1. Unsay gustong buhaton sa tanang alagad sa Diyos, ug ngano? (Tan-awa ang hulagway sa atubangan sa magasin.)

SI Kristo Jesus nagsugo sa iyang mga sumusunod nga ‘manglakaw ug maghimog mga tinun-an sa katawhan sa tanang kanasoran.’ (Mat. 28:19) Gusto sa tanang matinumanong alagad sa Diyos nga makakat-on kon unsaon ‘pagtuman sa bug-os’ ang ministeryo nga gisugo kanila. (2 Tim. 4:5) Sa pagkatinuod, kini nga buluhaton mas importante, mapuslanon, ug dinalian kay sa bisan unsang buluhaton. Pero, malisdan tingali ta sa paggahin ug dakong panahon sa ministeryo.

2. Unsang mga problema ang atong giatubang samtang nagtuman sa atong ministeryo?

² Dunay ubang importanteng buluhaton nga nagkinahanglan sa atong panahon ug kusog. Tingali kinahanglan tang motrabahog daghang oras kada adlaw aron matagan-an ang atong panginahanglan ug nianang sa atong pamilya. Basin malisdan ta sa pag-atiman sa ubang responsibilidad sa pamilya, o kaha nasakit ta, na-depress, o nag-antos sa katigulangon. Unsaon nato pagtuman sa bug-os ang atong ministeryo samtang nag-atubang nianang mga problemaha?

3. Unsay atong masabtan sa gisulti ni Jesus sa Mateo 13:23?

³ Kon nalimitahan ang atong panahon sa pag-alagad kang Jehova tungod sa atong kahimtang, dili ta angayng maluya. Nahibalo si Jesus nga ang matag usa kanato dili makapatunghag parehas nga gidaghanon sa bunga sa Gingharian. (Basaha ang Mateo 13:23.) Pabilhan pag-ayo ni Jehova ang tanan natong buhaton sa pag-alagad kaniya basta himoon nato ang atong kinamaayohan. (Heb. 6:10-12) Sa laing bahin, basin bation  nato nga makahimo tag labaw pa. Niining artikuloha, hisgotan nato kon unsaon pag-una ang ministeryo, pagpasimple ang atong kinabuhi, ug pagpauswag ang atong pagsangyaw ug pagpanudlo. Pero sa dili pa, unsay ipasabot sa bug-os nga pagtuman sa atong ministeryo?

4. Unsay ipasabot sa bug-os nga pagtuman sa atong ministeryo?

⁴ Sa simpleng pagkasulti, aron bug-os nga matuman ang atong ministeryo, kinahanglan tang mosangyaw ug manudlo kutob sa mahimo. Pero dili lang gidaghanon sa oras ang gitumong niini. Importante kang Jehova ang atong motibo. Kay gimahal nato si Jehova ug ang atong silingan, bug-os kalag tang nagahimo sa atong ministeryo. * (Mar. 12:30, 31; Col. 3:23) Ang bug-os kalag nga pag-alagad sa Diyos nagpasabot ug paggamit sa atong kusog sa pag-alagad kaniya kutob sa atong mahimo. Dihang maapresyar nato nga usa ka pribilehiyo ang pagsangyaw, maningkamot ta nga sultian ang mga tawo sa maayong balita.

5-6. Iilustrar kon sa unsang paagi unahon ang ministeryo bisag limitado ang panahon.

⁵ Hunahunaa ang usa ka batan-ong lalaki nga ganahang maggitara. Malipay siyang motugtog kon makahigayon. Ngadtongadto, nakatrabaho siya ingong gitarista sa usa ka restawran kada Sabado ug Dominggo. Pero ang iyang kita dili makasapar sa iyang galastohan. Busa nanarbaho siya ingong kahero sa usa ka groseri gikan sa Lunes hangtod sa Biyernes. Bisag mas daghan siyag panahon sa groseri, mas ganahan siyang motugtog. Nangandoy siyang mahimong mas maayong gitarista ug full-time nga musikero. Pero, pahimuslan niya ang matag higayon nga makatugtog, bisag kadali lang.

⁶ Sa susama, tingali limitado ang imong panahon sa pagsangyaw. Pero, mao nay gusto nimong buhaton. Naningkamot kang mouswag ang imong paagi sa pagsangyaw sa maayong balita aron maabot ang kasingkasing sa mga tawo. Kay daghan man kag atimanon,  naghunahuna ka kon unsaon nimo pag-una ang imong ministeryo.

7-8. Unsaon nato pagsundog ang panglantaw ni Jesus sa ministeryo?

⁷ Si Jesus naghatag ug kinamaayohang ehemplo sa iyang panglantaw sa ministeryo. Ang pinakaimportante sa iyang kinabuhi mao ang pagsangyaw sa Gingharian sa Diyos. (Juan 4:34, 35) Mibaktas siyag gatosan ka kilometro aron masangyawan ang daghang tawo kutob sa mahimo. Gipahimuslan niya ang tanang kahigayonan nga maestorya sila—sa publiko man o sa balay. Ang tibuok kinabuhi ni Jesus nasentro sa iyang ministeryo.

