1, 2. (a) Nganong posible natong maugmad ang bag-ong pagkatawo? (b) Unsang mga bahin sa bag-ong pagkatawo ang gihisgotan sa Colosas 3:10-14?

“BAG-ONG pagkatawo.” Kana nga ekspresyon kaduha makita diha sa Bag-ong Kalibotang Hubad sa Balaang Kasulatan. (Efe. 4:24; Col. 3:10) Pagkatawo kana nga “gilalang sumala sa kabubut-on sa Diyos.” Ug posibleng maugmad nato ang maong pagkatawo. Ngano? Tungod kay gilalang ni Jehova ang mga tawo sa iyang larawan, busa posible gayod nga masundog nato ang iyang maayong mga hiyas.​—Gen. 1:26, 27; Efe. 5:1.

² Tinuod, kay nakapanunod tag pagkadili-hingpit gikan sa atong unang ginikanan, usahay naa tay sayop nga mga tinguha. Maimpluwensiyahan sab ta sa atong palibot. Pero uban sa kaluoy ug tabang ni Jehova, maugmad nato ang pagkatawo nga Iyang giuyonan. Aron mahimo kana, atong konsiderahon ang lainlaing bahin sa bag-ong pagkatawo nga gihisgotan ni apostol Pablo. (Basaha ang Colosas 3:10-14.) Hisgotan pod nato kon unsaon nato kini pagpakita diha sa atong ministeryo.

3. Unsa ang usa ka bahin sa bag-ong pagkatawo?

³ Human tambagi bahin sa bag-ong pagkatawo, si Pablo naghisgot sa pagkadili-mapihigon ingong importanteng bahin sa bag-ong pagkatawo. Siya miingon: “Walay Grego ni Hudiyo, pagkatinuli ni pagkadili-tinuli, langyaw, Sityanhon, ulipon, tawong gawasnon.” * Diha sa kongregasyon, nganong kinahanglang walay diskriminasyon sa rasa, nasyonalidad, o estado sa kinabuhi? Tungod kay ang tinuod nga mga sumusunod ni Kristo “nahiusa.”​—Col. 3:11; Gal. 3:28.

4. (a) Unsaon pagtratar sa mga alagad ni Jehova ang uban? (b) Sa unsang paagi masulayan ang panaghiusa sa mga Kristohanon?

⁴ Kadtong nagsul-ob sa bag-ong pagkatawo nagtahod sa mga igsoon sa pagtuo ug sa mga tagagawas, bisan unsa may ilang estado sa kinabuhi o rasa. (Roma 2:11) Dili kini sayon sa ubang bahin sa kalibotan. Pananglitan, daghang Saksi sa South Africa ang nagpuyo gihapon sa mga lugar nga gilain tungod sa rasa​—dihay para sa mga dato, para sa mga itom, o para sa nagkasagol nga rasa. Busa, aron dasigon ang mga igsoon nga “magpasangkad,” niadtong Oktubre 2013, giaprobahan sa Nagamandong Lawas ang espesyal nga kahikayan aron tabangan ang mga igsoon nga mas magkailhanay. (2 Cor. 6:13) Unsay nahitabo?

5, 6. (a) Aron mas magkahiusa ang katawhan sa Diyos sa usa ka nasod, unsa ang gihimong kahikayan? (Tan-awa ang hulagway sa sinugdan sa artikulo.) (b) Unsay mga resulta?

⁵ Gihikay nga mag-uban ang duha ka kongregasyon nga lainlaig pinulongan ug rasa. Ang mga igsoon gikan sa duha ka kongregasyon nag-uban sa pagsangyaw, pagtambong ug tigom, ug nag-abiabi sa usag usa. Ginatos ka kongregasyon ang miapil, ug nakadawat ug maayong mga report ang sangang buhatan bahin sa maong kahikayan, bisan gikan sa tagagawas. Pananglitan, usa ka lider sa relihiyon miingon, “Dili ko Saksi, pero makaingon gyod ko nga organisado kaayo ang inyong pagsangyaw, ug nagkahiusa mo bisag lainlaig rasa.” Unsay epekto niini sa mga igsoon?

