1. Unsa ang paagi sa pagtuon ni Brader Russell ug sa iyang mga kauban, ug nganong epektibo ni?

KAPIG 100 ka tuig kanhi, si Brader C. T. Russell ug ang iyang mga kauban, usa ka gamayng grupo sa mga estudyante sa Pulong sa Diyos, nagsugod sa pagpahigayon ug mga tigom. Gusto nilang mahibaloan kon unsa gyoy gitudlo sa Bibliya bahin kang Jehova nga Diyos, kang Jesu-Kristo, sa kahimtang sa patay, ug sa lukat. Simple ra ang ilang paagi sa pagtuon. Dunay mangutana, dayon ilang susihon ang matag teksto nga konektado sa topiko. Unya, ilang isulat ang ilang nakat-onan. Sa tabang ni Jehova, ang maong sinserong mga Kristohanon daghag nadiskobrehan nga importanteng kamatuoran sa Bibliya nga atong gipabilhan hangtod karon.

2. Unsa usahay ang hinungdan nga masayop tag sabot sa usa ka tagna sa Bibliya?

² Pero nakita sa maong mga estudyante sa Bibliya nga mas lisod sabton ang mga tagna kay sa mga doktrina. Ngano? Ang usa ka rason mao nga sagad ang mga tagna bug-os lang masabtan kon kini nagakatuman o natuman na. Pero naa pay laing rason. Aron sakto ang pagsabot sa tagna, kinahanglan natong konsiderahon ang konteksto niini. Kon usa lang ka bahin sa tagna ang atong tagdon ug balewalaon ang ubang detalye, lagmit moresulta nig sayop nga pagsabot. Morag mao ni nahitabo sa usa ka tagna ni Joel. Atong susihon pag-usab ang maong tagna ug hisgotan kon nganong kinahanglang usbon ang atong pagsabot niana.

3-4. Hangtod karon, unsay atong pagsabot sa tagna sa Joel 2:7-9?

³ Basaha ang Joel 2:7-9. Si Joel nagtagna nga ang yuta sa Israel daoton sa panon sa mga dulon. Gamit ang mga ngipon  ug apapangig nga sama nianang sa leyon, kaonon niining hangol nga mga insekto ang tanan nilang makita! (Joel 1:4, 6) Sa daghang katuigan, nagtuo ta nga kanang tagnaa simbolikong nagtumong sa padayong pagsangyaw sa katawhan ni Jehova, samag mga dulon nga dili mapugngan. Nagtuo ta nga kining buluhatona nagpahinabog kadaot sa “yuta,” o sa mga tawo nga kontrolado sa mga lider sa relihiyon. *

⁴ Morag sakto nâ nga pagsabot kon magpokus ra ta sa Joel 2:7-9. Pero kon atong susihon ang konteksto, atong makita nga kinahanglan natong usbon ang atong pagsabot. Hisgotan nato ang upat ka rason kon ngano.

5-6. Unsang pangutana ang motungha kon atong konsiderahon ang (a) Joel 2:20? (b) Joel 2:25?

⁵ Una, matikdi ang saad ni Jehova bahin sa pag-atake sa mga dulon: “Ipahilayo nako kaninyo ang taga-amihanan [mga dulon].” (Joel 2:20) Kon ang mga dulon nagrepresentar sa mga Saksi ni Jehova nga nagsunod sa sugo ni Jesus nga magsangyaw ug maghimog mga tinun-an, nganong nagsaad man si Jehova nga iyang ipahilayo, o abogon, sila? (Ezeq. 33:7-9; Mat. 28:19, 20) Klaro nga ang abogon ni Jehova, dili ang iyang matinumanong mga alagad, kondili kadtong mokontra sa iyang katawhan.