⁸ Masundog nato ang Kristo pinaagi sa pagpangitag kahigayonan nga makasangyaw sa maayong balita bisag asa ug bisag kanus-a. Andam tang isakripisyo ang personal nga kahayahay aron makasangyaw. (Mar. 6:31-34; 1 Ped. 2:21) Ang pipila ka igsoon nakaalagad ingong espesyal, regular, o oksilyare payunir. Ang uban nagtuon ug laing pinulongan o mibalhin sa lugar nga nagkinahanglag dugang magsasangyaw. Pero, ang dakong bahin sa pagsangyawng buluhaton ginahimo sa mga magmamantala nga naningkamot kutob sa ilang mahimo. Bisan unsa pa man, wala mangayo si Jehova ug labaw sa atong maarangan. Gusto niyang malipay ta sa pag-alagad kaniya samtang atong ipahayag ang “mahimayaong maayong balita sa malipayong Diyos.”—1 Tim. 1:11; Deut. 30:11.

9. (a) Giunsa pag-una ni Pablo ang ministeryo bisag kinahanglan siyang manarbaho? (b) Unsay gipakita sa Buhat 28:16, 30, 31 bahin sa panglantaw ni Pablo sa iyang ministeryo?

⁹ Si apostol Pablo naghatag ug maayong panig-ingnan sa pag-una sa ministeryo. Dihang didto siya sa Corinto panahon sa iyang ikaduhang misyonaryong biyahe, hapit nang mahurot ang iyang kuwarta maong nanarbaho siya ingong tighimog tolda. Pero dili nâ ang pinakaimportante kang Pablo. Nanarbaho siya para masuportahan ang kaugalingon sa ministeryo ug mapahayag ang maayong balita sa mga taga-Corinto nga “walay bayad.” (2 Cor. 11:7) Bisag kinahanglang manarbaho si Pablo, padayon niyang giuna ang ministeryo, ug magsangyaw siya panahon sa Igpapahulay. Dihang miarang-arang ang kahimtang, si Pablo nakahatag ug dugang panahon sa pagsangyaw. Siya nahimong “okupado kaayo sa pulong, nga nagpamatuod ngadto sa mga Hudiyo nga si Jesus mao ang Kristo.” (Buh. 18:3-5; 2 Cor. 11:9) Sa ulahi, dihang duha ka tuig siyang gipriso sa iyang balay sa Roma, siya mosangyaw sa mga bisita ug maghimog mga sulat. (Basaha ang Buhat 28:16, 30, 31.) Determinado si Pablo nga dili mababagan ang iyang ministeryo. Siya misulat: “Sanglit nakabaton man kami niini nga ministeryo . . . , kami wala moangka.” (2 Cor. 4:1) Parehas ni Pablo, bisag mas dako ang atong panahon sa pagpanarbaho, mahimo gihapon natong unahon ang Gingharian.

10-11. Unsaon nato pagtuman sa bug-os ang atong ministeryo kon duna tay problema sa panglawas?

¹⁰ Kon dili kaayo ta makapamalaybalay tungod sa pagkatigulang o sakit, makasangyaw gihapon ta sa laing paagi. Ang mga Kristohanon sa unang siglo mosangyaw bisag asa sila. Gipahimuslan nila ang matag kahigayonan nga makasulti bahin sa kamatuoran—sa balay ug balay, sa publiko, ug sa impormal—bisag asa nga naay tawo. (Buh. 17:17; 20:20) Kon dili na kaayo ta makalakawlakaw, mahimo tingali tang molingkod sa lugar nga daghag tawo diin makasangyaw ta sa mga lumalabay. O tingali makasangyaw ta sa impormal, pinaagig sulat,  o pinaagig telepono. Daghang magmamantala nga nalimitahan pag-ayo ang nalipay ug natagbaw niining paagiha sa pagsangyaw.

¹¹ Bisan pa sa mga problema sa panglawas, bug-os gihapon nimong matuman ang imong ministeryo. Konsideraha pag-usab si Pablo. Siya miingon: “Sa tanang butang ako adunay kusog pinaagi kaniya nga naghatag ug gahom kanako.” (Filip. 4:13) Gikinahanglan ni Pablo ang maong kusog dihang nasakit siya panahon sa usa sa iyang mga biyahe ingong misyonaryo. Iyang giingnan ang mga taga-Galacia: “Gumikan sa usa ka sakit sa akong unod nga ako nagpahayag sa maayong balita kaninyo sa unang higayon.” (Gal. 4:13) Sa susama, ang imong problema sa panglawas maghatag tingali nimog kahigayonan sa pagsangyaw, pananglitan ngadto sa mga doktor, nars, ug sa ubang mag-atiman nimo. Daghan nila ang naa sa trabahoan dihang mobisita ang mga Saksi sa ilang balay.

