1. Tungod sa sala, unsay sagad bation sa matinumanong mga alagad sa Diyos?

“ALAOT ako nga tawo!” (Roma 7:24) Daghang alagad sa Diyos ang mibatig sama sa giingon ni apostol Pablo. Kitang tanan nag-antos tungod sa napanunod nga sala. Ug kon duna tay mahimo nga dili makapalipay kang Jehova, kita mobating alaot, o maguol. Ang pipila ka Kristohanon nga nakahimog seryosong sala mibati pa gani nga dili na gyod sila mapasaylo sa Diyos.

2. (a) Giunsa pagpakita sa Salmo 34:22 nga may paglaom pa ang mga alagad sa Diyos nga nakasala? (b) Unsay hisgotan niining artikuloha? (Tan-awa ang kahong “ Leksiyon o Simbolikal nga Kahulogan?”)

² Bisan pa niana, ang Bibliya nagpasalig nga kadtong modangop kang Jehova dili angayng mobati nga wala na siyay paglaom nga mapasaylo. (Basaha ang Salmo 34:22.) Unsay ipasabot sa pagdangop kang Jehova? Unsay kinahanglang buhaton aron maangkon ang kaluoy ug pagpasaylo ni Jehova? Matubag kana pinaagi sa paghisgot sa kahikayan sa mga siyudad nga dalangpanan sa karaang Israel. Tinuod, ang maong kahikayan ilalom sa pakigsaad sa Balaod​—nga gipulihan niadtong Pentekostes 33 C.E. Pero, ang maong Balaod naggikan kang Jehova. Busa, base sa kahikayan sa mga siyudad nga dalangpanan, atong makat-onan ang panglantaw ni Jehova sa sala, makasasala, ug paghinulsol. Una, atong  hisgotan ang katuyoan sa maong mga siyudad.

3. Sa Israel, unsay silot niadtong tinuyong nakapatay?

³ Sa Israel, giisip ni Jehova nga seryoso ang tanang kaso sa pagpatayg tawo. Patyon kadtong tinuyong nakapatayg tawo. Ang mopatay niya mao ang kinadul-an nga paryenteng lalaki sa namatay, nga gitawag ug “tigpanimalos sa dugo.” (Num. 35:19) Kini maoy bayad sa pagpatay sa inosenteng tawo. Himoon dayon ang pagsilot aron dili mahugawan ang Yutang Saad, kay si Jehova nagsugo: “Dili kamo magahugaw sa yuta diin anaa kamo; tungod kay ang dugo [sa tawo nga giula] magahugaw sa yuta.”​—Num. 35:33, 34.

4. Giunsa paghusay sa Israel ang kaso niadtong aksidenteng nakapatay?

⁴ Pero, giunsa man paghusay sa Israel ang kaso niadtong aksidenteng nakapatay? Bisag aksidente lang, sad-an gihapon siya sa pag-ulag inosenteng dugo. (Gen. 9:5) Pero, mapakitaan siyag kaluoy ug makaikyas sa tigpanimalos pinaagi sa pagdangop sa usa sa unom ka dalangpanang siyudad. Didto, mahatagan siyag proteksiyon. Kinahanglan siyang magpabilin sa maong siyudad hangtod mamatay ang hataas nga saserdote.​—Num. 35:15, 28.

5. Sa unsang paagi ang kahikayan sa mga siyudad nga dalangpanan makatabang nato nga mas mailhan si Jehova?

⁵ Dili ideya sa tawo ang paghimog mga siyudad nga dalangpanan. Si Jehova mismo ang nagsugo kang Josue: “Sultihi ang mga anak sa Israel, . . . ‘Paggahin kamo ug mga siyudad nga dalangpanan.’” Ang maong mga siyudad “gihimong sagrado.” (Jos. 20:1, 2, 7, 8) Kay si Jehova man ang nagsugo sa paglain niining mga siyudara para sa espesyal nga katuyoan, makapangutana tingali ta: Sa unsang paagi ang maong kahikayan makatabang nato nga mas masabtan ang kaluoy ni Jehova? Ug unsay gitudlo niana bahin sa pagdangop kang Jehova karon?

6, 7. (a) Unsay papel sa mga ansiyano sa paghusay sa wala tuyoang nakapatay? (Tan-awa ang hulagway sa sinugdan sa artikulo.) (b) Nganong ang miikyas kinahanglang moduol sa mga ansiyano?

