SI Esteban nag-atubang sa suko nga mga tawo. Ingong mga membro sa korte suprema sa Israel, ang Sanhedrin, ang maong 71 ka huwes apil sa gamhanan kaayong mga tawo sa nasod. Gitigom sila sa Hataas nga Saserdoteng si Caifas, kinsa nagdumala sa korte pipila ka bulan ang milabay aron hukman si Jesus ug kamatayon. (Mat. 26:57, 59; Buh. 6:8-12) Samtang sunodsunod nilang gipresentar ang bakakong mga magsusumbong, natingala sila sa ilang nakita kang Esteban​—“ang iyang nawong sama sa nawong sa manulonda.”​—Buh. 6:13-15.

Sa unsang paagi si Esteban nakapabiling kalmado ug malinawon nianang makahahadlok nga situwasyon? Sa wala pa siya ipaatubang sa Sanhedrin, si Esteban puliki na sa pagsangyaw ilalom sa gamhanang impluwensiya sa espiritu sa Diyos. (Buh. 6:3-7) Dihang gihusay, ang maong espiritu naglihok diha kaniya, ingong tighupay ug tigpahinumdom. (Juan 14:16) Samtang mihimo si Esteban ug maisogong pagdepensa, nga narekord sa Buhat kapitulo 7, ang balaang espiritu nagpahinumdom niya sa mga 20 ka teksto o kapin pa gikan sa Hebreohanong Kasulatan. (Juan 14:26) Pero ang pagtuo ni Esteban mas milig-on dihang nakita niya sa panan-awon si Jesus nga nagtindog sa tuong kamot sa Diyos.​—Buh. 7:54-56, 59, 60.

Tingali moabot ang panahon nga hulgaon ug lutoson sab ta. (Juan 15:20) Pinaagi sa regular nga pagtuon sa Pulong sa Diyos ug pagkaaktibo sa ministeryo, atong gitugotan ang espiritu ni Jehova nga molihok diha kanato. Makabarog sab tang malig-on sa pagsupak ug magpabiling malinawon.​—1 Ped. 4:12-14.