⁶ Ikaduha, konsideraha ang giingon sa Joel 2:25. Dinhi, si Jehova nag-ingon: “Akong ibalik ang nawala kaninyo sa mga tuig nga gipangaon sa nagpanon nga mga dulon, sa walay pako nga mga dulon, sa kusog mokaon nga mga dulon, ug sa nagapangutkot nga mga dulon, ang akong dakong panon sa kasundalohan nga akong gipadala kaninyo.” Matikdi nga nagsaad si Jehova nga iyang “ibalik ang nawala” tungod sa pag-atake sa mga dulon. Kon ang mga dulon nagtumong sa mga magsasangyaw sa Gingharian, magpasabot ni nga ang mensahe nga ilang gisangyaw miresultag kadaot. Pero sa pagkatinuod, kining makaluwas ug kinabuhi nga mensahe makapalihok sa ubang daotan sa paghinulsol. (Ezeq. 33:8, 19) Busa ang pagsangyaw makaayo kanila, dili makadaot!

7. Sa Joel 2:28, 29, unsay gipasabot sa mga pulong nga “human niana”?

⁷ Basaha ang Joel 2:28, 29. Konsideraha ang ikatulong rason​—ang pagkasunodsunod sa mga hitabo nga gihisgotan sa tagna. Namatikdan ba nimo nga si Jehova miingon: “Human niana ibubo nako ang akong espiritu”; buot ipasabot, dihang matapos na sa mga dulon ang ilang buluhaton? Kon ang mga dulon mao ang mga magsasangyaw sa Gingharian sa Diyos, nganong ibubo man ni Jehova ang iyang espiritu human sa ilang pagsangyaw? Sa pagkatinuod, kon walay tabang sa gamhanang balaang espiritu sa Diyos, dili gyod unta sila makapadayon sa pagsangyaw sa daghang katuigan tungod sa mga paglutos ug pagdili sa ilang buluhaton.

8. Kang kinsa nagtumong ang mga dulon nga gihisgotan sa Pinadayag 9:1-11? (Tan-awa ang hulagway sa atubangan sa magasin.)

⁸ Basaha ang Pinadayag 9:1-11. Karon atong hisgotan ang ikaupat nga rason. Kaniadto, nagtuo ta nga ang pag-atake sa mga dulon nga gihisgotan ni Joel konektado sa atong buluhatong pagsangyaw kay dunay tagna sa Pinadayag nga medyo parehas niana. Kini nga tagna naghisgot bahin sa mga dulon nga may nawong sa tawo ug may gisul-ob nga “morag korona nga bulawan.” (Pin. 9:7) Ilang gisakit ang “mga tawo [mga kaaway sa Diyos] nga  walay selyo sa Diyos diha sa ilang mga agtang.” Gihimo nila ni sulod sa lima ka bulan, ang kasagarang gitas-on sa kinabuhi sa dulon. (Pin. 9:4, 5) Dayag nga kini nagtumong sa dinihogang mga alagad ni Jehova. Maisogon nilang gipahayag ang mga paghukom sa Diyos batok niining daotang sistema sa mga butang, ug ingong resulta, kadtong nagsuportar niini nga sistema mibatig grabeng kasakit.

9. Unsa ang dagkong kalainan sa mga dulon nga nakita ni Joel ug nianang nakita ni Juan?

⁹ Tinuod, dunay mga detalye sa tagna sa Pinadayag ug sa Joel nga parehas. Pero naa poy dagkong kalainan. Pananglitan, sa tagna ni Joel, gidaot sa mga dulon ang mga tanom. (Joel 1:4, 6, 7) Sa panan-awon ni Juan, ang mga dulon ‘gidid-an sa pagdaot sa mga tanom sa yuta.’ (Pin. 9:4) Ang mga dulon nga nakita ni Joel naggikan sa amihanan. (Joel 2:20) Ang nakita ni Juan naggikan sa kahiladman. (Pin. 9:2, 3) Ang mga dulon sa Joel gipang-abog. Sa Pinadayag, ang mga dulon wala aboga kondili gitugotan sa pagtapos sa ilang buluhaton. Ang Bibliya walay giingon nga si Jehova wala malipay kanila.​—Tan-awa ang kahong “ Mga Tagna Bahin sa mga Dulon​—Susama Pero May Kalainan.”

10. Paghatag ug pananglitan sa Bibliya nga nagpakita nga ang mga dulon nga gihisgotan ni Joel ug ni Juan mahimong lainlaig kahulogan.

