1. Unsay nakita ni Jehova sa iyang katawhan?

 SI Jehova nga Diyos “nalipay sa iyang katawhan.” (Sal. 149:4) Makapalipay gyod nâ kanato! Nakita ni Jehova ang atong maayong mga hiyas; nakita niya ang atong potensiyal, ug gitabangan ta niya nga mahimong iyang mga higala. Kon magmatinumanon ta kaniya, siya magpabiling suod kanato hangtod sa hangtod!—Juan 6:44.

2. Nganong ang pipila nalisdan sa pagtuo nga gimahal sila ni Jehova?

² Ang pipila moingon tingali, ‘Nahibalo ko nga gimahal ni Jehova ang iyang katawhan ingong grupo, pero unsaon nako pagseguro nga gimahal ko ni Jehova ingong indibiduwal?’ Ngano kahang dunay makapangutanag ingon niana? Si Oksana, b kinsa nag-antos pag-ayo sa bata pa, miingon: “Nalipay kaayo ko dihang nabawtismohan ko ug nagsugod pagpayunir. Pero 15 ka tuig sa ulahi, nahinumdoman nako ang akong sakit kaayo nga kasinatian. Naghunahuna ko nga wala na ko uyoni ni Jehova ug dili ko takos sa iyang gugma.” Si Yua, usa ka payunir nga sister nga dili sab maayog kasinatian sa bata pa, miingon: “Gipahinungod nako ang akong kinabuhi kang Jehova kay gusto nakong malipay siya. Pero segurado ko nga dili ko angayan sa iyang pagmahal.”

3. Unsay atong hisgotan niining artikuloha?

³ Sama sa matinumanong mga Kristohanon nga bag-o lang gihisgotan, gimahal kaayo nimo si Jehova, pero tingali nagduhaduha ka kon gimahal ka ba niya. Nganong kinahanglan kang makombinsir nga gimahal gyod ka niya? Ug unsay makatabang nimo dihang maghunahuna ka nga wala ka higugmaa ni Jehova? Hisgotan nato ang mga tubag niana.

4. Nganong peligroso ang pagduhaduha nga gimahal ta ni Jehova?

⁴ Ang gugma puwersado kaayo. Kon kombinsido ta nga gimahal ta ni Jehova, mapalihok ta nga moalagad kaniya nga kinasingkasing  bisan pa sa mga kalisdanan. Pero kon magduhaduha ta nga gimahal ta sa Diyos, “modiyutay ang [atong] kusog.” (Prov. 24:10) Ug sa dihang maluya ta ug maghunahuna nga wala ta mahala sa Diyos, dili ta makasukol sa mga pag-atake ni Satanas.—Efe. 6:16.

5. Sa unsang paagi naapektohan ang pipila ka igsoon tungod sa ilang pagduhaduha nga gimahal sila sa Diyos?

⁵ Ang pipila ka matinumanong Kristohanon sa atong panahon naluya sa espirituwal tungod sa mga pagduhaduha. Ang ansiyano nga si James miingon: “Bisag nag-alagad ko sa Bethel ug malipayon sa akong ministeryo diha sa kongregasyon nga langyawg pinulongan, nagduhaduha ko kon nalipay ba gyod si Jehova sa akong mga sakripisyo. Diha gani higayon nga nagduhaduha ko kon namati ba si Jehova sa akong mga pag-ampo.” Si Eva, nga naa sab sa bug-os panahong pag-alagad, miingon: “Naamgohan nako nga peligroso ang pagduhaduha nga gimahal ta ni Jehova kay makaapektar ni sa tanan nga atong buhaton sa pag-alagad kaniya. Makawala ni sa atong gana sa espirituwal nga mga butang ug sa atong kalipay sa pag-alagad kang Jehova.” Si Michael, nga usa ka regular payunir ug ansiyano, miingon: “Kon dili ka motuo nga gimahal ka sa Diyos, maanod ka palayo kaniya.”