⁶ Dihang makahimog aksidenteng pagpatay, ang nakapatay kinahanglan unang ‘mopahayag sa iyang mga pulong [o, kaso] sa igdulungog sa mga ansiyano’ diha sa ganghaan sa siyudad nga napili niyang dangpan. Ug kinahanglan siyang atimanon. (Jos. 20:4) Pipila ka panahon sa ulahi, ipaatubang siya sa mga ansiyano sa siyudad diin nahitabo ang pagpatay, ug hukman nila ang kaso. (Basaha ang Numeros 35:24, 25.) Kon ilang madesisyonan nga aksidente ang nahitabo, pabalikon nila siya sa siyudad nga dalangpanan.

⁷ Nganong kinahanglang moduol sa mga ansiyano? Obligasyon nila nga magpabiling hinlo ang Israel ug matabangan ang wala tuyoang nakapatay nga makabenepisyo sa kaluoy ni Jehova. Usa ka eskolar sa Bibliya ang misulat nga kon ang miikyas dili moduol sa mga ansiyano, “gipameligro niya ang iyang kaugalingon.” Ang eskolar midugang: “Siyay makaingon sa iyang kamatayon, kay wala niya pahimusli ang proteksiyon nga gitagana sa Diyos kaniya.” Gitagan-ag tabang ang wala tuyoang nakapatay, pero kinahanglan siyang molihok ug dawaton ang maong tabang. Kon dili siya modangop sa usa sa mga siyudad nga gigahin ni Jehova, puwede siyang patyon sa kinadul-ang paryente sa namatay.

8, 9. Nganong kinahanglang moduol sa mga ansiyano ang usa ka Kristohanon nga nakahimog seryosong sala?

⁸ Karon, ang usa ka Kristohanon nga nakahimog seryosong sala kinahanglang magpatabang sa mga ansiyano aron maulian.  Nganong importante kini? Una, gikan kang Jehova ang kahikayan nga husayon sa mga ansiyano ang mga kaso sa seryosong sala. Gibase kini sa iyang Pulong. (Sant. 5:14-16) Ikaduha, kini nga kahikayan makatabang niadtong mahinulsolon nga maangkon pag-usab ang pag-uyon sa Diyos ug malikayan ang balikbalik nga pagbuhat ug sala. (Gal. 6:1; Heb. 12:11) Ikatulo, ang mga ansiyano gisugo ug gibansay nga pasaligan ang mga mahinulsolon ug hupayon ang gibating kasakit ug kahasol sa konsensiya sa nakasala. Si Jehova nagtawag sa mga ansiyano ingong “salipdanang dapit gikan sa bagyo.” (Isa. 32:1, 2) Kini nga kahikayan nagpakita gyod sa kaluoy ni Jehova.

⁹ Daghang alagad sa Diyos ang nahupayan kay sila miduol sa mga ansiyano ug midawat sa tabang niini. Pananglitan, ang brader nga si Daniel nakahimog seryosong sala, pero sulod sa pipila ka bulan wala siya moduol sa mga ansiyano. Siya miangkon, “Human molabay ang daghang panahon, naghunahuna kong wala na gyoy matabang ang mga ansiyano nako. Bisan pa niana, nahadlok ko nga basig mahibal-an ang akong sala. Ug dihang mag-ampo ko kang Jehova, gibati nako nga kinahanglan kong magsugod pirme sa pagpangayog pasaylo sa akong sala.” Sa kataposan, si Daniel miduol sa mga ansiyano. Sa paghinumdom, siya miingon: “Siyempre, nahadlok kong moduol nila. Pero pagkahuman, morag nakaginhawa kog lawom. Gibati nako nga makaduol na ko kang Jehova nga walay babag.” Karon, hinlo na ang konsensiya ni Daniel, ug dili pa dugay, natudlo siya ingong ministeryal nga alagad.

