1-3. (a) Bisag unsay atong kahimtang, unsay himoon natong prayoridad? (b) Unsang espesipikong mga hagit ang giatubang niadtong nagtuon ug bag-ong pinulongan, ug unsang mga pangutana ang motungha? (Tan-awa ang hulagway sa sinugdan sa artikulo.)

 LIBOLIBO ka Saksi ni Jehova karon ang aktibong nakigbahin sa katumanan sa panan-awon nga imantala ang maayong balita “ngadto sa matag nasod ug tribo ug pinulongan ug katawhan.” (Pin. 14:6) Apil ka ba niadtong nagtuon ug laing pinulongan? Ikaw ba nag-alagad ingong misyonaryo o need-greater sa laing nasod, o nagtambongan sa langyawg pinulongan nga kongregasyon sa inyong nasod?

² Ingong mga alagad sa Diyos, kinahanglang himoon natong prayoridad ang pag-atiman sa atong espirituwal nga kahimsog ug nianang sa atong pamilya. (Mat. 5:3) Galing lang, malisdan ta usahay sa paggahig panahon para sa personal nga pagtuon tungod sa kadaghan sa atong buluhaton. Pero ang mga nag-alagad sa langyawng teritoryo may lain pang mga hagit nga giatubang.

³ Gawas sa pagkat-og bag-ong pinulongan, kinahanglang seguroon niadtong nag-alagad sa langyawng teritoryo nga regular nilang matagan-an ang ilang kasingkasing ug gahing espirituwal nga pagkaon. (1 Cor. 2:10) Unsaon nila kana paghimo kon dili nila bug-os masabtan ang pinulongan sa kongregasyon? Ug nganong angayng  seguroon sa mga ginikanan nga matisok ang Pulong sa Diyos sa kasingkasing sa ilang mga anak?

4. Unsay lagmit magpameligro sa atong espirituwalidad? Paghatag ug pananglitan.

⁴ Kon dili nato masabtan ang Pulong sa Diyos sa langyawng pinulongan, kini lagmit magpameligro sa atong espirituwal nga kahimsog. Niadtong ikalimang siglo B.C.E., nabalaka si Nehemias dihang nahibaloan niya nga ang pipila ka anak sa mga Hudiyo nga namalik gikan sa Babilonya dili makasultig Hebreohanon. (Basaha ang Nehemias 13:23, 24.) Kining mga bataa anam-anam nga nawad-an sa ilang ilhanan ingong mga alagad sa Diyos kay wala nila masabti sa bug-os ang kahulogan sa Pulong sa Diyos.—Neh. 8:2, 8.

5, 6. Unsay namatikdan sa pipila ka ginikanan nga nag-alagad sa langyawng teritoryo, ug ngano?

⁵ Namatikdan sa pipila ka ginikanan nga nag-alagad sa langyawng teritoryo nga anam-anam nga nawala ang interes sa ilang anak sa kamatuoran. Tungod kay wala nila masabti sa bug-os ang ginahisgotan sa tigom, wala gyod matandog ang kasingkasing sa mga anak. “Dihang maghisgot ug espirituwal nga mga butang,” matod ni Pedro, ^[1] nga taga-South America kinsa mibalhin sa Australia uban sa iyang pamilya, “kinahanglang malangkit ang kasingkasing ug emosyon.”—Luc. 24:32.

⁶ Kon magbasa ta diha sa langyawng pinulongan, ang atong kasingkasing lagmit dili kaayo matandog sama nianang magbasa ta diha sa atong pinulongan. Dugang pa, kon maglisod ta sa pagpakigkomunikar diha sa laing pinulongan, maluya ang atong hunahuna ug espirituwalidad. Busa, samtang maningkamot ta nga mahuptan ang atong tinguha sa pag-alagad kang Jehova diha sa langyawng teritoryo, angay sab natong ampingan ang atong espirituwal nga kahimsog.—Mat. 4:4.

7. Unsay gibuhat sa mga Babilonyanhon aron sagopon ni Daniel ang ilang kultura ug relihiyon?

⁷ Dihang si Daniel ug ang iyang mga kauban nabihag, gusto sa mga Babilonyanhon nga sagopon nila ang kultura sa Babilonya pinaagi sa pagtudlo nila sa “pinulongan sa mga Caldeanhon.” Dugang pa, ang opisyal sa palasyo nga gitugyanan sa pagbansay kanila naghatag nilag Babilonyanhong ngalan. (Dan. 1:3-7) Ang ngalan nga gihatag kang Daniel konektado kang Bel, ang pangunang diyos sa Babilonya. Gusto ni Haring Nabucodonosor nga patuohon si Daniel nga mas gamhanan ang diyos sa Babilonya kay sa Diyos ni Daniel nga si Jehova.—Dan. 4:8.

