1. Unsa tingali atong ikapangutana dihang maghunahuna ta sa tanang gilalang ni Jehova?

SA DIHANG hunahunaon nato ang dako kaayong uniberso nga gilalang ni Jehova, bation tingali nato ang gibati ni salmistang David, kinsa miampo ug nangutana: “Dihang makita nako ang imong kalangitan, ang mga buhat sa imong mga tudlo, ang bulan ug ang mga bituon nga imong gipahimutang, unsa ba ang tawo nga ikaw naghunahuna man kaniya, ug ang anak sa tawo nga ikaw nag-atiman man kaniya?” (Sal. 8:3, 4) Sama kang David, maghunahuna tingali ta kon unsa ta ka gamay kon itandi sa ubang mga butang nga gilalang ni Jehova diha sa uniberso ug mahingangha ta nga si Jehova nagpakitag pagtagad kanato. Pero, sa ato unyang masayran, si Jehova wala lang magpakitag pagtagad sa unang magtiayon, si Adan ug Eva, kondili naghimo pod nila nga bahin sa iyang pamilya.

2. Unsay katuyoan ni Jehova para sa iyang unang yutan-ong mga anak?

² Si Adan ug Eva mao ang unang yutan-ong mga anak ni Jehova, ug siya mao ang ilang mahigugmaon nga langitnong Amahan. Gihatagan niyag buluhaton ang maong magtiayon. Giingnan niya sila: “Panganak mo ug pagdaghan, pun-a ang yuta ug gamhi kini.” (Gen. 1:28) Gusto niya nga manganak sila ug atimanon pag-ayo ang yuta. Kon misunod pa sila sa katuyoan ni Jehova para kanila, si Adan ug Eva ug ang ilang mga anak magpabilin untang mga membro sa pamilya sa Diyos hangtod sa hangtod.

3. Nganong makaingon ta nga si Adan ug Eva may importanteng lunâ sa pamilya ni Jehova?

³ Si Adan ug Eva may importanteng lunâ sa pamilya ni Jehova. Sa Salmo 8:5, si David miingon bahin sa paglalang ni Jehova sa tawo: “Gihimo nimo siyang ubos ug diyutay sa mga anghel, ug gikoronahan nimo siyag himaya ug kahalangdon.” Tinuod,  dili parehas ang gahom, kahibalo, ug mga abilidad nga gihatag ni Jehova sa mga tawo kon itandi nianang sa mga anghel. (Sal. 103:20) Pero, ang mga tawo “ubos [lag] diyutay” sa gamhanan nga espiritung mga linalang. Hunahunaa kana! Gihatagan gyod ni Jehova ang atong unang ginikanan ug nindot nga sinugdanan.

4. Unsay nahitabo kang Adan ug Eva tungod sa ilang pagsupak kang Jehova, ug unsay atong hisgotan niining artikuloha?

 ⁴ Makapaguol, si Adan ug Eva misupak kang Jehova busa dili na sila membro sa iyang pamilya. Miresulta nig grabeng kadaot sa iyang mga kaliwat, sumala sa ato unyang masayran niining artikuloha. Pero wala mausab ang katuyoan ni Jehova. Gusto niya nga ang masinugtanong mga tawo mahimong iyang mga anak hangtod sa hangtod. Una, hisgotan nato kon sa unsang paagi gipakita ni Jehova nga importante ta kaniya. Dayon, hisgotan nato kon unsay atong mahimo karon sa pagpakita nga gusto natong mahimong membro sa pamilya sa Diyos. Ug atong hisgotan ang mga panalangin nga matagamtam sa yutan-ong mga anak ni Jehova hangtod sa hangtod.

5. Unsaon nato pagpakita nga mapasalamaton ta sa Diyos tungod sa pagbuhat niya kanato sumala sa iyang larawan?

⁵ Gipakita ni Jehova nga importante ta kaniya pinaagi sa pagbuhat kanato sumala sa iyang larawan. (Gen. 1:26, 27) Kay gibuhat ta sumala sa larawan sa Diyos, maugmad ug mapakita nato ang daghan sa iyang nindot nga mga hiyas, sama sa gugma, kaluoy, pagkamaunongon, ug pagkamatarong. (Sal. 86:15; 145:17) Sa dihang ugmaron nato ang maong mga hiyas, atong gipasidunggan si Jehova ug gipakita nga mapasalamaton ta kaniya. (1 Ped. 1:14-16) Dihang molihok ta sa paagi nga makapalipay sa atong langitnong Amahan, kita magmalipayon ug mobatig katagbawan. Ug kay gibuhat ta ni Jehova sumala sa iyang larawan, puwede tang mahimong klase sa mga tawo nga gusto niyang mahimong bahin sa iyang pamilya.