6. Unsay angay natong buhaton kon mosantop sa atong hunahuna ang pagduhaduha nga gimahal ta sa Diyos?

⁶ Gipakita niini nga mga eksperyensiya kon unsa ka grabe ang epekto sa negatibong panghunahuna diha sa atong espirituwalidad. Pero unsay angay natong buhaton dihang mosantop sa atong hunahuna ang pagduhaduha nga gimahal ta sa Diyos? Kinahanglang isalikway dayon nato kana! Pangayog tabang kang Jehova aron ang imong “makapatugaw nga [mga] hunahuna” mapulihan sa ‘kalinaw nga gikan sa Diyos nga magbantay sa imong kasingkasing ug hunahuna.’ (Sal. 139:23; footnote; Filip. 4:6, 7) Ug hinumdomi nga dili kay ikaw ray mibatig ingon niana. Ang ubang matinumanong mga igsoon naningkamot sab nga madaog ang negatibong mga pagbati. Bisan ang mga alagad ni Jehova kaniadto nakigbisog niana. Tagda kon unsay atong makat-onan sa ehemplo ni apostol Pablo.

7. Unsang mga problema ang giatubang ni Pablo?

⁷ Gibati ba nimo nga nabug-atan ka sa daghang responsibilidad ug dili nimo mahimo ang tanan nga kinahanglan nimong buhaton? Kon mao, masabtan nimo ang gibati ni Pablo.  Nabalaka siya dili lang sa usa ka kongregasyon, kondili “sa tanang kongregasyon.” (2 Cor. 11:23-28) Duna ka bay mga problema sa panglawas nga nakapawala sa imong kalipay? Si Pablo nag-antos sa “tunok sa unod,” nga tingali usa ka problema sa panglawas, ug gusto niya nga mawala kini. (2 Cor. 12:7-10) Maluya ka ba usahay tungod sa imong mga kahuyangan? Gibati sab nâ ni Pablo. Giisip niya ang iyang kaugalingon nga “makaluluoy” tungod kay pirme siyang makigbisog sa iyang mga kahuyangan.—Roma 7:21-24.

8. Unsay nakatabang kang Pablo sa paglahutay bisan pa sa iyang mga problema?

⁸ Bisan pag nakasinati si Pablo ug lainlaing mga pagsulay ug makapaluya nga mga kahimtang, nagpadayon siya sa pag-alagad kang Jehova. Nganong nahimo niya kana? Bisag nahibalo siya sa iyang mga kahuyangan, duna siyay lig-ong pagtuo sa lukat. Nahibalo sab siya sa saad ni Jesus nga “ang tanan nga magpakitag pagtuo [kang Jesus] . . . makabaton ug kinabuhing walay kataposan.” (Juan 3:16; Roma 6:23) Oo, si Pablo apil niadtong nagpakitag pagtuo sa lukat. Kombinsido siya nga si Jehova gusto gyong magpasaylo bisan niadtong nakahimog grabeng sala basta maghinulsol sila.—Sal. 86:5.

9. Unsay atong makat-onan sa giingon ni Pablo sa Galacia 2:20?

⁹ Si Pablo may pagtuo sab sa gahom sa gugma sa Diyos nga gipakita pinaagi sa Kristo. (Basaha ang Galacia 2:20.) Matikdi ang makapadasig nga mga pulong sa kataposan niana nga bersikulo. Si Pablo miingon: “[Ang] Anak sa Diyos . . . nahigugma nako ug nagtugyan sa iyang kaugalingon alang kanako.” Wala maghunahuna si Pablo nga naay limitasyon ang gugma sa Diyos, nga sama bag miingon siya, ‘Makita nako ang rason kon nganong gimahal ni Jehova ang mga igsoon, pero imposible nga higugmaon ko niya.’ Gipahinumdoman ni Pablo ang mga taga-Roma: “Samtang kita makasasala pa, ang Kristo namatay para nato.” (Roma 5:8) Wa gyoy kinutoban ang gugma sa Diyos!

10. Unsay atong makat-onan sa Roma 8:38, 39?

¹⁰ Basaha ang Roma 8:38, 39. Kombinsido gyod si Pablo sa gahom sa gugma sa Diyos. Siya misulat nga walay “makabulag nato gikan sa gugma sa Diyos.” Nahibalo si Pablo nga si Jehova nagmapailobon pag-ayo sa mga Israelinhon. Nahibalo sab siya kon sa unsang paagi si Jehova nagpakitag kaluoy kaniya. Sa laing pagkasulti, sama rag miingon si Pablo, ‘Kay gihatag ni Jehova ang iyang Anak aron mamatay  para nako, naa pa ba koy rason nga magduhaduha nga gimahal ko niya?’—Roma 8:32.