8. Unsay nakatabang kang Daniel sa pagpabiling himsog sa espirituwal samtang nagpuyo sa langyawng nasod?

⁸ Bisag gidalitan si Daniel sa lamiang pagkaon sa hari, “gihukom [niya] sa iyang kasingkasing” nga dili niya “hugawan ang iyang kaugalingon.” (Dan. 1:8) Tungod kay kanunay siyang nagtuon sa “[sagradong] mga basahon” diha sa iyang kaugalingong pinulongan, nagpabilin siyang himsog sa espirituwal samtang nagpuyo sa langyawng nasod. (Dan. 9:2) Busa, mga 70 ka tuig sukad nga miabot siya sa Babilonya, ilado gihapon siya sa iyang Hebreohanong ngalan.—Dan. 5:13.

9. Sama sa gipakita sa Salmo 119, unsay epekto sa Pulong sa Diyos diha sa magsusulat niini?

⁹ Ang Pulong sa Diyos nakatabang sa magsusulat sa Salmo 119 sa pagpabiling lahi sa uban. Kinahanglan niyang antoson ang pagbiaybiay kaniya sa pipila ka membro sa palasyo. (Sal. 119:23, 61) Bisan pa niana, gitugotan niya nga matandog ang iyang kasingkasing sa pulong sa Diyos.—Basaha ang Salmo 119:11, 46.

10, 11. (a) Samtang magtuon ta sa Pulong sa Diyos, unsay angay natong tumong? (b) Sa unsang paagi makab-ot nato ang maong tumong? Iilustrar.

¹⁰ Bisag puliki tingali kaayo ta sa atong responsabilidad  sa kongregasyon ug trabahoan, kinahanglan gihapon tang mogahin ug panahon para sa personal nga pagtuon ug pamilyahanong pagsimba. (Efe. 5:15, 16) Apan ang atong tumong dili lang ang pagkobreg pipila ka panid o pag-andam ug mga komento para sa tigom. Kinahanglang seguroon nato nga matandog ang atong kasingkasing sa Pulong sa Diyos ug mapalig-on ang atong pagtuo.

¹¹ Aron makab-ot ang maong tumong, kinahanglang balanse ta. Dihang magtuon, angay natong hunahunaon dili lang ang espirituwal nga panginahanglan sa uban kondili ang atoa usab. (Filip. 1:9, 10) Angay natong hinumdoman nga dihang kita mangandam sa pagsangyaw, tigom, o pakigpulong, dili sa tanang higayon nga mapadapat sa atong kaugalingon ang atong gitun-an. Sa pag-ilustrar: Bisag tilawan sa kosinero ang mga potahe sa dili pa kini idalit, dili to igo aron magpabilin siyang himsog. Kinahanglang magluto siyag sustansiyadong pagkaon para sa iyang kaugalingon. Sa susama, angay sab natong tagan-an ang atong kasingkasing ug espirituwal nga pagkaon nga makatagbaw sa atong panginahanglan.

12, 13. Nganong daghan niadtong nag-alagad sa langyawng teritoryo ang nakabenepisyo sa regular nga pagtuon diha sa ilang kaugalingong pinulongan?

¹² Daghang nag-alagad sa langyawng teritoryo ang nakabenepisyo sa regular nga pagtuon sa Bibliya diha sa ilang “pinulongan nga natawhan.” (Buh. 2:8) Bisan ang mga misyonaryo nahibalo nga aron magpabiling lig-on diha sa ilang asaynment, dili sila puwedeng magsalig lang sa paninugdang espirituwal nga mga butang nga ilang madungog sa tigom.

¹³ Si Alain, nga nagtuon ug Persian nga pinulongan sulod sa mga walo ka tuig, miangkon: “Dihang mangandam ko sa tigom sa Persian, sagad magpokus lang ko sa pinulongan. Kay halos hunahuna ray naglihok, ang akong kasingkasing wala kaayo matandog sa espirituwal nga mga butang nga akong gitun-an.  Maong kanunay kong maggahin ug panahon sa pagtuon sa Bibliya ug sa ubang publikasyon diha sa akong kaugalingong pinulongan.”

14. Unsay angayng paneguroon sa mga ginikanan, ug ngano?

¹⁴ Angayng paneguroon sa mga ginikanan nga matisok ang Pulong sa Diyos diha sa hunahuna ug kasingkasing sa ilang mga anak. Human mag-alagad sa langyawng teritoryo sa kapig tulo ka tuig, si Serge ug ang iyang asawang si Muriel nakamatikod nga dili na kaayo malipayon sa teokratikanhong mga kalihokan ang ilang 17 anyos nga anak nga lalaki. “Dili siya ganahang mosangyaw diha sa laing pinulongan, pero sa una ganahan siyang mosangyaw sa iyang pinulongan nga French,” miingon si Muriel. “Dihang naamgohan namo nga nakababag kana sa espirituwal nga pag-uswag sa among anak,” matod ni Serge, “nakadesisyon ming mobalik sa among kanhing kongregasyon.”