6. Giunsa pagpakita ni Jehova nga importante ang mga tawo dihang giandam niya ang yuta?

⁶ Si Jehova nag-andam ug espesyal nga puy-anan para kanato. Dugay nang naandam ni Jehova ang yuta para sa mga tawo sa wala pa niya lalanga si Adan. (Job 38:4-6; Jer. 10:12) Kay siya mahunahunaon ug mahinatagon, daghang maayong mga butang ang gitagana ni Jehova aron malipay ta. (Sal. 104:14, 15, 24) May mga higayon nga namalandong siya sa iyang gipanglalang, ug iyang “nakita . . . nga kini maayo.” (Gen. 1:10, 12, 31) Gipakita niya nga importante ang mga tawo pinaagi sa paghatag nilag “awtoridad ibabaw” sa tanan niyang nindot nga mga linalang dinhi sa yuta. (Sal. 8:6) Katuyoan sa Diyos nga ang hingpit nga mga tawo malipay sa pag-atiman niini nga mga linalang hangtod sa hangtod. Kanunay ka bang magpasalamat kang Jehova nianang nindot nga katuyoan?

7. Giunsa pagpakita sa Josue 24:15 nga ang tawo dunay kagawasan sa pagpili?

⁷ Si Jehova naghatag kanatog regalo—ang kagawasan sa pagpili. Makapili ta kon unsay buhaton nato sa atong kinabuhi. (Basaha ang Josue 24:15.) Ang atong mahigugmaong Diyos malipay kon mopili ta sa pag-alagad kaniya. (Sal. 84:11; Prov. 27:11) Magamit nato sa hustong paagi ang atong kagawasan sa pagpili diha sa daghang bahin sa atong kinabuhi. Tagda ang ehemplo ni Jesus.

8. Unsa ang usa ka paagi nga gigamit ni Jesus ang iyang kagawasan sa pagpili?

⁸ Masundog nato si Jesus kon unahon nato ang kaayohan sa uban imbes ang atoa. Dihay higayon nga si Jesus ug ang iyang mga apostoles gikapoy kaayo, ug miadto sila sa mingaw nga dapit aron mopahulay unta. Pero dili kanay nahitabo. Nangadto pod didto ang mga tawo, ug gusto kaayo nilang maminaw kang Jesus. Pero  wala masuko si Jesus; naluoy hinuon siya sa mga tawo. Busa, unsay iyang gihimo? “Gitudloan niya sila ug daghang butang.” (Mar. 6:30-34) Dihang sundogon nato si Jesus pinaagi sa paggamit sa atong panahon ug kusog sa pagtabang sa uban, atong gihimaya ang atong langitnong Amahan. (Mat. 5:14-16) Gipakita pod nato kang Jehova nga gusto natong mahimong bahin sa iyang pamilya.

9. Unsay angayng hinumdoman sa mga ginikanan?

⁹ Si Jehova naghatag sa mga tawo ug katakos nga makabatog mga anak, maingon man ang responsibilidad nga tudloan sila sa paghigugma ug pag-alagad kaniya. Kon ginikanan ka, gipabilhan ba nimo kining espesyal nga pribilehiyo? Ang mga anghel gihatagan ni Jehova ug daghang nindot nga mga katakos, pero wala niya sila hatagig katakos nga makabatog mga anak. Busa, angayng pabilhan sa mga ginikanan ang ilang pribilehiyo nga makapadakog mga anak. Ang mga ginikanan gihatagan ug importanteng responsibilidad sa pagmatuto sa ilang mga anak diha “sa disiplina ug tambag ni Jehova.” (Efe. 6:4; Deut. 6:5-7; Sal. 127:3) Aron tabangan ang mga ginikanan, ang organisasyon sa Diyos nagtaganag daghang binase sa Bibliya nga mga galamiton, sama sa mga publikasyon, video, musika, ug online nga mga artikulo. Klaro nga gimahal sa atong langitnong Amahan ug sa iyang Anak ang mga bata. (Luc. 18:15-17) Sa dihang ang mga ginikanan mosalig kang Jehova ug mohimo sa ilang kinamaayohan sa pag-atiman sa ilang bililhong mga anak, si Jehova malipay. Gihatagan sab nila ang ilang mga anak ug kahigayonan nga mahimong bahin sa pamilya ni Jehova hangtod sa hangtod!

10-11. Unsay gipaposible ni Jehova alang kanato pinaagi sa lukat?

