1. Unsay gitudlo kanimo bahin sa atong Maglalalang?

 KON gipadako ka ingong Saksi ni Jehova, tingali nakakat-on ka bahin kang Jehova sukad sa bata pa ka. Gitudloan ka nga siya ang Maglalalang, nga siya dunay nindot nga mga hiyas, ug nga duna siyay mahigugmaong katuyoan para sa katawhan.—Gen. 1:1; Buh. 17:24-27.

2. Giunsa pag-isip sa pipila ka tawo kadtong motuo sa Maglalalang?

² Pero daghan ang dili motuo nga dunay Diyos o nga siya ang Maglalalang. Hinunoa, sila nagtuo nga ang kinabuhi mitungha lag iya ug nagsugod gikan sa simple kaayong mga matang hangtod nga nahimo kining komplikadong mga matang sa kinabuhi. Ang pipila nga nagtuo niini edukado kaayo. Moingon tingali sila nga gipamatud-an na sa siyensiya nga sayop ang Bibliya ug nga kadto lang way grado, dili intelihente, o daling malimbongan ang motuo sa Maglalalang.

3. Nganong importante nga palig-onon nato ang atong pagtuo?

³ Ang giingon ba sa pipila ka edukadong mga tawo makapahuyang sa atong pagtuo nga si Jehova ang atong mahigugmaong Maglalalang? Ang tubag niana nagdependeg dako sa rason kon nganong nagtuo ta nga si Jehova ang Maglalalang. Tungod ba kay giingnan ta nga mao nay tuohan o tungod kay kita mismo naggahin ug panahon sa pagsusi sa ebidensiya? (1 Cor. 3:12-15) Bisag unsa na ta ka dugay nga nag-alagad kang Jehova, kinahanglan nga padayon natong palig-onon ang atong pagtuo. Kon himoon nato nâ, dili ta malimbongan sa “pilosopiya ug sayop nga mga pangatarongan” nga gitudlo niadtong supak sa Pulong sa Diyos. (Col. 2:8; Heb. 11:6) Aron tabangan ta, hisgotan niining artikuloha (1) kon nganong daghan ang dili motuo nga dunay Maglalalang, (2) kon unsaon nimo pag-ugmad ang  imong pagtuo kang Jehova, ang imong Maglalalang, ug (3) kon unsaon nimo pagpalig-on ang imong pagtuo.

4. Sumala sa Hebreohanon 11:1 ug footnote, sa unsa gibase ang tinuod nga pagtuo?

⁴ Ang pipila naghunahuna nga ang pagtuo nagpasabot nga motuo ta sa usa ka butang bisag walay ebidensiya. Pero sumala sa Bibliya, dili nâ tinuod nga pagtuo. (Basaha ang Hebreohanon 11:1 ug footnote.) Matikdi nga ang pagtuo sa dili makitang mga realidad, sama kang Jehova, Jesus, ug sa langitnong Gingharian, gibase sa makapakombinsir nga ebidensiya. (Heb. 11:3) Ang usa ka Saksi nga biochemist miingon: “Ang atong pagtuo dunay basehanan. Wala nato balewalaa ang mga butang nga napamatud-an sa siyensiya.”

5. Nganong daghan ang nagtuo nga wala lalanga sa Diyos ang kinabuhi?

⁵ Mangutana tingali ta, ‘Kon may lig-ong ebidensiya nga dunay Maglalalang, nganong daghan ang dili motuo nga ang Diyos maoy naglalang sa kinabuhi?’ Tungod kay wala susiha sa pipila ang ebidensiya. Si Robert, nga karon Saksi ni Jehova na, miingon: “Kay ang eskuwelahan wala man magtudlo bahin sa paglalang, abi nakog dili ni tinuod. Kapig 20 anyos na ko dihang nakaestorya kog mga Saksi ni Jehova ug nadunggan nako ang lohikal ug makapakombinsir nga mga pangatarongan gikan sa Bibliya nga ang Diyos maoy naglalang sa tanang butang.” b—Tan-awa ang kahong “ Importanteng Mensahe Para sa mga Ginikanan.”

