1. Unsay natural natong tinguha, ug unsay apil niana?

UNSAY imong bation kon ang tawong imong nailhan ug gitahod nalimot sa imong ngalan o, mas grabe pa, wala gani makaila nimo? Makapaguol gyod nâ. Ngano? Tungod kay natural nga tinguha sa matag usa kanato nga dawaton sa uban. Pero gusto nato nga dili lang basta mailhan ta sa uban. Gusto natong mahibalo sila kon kinsa ta ug kon unsay atong nalampos.​—Num. 11:16; Job 31:6.

2, 3. Sa unsang paagi maapektohan ang atong tinguha nga apresyahon? (Tan-awa ang hulagway sa sinugdan sa artikulo.)

² Pero sama sa ubang natural nga mga tinguha, ang atong tinguha nga apresyahon posibleng mahimong dili balanse, nga maapektohan sa atong pagkadili-hingpit. Tungod niini, tinguhaon nato ang sayop nga klase sa pag-ila. Sugnoran sa kalibotan ni Satanas ang atong tinguha nga mahimong inila ug importante. Kon mahitabo nâ, dili na nato mahatag sa atong langitnong Amahan, si Jehova nga Diyos, ang pag-ila ug pagsimba nga takos kaniya.​—Pin. 4:11.

 ³ Sa panahon ni Jesus, ang pipila ka lider sa relihiyon may sayop nga panglantaw sa pag-ila. Gipasidan-an ni Jesus ang iyang mga sumusunod: “Pagbantay sa mga eskriba nga nagtinguha sa paglakawlakaw nga may hatag-as nga mga besti ug buot sa mga timbaya diha sa mga tiyanggihan ug sa unahang [o, kinamaayohang] mga lingkoranan diha sa mga sinagoga ug sa labing dungganong mga dapit panahon sa mga panihapon.” Siya mipadayon: “Kini sila makadawat ug mas mabug-at nga paghukom.” (Luc. 20:46, 47) Sa laing bahin, gidayeg ni Jesus ang pobreng biyuda kansang gamayng amot lagmit wala apresyaha sa uban. (Luc. 21:1-4) Klaro nga ang panglantaw ni Jesus sa pag-ila lahi kaayo sa uban. Kining artikuloha motabang nato nga mamentinar ang hustong panglantaw, kanang dalawaton kang Jehova nga Diyos.

4. Unsa ang kinamaayohang pag-ila, ug ngano?

⁴ Busa, unsa ang kinamaayohang pag-ila nga atong gipaningkamotang madawat? Dili kini ang atensiyon nga gustong madawat sa mga tawo gikan sa eskuylahan, negosyo, ug kalingawan. Hinunoa, kini ang pag-ila nga gihisgotan ni Pablo: “Karon nga kamo nakaila na sa Diyos, o hinuon karon nga kamo nailhan na sa Diyos, naunsa bang namalik na man hinuon kamo pag-usab sa mahuyang ug walay bili nga paninugdang mga butang ug buot magpaulipon niini pag-usab?” (Gal. 4:9) Dako kaayong pribilehiyo nga ‘mailhan sa Diyos,’ ang Kinalabwang Magmamando sa uniberso! Gusto niya nga masuod ta pag-ayo niya. Sumala pa sa usa ka eskolar, gusto sa Diyos nga pakitaan tag pabor. Kon ilhon ta ni Jehova ingong iyang mga higala, atong nakab-ot ang rason kon nganong nabuhi ta.​—Eccl. 12:13, 14.

5. Unsay atong buhaton aron mailhan ta sa Diyos?

⁵ Naeksperyensiyahan ni Moises ang maong panalangin. Dihang mihangyo siya kang Jehova nga tugotan siyang mas mailhan ang Iyang mga dalan, si Jehova mitubag: “Kining butanga, usab, nga imong gisulti, akong buhaton, tungod kay nakakaplag ka ug pabor sa akong mga mata ug ako nakaila kanimo pinaagi sa ngalan.” (Ex. 33:12-17) Makadawat pod tag nindot nga mga panalangin kon personal tang nailhan ni Jehova. Pero unsay atong buhaton aron mailhan ta ni Jehova? Mailhan ta niya kon higugmaon nato siya ug ipahinungod ang atong kinabuhi kaniya.​—Basaha ang 1 Corinto 8:3.

