Usahay makakomento sab tag sama niana. Morag mohaom kana sa atong mabasa sa Hebreohanon 12:16. Ang teksto nag-ingon nga si Esau “wala magpabili sa sagradong mga butang” ug “baylo sa usa ka pagkaon naghatag [kang Jacob] sa iyang mga katungod ingong panganay.” Daw nagpakita kini nga dihang gidawat ni Jacob ang “katungod ingong panganay,” puwede na siyang mahimong kagikan sa Mesiyas.​—Mat. 1:2, 16; Luc. 3:23, 34.

Pero, kon atong susihon ang mga asoy sa Bibliya, atong masayran nga dili kinahanglan nga ang usa panganay aron mahimong kagikan sa Mesiyas. Tagda ang pipila ka ebidensiya:

Sa mga anak ni Jacob (Israel), si Ruben ang iyang panganay pinaagi kang Lea. Sa ulahi, ang panganay ni Jacob pinaagi sa iyang pinalanggang asawa nga si Raquel mao si Jose. Dihang nakasala si Ruben, ang katungod sa pagkapanganay nabalhin kang Jose. (Gen. 29:31-35; 30:22-25; 35:22-26; 49:22-26; 1 Cron. 5:1, 2) Pero, ang Mesiyas wala maggikan kang Ruben o Jose. Ang Mesiyas naggikan kang Juda, ang ikaupat nga anak ni Jacob pinaagi kang Lea.​—Gen. 49:10.

 Narekord sa Lucas 3:32 ang lima pa ka kagikan sa Mesiyas. Morag pulos panganay sila. Busa si Boaz nanganak kang Obed, kansang anak mao si Jese.​—Ruth 4:17, 20-22; 1 Cron. 2:10-12.

Pero ang anak ni Jese nga si David dili panganay. Siya ang kamanghoran sa walo ka anak nga lalaki. Apan ang Mesiyas naggikan kang David. (1 Sam. 16:10, 11; 17:12; Mat. 1:5, 6) Mao pod nay nahitabo kang Solomon, bisag dili siya panganayng anak ni David.​—2 Sam. 3:2-5.

Wala kini magpasabot nga dili importante ang pagkapanganay. Ang panganayng lalaki dunay dungganong posisyon ug kasagaran maoy mahimong sunod nga ulo sa pamilya. Makapanunod pod siyag dobleng bahin sa katigayonan.​—Gen. 43:33; Deut. 21:17; Jos. 17:1.

Pero ang katungod sa pagkapanganay puwedeng ibalhin. Gipapahawa ni Abraham si Ismael, ug gipasa ang katungod sa pagkapanganay ngadto kang Isaac. (Gen. 21:14-21; 22:2) Ug sa nahisgotan na, ang katungod sa pagkapanganay gibalhin gikan kang Ruben ngadto kang Jose.

Karon mobalik ta sa Hebreohanon 12:16, nga nag-ingon: “[Pagbantay nga] walay makihilawason ni si bisan kinsa nga wala magpabili sa sagradong mga butang, sama kang Esau, kinsa baylo sa usa ka pagkaon naghatag sa iyang mga katungod ingong panganay.” Unsa man ang punto?

Si apostol Pablo wala maghisgot bahin sa kagikan sa Mesiyas. Mao pay pag-awhag niya sa mga Kristohanon nga ‘tul-iron nila ang mga alagianan sa ilang mga tiil.’ Sa ingon, dili sila “mahikawan sa dili-takos nga kalulot sa Diyos,” nga lagmit mahitabo kon magbuhat silag seksuwal nga imoralidad. (Heb. 12:12-16) Kon mobuhat sila niana, mahisama sila kang Esau. Siya “wala magpabili sa sagradong mga butang,” ug literal nga nagpadaog sa buhat nga dili balaan.

Si Esau nabuhi panahon sa mga patriarka, ug tingali may mga higayon nga nakapribilehiyo siya sa paghalad. (Gen. 8:20, 21; 12:7, 8; Job 1:4, 5) Pero tungod sa iyang unodnong panghunahuna, gibaylo ni Esau kanang tanang pribilehiyo sa usa ka panaksang linat-an. Basin dili niya gustong maapil sa kalisod nga gitagnang mahitabo sa kaliwat ni Abraham. (Gen. 15:13) Gipakita sab ni Esau ang iyang tendensiya sa pagbuhat ug dili balaan, nga walay pagpabili sa sagradong mga butang, pinaagi sa pagpangasawa ug duha ka paganong babaye, nga gikaguol sa iyang ginikanan. (Gen. 26:34, 35) Lahi gyod siya kang Jacob, kinsa naningkamot nga makaminyog magsisimba sa matuod nga Diyos!​—Gen. 28:6, 7; 29:10-12, 18.

Busa, unsa may atong ikahinapos bahin sa kagikan ni Jesus, ang Mesiyas? Usahay panganayng mga lalaki ang nahimong kagikan​—pero dili sa tanang higayon. Ang mga Hudiyo nahibalo ug midawat niini, sama sa ilang pag-admitir nga ang Kristo maggikan kang David, ang kamanghorang anak ni Jese.​—Mat. 22:42.