6. Nganong ang uban dili motuo sa Maglalalang?

⁶ Ang uban moingon nga dili sila motuog Maglalalang kay motuo lang sila sa mga butang nga  ilang makita. Pero sa tinuod lang, nagtuo sila sa mga butang nga dili nila makita, pananglitan, sa grabidad, kay naay ebidensiya nga tinuod ni. Sa susama, ang klase sa pagtuo nga gihisgotan sa Bibliya gibase sab sa mga ebidensiya nga tinuod ang uban pang butang nga ‘gituohan bisag kini dili makita.’ (Heb. 11:1) Nagkinahanglag panahon ug paningkamot ang pagsusi sa mga ebidensiya, ug daghan ang dili ganahang maghago sa pagbuhat niana. Ang tawo nga dili mosusi sa mga ebidensiya mohinapos tingali nga walay Diyos.

7. Ang tanan bang edukadong tawo dili motuo nga gilalang sa Diyos ang uniberso? Ipatin-aw.

⁷ Human tun-i ang mga ebidensiya, ang pipila ka siyentista nakombinsir nga gilalang sa Diyos ang uniberso. c Sama kang Robert, nga gihisgotan  ganina, ang pipila tingali nagtuo nga walay Maglalalang kay ang paglalang wala gyod itudlo sa unibersidad. Pero, daghang siyentista ang nakakat-on bahin kang Jehova ug nahigugma kaniya. Sama niini nga mga siyentista, angay natong palig-onon ang atong pagtuo sa Diyos, bisag unsa pay atong nakab-ot nga edukasyon. Walay laing makahimo niini para kanato.

8-9. (a) Unsang pangutana ang atong hisgotan? (b) Sa unsang paagi ang pagtuon sa kalalangan makatabang nimo?

⁸ Unsaon nimo pag-ugmad ang imong pagtuo sa Maglalalang? Hisgotan nato ang upat ka paagi.

⁹ Tun-i ang kalalangan. Maugmad nimo ang imong pagtuo sa Maglalalang pinaagi sa pagpaniid sa mga hayop, tanom, ug bituon. (Sal. 19:1; Isa. 40:26) Kon tun-an nimo ni pag-ayo, mas makombinsir ka nga si Jehova ang Maglalalang. Ang atong mga publikasyon sagad dunay mga artikulo nga nagpatin-aw bahin sa lainlaing detalye sa kalalangan. Ayawg sayloi ang maong mga artikulo bisan pag nalisdan ka sa pagsabot niana. Pagkat-on kutob sa imong maarangan. Ug ayawg kalimot sa pagtan-aw diha sa atong website, ang jw.org, sa nindot nga mga video bahin sa kalalangan nga gipresentar sa atong rehiyonal nga mga kombensiyon sa milabayng mga tuig.

10. Paghatag ug pananglitan kon sa unsang paagi ang kalalangan nagpamatuod nga dunay Maglalalang. (Roma 1:20)

¹⁰ Dihang magtuon bahin sa kalalangan, matikdi pag-ayo kon unsay gipadayag niana bahin sa atong Maglalalang. (Basaha ang Roma 1:20.) Pananglitan, nahibalo tingali ka nga ang atong adlaw, gawas nga maghatag ug kainit nga importante sa kinabuhi, magpagawas sab ug makadaot nga enerhiya, ang ultraviolet rays. Kitang mga tawo kinahanglang maprotektahan batok niana. Ug naprotektahan gyod ta! Sa unsang paagi? Ang atong planetang yuta dunay kaugalingong proteksiyon—ang ozone layer nga maoy mosala sa makadaot nga radyasyon. Samtang magkataas ang lebel sa ultraviolet nga radyasyon gikan sa adlaw, magkabaga pod ang ozone layer. Dili ba nagpakita ni nga duna gyoy naghimo niini nga proseso ug nga siya usa gyod ka mahigugmaon ug intelihente nga Maglalalang?

11. Asa ka makakitag makapalig-on sa pagtuo nga mga impormasyon bahin sa kalalangan? (Tan-awa ang kahong “ Pipila ka Reperensiya nga Makapalig-on sa Pagtuo.”)

¹¹ Makakita kag daghang makapalig-on sa pagtuo nga impormasyon bahin sa kalalangan pinaagi sa pagtan-aw sa Watch Tower Publications Index ug pag-research sa jw.org. Puwede kang magsugod diha sa mga artikulo ug video sa serye nga “Gidisenyo ba Kini?” Kini mugbo ra ug dunay pipila ka makapahinganghang impormasyon bahin sa mga hayop ug mga tanom. Duna pod ni mga pananglitan kon giunsa pagpaningkamot sa mga siyentista nga masundog ang ilang nakita sa kinaiyahan.

