1. Nganong talagsaon ang atong panahon karon?

 NAGKINABUHI ta sa talagsaong yugto sa kasaysayan. Ingon sa gitagna sa Bibliya, si Jehova nagtigom ug “usa ka dakong panon . . . gikan sa tanang kanasoran ug mga tribo ug katawhan ug mga pinulongan.” Kadtong gitigom maoy “usa ka gamhanang nasod” nga may kapig walo ka milyong malipayong katawhan, kinsa “nagahatag [sa Diyos] ug sagradong pag-alagad adlaw ug gabii.” (Pin. 7:9, 15; Isa. 60:22) Mas daghan karon ang nahigugma sa Diyos ug sa isigkatawo kay sukad masukad.

2. Unsang sayop nga matang sa gugma ang gipakita sa mga tawong nahimulag sa Diyos? (Tan-awa ang hulagway sa sinugdan sa artikulo.)

² Bisan pa niana, ang Kasulatan nagtagna usab nga sa atong adlaw, kadtong nahimulag sa Diyos magpakitag sayop nga matang sa gugma​—hakog nga gugma. Si apostol Pablo misulat: “Sa kataposang mga adlaw . . . , ang mga tawo unya magmahigugmaon sa ilang kaugalingon, magmahigugmaon sa salapi, . . . mga mahigugmaon sa kalipayan inay nga mga mahigugmaon sa Diyos.” (2 Tim. 3:1-4) Kining hakog nga gugma lahi kaayo sa Kristohanong gugma. Ang  pagpangagpas ug hakog nga mga tumong dili makahatag sa tawo sa kalipay nga iyang gidahom. Sa pagkatinuod, ang maong gugma magpatunghag hakog nga kalibotan nga “lisod sagubangon.”

3. Unsay atong susihon niining artikuloha, ug ngano?

³ Nahibalo si Pablo nga ang hakog nga gugma mahimong komon kaayo ug magpameligro sa mga Kristohanon. Busa, nagpasidaan siya nga “magpahilayo” niadtong nagpakitag sayop nga matang sa gugma. (2 Tim. 3:5) Pero, dili sa tanang higayon nga makalikay ta nianang mga tawhana. Busa unsay atong buhaton aron makalikay sa panghunahuna sa mga tawo sa atong palibot ug sa ingon makapalipay kang Jehova, ang Diyos sa gugma? Atong susihon ang kalainan sa diyosnong gugma ug sa gugma nga gihisgotan sa 2 Timoteo 3:2-4. Ang pagbuhat niana makatabang nato sa pagsusi ug pagpauswag sa gugma nga angay natong ipakita​—gugma nga makahatag ug tinuod nga katagbawan ug kalipay.

4. Nganong dili sayop ang pagpakitag balanseng paghigugma sa kaugalingon?

⁴ “Ang mga tawo unya magmahigugmaon sa ilang kaugalingon,” misulat si Pablo. Sayop bang mahigugma sa kaugalingon? Dili. Normal lang ug gikinahanglan pa gani nga higugmaon ang kaugalingon. Gidisenyo ta ni Jehova nga ingon niana. Si Jesus miingon: “Higugmaon mo ang imong silingan sama sa imong kaugalingon.” (Mar. 12:31) Kon wala ta mahigugma sa kaugalingon, dili ta makahigugma sa silingan. Mabasa pod nato sa Bibliya: “Ang mga bana angay nga maghigugma sa ilang mga asawa sama sa ilang kaugalingong mga lawas. Siya nga nahigugma sa iyang asawa nahigugma sa iyang kaugalingon, kay wala gayoy tawo nga nagdumot sa iyang kaugalingong unod; kondili nagapakaon ug nagapangga niini.” (Efe. 5:28, 29) Busa, angay sab nga magpakitag haom nga gugma sa kaugalingon.

5. Unsay imong ikasulti bahin niadtong sobrang nahigugma sa kaugalingon?

⁵ Ang paghigugma sa kaugalingon nga gihisgotan sa 2 Timoteo 3:2 dili normal o dili maayo nga gugma. Kana sayop, hakog nga gugma. Ang mga tawo nga sobrang nahigugma sa kaugalingon naghunahunag labaw kay sa angayng hunahunaon sa ilang kaugalingon. (Basaha ang Roma 12:3.) Unahon nila ang ilang kaayohan imbes ang sa uban. Kon may dili maayong panghitabo, basolon nila ang uban imbes ang kaugalingon. Usa ka komentaryo sa Bibliya nagpakasama niadtong mahigugmaon sa kaugalingon ngadto sa hayop nga ‘hedgehog nga moluko ug mapormag bola, nga naa sa sulod ang humok, init nga balhibo pero sa gawas, puro tunok.’ Ang maong mga tawo dili tinuod nga malipayon.

