nila?

¹⁵ Gawas pa sa pagpokus sa maayong mga hiyas sa uban, unsay makatabang nato aron dili ta manaway nila? Makatabang ang paghunahuna sa ilang kahimtang. Tagda ni nga pananglitan. Usa ka adlaw niana diha sa templo, nakita ni Jesus ang usa ka kabos nga babayeng balo nga naghulog sa panudlanag bahandi ug duha  ka sensilyo nga ubos kaayog bili. Wala siya mangutana: “Nganong mao ra man nay iyang gihulog?” Imbes magpokus sa kantidad sa gihulog sa babayeng balo, gihunahuna ni Jesus ang iyang motibo ug kahimtang ug gidayeg siya kay gihimo niya ang iyang maarangan.—Luc. 21:1-4.

16. Unsay imong makat-onan sa eksperyensiya ni Veronica?

¹⁶ Ikailustrar nato ang kaimportante sa paghunahuna sa kahimtang sa uban pinaagi sa pagkonsiderar sa eksperyensiya sa sister nga si Veronica. Sa ilang kongregasyon, may nag-inusarang inahan nga dunay anak nga lalaki. Si Veronica miingon: “Sa tan-aw nako, dili sila regular sa mga kalihokan sa kongregasyon. Busa negatibo ang akong panglantaw nila. Pero dihay higayon nga nagpartner mig sangyaw sa inahan. Giestoryahan ko niya nga lisod mag-atiman ug autistic nga anak. Gihimo niya ang tanan aron matagan-an ang ilang pisikal ug espirituwal nga panginahanglan. Usahay, tungod sa kondisyon sa iyang anak, kinahanglan siyang motambong ug tigom sa laing kongregasyon.” Si Veronica miingon: “Wa gyod ko magdahom nga lisod kaayo ang iyang kinabuhi. Karon, ako nang gimahal ug gitahod pag-ayo ang maong sister tungod sa tanan niyang paningkamot sa pag-alagad kang Jehova.”

17. Unsay gisugo kanato sa Santiago 2:8, ug sa unsang paagi mahimo nato kana?

¹⁷ Unsay angay natong buhaton kon atong  maamgohan nga atong gihukman ang usa ka igsoon? Angay natong hinumdoman nga gisugo ta nga higugmaon ang atong mga igsoon. (Basaha ang Santiago 2:8.) Kinahanglan sab nga kinasingkasing tang mag-ampo kang Jehova ug hangyoon siya nga tabangan ta nga dili na manghukom. Ikapakita nato nga milihok ta uyon sa atong mga pag-ampo pinaagi sa paggahin ug panahon sa pagpakig-uban sa igsoon nga atong gihukman. Pinaagi niana mas mailhan nato siya. Puwede nato siyang dapiton nga makig-uban nato sa pagsangyaw o sa pagpangaon. Samtang maningkamot ta nga mas mailhan ang atong igsoon, puwede natong sundogon si Jehova ug Jesus pinaagi sa pagpokus sa iyang maayong mga hiyas. Niining paagiha, atong gipakita nga namati ta sa sugo sa maayong magbalantay nga dili na manghukom.

18. Unsaon nato pagpakita nga namati ta sa tingog sa maayong magbalantay?

¹⁸ Sama nga ang mga karnero mamati sa tingog sa ilang magbalantay, ang mga sumusunod ni Jesus mamati sa iyang tingog. Kon maningkamot ta nga mohunong na sa pagkabalaka sa atong materyal nga panginahanglan ug dili na manghukom, panalanginan ni Jehova ug Jesus ang atong mga paningkamot. Bahin man ta sa “gamayng panon” o sa “ubang mga karnero,” hinaot nga padayon tang mamati sa tingog sa maayong magbalantay. (Luc. 12:32; Juan 10:11, 14, 16) Sa sunod nga artikulo, atong hisgotan ang duha ka butang nga gisugo ni Jesus sa iyang mga sumusunod nga angay nilang buhaton.