6, 7. Unsay posibleng makapawala sa atong relasyon kang Jehova?

⁶ Pero, kinahanglan natong mentinahon ang atong bililhong relasyon sa atong langitnong Amahan. Sama sa mga Kristohanon sa Galacia nga gisulatan ni Pablo, kinahanglang dili ta magpaulipon sa “mahuyang ug walay bili nga paninugdang mga butang” niining kalibotana, apil ang tinguha nga dayegon niini. (Gal. 4:9) Kadtong unang siglong mga Kristohanon nakaila na sa Diyos ug nailhan pod sila sa Diyos. Pero, si Pablo miingon nga ang maong mga igsoon ‘namalik hinuon’ sa way pulos nga mga butang. Sama rag miingon si Pablo: “Karon nga daghan na mog nalampos, nganong mamalik man mo sa binuang ug way pulos nga mga butang nga inyong gibiyaan?”

⁷ Posible ba nga mahisama ta nila? Oo. Dihang nailhan nato si Jehova, sama kang Pablo, gibiyaan tingali nato ang pagkainila ug kalamposan sa kalibotan ni Satanas. (Basaha ang Filipos 3:7, 8.) Tingali wala nato dawata ang mga oportunidad nga makakuhag taas nga edukasyon, o kaha mibalibad ta sa mga tanyag nga mapromot o mokitag dako. Puwede pod unta tang mosikat  ug modato tungod sa atong talento sa musika o sports, pero gitalikdan nato nang tanan. (Heb. 11:24-27) Dili gyod maalamon nga isipon nato kanang maayong mga desisyon ingong ‘gipalabay nga mga kahigayonan’! Ang maong panghunahuna posibleng makapabalik nato sa “mahuyang ug walay bili” nga mga butang sa kalibotan. *

8. Unsay magpalig-on sa atong determinasyon nga mailhan ni Jehova?

⁸ Unsaon nato pagpalig-on ang atong determinasyon nga mailhan ni Jehova ug dili sa kalibotan? Kinahanglan natong hinumdoman kining duha ka importanteng kamatuoran. Una, si Jehova kanunayng nakaila niadtong matinumanong nag-alagad kaniya. (Basaha ang Hebreohanon 6:10; 11:6) Giapresyar gyod ni Jehova ang matag usa sa iyang mga alagad, ug para niya, “dili-matarong” ang pagbalewala niadtong matinumanon kaniya. Si Jehova kanunayng “nakaila sa mga iyaha.” (2 Tim. 2:19) “Nahibalo [siya] sa dalan sa mga matarong” ug kon unsaon sila pagtabang panahon sa pagsulay.​—Sal. 1:6; 2 Ped. 2:9.

9. Paghatag ug mga pananglitan kon giunsa pagpakita ni Jehova ang iyang pag-uyon sa iyang katawhan.

⁹ Usahay, ipakita ni Jehova sa espesyal nga paagi nga giuyonan niya ang iyang katawhan. (2 Cron. 20:20, 29) Pananglitan, hunahunaa ang paagi sa pagluwas ni Jehova sa iyang katawhan didto sa Pulang Dagat dihang gigukod sila sa puwersadong kasundalohan ni Paraon. (Ex. 14:21-30; Sal. 106:9-11) Talagsaon kaayo ni nga panghitabo kay bisag 40 ka tuig na ang milabay, gihisgotan gihapon ni sa mga tawo nianang lugara. (Jos. 2:9-11) Makapadasig gyong hinumdoman ang pagpakita ni Jehova ug gugma ug gahom sa iyang katawhan kay hapit na tang atakehon sa Gog sa Magog! (Ezeq. 38:8-12) Nianang panahona, magmapasalamaton gyod ta nga atong gipili nga mailhan sa Diyos ug dili sa kalibotan.

10. Unsa pay angay natong hinumdoman sa pag-ila nga ihatag ni Jehova?

¹⁰ Kinahanglan pod natong hinumdoman ang ikaduhang importanteng kamatuoran: Mahimong ilhon ta ni Jehova sa mga paaging wala gyod nato damha. Kadtong mihimog maayo aron lang makita sa mga tawo giingnan nga wala gyod silay ganti gikan kang Jehova. Ngano? Tungod kay sila bug-os nang gigantihan dihang gidayeg sila sa uban. (Basaha ang Mateo 6:1-5.) Pero si Jesus miingon nga ang iyang Amahan “nagatan-aw sa tago” niadtong wala mapasidunggi sa kaayo nga nahimo nila sa uban. Nakita niya ang maong mga buhat ug gantihan, o panalanginan, niya ang matag usa nila. Pero usahay, gantihan ta ni Jehova sa wala damhang mga paagi. Atong hisgotan ang pipila ka pananglitan.