6. Unsay resulta kon higugmaon ang Diyos?

⁶ Ang mga eksperto sa Bibliya nagtuo nga unang gihisgotan ni Pablo ang gugma sa kaugalingon tungod kay ang ubang dili maayong hiyas maoy resulta niana. Sa laing bahin, ang mga tawong nahigugma sa Diyos mopatunghag lahi kaayong bunga. Gipakita sa Bibliya nga ang diyosnong gugma konektado sa kalipay, pakigdait, pailob, kalulot, pagkamaayo, pagtuo, kalumo, ug pagpugong sa kaugalingon. (Gal. 5:22, 23) “Malipayon ang katawhan kansang Diyos mao si Jehova!” misulat ang salmista. (Sal. 144:15) Si Jehova malipayong Diyos, ug gipakita sa iyang katawhan ang maong hiyas. Dugang pa, dili sama niadtong mahigugmaon sa kaugalingon ug naghunahuna lang kon unsay ilang madawat, ang mga alagad ni Jehova malipayng mohatag sa uban.​—Buh. 20:35.

7. Unsang mga pangutana ang motabang nato sa pagsusi sa atong gugma sa Diyos?

⁷ Unsaon nato pagkahibalo kon ang atong gugma sa Diyos nasapawan na sa gugma sa kaugalingon? Konsideraha ang tambag  sa Filipos 2:3, 4: “Dili magabuhat ug bisan unsa tungod sa pagkamatigion o tungod sa pagpaimportante sa kaugalingon, kondili uban sa pagpaubos sa hunahuna nga magaisip nga ang uban labaw kay kaninyo, nga magatan-aw, dili lamang sa personal nga interes sa mga butang labot sa inyong kaugalingon, kondili sa personal nga interes usab sa uban.” Mahimong pangutan-on nato ang kaugalingon: ‘Gipadapat ba nako ang maong tambag? Naningkamot ba ko sa pagbuhat sa kabubut-on sa Diyos? Naningkamot ba ko sa pagtabang sa uban, diha sa kongregasyon ug sa ministeryo?’ Dili kanunayng sayon ang paghatag sa atong panahon ug kusog. Nagkinahanglan nag paningkamot ug sakripisyo. Pero walay labawng makapalipay kay sa pagkahibalong giuyonan ta sa Soberano sa uniberso!

8. Tungod sa ilang gugma sa Diyos, unsay gibuhat sa pipila?

⁸ Kay gihigugma nila ang Diyos, ang pipila mibiya sa ilang malamposong karera aron makaalagad kang Jehova nga mas bug-os pa. Si Ericka usa ka doktor nga nagpuyo sa United States. Imbes maningkamot sa pagkab-ot ug taas nga posisyon, siya nagregular payunir ug nakaalagad sa pipila ka nasod uban sa iyang bana. Siya miingon: “Ang among mga eksperyensiya sa pagtabang diha sa langyawng teritoryo ug ang nahimo namong suod nga mga higala maoy nakahatag ug tinuod nga kalipay. Nagtrabaho gihapon ko ingong doktor, pero ang paggamit sa dakong bahin sa akong panahon ug kusog sa pagtabang sa mga tawo sa espirituwal nga paagi ug sa pag-atiman sa panginahanglan sa mga igsoon nakahatag nakog tinuod nga kalipay ug katagbawan.”

9. Nganong ang gugma sa kuwarta dili makahatag ug kalipay?

⁹ Si Pablo misulat nga ang mga tawo “magmahigugmaon sa salapi.” Pipila ka tuig kanhi, usa ka payunir sa Ireland ang nakig-estorya sa usa ka tawo bahin sa Diyos. Ang tawo mihulbot ug kuwarta sa iyang pitaka, giisa kini, ug mapasigarbohong miingon, “Mao niy akong diyos!” Bisag dili tingali sila moadmitir, daghan ang mibatig ingon niana. Ilang gihigugma ang kuwarta ug ang mga butang nga mapalit niini. Apan ang Bibliya nagpasidaan: “Ang mahigugmaon lamang sa salapi dili matagbaw sa salapi, ni sa kinitaan si bisan kinsa nga mahigugmaon sa bahandi.” (Eccl. 5:10) Ang maong mga tawo gustog dugang kuwarta, ug kay nangamas pag-ayo aron makabaton niana, sila nakaagom ug “daghang kasakitan.”​—1 Tim. 6:9, 10.