⁶ Sa sugod, si Noma nagduhaduhang mangimbitar ug puti nga mga igsoon sa English nga kongregasyon. Xhosa ang iyang pinulongan ug gamay ang iyang balay. Pero human makasangyaw uban sa puti nga mga igsoon, ug maimbitar sa ilang balay, siya miingon, “Normal man pod diay sila!” Busa, dihang turno na sa Xhosa nga kongregasyon aron abiabihon ang English nga kongregasyon, nagluto siya ug nangimbitar ug pipila ka bisita sa balay. Usa sa iyang bisita ang ansiyano nga puti. Si Noma miingon: “Nasorpresa kong makita nga milingkod siya sa plastik nga kahon, nga halos nagyaka na.” Tungod niining nagapadayon pang kahikayan, daghang igsoon ang nakakitag bag-ong mga higala ug determinadong magpasangkad pa.

7. Nganong kinahanglang padayong ipakita ang pagkamabination?

⁷ Samtang wala pa matapos ang kalibotan ni Satanas, makaeksperyensiya pa gihapon tag pagsulay—​sama sa kawalay trabaho, grabeng sakit, paglutos, kalamidad, pagkawala sa kabtangan tungod sa krimen, o ubang kalisdanan. Aron makatabang sa usag usa dihang mag-antos o magkalisod, kinahanglang naa tay tinuod nga pagkamabination. Ang pagkamabination magpalihok kanato nga magmaluloton [o, buhaton ang maayo]. (Efe. 4:32) Kini nga mga bahin sa bag-ong pagkatawo makatabang nato  sa pagsundog sa Diyos ug sa paghupay sa uban.​—2 Cor. 1:3, 4.

8. Unsay maayong mga resulta kon pakitaan natog pagkamabination ug pagkamaayo ang tanan sa kongregasyon? Paghatag ug pananglitan.

⁸ Unsaon nato pagpakitag konsiderasyon sa mga langyaw o sa mga makaluluoy diha sa kongregasyon? Kinahanglan nato silang suoron ug ipakita kanila nga importanteng bahin sila sa kongregasyon. (1 Cor. 12:22, 25) Konsideraha si Dannykarl kinsa mibalhig Japan gikan sa Pilipinas. Sa trabahoan, lahi ang pagtratar kaniya komparar sa lokal nga mga empleyado. Dayon, nakatambong siya sa tigom sa mga Saksi ni Jehova. “Halos Japanese ang tanang nanambong,” miingon si Dannykarl, “pero giabiabi ko nila pag-ayo nga morag dugay na ming kaila.” Padayon niyang nabati ang maong pagkamaayo, nga nakatabang niya nga mouswag sa espirituwal. Siya nabawtismohan, ug karon ansiyano na. Para sa iyang kaubang mga ansiyano, panalangin gyod siya ug ang iyang asawang si Jennifer sa kongregasyon. Ang mga ansiyano miingon bahin kanila, “Simple kaayo ang ilang kinabuhi ingong payunir, ug maayo silang panig-ingnan sa pag-una sa Gingharian.”​—Luc. 12:31.

9, 10. Paghatag ug pananglitan sa mga panalangin sa pagpakitag pagkamabination diha sa ministeryo.

⁹ Dihang magsangyaw ta sa mensahe sa Gingharian, kahigayonan kana nga ‘makabuhat tag maayo ngadto sa tanan.’ (Gal. 6:10) Aron ipakita ang pagkamabination sa mga langyaw, daghang Saksi ang nagtuon ug bag-ong pinulongan. (1 Cor. 9:23) Miresulta kinig daghang panalangin. Pananglitan, ang sister nga payunir sa Australia nga si Tiffany nagtuon ug Swahili aron makatabang sa Swahili nga kongregasyon sa siyudad sa Brisbane. Bisag lisod para kang Tiffany ang pagtuon ug pinulongan, natagamtam niya ang dagayang panalangin. Siya miingon: “Kon gusto nimog talagsaon kaayong ministeryo, angayan ka sa langyawg pinulongan nga kongregasyon. Pareho nâ sa pagbalhin sa laing dapit pero naa ra ka sa imong siyudad. Maeksperyensiyahan nimo ang internasyonal nga panag-igsoonay ug ang talagsaong panaghiusa.”