12. Dihang magtuon sa Bibliya, unsa ang pipila ka butang nga angay natong matikdan?

¹² Tun-i ang Bibliya. Sa sinugdan, ang biochemist nga gihisgotan ganina wala motuo nga dunay Maglalalang. Pero sa ngadtongadto, nakombinsir siya. Siya miingon: “Ang akong pagtuo wala lang ibase sa akong pagtuon sa siyensiya. Gibase sab ni sa akong seryosong pagtuon sa Bibliya.” Tingali duna ka nay tukmang kahibalo bahin sa mga pagtulon-an sa Bibliya. Pero aron molig-on ang imong pagtuo sa Maglalalang, kinahanglang padayon nimong tun-an ang Pulong sa Diyos. (Jos. 1:8; Sal. 119:97) Matikdi kon unsa ka detalyado ang paghisgot sa Bibliya sa mga panghitabo sa kasaysayan. Matikdi sab ang mga tagna niini ug ang pagkaharmonya sa mga nasulat niini. Ang paghimo niana makapalig-on sa imong pagtuo nga usa ka mahigugmaon,  maalamong Maglalalang ang naghimo kanato ug nga iyang gipasulat ang Bibliya. d—2 Tim. 3:14; 2 Ped. 1:21.

13. Unsa ang usa ka pananglitan sa maalamong tambag nga naa sa Pulong sa Diyos?

¹³ Dihang magtuon sa Pulong sa Diyos, matikdi kon sa unsang paagi makatabang ang tambag niini. Pananglitan, ang Bibliya dugay nang nagpasidaan nga ang gugma sa kuwarta makadaot ug makahatag ug “daghang kasakitan.” (1 Tim. 6:9, 10; Prov. 28:20; Mat. 6:24) Haom ba gihapon nâ nga pasidaan karon? Ang librong The Narcissism Epidemic nag-ingon: “Sagad, ang materyalistikong mga tawo dili kaayo malipayon ug mas magul-anon. Bisan ang mga tawo nga gusto lang makabaton ug dugang kuwarta dili malipayon ug mas daghag problema sa panglawas.” Busa, makatabang gyod ang pasidaan sa Bibliya nga dili higugmaon ang kuwarta! Makahunahuna ba kag uban pang prinsipyo sa Bibliya nga nakatabang nimo? Kon mas maapresyar nato ang tambag sa Bibliya, mas mosalig ta sa way paglubad nga kaalam gikan sa atong mahigugmaong Maglalalang. (Sant. 1:5) Ingong resulta, ang atong kinabuhi mas magmalipayon.—Isa. 48:17, 18.

14. Unsay imong makat-onan bahin kang Jehova sa imong pagtuon sa Bibliya?

¹⁴ Tun-i ang Bibliya uban ang tumong nga mas mailhan si Jehova. (Juan 17:3) Samtang magtuon ka sa Kasulatan, makita nimo ang personalidad ug mga hiyas ni Jehova—ang samang mga hiyas nga imong nakita dihang nagtuon ka sa kalalangan. Kini nga mga hiyas klarong nagpakita nga si Jehova tinuod nga Persona ug dili kay imahinasyon lang. (Ex. 34:6, 7; Sal. 145:8, 9) Samtang mas mailhan nimo si Jehova, molig-on ang imong pagtuo kaniya, molawom ang imong gugma kaniya, ug mas masuod ka kaniya.

15. Sa unsang paagi makatabang nimo ang pagsulti sa uban bahin sa imong pagtuo?

¹⁵ Isulti sa uban ang imong pagtuo sa Diyos. Kon imo nang himoon, molig-on ang imong pagtuo. Pero komosta kon ang imong gisangyawan mangutana nimo kon duna ba gyoy Diyos ug wala ka kabalo kon unsaon pagtubag? Pangitag binase sa Bibliya nga tubag niana nga pangutana diha sa usa sa atong mga publikasyon, ug dayon hisgoti ni uban kaniya. (1 Ped. 3:15) Makapangayo pod kag tabang sa usa ka eksperyensiyadong igsoon. Modawat man ang tawo o dili sa tubag sa Bibliya, makabenepisyo ka sa imong pag-research. Mas molig-on ang imong pagtuo. Ingong resulta, dili ka maapektohan sa dili tinuod nga gipanulti sa maalamon ug edukado kunong mga tawo nga nag-ingon nga walay Maglalalang.