11. Bisag nahimo ni Pablo ang mga sala nga gihisgotan sa 1 Timoteo 1:12-15, nganong kombinsido siya nga gimahal siya sa Diyos?

¹¹ Basaha ang 1 Timoteo 1:12-15. Tingali dihay mga panahon nga gihasol si Pablo sa iyang konsensiya tungod sa iyang mga gihimo kaniadto. Dili ikatingala nga giisip niya ang iyang kaugalingon nga “kinalabwan” sa tanang makasasala. Sa wala pa makakat-on si Pablo sa kamatuoran, iyang gilutos pag-ayo ang mga Kristohanon sa lainlaing siyudad, nga nagpabilanggo sa pipila ka Kristohanon ug miuyon nga patyon ang uban. (Buh. 26:10, 11) Maimadyin ba nimo ang gibati ni Pablo kon ugaling duna siyay nakaila nga batan-ong Kristohanon kansang ginikanan gipatay ubos sa iyang pagtugot? Nagbasol pag-ayo si Pablo sa iyang nangaging kasaypanan, pero nahibalo siya nga wala na siyay mahimo sa nahitabo. Gidawat niya nga ang Kristo namatay para niya, ug uban ang bug-os nga pagsalig, siya misulat: “Pinaagi sa dili hitupngang pagkamaayo sa Diyos nahimo kong apostol.” (1 Cor. 15:3, 10) Unsay atong makat-onan? Dawata nga ang Kristo namatay para nimo ug gipaposible niya nga makabaton kag suod nga relasyon kang Jehova. (Buh. 3:19) Ang importante sa Diyos mao ang atong ginahimo karon ug ang atong himoon sa umaabot, dili ang mga sayop nga atong nahimo kaniadto, alagad man ta ni Jehova niadtong panahona o dili.—Isa. 1:18.

12. Sa unsang paagi ang giingon sa 1 Juan 3:19, 20 makatabang nato sa dihang mobati tang walay pulos o dili angayng higugmaon?

¹² Sa dihang maghunahuna ka nga si Jesus namatay para sa imong mga sala, tingali moingon ka, ‘Dili ko takos nga modawat nianang bililhon nga gasa.’ Ngano tingaling mobati kag ingon niana? Ang atong dili hingpit nga kasingkasing maglimbong tingali nato, nga mopabati  natong wala tay pulos o dili angayng higugmaon. (Basaha ang 1 Juan 3:19, 20.) Sa dihang mobati tag ingon niana, angay natong hinumdoman nga “ang Diyos mas labaw sa atong kasingkasing.” Ang gugma ug pagpasaylo sa atong langitnong Amahan mas kusganon kay sa bisan unsang negatibong pagbati nga naa tingali sa atong kasingkasing. Kinahanglan natong kombinsihon ang atong kaugalingon nga gimahal ta ni Jehova. Aron mahimo kana, kinahanglan nga kanunay tang magtuon sa iyang Pulong, mag-ampo kaniya, ug makig-uban sa iyang maunongong katawhan. Nganong importante ang paghimo niana?

13. Sa unsang paagi ang pagtuon sa Pulong sa Diyos makatabang kanato? (Tan-awa sab ang kahong “ Kon sa Unsang Paagi ang Pulong sa Diyos Nakatabang Nila.”)

¹³ Tun-i ang Pulong sa Diyos kada adlaw, ug mas makita nimo ang nindot kaayo nga mga hiyas ni Jehova. Imong mahibaloan kon unsa ka dako ang iyang gugma kanimo. Ang pagpamalandong sa usa ka bahin sa Pulong sa Diyos kada adlaw makatabang nimo sa “pagtul-id” sa imong hunahuna ug kasingkasing. (2 Tim. 3:16) Ang ansiyanong si Kevin, kinsa nakigbisog sa pagbati nga wala siyay bili, miingon: “Ang pagbasa ug pagpamalandong sa Salmo 103 nakatabang nako nga makaamgo ug makasabot kon unsa gyoy panglantaw ni Jehova kanako.” Si Eva, nga gihisgotan ganina, miingon: “Taposon nako ang adlaw pinaagi sa pagpamalandong sa mga hunahuna ni Jehova. Kini naghatag nakog malinawong hunahuna ug nagpalig-on sa akong pagtuo.”