¹⁰ Si Jehova naghatag sa iyang pinangga kaayong Anak aron mahimo na sab tang membro sa Iyang pamilya. Sa ato nang nahisgotan sa  parapo 4, dihang si Adan ug Eva nakasala, dili na sila bahin sa pamilya ni Jehova, ingon man ang ilang mga anak. (Roma 5:12) Angay lang to kang Adan ug Eva kay tinuyo silang misupak sa Diyos. Pero komosta ang ilang mga anak? Si Jehova mahigugmaong naghimog kahikayan sa pagsagop sa masinugtanong mga kaliwat ni Adan ug Eva aron mahimo silang bahin sa iyang pamilya. Gihimo niya kini pinaagi sa halad lukat sa iyang bugtong Anak, si Jesu-Kristo. (Juan 3:16; Roma 5:19) Tungod sa halad ni Jesus, 144,000 ka matinumanong mga tawo ang gisagop ingong mga anak sa Diyos.—Roma 8:15-17; Pin. 14:1.

¹¹ Gawas pa niana, milyonmilyon pa ka matinumanong mga tawo ang nagbuhat sa kabubut-on sa Diyos. Duna silay paglaom nga mahimong bahin sa pamilya sa Diyos human sa kataposang pagsulay sa kataposan sa Milenyo. (Sal. 25:14; Roma 8:20, 21) Tungod niana nga paglaom, ila nang gitawag si Jehova, ang ilang Maglalalang, ingong ilang “Amahan.” (Mat. 6:9) Ang mga binanhaw hatagan sab ug kahigayonan nga makakat-on kon unsay gidahom ni Jehova kanila. Sa ngadtongadto, kadtong motuman kaniya mahimo pong mga membro sa iyang pamilya.

12. Unsang pangutana ang atong tubagon?

¹² Sa ato nang nasayran, si Jehova daghan nag gihimo aron ipakita nga importante kaniya ang mga tawo. Iya nang gisagop ang mga dinihogan ingong iyang mga anak, ug iyang gihatagan ang “dakong panon” ug paglaom nga mahimong iyang mga anak sa bag-ong kalibotan. (Pin. 7:9) Unsay atong mahimo karon aron ipakita kang Jehova nga gusto natong mahimong bahin sa iyang pamilya hangtod sa hangtod?

13. Unsay atong buhaton aron mahimo tang bahin sa pamilya sa Diyos? (Marcos 12:30)

¹³ Ipakita ang imong gugma kang Jehova pinaagi sa pag-alagad kaniya sa tibuok nimong kasingkasing. (Basaha ang Marcos 12:30.) Sa tanang regalo nga mahigugmaong gihatag sa  Diyos kanato, ang usa sa kinamaayohan mao ang katakos sa pagsimba kaniya. Atong gipakita kang Jehova nga gihigugma nato siya pinaagi sa ‘pagtuman sa iyang mga sugo.’ (1 Juan 5:3) Ang usa sa mga sugo nga gusto ni Jehova nga atong sundon mao ang sugo nga gihatag ni Jesus—ang paghimog mga tinun-an ug pagbawtismo kanila. (Mat. 28:19) Gisugo sab ta niya nga maghigugmaay. (Juan 13:35) Kadtong motuman sa mga sugo ni Jehova dawaton niya ingong bahin sa iyang tibuok kalibotang pamilya sa mga magsisimba.—Sal. 15:1, 2.

14. Unsaon nato pagpakitag gugma sa uban? (Mateo 9:36-38; Roma 12:10)

¹⁴ Magpakitag gugma sa uban. Ang gugma mao ang kinalabwang hiyas ni Jehova. (1 Juan 4:8) Si Jehova nahigugma na kanato sa wala pa gani ta makaila kaniya. (1 Juan 4:9, 10) Masundog nato siya pinaagi sa pagpakitag gugma sa uban. (Efe. 5:1) Ang usa sa kinamaayohang mga paagi nga ikapakita nato ang gugma ngadto sa mga tawo mao ang pagtabang kanila nga makakat-on bahin kang Jehova samtang may panahon pa. (Basaha ang Mateo 9:36-38.) Sa paghimo niana, gihatagan nato silag kahigayonan nga mahimong membro sa pamilya sa Diyos. Human mabawtismohi ang usa ka tawo, kinahanglan nga padayon nato siyang higugmaon ug tahoron. (1 Juan 4:20, 21) Unsaon nato nâ paghimo? Ang usa ka paagi mao ang pagsalig kaniya. Pananglitan, dili ta maghunahuna nga duna siyay daotan o hakog nga mga motibo. Hinunoa, magpakita tag pagtahod sa atong igsoon, nga mag-isip kaniya nga labaw kay kanato.—Basaha ang Roma 12:10; Filip. 2:3.

15. Kang kinsa ta angayng magpakitag kaluoy ug kaayo?

¹⁵ Magpakitag kaluoy ug kaayo sa tanang tawo. Kon gusto natong maapil niadtong dunay katungod nga motawag kang Jehova ingong ilang Amahan hangtod sa hangtod, kinahanglan natong ipadapat ang Pulong sa Diyos. Pananglitan, si Jesus nagtudlo nga angay tang magpakitag kaluoy ug kaayo sa tanang tawo, bisan sa atong mga kaaway. (Luc. 6:32-36) Usahay, malisdan tingali ta sa paghimo niini. Kon mao, kinahanglang makakat-on ta sa pagsundog sa panghunahuna ug binuhatan ni Jesus. Dihang himoon nato ang atong kinamaayohan sa pagtuman kang Jehova ug pagsundog kang Jesus, atong gipakita sa atong langitnong Amahan nga gusto natong mahimong bahin sa iyang pamilya hangtod sa hangtod.