11. Giunsa pagpakita ni Jehova nga nailhan niya ang dalagang si Maria?

¹¹ Dihang panahon na nga ipakatawo ang Anak sa Diyos, gipili ni Jehova ang mapainubsanong ulay nga si Maria aron mahimong inahan niining espesyal nga bata. Si Maria nagpuyo sa gamayng siyudad sa Nasaret, nga layo sa Jerusalem ug sa nindot nga templo niini. (Basaha ang Lucas 1:26-33.) Nganong si Maria ang gihatagan niini nga pribilehiyo? Giingnan siya sa anghel nga si Gabriel nga “nakakaplag [siyag] pabor sa Diyos.” Gipakita ni Maria nga hamtong siya sa espirituwal dihang nakig-estorya siya sa iyang paryenteng si Elisabet.  (Luc. 1:46-55) Oo, dugay nang giobserbahan ni Jehova si Maria, ug gihatagan niya kinig wala damhang pribilehiyo tungod sa pagkamatinumanon niini.

12, 13. Sa unsang paagi gipakita ang haom nga pasidungog dihang natawo si Jesus ug dihang gidala siya sa templo 40 ka adlaw sa ulahi?

¹² Dihang gipanganak ni Maria si Jesus, wala pasidunggi ni Jehova si bisan kinsang prominenteng opisyal o magmamando sa Jerusalem ug Betlehem kay wala sila pahibaloa sa nahitabo. Ang mga anghel nagpakita sa mapainubsanong mga magbalantay nga nagpasibsib sa mga karnero sa gawas sa Betlehem. (Luc. 2:8-14) Dayon, ang mga magbalantay mibisita sa bag-ong natawo nga bata. (Luc. 2:15-17) Seguradong nasorpresa ug nalipay si Maria ug Jose dihang ilang nakita nga gipasidunggan si Jesus niining paagiha! Konsideraha ang kalainan sa paagi ni Jehova ug nianang sa Yawa. Dihang nagpadala si Satanas ug mga astrologo sa pagbisita kang Jesus ug sa ginikanan niini, ang tibuok Jerusalem natugaw sa balita sa pagkatawo ni Jesus. (Mat. 2:3) Kining publikong pagpahibalo sa pagkatawo ni Jesus miresultag kamatayon sa daghang inosenteng bata.​—Mat. 2:16.

¹³ Kuwarenta ka adlaw human sa pagkatawo ni Jesus, si Maria kinahanglang maghalad kang Jehova didto sa templo sa Jerusalem, nga mga nuybe kilometros gikan sa Betlehem. (Luc. 2:22-24) Dihang nagbiyahe si Maria kauban ni Jose ug Jesus, naghunahuna tingali siya kon hatagan ba sa saserdote ug espesyal nga pasidungog si Jesus tungod sa umaabot nga katungdanan niini. Gipasidunggan si Jesus, pero dili sa paagi nga gidahom tingali ni Maria. Hinunoa, gigamit ni Jehova ang “matarong ug masimbahon” nga si Simeon ug ang 84 anyos nga biyuda ug propetisang si Ana aron ipahibalo nga ang bata mao ang gisaad nga mahimong Mesiyas, o Kristo.​—Luc. 2:25-38.

14. Unsang mga panalangin ang nadawat ni Maria gikan kang Jehova?

¹⁴ Komosta ang bahin kang Maria? Padayon ba siyang gipakitaan ni Jehova ug haom nga pasidungog tungod sa iyang matinumanong pag-atiman ug pagpadako kang Jesus? Oo. Giseguro sa Diyos nga marekord sa Bibliya ang gibuhat ug gisulti ni Maria. Lagmit, dili makahimo si Maria sa pag-uban-uban kang Jesus sa tulo ka tuig ug tunga nga ministeryo niini. Tingali kay biyuda siya, kinahanglan niyang magpabilin sa Nasaret. Pero bisan pag wala niya maeksperyensiyahi ang daghang pribilehiyo, kauban siya ni Jesus panahon sa kamatayon niini. (Juan 19:26) Sa ulahi, si Maria didto sa Jerusalem uban ang mga tinun-an hangtod sa Pentekostes dihang gibubo ang balaang espiritu. (Buh. 1:13, 14) Lagmit apil siya sa gidihogan niadtong panahona. Kon mao, magpasabot nâ nga makapribilehiyo siya nga makauban si Jesus sa langit hangtod sa hangtod. Pagkanindot nga panalangin tungod sa iyang matinumanong pag-alagad!