10. Aron kaluy-an, unsay kinahanglang buhaton niadtong wala tuyoang nakapatay?

¹⁰ Aron kaluy-an, kadtong wala tuyoang nakapatay kinahanglang molihok dayon. Kinahanglan siyang mokalagiw ngadto sa kinadul-ang siyudad nga dalangpanan. (Basaha ang Josue 20:4.) Kinahanglang dili niya kini pakamenoson; ang iyang kinabuhi nagdepende sa pag-adto dayon sa maong siyudad ug sa pagpabilin diha niana! Kinahanglan siyang  mosakripisyo. Biyaan niya ang iyang trabaho ug hayahay nga balay, ug dili siya puwedeng mobiyahe bisag asa​—hangtod mamatay ang hataas nga saserdote. * (Num. 35:25) Pero dili makawang ang maong sakripisyo. Kon mobiya siya sa siyudad, iyang gipakita nga gibalewala niya nga nakapatay siya, ug gipameligro niya ang iyang kinabuhi.

11. Unsaon pagpakita sa mahinulsolong Kristohanon nga wala niya abusohi ang kaluoy sa Diyos?

¹¹ Aron makabenepisyo sa kaluoy sa Diyos, ang mahinulsolong makasasala karon kinahanglan pong molihok dayon. Kinahanglang bug-os natong biyaan ang makasasalang buhat​—seryoso man o ginagmayng sala nga sagad moresulta sa grabeng sala. Ilalom sa paggiya sa Diyos, gihisgotan ni apostol Pablo ang gihimo sa mahinulsolong mga Kristohanon sa Corinto: “Ang inyong pagkasubo sa diyosnong paagi, pagkadakong pagkamatinuoron ang napatungha niini diha kaninyo, oo, pagpahigawas sa inyong kaugalingon, oo, sa kasuko, oo, sa kahadlok, oo, sa pagpangiliw, oo, sa kasibot, oo, sa pagtul-id sa sayop!” (2 Cor. 7:10, 11) Kon maningkamot tang biyaan ang makasasalang buhat, atong gipakita nga dili nato gustong abusohan ang kaluoy ni Jehova.

12. Unsa tingaliy kinahanglang isakripisyo sa usa ka Kristohanon aron padayon siyang kaluy-an sa Diyos?

¹² Unsa tingaliy kinahanglang isakripisyo sa usa ka Kristohanon aron padayon siyang kaluy-an sa Diyos? Kinahanglang andam niyang isakripisyo bisan kadtong importante niya kon kini magtental niya sa pagpakasala. (Mat. 18:8, 9) Kon may mga higala ka nga nag-impluwensiya nimo sa pagbuhat sa mga butang nga makapasuko kang Jehova, undangon ba nimo ang pagpakig-uban nila? Kon maglisod ka sa pagkontrolar sa kaugalingon maylabot sa pag-inom, likayan ba nimo ang mga situwasyon nga mahimong moresulta sa sobrang pag-inom? Kon maglisod ka sa pagpugong sa imoral nga mga tinguha, gilikayan ba nimo ang mga salida, website, o kalihokan nga makapukaw sa hugaw nga hunahuna? Hinumdomi, dili makawang ang bisan unsang sakripisyo nga atong himoon aron magmaunongon kang Jehova. Walay mas sakit pa kay sa talikdan niya. Ug wala nay mas makapalipay kay sa matagamtam ang iyang walay kataposang maunongong gugma.​—Isa. 54:7, 8.

13. Ipatin-aw kon nganong puwedeng mobating luwas ug malipayon ang tawong midangop sa siyudad nga dalangpanan.

¹³ Kon ang midangop naa na sa siyudad nga dalangpanan, siya luwas na. Bahin niining mga siyudara, si Jehova miingon: “Kini magsilbi kaninyo nga dalangpanan.” (Jos. 20:2, 3) Si Jehova wala magsugo nga husayon pag-usab ang nakapatay tungod sa mao rang kaso. Dili sab tugotang mosulod sa siyudad ang tigpanimalos aron patyon ang nakapatay. Busa, ang midangop dili na mahadlok nga panimaslan. Samtang naa sa siyudad, siya luwas ilalom sa proteksiyon ni Jehova. Dili kini prisohan. Sa siyudad, siya makatrabaho, makatabang sa uban, ug makaalagad kang Jehova nga malinawon. Oo, posible pa ang malipayon ug malamposong kinabuhi!