16. Sa unsang paagi mapanalipdan nato ang reputasyon sa pamilya ni Jehova?

¹⁶ Panalipdi ang reputasyon sa pamilya ni Jehova. Sa literal nga pamilya, sagad sundogon sa manghod ang iyang magulang. Kon ang magulang magpadapat sa mga prinsipyo sa Bibliya, mahimo siyang maayong ehemplo sa iyang manghod. Kon ang magulang mohimog daotan, ang manghod basig mosundog kaniya. Ingon ana pod sa pamilya ni Jehova. Kon ang usa ka matinumanong Kristohanon sa ulahi mahimong apostata o mohimog imoral o daotang mga butang, ang uban basig mosundog niya sa paghimog daotan. Kadtong naghimo niana nagdaot sa reputasyon sa pamilya ni Jehova. (1 Tes. 4:3-8) Dili nato sundogon ang daotang mga pananglitan ug dili nato tugotan ang bisan unsa nga makapahilayo nato sa atong mahigugmaon nga langitnong Amahan.

17. Unsang panghunahuna ang angay natong likayan, ug ngano?

¹⁷ Salig kang Jehova imbes sa materyal nga mga butang. Si Jehova nagsaad nga iyang itagana ang atong pagkaon, sinina, ug puy-anan kon atong unahon ang iyang Gingharian ug sundon ang iyang matarong nga mga sukdanan. (Sal. 55:22; Mat. 6:33) Kon mosalig ta niana nga saad, dili ta maghunahuna nga ang materyal nga mga butang niining kalibotana makahatag natog kasegurohan ug kalipay hangtod sa hangtod. Nahibalo ta nga makabaton lang tag tinuod nga kalinaw sa hunahuna kon buhaton nato ang kabubut-on ni  Jehova. (Filip. 4:6, 7) Bisag makapalit tag daghang butang, angay natong konsiderahon kon duna ba gyod tay panahon o kusog sa paggamit ug pag-atiman sa maong mga butang. Posible kaha nga ang materyal nga mga butang mahimo nang pinakaimportante sa atong kinabuhi? Angay natong hinumdoman nga gihatagan ta sa Diyos ug buluhaton ingong membro sa iyang pamilya. Nagpasabot nâ nga dili nato tugotan nga malinga ta. Dili nato gustong maparehas sa batan-ong lalaki kinsa nawad-ag kahigayonan nga makaalagad kang Jehova ug mahimong usa sa iyang sinagop nga mga anak—tungod lang kay mas importante kaniya ang pipila ka materyal nga kabtangan!—Mar. 10:17-22.

18. Unsang dakong pribilehiyo ug mga panalangin ang matagamtam sa masinugtanong mga tawo hangtod sa hangtod?

¹⁸ Ang masinugtanong mga tawo makatagamtam sa kinalabwang pribilehiyo—ang paghigugma ug pagsimba kang Jehova hangtod sa hangtod! Kadtong dunay yutan-ong paglaom magmalipayon sab sa pag-atiman niining nindot nga planeta nga gilalang ni Jehova aron mahimong ilang hingpit nga puy-anan. Sa dili madugay, ang yuta ug ang tanang kinabuhi nga naa niini mabag-o ubos sa pagmando sa Gingharian. Wad-on ni Jesus ang tanang problema nga resulta sa pagbiya ni Adan ug Eva sa pamilya sa Diyos. Banhawon ni Jehova ang milyonmilyong tawo ug hatagan silag kahigayonan nga mabuhi sa walay kataposan nga may hingpit nga panglawas diha sa yuta nga nahimo nang paraiso. (Luc. 23:42, 43) Sa dihang ang yutan-ong bahin sa pamilya ni Jehova mahimo nang hingpit, mabatonan nilang tanan ang “himaya ug kahalangdon” nga gihisgotan ni David.—Sal. 8:5.

19. Unsay angay natong hinumdoman?

¹⁹ Kon sakop ka sa “dakong panon,” duna kay nindot nga paglaom. Gimahal ka sa Diyos; gusto niya nga mahimo kang membro sa iyang pamilya. Busa himoa ang tanan aron malipay siya. Ibutang kanunay sa imong hunahuna ug kasingkasing ang mga saad sa Diyos. Pabilhi ang imong pribilehiyo nga makasimba ug makadayeg sa atong minahal nga langitnong Amahan hangtod sa hangtod!