15. Sa dinhi pa si Jesus sa yuta, giunsa pagpakita ni Jehova ang iyang pag-uyon sa iyang Anak?

¹⁵ Wala mangandoy si Jesus nga pasidunggan sa mga lider sa relihiyon o sa politika. Pero seguradong nadasig gyod siya dihang giila siya ni Jehova sa tulo ka higayon pinaagi sa direktang pagsulti gikan sa langit. Human dayon sa bawtismo ni Jesus sa Suba sa Jordan, si Jehova miingon: “Kini mao ang akong Anak, ang hinigugma, nga akong giuyonan.” (Mat. 3:17) Tingali si Juan Bawtista lang ang laing tawo nga nakadungog niini. Dayon, mga usa ka tuig una sa kamatayon ni Jesus, nadunggan sa tulo ka apostoles ang giingon ni Jehova bahin kang  Jesus: “Kini mao ang akong Anak, ang hinigugma, kinsa akong giuyonan; patalinghogi ninyo siya.” (Mat. 17:5) Sa ulahi, pipila ka adlaw una mamatay si Jesus, nakig-estorya na pod si Jehova sa iyang Anak gikan sa langit.​—Juan 12:28.

16, 17. Giunsa pagpasidungog ni Jehova si Jesus sa wala damhang paagi?

¹⁶ Bisag nahibalo si Jesus nga siya akusahan ingong tigpasipala ug makasinatig makauulawng kamatayon, siya miampo nga matuman unta ang kabubut-on ni Jehova ug dili ang iyaha. (Mat. 26:39, 42) “Siya nag-antos sa estaka sa pagsakit, nga wala igsapayan ang kaulaw,” nga wala magtinguha nga ilhon sa kalibotan, kondili ilhon sa iyang Amahan. (Heb. 12:2) Giunsa pagpakita ni Jehova ang maong pag-ila?

¹⁷ Sa dinhi pa si Jesus sa yuta, gisulti niya ang iyang tinguha nga mahibalik sa himaya nga iyang nasinati didto sa langit uban sa iyang Amahan. (Juan 17:5) Walay giingon ang Bibliya nga nangandoy si Jesus ug labaw pa ana. Wala siya magdahom nga motaas ang iyang posisyon sa langit. Pero unsay gihimo ni Jehova? Gipasidunggan niya si Jesus sa wala damhang paagi pinaagi sa pagbanhaw niini nga may “labaw nga katungdanan” ug paghatag niini sa pribilehiyo nga wala pa madawat ni bisan kinsa hangtod nianang panahona​—ang imortal nga espiritung kinabuhi! * (Filip. 2:9; 1 Tim. 6:16) Pagkanindot nga pag-ila ang nadawat ni Jesus tungod sa iyang pagkamatinumanon!

18. Unsay makatabang aron dili nato tinguhaon ang pag-uyon sa kalibotan?

¹⁸ Unsay makatabang aron dili nato tinguhaon ang pag-uyon sa kalibotan? Hinumdomi nga kanunayng ilhon ni Jehova ang iyang matinumanong mga alagad, ug sagad gantihan niya sila sa wala damhang mga paagi. Kinsay nasayod kon unsang wala damhang mga panalangin ang naghulat nato sa umaabot? Pero karon, samtang atong lahutayon ang mga kalisod ug pagsulay niining daotang kalibotan, atong hinumdoman nga kining kalibotana, apil ang pag-ila nga itanyag niini, mahanaw ra. (1 Juan 2:17) Ang atong mahigugmaong Amahan, si Jehova, ‘dili kay dili-matarong nga kalimtan ang atong buhat ug ang gugma nga atong gipakita alang sa iyang ngalan.’ (Heb. 6:10) Oo, paboran ta niya​—tingali bisan sa mga paagi nga wala pa nato mahunahunai!