¹⁰ Tungod niining dagkong kalainan sa duha ka tagna, makaingon ta nga kining mga tagnaa  dili konektado. Buot bang ipasabot nga ang mga dulon sa Joel lahi sa mga dulon sa Pinadayag? Oo. Sa Bibliya, usahay ang usa ka simbolo lainlaig kahulogan depende sa pagkagamit niini. Pananglitan, sa Pinadayag 5:5, si Jesus gitawag nga “Leyon sa tribo ni Juda,” pero sa 1 Pedro 5:8, ang Yawa gitawag nga “leyon nga nagngulob.” Busa tungod sa mga isyu nga mitungha maylabot sa atong pagsabot sa tagna ni Joel, nagkinahanglan tag laing eksplinasyon. Unsa kini?

11. Sa unsang paagi ang Joel 1:6 ug 2:1, 8, 11 makatabang nato sa pagsabot kon kinsa ang mga dulon?

¹¹ Kon susihog maayo ang ubang bersikulo sa tagna ni Joel, atong masabtan nga ang propeta nagtagna bahin sa pagsulong sa mga sundalo. (Joel 1:6; 2:1, 8, 11) Si Jehova miingon nga gamiton niya ang iyang “dakong panon sa kasundalohan” (kasundalohan sa Babilonya) sa pagsilot sa masinupakong mga Israelinhon. (Joel 2:25) Ang misulong nga kasundalohan haom nga gitawag ug “taga-amihanan” kay ang mga Babilonyanhon mosulong sa Israel gikan sa amihanan. (Joel 2:20) Kana nga kasundalohan gipakasama sa organisado kaayong panon sa mga dulon. Bahin kanila, si Joel miingon: “Ang matag [sundalo] mosubay sa iyang kaugalingong dalan. . . . Moatake sila sa siyudad, mokatkat sila sa mga paril. Mosulod sila sa mga balay, moagi sila sa mga bentana samag mga kawatan.” (Joel 2:8, 9) Maimadyin ba nimo kining hitaboa? Dunay mga sundalo bisan asa. Walay katagoan. Walay makaikyas sa espada sa mga Babilonyanhon!

12. Sa unsang paagi natuman ang tagna ni Joel bahin sa mga dulon?

¹² Sama sa mga dulon, ang mga Babilonyanhon (o, mga Caldeanhon) misulong sa Jerusalem niadtong 607 B.C.E. Ang Bibliya nag-ingon: “Ang hari sa mga Caldeanhon . . . mipatay sa ilang batan-ong mga lalaki . . . pinaagig espada; wala siya maluoy sa batan-ong lalaki o babaye, tigulang o luyahon. Gitugyan sa Diyos ang tanan ngadto sa iyang kamot. Iyang gisunog ang balay sa matuod nga Diyos, gitumpag ang paril sa Jerusalem, gisunog ang tanang lig-ong torre niini, ug gipangguba ang tanang bililhong butang.” (2 Cron. 36:17, 19) Human laglaga sa mga Babilonyanhon ang Jerusalem, ang mga tawo nakaingon: “Kini nga yuta umaw ug walay tawo ug mananap, ug gitugyan na kini sa kamot sa mga Caldeanhon.”​—Jer. 32:43.

13. Ipatin-aw ang kahulogan sa Jeremias 16:16, 18.

¹³ Mga 200 ka tuig human isulat ang tagna ni Joel, may gipasulat pa si Jehova kang Jeremias bahin niini nga pag-atake. Siya miingon nga ang tanang Israelinhon nga naghimog daotan pangitaon gyod ug dakpon. “‘Ania, magpatawag kog daghang mangingisda,’ miingon si Jehova, ‘ug sila mangisda alang kanila. Human niana magpatawag kog daghang mangangayam, ug sila mangayam kanila sa matag bukid ug sa matag bungtod ug sa mga giwang sa dagkong bato. Bug-os nakong panimaslan ang tanan nilang kasaypanan ug sala.’” Ang kadagatan ug kalasangan dili gyod makatago sa dili mahinulsolong mga Israelinhon batok sa mosulong nga mga Babilonyanhon.​—Jer. 16:16, 18.