16. Unsay posibleng mahitabo kon dili nato padayong lig-onon ang atong pagtuo?

¹⁶ Bisag unsa na ta ka dugay nga nag-alagad kang Jehova, kinahanglan nga padayon natong palig-onon ang atong pagtuo kaniya. Ngano? Tungod kay kon dili ta mag-amping, mahimong mohuyang ang atong pagtuo. Hinumdomi nga ang pagtuo gibase sa ebidensiya nga tinuod ang mga butang nga dili makita. Dali ra tingali natong malimtan ang mga butang nga dili nato makita. Tungod niana, gitawag ni Pablo ang kakulag pagtuo ingong “sala nga daling makalambod nato.” (Heb. 12:1) Busa, sa unsang paagi maseguro nato nga magpabiling lig-on ang atong pagtuo?—2 Tes. 1:3.

17. Unsang tabang ang atong gikinahanglan aron padayon natong mapalig-on ang atong pagtuo?

¹⁷ Una, pangayoa ang balaang espiritu ni Jehova, ug pirme nang himoa. Ngano? Tungod kay ang pagtuo maoy bahin sa bunga sa espiritu. (Gal. 5:22, 23) Dili nato padayong mapalig-on ang atong pagtuo sa Maglalalang kon wala ang tabang sa iyang balaang espiritu. Kon pirme natong pangayoon kang Jehova ang iyang espiritu, iya ning  ihatag kanato. (Luc. 11:13) Makaampo pa gani ta: “Hatagi mig dugang pagtuo.”—Luc. 17:5.

18. Base sa Salmo 1:2, 3, unsang pribilehiyo ang atong nabatonan?

¹⁸ Dugang pa, himoang regular ang imong pagtuon sa Pulong sa Diyos. (Basaha ang Salmo 1:2, 3.) Sa dihang gikomposo ang maong salmo, diyutay lang ang kompletong sinulat nga kopya sa Balaod sa Diyos ug nabatonan lang kini sa pipila ka Israelinhon, apil na sa hari ug mga saserdote. Kada pito ka tuig, dihay mga kahikayan nga “ang mga lalaki, babaye, bata,” ug mga langyaw nga nagpuyo sa Israel maminaw sa pagbasa sa Balaod sa Diyos. (Deut. 31:10-12) Sa panahon ni Jesus, pipila lang ang dunay kopya sa Kasulatan. Kadaghanan sa mga kopya naa sa mga sinagoga. Pero karon, kadaghanang tawo makabasa na sa Pulong sa Diyos, tibuok man o bahin lang niini. Nindot gyod nâ nga pribilehiyo! Unsaon nato pagpakita nga atong giapresyar ang maong pribilehiyo?

19. Unsay angay natong himoon aron padayong mapalig-on ang atong pagtuo?

¹⁹ Ikapakita nato nga atong giapresyar ang pribilehiyo nga nabatonan nato ang Pulong sa Diyos pinaagi sa regular nga pagbasa niini. Kinahanglan tang mag-eskedyul ug panahon sa pagtuon sa Bibliya, dili kay mobasa lang niini kon makalugar. Kon sundon nato ang atong eskedyul sa pagtuon, padayon natong mapalig-on ang atong pagtuo.

20. Unsay determinado natong buhaton?

²⁰ Dili sama sa “mga maalamon ug makinaadmanon” niining kalibotana, duna tay lig-ong pagtuo nga gibase sa Pulong sa Diyos. (Mat. 11:25, 26) Tungod sa atong pagtuon nianang sagrado nga basahon, nahibaloan nato kon nganong nagkagrabe ang kahimtang sa yuta ug kon unsay buhaton ni Jehova niini. Busa magmadeterminado ta nga palig-onon ang atong pagtuo ug tabangan ang mas daghang tawo kutob sa mahimo nga motuo sa atong Maglalalang. (1 Tim. 2:3, 4) Ug padayon natong paaboton ang panahon dihang ang tanang buhi dinhi sa yuta mosulti sa mga pulong sa Pinadayag 4:11: “Takos ka, Jehova nga among Diyos, nga modawat sa himaya . . . kay gilalang nimo ang tanang butang.”