¹⁰ Tagda sab ang panig-ingnan sa usa ka pamilya sa Japan. Ang anak nga babayeng si Sakiko miingon: “Niadtong mga tuig sa 1990, makasangyaw mig mga langyaw gikan sa Brazil. Dihang gipakita namo nila ang mga teksto diha sa Portuguese nga Bibliya, sama sa Pinadayag 21:3, 4 o Salmo 37:10, 11, 29, naminaw sila ug nakahilak pa gani.” Pero dili lang kana ang gihimo sa pamilya. Si Sakiko miingon, “Dihang nakita namo nga uhaw sila sa espirituwal, nakadesisyon ang among pamilya nga magtuon ug Portuguese.”  Sa ulahi, nakatabang ang pamilya sa pagtukod ug Portuguese nga kongregasyon. Mga tuig ang milabay, nakatabang silag daghang langyaw nga mahimong alagad ni Jehova. Si Sakiko midugang, “Dakong paningkamot ang kinahanglan aron tun-an ang Portuguese, pero mas daghan man pod ang panalangin nga among nadawat. Mapasalamaton kaayo mi kang Jehova.”​—Basaha ang Buhat 10:34, 35.

11, 12. (a) Nganong importante ang hustong motibo sa pagsul-ob ug bag-ong pagkatawo? (b) Unsay makatabang nato sa pagpabiling mapainubsanon?

¹¹ Ang atong motibo sa pagsul-ob ug bag-ong pagkatawo mao ang pagpasidungog kang Jehova, dili aron dayegon sa mga tawo. Hinumdomi nga bisan ang usa ka hingpit nga espiritung linalang nakasala tungod sa garbo. (Itandi ang Ezequiel 28:17.) Mas lisod gyod para sa dili hingpit nga mga tawo nga malikayan ang pagkagarboso ug pagkamapahitas-on! Bisan pa niana, posible gihapong masul-ob nato ang pagkamapainubsanon. Unsay makatabang nato sa paghimo niana?

¹² Aron magpabiling mapainubsanon, kinahanglan tang mogahin ug panahon kada adlaw sa pagpamalandong sa atong mabasa sa Pulong sa Diyos. (Deut. 17:18-20) Angay natong pamalandongon ilabina ang pagtulon-an ug ehemplo ni Jesus sa mapainubsanong pag-alagad. (Mat. 20:28) Gihugasan pa gani ni Jesus ang tiil sa iyang mga apostoles. (Juan 13:12-17) Kinahanglan sab tang mag-ampo kanunay para sa espiritu sa Diyos aron tabangan tang masuklan ang pagbating labaw ta sa uban.​—Gal. 6:3, 4; Filip. 2:3.

13. Unsa ang mga panalangin sa pagpaubos?

¹³ Basaha ang Proverbio 22:4. Para sa tanang magsisimba ni Jehova, importante kaayo ang pagpaubos ug moresulta kanag dagayang panalangin. Ang pagpaubos makatabang aron magmalinawon ug magkahiusa ang atong kongregasyon. Ang pag-ugmad ug ang pagpabiling mapainubsanon makatabang sab nato aron madawat nato ang hilabihang pagkamaayo sa Diyos. Si apostol Pedro miingon: “Kamong tanan sul-obi ang inyong kaugalingon sa pagkamapainubsanon sa hunahuna ngadto sa usag usa, tungod kay ang Diyos magabatok sa mga mapahitas-on, apan magahatag siyag dili-takos nga kalulot sa mga mapainubsanon.”​—1 Ped. 5:5.

14. Kinsa ang kinalabwang panig-ingnan sa kalumo ug pailob?

¹⁴ Para sa kalibotan karon, huyang ang tawong malumo ug mapailobon. Pero dili nâ tinuod. Ang maong maayong hiyas naggikan sa gamhanan kaayong Persona sa uniberso. Si Jehova nga Diyos ang kinalabwang panig-ingnan sa kalumo ug pailob. (2 Ped. 3:9) Hunahunaa kon giunsa niya pagtubag​—pinaagi sa representanteng mga anghel—​ang mga pangutana ni Abraham ug Lot. (Gen. 18:22-33; 19:18-21) Dugang pa, sulod sa 1,500 ka tuig, si Jehova nagpailob sa dili masinugtanong nasod sa Israel.​—Ezeq. 33:11.

15. Giunsa pagpakita ni Jesus ang kalumo ug pailob?

¹⁵ Si Jesus ‘malumo.’ (Mat. 11:29) Nagpailob siya pag-ayo sa mga kahuyangan sa iyang mga sumusunod. Sa ministeryo ni Jesus sa yuta, grabe siyang gisaway sa mga lider sa relihiyon. Pero, malumo ug mapailobon gihapon siya bisan hangtod sa iyang kamatayon. Samtang nag-antos diha sa estaka sa pagsakit, si Jesus miampo sa iyang Amahan nga pasayloon ang mga naglutos niya, kay sumala pa niya, “wala sila mahibalo  sa ilang ginabuhat.” (Luc. 23:34) Maayo gyod siyang panig-ingnan sa kalumo ug pailob bisan sa masakit ug malisod nga mga situwasyon!​—Basaha ang 1 Pedro 2:21-23.