14. Sa unsa makasalig ang Kristohanon nga mahinulsolon?

¹⁴ Ang pipila ka alagad sa Diyos nga grabeng nakasala pero naghinulsol na mibati gihapong “napriso” sa ilang pagkasad-an. Ang uban mibati gani nga lantawon sila ni Jehova nga makasasala hangtod sa hangtod. Kon kanay imong gibati, palihog hinumdomi nga dihang pasayloon ka ni Jehova, bug-os ka niyang gipasaylo! Napamatud-an kini ni Daniel, nga gihisgotan ganina. Human  siya matambagi sa mga ansiyano ug matabangi nga makabaton pag-usab ug hinlong konsensiya, siya miingon: “Makaginhawa na kog lawom karon. Human mahusay ang problema sa hustong paagi, wala na ko hasola sa akong konsensiya. Pagkawala sa sala, nawala na gyod to. Sama sa giingon ni Jehova, iyang kuhaon ang imong palas-anon ug ipalayo kini kanimo. Dili na nimo ni makita pag-usab.” Sulod sa siyudad nga dalangpanan, ang tawong midangop dili na angayng mahadlok nga panimaslan. Sa susama, dihang gipasaylo na ni Jehova ang atong sala, dili na ta angayng mahadlok nga mangita siyag rason nga akusahan o hukman tag balik tungod sa maong sala.​—Basaha ang Salmo 103:8-12.

15, 16. Sa unsang paagi mas makasalig ka sa kaluoy sa Diyos tungod sa pagkahimong Manlulukat ug Hataas nga Saserdote ni Jesus?

¹⁵ Sa pagkatinuod, kon ikomparar sa mga Israelinhon, mas daghan tag rason nga mosalig sa kaluoy ni Jehova. Human mapahayag ni Pablo ang iyang kaguol kay wala niya matuman sa bug-os si Jehova, siya miingon: “Salamat sa Diyos pinaagi kang Jesu-Kristo nga atong Ginoo!” (Roma 7:25) Oo, bisag si Pablo naningkamot nga suklan ang sala ug nakasala kaniadto​—nga iya nang gihinulsolan—​masaligon siya sa pagpasaylo sa Diyos pinaagi ni Jesus. Ingong atong Manlulukat, si Jesus naghinlo sa atong konsensiya ug naghatag natog kalinaw sa hunahuna. (Heb. 9:13, 14) Ingong atong Hataas nga Saserdote, “siya makahimo usab sa pagluwas sa bug-os kanilang nagaduol sa Diyos pinaagi kaniya, tungod kay siya buhi man kanunay aron sa pagpangamuyo alang kanila.” (Heb. 7:24, 25) Kon ang gihimo sa hataas nga saserdote maghatag ug pasalig sa mga Israelinhon nga mapasaylo ang ilang sala, labaw tang makasalig nga pinaagi sa atong Hataas nga Saserdote, si Jesus, “makadawat kita ug kaluoy ug makakaplag ug dili-takos nga kalulot ingong tabang sa hustong panahon.”​—Heb. 4:15, 16.

¹⁶ Nan, aron makadangop kang Jehova, kinahanglan tang magpakitag pagtuo sa halad ni Jesus. Ayawg hunahunaa nga ang lukat mapadapat lamang sa mga tawo sa katibuk-an. Hinunoa, tuohi nga ang lukat mapadapat kanimo ingong indibiduwal. (Gal. 2:20, 21) Tungod sa lukat, tuohi nga mapasaylo ang imong mga sala, ug nga mabuhi ka sa walay kataposan. Ang halad ni Jesus maoy regalo ni Jehova kanimo.

17. Nganong gusto nimong modangop kang Jehova?

¹⁷ Ang mga siyudad nga dalangpanan nagpakita sa kaluoy ni Jehova. Pinaagi sa maong kahikayan, gipasiugda sa Diyos ang pagkabalaan sa kinabuhi, ang mga paagi nga matabangan ta sa mga ansiyano, ang kahulogan sa tinuod nga paghinulsol, ug kon nganong bug-os tang makasalig sa pagpasaylo ni Jehova. Midangop ka ba kang Jehova? Siya ang labing luwas nga dalangpanan! (Sal. 91:1, 2) Sa sunod nga artikulo, atong mahibaloan kon sa unsang paagi ang mga siyudad nga dalangpanan makatabang nato sa pagsundog kang Jehova​—ang kinalabwang ehemplo sa hustisya ug kaluoy.