14. Kanus-a natuman ang Joel 2:28, 29?

¹⁴ Pero si Joel may nindot nga balita—ang pagpasig-uli. Ang yuta magmabungahon pag-usab. (Joel 2:23-26) Unya, mabatonan nila ang abundang suplay sa espirituwal nga pagkaon. Si Jehova miingon: “Ibubo nako ang akong espiritu sa tanang matang sa tawo, ug  ang inyong mga anak nga lalaki ug babaye managna . . . Ug bisan sa akong mga ulipong lalaki ug babaye akong ibubo ang akong espiritu.” (Joel 2:28, 29) Ang pagbubo sa espiritu sa Diyos wala dayon mahitabo human mamalik ang mga Israelinhon sa ilang yutang natawhan gikan sa Babilonya. Hinuon, nahitabo kini gatosan ka tuig sa ulahi, sa Pentekostes 33 C.E. Giunsa nato pagkahibalo?

15. Sumala sa Buhat 2:16, 17, unsay giusab ni Pedro sa giingon sa Joel 2:28, ug unsay gipakita niana?

¹⁵ Ubos sa paggiya sa Diyos, gipadapat ni apostol Pedro ang Joel 2:28, 29 sa katingalahang hitabo sa adlaw sa Pentekostes. Sa mga alas nuybe nianang buntaga, ang balaang espiritu milagrosong gibubo, ug kadtong nakadawat niini nagsugod pagsulti “bahin sa halangdong mga butang sa Diyos.” (Buh. 2:11) Ubos sa paggiya sa Diyos, si Pedro migamit ug medyo lahi nga mga pulong dihang iyang gikutlo ang tagna ni Joel. Namatikdan ba nimo kon unsay iyang giusab? (Basaha ang Buhat 2:16, 17.) Imbes sugdan kini sa mga pulong nga “human niana,” si Pedro miingon: “Ug sa kataposang mga adlaw”​—niini nga konteksto nagpasabot sa kataposang mga adlaw sa Hudiyong sistema sa mga butang—​ang espiritu sa Diyos ibubo ngadto “sa tanang matang sa tawo.” Gipakita niini nga milabay pa ang taastaas nga panahon una natuman ang tagna ni Joel.

16. Unsay epekto sa espiritu sa Diyos sa buluhatong pagsangyaw sa unang siglo, ug unsay epekto niini karon?

¹⁶ Human ibubo sa Diyos ang iyang espiritu sa mga Kristohanon sa unang siglo, mas miuswag pa ang buluhatong pagsangyaw.  Sa sulat ni apostol Pablo sa mga taga-Colosas niadtong mga 61 C.E., nakaingon siya nga ang maayong balita nasangyaw na “sa tibuok kalibotan.” (Col. 1:23) Sa panahon ni Pablo, ang “tibuok kalibotan” nagtumong sa mga lugar nga maadtoan sa mga tawo. Sa tabang sa gamhanang balaang espiritu ni Jehova, ang pagsangyaw mas mikaylap pa sa atong panahon​—“hangtod sa mga kinatumyan sa yuta”!​—Buh. 13:47; tan-awa ang kahong “ Ibubo Nako ang Akong Espiritu.”

17. Unsay kausaban sa atong pagsabot sa tagna ni Joel bahin sa mga dulon?

¹⁷ Unsay nausab? Karon, mas sakto na ang atong pagsabot sa tagna sa Joel 2:7-9. Klaro nga ang teksto nagtumong, dili sa atong madasigong pagsangyaw, kondili sa pagsulong sa Babilonyanhong kasundalohan ngadto sa Jerusalem niadtong 607 B.C.E.

18. Unsay wala mausab bahin sa katawhan ni Jehova?

¹⁸ Unsay wala mausab? Ang katawhan ni Jehova padayong nagsangyaw sa maayong balita bisan asa, nga naggamit sa tanang pamaagi nga posible. (Mat. 24:14) Bisag idili sa gobyerno ang atong buluhaton, dili ni makapugong nato sa pagsunod sa sugo nga mosangyaw. Ug sa tabang ni Jehova, mas aktibo ta karon, nga maisogong nagsangyaw sa maayong balita sa Gingharian! Padayon tang nagsalig kang Jehova nga tabangan ta sa pagsabot sa mga tagna sa Bibliya, kay nahibalo ta nga sa saktong panahon, ‘bug-os niyang ipasabot kanato ang kamatuoran’!​—Juan 16:13.