10. Unsay giingon sa Bibliya bahin sa bahandi ug kakabos?

¹⁰ Siyempre, kitang tanan nagkinahanglag kuwarta. Kini makapanalipod nato. (Eccl. 7:12) Apan magmalipayon ba ang usa kon ang iyang kuwarta igo lang sa iyang panginahanglan? Oo! (Basaha ang Ecclesiastes 5:12.) Si Agur nga anak ni Jakeh misulat: “Ayaw ako hatagi ug kakabos ni mga bahandi. Pakan-a ako sa pagkaon nga maoy gikinahanglan lamang alang kanako.” Masabtan dayon nato kon nganong dili niya gustong mahimong hilabihan ka pobre. Matod niya, dili niya gustong matental sa pagpangawat kay kana makapasipala sa Diyos. Pero nganong wala man siya mag-ampo nga madato? Siya misulat: “Tingali unya ako mabusog ug magalimod kanimo ug magaingon: ‘Kinsa ba si Jehova?’” (Prov. 30:8, 9) Lagmit may nailhan ka nga nagsalig sa ilang bahandi imbes sa Diyos.

11. Unsay gitambag ni Jesus bahin sa kuwarta?

¹¹ Ang nahigugma sa kuwarta dili makapalipay sa Diyos. Si Jesus nag-ingon: “Walay usa nga mahimong ulipon sa duha ka agalon; kay mahimong dumtan niya ang usa ug higugmaon ang lain, o unongan niya ang usa ug tamayon ang lain. Dili kamo mahimong ulipon sa Diyos ug sa Bahandi.” Sa wala pa niya kini isulti, siya miingon: “Hunong na kamo sa pagtigom ug mga bahandi alang kaninyo dinhi sa yuta, diin ang tangkob ug taya magakutkot,  ug diin ang mga kawatan magalungkab ug magapangawat. Hinunoa, pagtigom kamo ug mga bahandi alang kaninyo sa langit, diin walay tangkob ni taya nga magakutkot, ug diin walay mga kawatan nga magalungkab ug magapangawat.”​—Mat. 6:19, 20, 24.

12. Nganong mas sayon ang pag-alagad sa Diyos kon simple ang kinabuhi? Paghatag ug pananglitan.

¹² Napamatud-an sa daghan nga pinaagi sa pagkinabuhing simple dili lang sila mas malipayon kondili mas daghan sab ug panahon sa pag-alagad kang Jehova. Si Jack, nga nagpuyo sa United States, nagbaligya sa iyang dakong balay ug negosyo aron makapayunir uban sa iyang asawa. Siya miingon: “Lisod biyaan ang among nindot nga balay ug propidad nga nahimutang sa nindot nga lugar. Bisan pa niana, sulod sa katuigan, dili ko malipayon inig-uli tungod sa mga problema sa trabahoan. Ang akong asawa nga regular payunir pirmeng malipayon. Moingon siya, ‘Maayo kaayo akong amo!’ Karon nga payunir na sab ko, parehas na mig Amo, si Jehova.”

13. Unsaon nato pagsusi ang atong panglantaw sa kuwarta?

¹³ Aron masusi kon unsay atong panglantaw sa kuwarta, kinahanglan tang magmatinud-anon ug pangutan-on ang kaugalingon: ‘Nagtuo ba gyod ko ug nagkinabuhi uyon sa giingon sa Bibliya bahin sa kuwarta? Giuna ba nako ang pagpangitag kuwarta? Mas importante ba nako ang materyal nga mga butang kay sa akong relasyon kang Jehova ug sa mga tawo? Misalig ba gyod ko nga itagana ni Jehova ang akong panginahanglan?’ Makaseguro ta nga dili gyod pakyason ni Jehova ang misalig kaniya.​—Mat. 6:33.

14. Unsa ang balanseng panglantaw sa kalipayan?

¹⁴ Sumala sa gitagna, daghan karon ang “mahigugmaon sa kalipayan.” Maingon nga dili sayop ang haom, rasonableng panglantaw sa kaugalingon ug sa kuwarta, dili pod sayop ang balanseng panglantaw sa kalipayan. Dili gusto ni Jehova nga dumilian nato ang tanang kalipayan o likayan ang maayong kalihokan nga makahatag ug kalipay. Ang Bibliya nag-awhag sa mga matinumanon: “Lakaw, kan-a ang imong pagkaon uban ang pagmaya ug imna ang imong bino uban ang usa ka maayong kasingkasing.”​—Eccl. 9:7.