12. Unsay gipasabot sa pagpasimple sa mata?

¹² Si Jesus miingon: “Ang lampara sa lawas mao ang mata. Nan, kon yano [o, simple] ang imong mata, ang imong tibuok lawas mahimong hayag.” (Mat. 6:22) Unsay iyang gipasabot? Gipasabot niya nga kinahanglan tang magpokus sa usa ka tumong, o katuyoan, nga dili magpabalda. Si Jesus mismo naghatag ug ehemplo pinaagi sa pagpokus diha sa ministeryo, ug gitudloan niya ang mga tinun-an nga unahon ang pag-alagad kang Jehova ug ang Gingharian. Atong masundog si Jesus pinaagi sa pagpokus sa atong ministeryo, nga  ‘pangitaon pag-una ang Gingharian ug ang pagkamatarong sa Diyos.’—Mat. 6:33.

13. Unsay makatabang nato sa pagpokus sa atong ministeryo?

¹³ Ang usa ka paagi nga makapokus ta sa atong ministeryo mao ang pagpasimple sa atong kinabuhi aron mas dako tag panahon sa pagtabang sa uban nga mailhan ug higugmaon si Jehova. * Pananglitan, makaadyas ba ta sa atong oras sa pagtrabaho aron makasangyaw ta sa ubang adlaw sa semana? Puwede ba natong ibanan ang pipila ka kalingawan nga tingali makahurot ug panahon?

14. Unsang mga kausaban ang gihimo sa usa ka magtiayon aron makahatag ug dugang nga panahon ug atensiyon sa ministeryo?

¹⁴ Mao ni gihimo sa ansiyanong si Elias ug sa iyang asawa. Siya miingon: “Dili dayon mi makapayunir, pero may mahimo mi para makagahin ug dugang panahon sa pagsangyaw. Busa mihimo mig ginagmayng lakang aron madugangan ang among panahon sa ministeryo. Pananglitan, among giibanan ang among galastohan, gimenosan ang mga kalingawan nga makahurot sa panahon, ug gihangyo ang among mga boss nga usbon ang among eskedyul sa trabaho. Tungod niana, makasangyaw mi sa gabii, makadumalag mas daghang Bible study, ug makasangyaw pa gani sa ubang adlaw sa semana kaduha sa usa ka bulan. Nag-enjoy kaayo mi!”

15-16. Uyon sa 1 Timoteo 4:13, 15, unsaon nato pagpauswag ang atong paagi sa pagsangyaw? (Tan-awa sab ang kahong “ Mga Tumong Aron Bug-os Matuman ang Akong Ministeryo.”)

¹⁵ Ang laing paagi nga bug-os natong matuman ang ministeryo mao ang pagpauswag sa  atong paagi sa pagsangyaw. May mga propesyonal nga nagkinahanglag dugang nga pagbansay aron mouswag ang ilang kahibalo ug abilidad. Ingon sab niana ang mga magwawali sa Gingharian. Kinahanglan tang magpadayon sa pagkat-on aron mouswag ang atong ministeryo.—Prov. 1:5; basaha ang 1 Timoteo 4:13, 15.

¹⁶ Busa, sa unsang paagi mouswag ang atong ministeryo? Mouswag ni pinaagi sa pagpaminaw pag-ayo sa mga instruksiyon nga atong madawat sa senemanang Kinabuhi ug Ministeryo nga Tigom. Kini nga tigom maghatag ug mapuslanong pagbansay aron tabangan ta nga mouswag ang atong paagi sa pagsangyaw. Pananglitan, dihang ang tsirman mohatag ug tambag niadtong dunay bahin, makakat-on tag mga punto nga makatabang nato sa pagpauswag sa atong ministeryo. Magamit nato ang maong mga tambag dihang mosangyaw ta. Puwede tang magpatabang sa atong tigdumala sa grupo sa pagsangyaw o makigpartner niya o sa ubang eksperyensiyadong magmamantala, sa usa ka payunir, o sa tigdumala sa sirkito. Samtang magkahanas ta sa paggamit sa matag tool diha sa Teaching Toolbox, mas mag-enjoy ta sa atong pagsangyaw ug pagpanudlo.

17. Unsay imong maeksperyensiyahan kon bug-os nimong tumanon ang imong ministeryo?

¹⁷ Pribilehiyo gyod nga gitugotan ta ni Jehova nga mahimong iyang “mga isigkamagbubuhat”! (1 Cor. 3:9) Kon imong unahon “ang mas hinungdanong mga butang” ug magpokus ka sa ministeryo, ‘makaalagad ka kang Jehova uban ang pagmaya.’ (Filip. 1:10; Sal. 100:2) Ingong usa sa mga alagad sa Diyos, makaseguro ka nga hatagan ka niyag gahom nga imong gikinahanglan aron matuman ang imong ministeryo bisag unsa pay imong problema o limitasyon. (2 Cor. 4:1, 7; 6:4) Gamay man o dako ang imong mahimo sa pagsangyaw, ikaw “may hinungdan sa pagsadya” kon bug-os kalag nimong tumanon ang imong ministeryo. (Gal. 6:4) Kon buhaton nâ nimo, gipakita nimo ang imong gugma kang Jehova ug sa isigkatawo. “Sa pagbuhat niini pagaluwason mo ang imong kaugalingon ug kadtong mamati kanimo.”—1 Tim. 4:16.