15. (a) Unsa tingaliy mga rason kon nganong ang mga ginikanan makadesisyon nga mobalik sa kongregasyon nga naggamit sa pinulongang masabtan pag-ayo sa ilang mga anak? (b) Unsay gitambag sa Deuteronomio 6:5-7 ngadto sa mga ginikanan?

¹⁵ Unsa tingaliy mga rason kon nganong ang mga ginikanan makadesisyon nga mobalik sa kongregasyon nga naggamit sa pinulongang masabtan pag-ayo sa ilang mga anak? Una, angay nilang susihon kon duna ba silay igong panahon ug kusog sa pagtisok sa gugma kang Jehova diha sa ilang mga anak ug sa samang higayon sa pagtudlo kanila ug langyawng pinulongan. Ikaduha, mamatikdan tingali nila nga ang ilang mga anak wala na kaayoy gana sa espirituwal nga mga kalihokan o sa langyawng teritoryo nga ilang gialagaran. Niana nga mga kahimtang, mahimong makadesisyon ang mga ginikanan nga mobalik sa kongregasyon nga naggamit sa pinulongan nga masabtan pag-ayo sa ilang mga anak hangtod nga molig-on na ang espirituwalidad niini.—Basaha ang Deuteronomio 6:5-7.

16, 17. Unsay gihimo sa pipila ka ginikanan aron mabansay ang ilang mga anak sa espirituwal nga paagi samtang naa sa langyawng teritoryo?

¹⁶ Sa laing bahin, ang pipila ka ginikanan nakakitag mga paagi sa pagtudlo sa ilang mga anak diha sa ilang pinulongan bisag nagtambongan sila sa langyawg pinulongan nga kongregasyon o grupo. Si Charles, nga may tulo ka anak nga babaye nga nag-edad ug 9, 12, ug 13, nagtambongan sa Lingala ug pinulongan nga grupo. Siya miingon: “Nakadesisyon mi nga dumalahon ang pagtuon ug ang pamilyahanong pagsimba uban sa among mga anak diha sa among kaugalingong pinulongan. Pero magpraktis sesyon ug magdula sab mi gamit ang Lingala aron makakat-on sila samtang naglingawlingaw.”

¹⁷ Si Kevin, nga may duha ka anak nga babaye nga singko ug otso anyos, naningkamot sa pagtudlo sa kamatuoran ngadto sa ilang mga anak kay dili pa kaayo masabtan sa mga bata ang mga tigom sa langyawng pinulongan. Siya miingon: “Among estadihan ang among mga anak diha sa French, ang ilang kaugalingong pinulongan. Gihimo sab namong tumong ang pagtambong ug French nga tigom kas-a sa usa ka bulan, ug magbakasyon mi aron makatambong ug mga kombensiyon diha sa among pinulongan.”

18. (a) Unsang prinsipyo sa Roma 15:1, 2 ang makatabang ninyo sa pagdesisyon kon unsay labing makaayo sa inyong mga anak? (b) Unsay gisugyot sa ubang ginikanan? (Tan-awa ang endnote.)

¹⁸ Siyempre, ang matag pamilya maoy modesisyon kon unsay labing makaayo sa espirituwalidad sa ilang mga anak. ^[2] (Gal. 6:5) Si Muriel, nga gihisgotan ganina, miangkon nga bisag gusto nilang magtiayon nga moalagad sa langyawng teritoryo, nakadesisyon silang mobalik sa ilang kanhing kongregasyon alang sa espirituwal nga kaayohan sa ilang anak nga lalaki. (Basaha ang Roma 15:1, 2.) Sa paghinumdom, nakaingon si Serge nga husto ang ilang desisyon. Siya miingon: “Pagbalik namo  sa French nga kongregasyon, ang among anak miuswag sa espirituwal ug nabawtismohan. Karon, regular payunir na siya. Gusto gani niyang mobalik sa langyawg pinulongan nga grupo!”

19, 20. Sa unsang paagi ikapakita nato nga atong gipabilhan ang Pulong sa Diyos?

¹⁹ Tungod sa iyang gugma, gipaposible ni Jehova nga mabatonan ang iyang Pulong, ang Bibliya, diha sa gatosan ka pinulongan aron “ang tanang matang sa mga tawo . . . makadangat sa tukmang kahibalo sa kamatuoran.” (1 Tim. 2:4) Nahibalo siya nga mas matagan-an ang espirituwal nga panginahanglan sa katawhan kon ilang mabasa ang iyang hunahuna diha sa pinulongan sa ilang kasingkasing.

²⁰ Apan bisag unsay atong kahimtang, magmadeterminado ta nga tagan-an ang atong kasingkasing ug gahing espirituwal nga pagkaon. Pinaagi sa regular nga pagtuon sa Kasulatan diha sa pinulongan sa atong kasingkasing, kita makapabiling himsog sa espirituwal ingon man ang atong pamilya, ug ikapakita nato nga gipabilhan gyod nato ang pulong sa Diyos.—Sal. 119:11.