14. Sa unsang paagi ang pag-ampo makatabang kanato?

¹⁴ Pag-ampo kanunay. (1 Tes. 5:17) Aron masuod ka sa usa ka tawo, kinahanglan nga pirme mong mag-estorya ug isulti nimo kaniya ang imong gibati. Ingon ana sab sa atong pagpakighigala kang Jehova. Sa dihang ipahayag nato diha sa pag-ampo ang atong pagbati, hunahuna, ug mga kabalaka, atong gipakita nga may pagsalig ta kaniya ug nahibalo ta nga gimahal ta niya. (Sal. 94:17-19; 1 Juan 5:14, 15) Si Yua, nga gihisgotan ganina, miingon: “Sa dihang mag-ampo ko, dili lang kay basta maghisgot ko sa nahitabo nianang adlawa. Akong isulti kang Jehova kon unsa gyoy akong gihunahuna ug gibati. Ngadtongadto, akong naamgohan nga si Jehova dili samag manedyer sa usa ka kompaniya, kondili samag Amahan nga tinuod nga nahigugma sa iyang mga anak.”—Tan-awa ang kahong “ Nabasa na ba Nimo Kini?”

15. Sa unsang paagi gipakita ni Jehova ang iyang personal nga interes kanato?

¹⁵ Pakig-uban sa maunongong mga higala; sila regalo gikan kang Jehova. (Sant. 1:17) Ang atong langitnong Amahan nagpakitag personal nga interes kanato pinaagi sa pagtaganag espirituwal nga pamilya kinsa nagpakitag  “gugma sa tanang panahon.” (Prov. 17:17) Sa iyang sulat sa mga taga-Colosas, gihisgotan ni Pablo ang pipila ka Kristohanon nga mitabang niya ug “nakahupay pag-ayo” kaniya. (Col. 4:10, 11) Bisan si Kristo Jesus nagkinahanglag tabang gikan sa iyang mga higala—mga anghel ug tawo—ug giapresyar niya kana.—Luc. 22:28, 43.

16. Sa unsang paagi ang maunongong mga higala makatabang nato nga mas masuod kang Jehova?

¹⁶ Bug-os ba nimong gipahimuslan ang regalo ni Jehova nga maunongong mga higala? Ang pagsulti sa atong mga kabalaka ngadto sa usa ka hamtong nga higala wala magpasabot nga huyang ta; kini makapanalipod hinuon kanato. Tagda ang giingon ni James nga gihisgotan ganina: “Ang suod nga panaghigalaay uban sa hamtong nga mga Kristohanon nakatabang gyod nako. Sa dihang malumsan ko sa negatibong mga hunahuna, kining bililhong mga higala mapailobong maminaw ug magpahinumdom nako sa ilang gugma kanako. Pinaagi kanila, makita nako ang gugma ug pagpangga ni Jehova kanako.” Importante gyod nga masuod ta sa atong mga igsoon!

17-18. Kang kinsa ta mamati, ug ngano?

¹⁷ Gusto ni Satanas nga mohunong ta sa pagpaningkamot sa pagbuhat kon unsay husto. Gusto ta niyang patuohon nga wala ta mahala ni Jehova, nga dili ta angayng luwason. Pero sa ato nang nakita, dili gyod nâ tinuod.

¹⁸ Gimahal ka ni Jehova. Bililhon kaayo ka kaniya. Kon sundon nimo siya, ‘magpabilin [ka] sa iyang gugma’ hangtod sa hangtod, sama kang Jesus. (Juan 15:10) Busa ayaw pamati kang Satanas o sa imong mahukmanong kasingkasing. Hinunoa, pamati kang Jehova, kinsa nagtan-aw sa maayo sa matag usa kanato. Magmakombinsido nga siya “nalipay sa iyang katawhan,” apil na kanimo!