15. Unsang matanga sa kalipayan ang gitumong sa 2 Timoteo 3:4?

¹⁵ Ang 2 Timoteo 3:4 nagtumong sa pagpangagpas sa kalipayan nga wala nay paghunahuna  sa Diyos. Matikdi nga ang teksto wala mag-ingon nga mas higugmaon sa mga tawo ang kalipayan kay sa Diyos, kay magpasabot kana nga nahigugma pod sila sa Diyos. Kini nag-ingong ‘inay sa Diyos.’ Usa ka eskolar misulat: “Kini [nga teksto] wala magpasabot nga nahigugma pod sila sa Diyos. Kini nagpasabot nga wala gyod sila mahigugma sa Diyos.” Seryosong pasidaan kini niadtong mahigugmaon sa kalipayan! Ang ekspresyong “mga mahigugmaon sa kalipayan” haom nga nagtumong niadtong “nalinga sa . . . mga kalipayan niining kinabuhia.”​—Luc. 8:14.

16, 17. Unsang ehemplo ang gipakita ni Jesus maylabot sa kalipayan?

¹⁶ Si Jesus balanseg panglantaw sa kalipayan. Siya mitambong ug “kombira sa kasal” ug sa “[usa ka] dakong kombira.” (Juan 2:1-10; Luc. 5:29) Sa kasal, dihang nahurot ang bino, milagroso niyang gihimong bino ang tubig. Sa laing higayon, wala siya mouyon sa panghunahuna niadtong nagpakamatarong sa kaugalingon kinsa nagsaway niya kay siya mikaon ug miinom.​—Luc. 7:33-36.

¹⁷ Apan, dili panguna sa kinabuhi ni Jesus ang kalipayan. Giuna niya si Jehova ug gihimo niya ang tanan sa pagtabang sa uban. Aron daghan ang mabuhi, kinabubut-on niyang giantos ang masakit nga kamatayon diha sa estaka. Giingnan ni Jesus kadtong gustong mosunod sa iyang tunob: “Malipayon kamo sa dihang pakaulawan kamo sa mga tawo ug pagalutoson kamo ug sa binakak sultihan kamo sa tanang matang sa kadaotan tungod kanako. Pagmaya ug lukso sa kalipay, sanglit dako ang inyong ganti sa mga langit; kay nianang paagiha sila naglutos sa mga manalagna nga nauna kaninyo.”​—Mat. 5:11, 12.

18. Unsang mga pangutana ang makatabang nato sa pagsusi kon unsa ka dako ang atong gugma sa kalipayan?

¹⁸ Unsaon nato pagsusi kon unsa ka dako ang atong gugma sa kalipayan? Maayong pangutan-on nato ang kaugalingon: ‘Mas importante ba nako ang kalingawan kay sa tigom ug pagsangyaw? Andam ba nakong isakripisyo ang pipila ka butang kay gusto nakong moalagad sa Diyos? Sa pagpilig kalingawan, hunahunaon ba nako kon unsay panglantaw ni Jehova niana?’ Kon tinuod natong gihigugma ang Diyos, likayan nato dili lang ang mga butang nga atong nahibaloang dili makapalipay niya kondili ang mga butang usab nga sa atong hunahuna dili makapahimuot niya.​—Basaha ang Mateo 22:37, 38.

19. Kinsay dili gyod mahimong tinuod nga malipayon?

¹⁹ Human sa mga 6,000 ka tuig nga pag-antos sa tawo, ang kalibotan ni Satanas hapit nang taposon. Ang yuta punog mga tawo nga mahigugmaon sa kaugalingon, kuwarta, ug kalipayan. Sila naghunahuna kon unsay ilang makuha ug naghimo sa ilang mga tinguha nga una sa ilang kinabuhi. Ang maong mga tawo dili gyod mahimong tinuod nga malipayon. Hinunoa, ang salmista misulat: “Malipayon siya nga ang Diyos ni Jacob maoy iyang panabang, kansang paglaom anaa kang Jehova nga iyang Diyos.”​—Sal. 146:5.

20. Sa unsang paagi nakapalipay nimo ang imong gugma sa Diyos?

²⁰ Nagkadako ang gugma sa katawhan ni Jehova alang kaniya ug nagkadaghan ang iyang mga alagad kada tuig. Pamatuod ni nga ang Gingharian nagmando na ug sa dili madugay magdalag mga panalangin nga labaw pa sa atong mahunahunaan. Kon buhaton nato ang kabubut-on sa Diyos, siya malipay, ug kini makahatag natog tinuod ug dumalayong kalipay. Kadtong nahigugma kang Jehova magmalipayon hangtod sa hangtod! Hisgotan sa sunod nga artikulo ang pipila ka hiyas nga moresulta tungod sa hakog nga gugma. Dayon, susihon nato ang kalainan niini sa mga hiyas nga makita diha sa mga alagad ni Jehova.