GITAGNA ni Jesus nga ang iyang mga sumusunod makasinatig abunda nga ani niining panahon sa kataposan. (Mat. 9:37; 24:14) Konsiderahon nato kon sa unsang paagi natuman kini sa talagsaong paagi sa usa ka lugar sa Transcarpathia, Ukraine. Sa tulo lang ka managsilingang lungsod sa maong lugar, may 50 ka kongregasyon ug kapig 5,400 ka magmamantala. a Gani, kon usahon ang populasyon niining tulo ka lungsod, 1 sa 4 ka tawo ang Saksi ni Jehova!

Unsay kinaiya sa mga tawo sa ilang teritoryo? “Ang mga tawo dinhi may respeto sa Bibliya, nagpabili sa hustisya, may suod nga relasyon sa pamilya, ug sinserong nagtinabangay,” matod sa usa ka brader nga si Vasile. Siya midugang: “Usahay, dili sila mouyon sa among tinuohan. Pero kon may ipakita mi nila gikan sa Bibliya, maminaw sila pag-ayo.”

Siyempre, lahi ang giatubang nila sa ilang teritoryo kay gamay ra kaayo ang sangyawan sa matag magmamantala. Pananglitan, ang usa ka kongregasyon may 134 ka magmamantala pero 50 lang ka balay ang naa sa ilang teritoryo! Unsay ilang buhaton?

Daghang igsoon ang nagboluntaryo sa mga lugar nga mas dako ang panginahanglan sa magsasangyaw. “Sa teritoryo sa among kongregasyon, 1 ka magmamantala sa 2 ka balay ang ratio,” miingon ang 90 anyos nga brader nga si Ionash. “Mosangyaw ko sa among baryo, pero sa una nga maayo pa kog lawas, mobiyahe kog mga 160 kilometros ngadto sa teritoryong wala maasayn ug kongregasyon, diin magsangyaw ko sa Hungarian nga pinulongan.” Kinahanglang mosakripisyo ang mga magmamantala aron makatabang sa ubang teritoryo. “Aron makasakay sa tren, momata kog alas 4:00 sa buntag ug magsangyaw hangtod sa alas 6:00 sa hapon​—ang biyahe sa tren paingon sa amoa. Gibuhat nâ nako kaduha o katulo sa usa ka semana,” miingon si Ionash. Gibati ba niyang takos ang iyang paningkamot? “Lipay kaayo ko nianang paagiha sa pagsangyaw,” siya miingon. “Nalipay kong nakatabang sa usa ka pamilyang nagpuyo sa layo nga makakat-on sa kamatuoran.”

Siyempre, dili tanan sa mga kongregasyon niining dapita ang makabiyaheg layo. Pero ang tanan​—apil ang tigulang nga mga magmamantala—​naningkamot nga bug-os makobrehan ang ilang teritoryo. Ingong resulta, niadtong 2017, ang nanambong sa Memoryal niining tulo ka lungsod halos doble sa gidaghanon sa magmamantala​—o katunga sa tibuok populasyon. Walay duhaduha, bisan asa ta mag-alagad, kinahanglang ‘kanunay tang puliki sa buluhaton sa Ginoo.’​—1 Cor. 15:58.