16. Unsaon nato pagpakita ang kalumo ug pailob?

¹⁶ Unsaon nato pagpakita ang kalumo ug pailob? Gihisgotan ni Pablo ang usa ka paagi dihang gisulatan niya ang mga igsoon sa pagtuo: “Magpadayon sa pag-antos sa usag usa ug kinabubut-on nga magpasaylo sa usag usa kon ang usa adunay reklamo batok sa lain. Ingon nga si Jehova kinabubut-on nga nagpasaylo kaninyo, buhata usab ninyo ang ingon.” (Col. 3:13) Oo, gikinahanglan nato ang kalumo ug pailob aron matuman nato kini nga sugo. Ug pinaagi sa pagpasaylo, makatabang ta aron mahiusa ug magpabiling mahiusa ang kongregasyon.

17. Nganong importante ang kalumo ug pailob?

¹⁷ Kinahanglanon para sa mga Kristohanon ang pagsul-ob sa kalumo ug pailob. Importante sab ni aron maluwas ta. (Mat. 5:5; Sant. 1:21) Labaw sa tanan, pinaagi sa maong mga hiyas, mapasidunggan nato si Jehova ug matabangan nato ang uban sa pagsunod sa tambag sa Bibliya.​—Gal. 6:1; 2 Tim. 2:24, 25.

18. Unsay koneksiyon sa gugma ug sa pagkadili-mapihigon?

¹⁸ Ang mga hiyas nga atong nahisgotan konektado kaayo sa gugma. Pananglitan, gitambagan sa tinun-ang si Santiago ang mga igsoon kay ilang gitratar ang mga dato nga labaw sa mga pobre. Iyang gipakita nga kana supak sa sugo sa Diyos: “Higugmaon mo ang imong silingan sama sa imong kaugalingon.” Dayon siya midugang: “Kon kamo magpadayon sa pagpakitag paboritismo, kamo nakasala.” (Sant. 2:8, 9) Sa laing bahin, ang gugma magtabang nato nga likayan ang diskriminasyon tungod sa edukasyon, rasa, o estado sa kinabuhi. Oo, angayng sinsero ang atong pagkadili-mapihigon. Kinahanglang tinuod kining bahin sa atong pagkatawo.

19. Nganong importante nga isul-ob nato ang gugma?

¹⁹ Ang gugma “hataas-ug-pailob ug maluloton” ug dili mapahitas-on. (1 Cor. 13:4) Nagkinahanglan gyod tag pailob, pagkamaayo, ug pagpaubos aron padayon natong masangyaw ang mensahe sa Gingharian. (Mat. 28:19) Ang maong mga hiyas makatabang sab nato aron maayo ang atong relasyon sa tanang igsoon. Unsay panalangin sa pagpakita sa maong gugma? Kana makapahiusa sa kongregasyon nga makahatag ug pasidungog kang Jehova ug makadani sa mga interesado. Mao diay nga dihang ang Bibliya naghisgot bahin sa bag-ong pagkatawo, kini mihinapos: “Gawas pa niining tanang butanga, isul-ob ninyo ang gugma, kay kini maoy usa ka hingpit nga bugkos sa panaghiusa.”​—Col. 3:14.

20. (a) Unsay atong ipangutana sa kaugalingon, ug ngano? (b) Unsay atong gilaoman?

²⁰ Ang matag usa kinahanglang mangutana sa kaugalingon, ‘Unsa pay angay nakong buhaton aron mahukas ug mabiyaan ang daang pagkatawo?’ Kinahanglang sinsero tang mag-ampo sa tabang sa Diyos ug maningkamot sa pagbiya sa mga batasan o panggawi nga makapugong nato sa pagdawat sa mga panalangin sa Gingharian sa Diyos. (Gal. 5:19-21) Kinahanglan sab tang mangutana, ‘Padayon ba nakong ginabag-o ang akong paagi sa paghunahuna aron mapalipay si Jehova?’ (Efe. 4:23, 24) Ang pagsul-ob ug ang dili paghukas sa bag-ong pagkatawo padayon pa natong buhaton hangtod mahimo na nato kana sa hingpit nga paagi. Hunahunaa kon unsa ka makapalipay ang kinabuhi dihang ang tanan hingpit nang nagsul-ob sa bag-ong pagkatawo!