1-3. (a) Unsay giatubang sa tanang batan-on, ug giunsa ni pag-ilustrar? (Tan-awa ang hulagway sa sinugdan sa artikulo.) (b) Unsaon ni pag-atubang sa mga batan-on?

HUNAHUNAA nga moadto ka sa layong lungsod para sa usa ka importanteng okasyon. Aron makaabot didto, kinahanglan kang mosakayg bus. Sa terminal, naglibog ka tungod sa kadaghan sa pasahero ug sa bus. Maayo na lang kay kabalo ka sa imong adtoan ug sa bus nga imong sakyan! Kon mosakay kag lahi nga bus, dad-on gyod ka sa laing direksiyon.

² Ang kinabuhi samag pagbiyahe, ug ang mga batan-on karon parehas nianang mga pasahero diha sa terminal sa bus. Usahay maglibog sila sa mga oportunidad ug sa mga desisyon nga kinahanglang himoon. Mga batan-on, mas sayon ang pagdesisyon kon kabalo na mo sa direksiyon sa inyong kinabuhi. Asa mo angayng moadto?

³ Tubagon kana niining artikuloha pinaagi sa pagdasig sa mga batan-on nga ipokus ang ilang kinabuhi sa paglipay kang Jehova. Nagpasabot kana nga iapil si Jehova sa tanang bahin sa kinabuhi​—sa edukasyon, trabaho, responsibilidad sa pamilya, ug uban pa. Ug kana nagpasabot sa pagkab-ot ug espirituwal nga mga tumong.  Kon ang mga batan-on magpokus sa pag-alagad, makaseguro sila nga panalanginan sila ni Jehova ug malamposong kinabuhi.​—Basaha ang Proverbio 16:3.

4. Unsay atong hisgotan niining artikuloha?

⁴ Maayo gyod ang paghimog espirituwal nga mga tumong samtang bata pa. Ngano? Atong hisgotan ang tulo ka rason. Ipakita sa unang duha ka rason nga ang espirituwal nga mga tumong makapasuod sa usa kang Jehova; ipasiugda sa ikatulo ang kaayohan sa paghimog espirituwal nga mga tumong samtang bata pa.

5. Unsa ang pangunang rason sa paghimog espirituwal nga mga tumong?

⁵ Ang pangunang rason sa paghimog espirituwal nga mga tumong mao ang pagpakita kang Jehova sa atong pagkamapasalamaton sa iyang gugma ug sa iyang nahimo para nato. Ang salmista miingon: “Maayo nga magpasalamat kang Jehova . . . Kay gilipay mo ako, Oh Jehova, tungod sa imong buhat; tungod sa mga buhat sa imong mga kamot magahugyaw ako sa kalipay.” (Sal. 92:1, 4) Ingong batan-on, hunahunaa ang tanang nahatag ni Jehova kanimo​—ang imong kinabuhi, pagtuo, ang Bibliya, kongregasyon, ug ang nindot nga paglaom sa umaabot. Ang pag-una sa espirituwal nga mga butang mao ang usa ka paagi sa pagpasalamat sa Diyos sa maong mga panalangin, ug kana makapasuod nimo kaniya.

6. (a) Unsay epekto sa espirituwal nga mga tumong diha sa atong relasyon kang Jehova? (b) Unsay puwedeng himoong tumong samtang bata pa?

⁶ Ang ikaduhang rason mao nga dihang sugdan nimo pagkab-ot ang espirituwal nga mga tumong, makahimo ka nag rekord sa maayong mga buhat sa panan-aw ni Jehova. Kana mas makapasuod nimo kaniya. Si apostol Pablo nagsaad: “Ang Diyos dili kay dili-matarong nga kalimtan ang inyong buhat ug ang gugma nga inyong gipakita alang sa iyang ngalan.” (Heb. 6:10) Makahimo kag espirituwal nga mga tumong bisag bata pa ka. Si Christine 10 anyos dihang gihimo niyang tumong ang pagbasa sa estorya sa kinabuhi sa matinumanong mga Saksi. Sa edad nga 12, gihimong tumong ni Toby nga mabasa ang tibuok Bibliya unâ siya mabawtismohan. Si Maxim 11 anyos ug ang iyang manghod nga si Noemi 10 anyos dihang nabawtismohan. Tumong nilang duha nga makaalagad sa Bethel. Aron makapokus sa ilang tumong, gibutang nila sa bungbong sa ilang balay ang aplikasyon sa Bethel. Makahunahuna ka bag mga tumong nga importante nimo ug dayon sugdan ang pagkab-ot niana?​—Basaha ang Filipos 1:10, 11.

7, 8. (a) Nganong mas dali ang pagdesisyon kon dunay espirituwal nga mga tumong? (b) Nganong gipili sa usa ka batan-on nga dili moeskuyla sa unibersidad?

⁷ Ang ikatulong rason kon nganong mohimog tumong samtang batan-on pa adunay kalabotan sa pagdesisyon. Ang mga batan-on kinahanglang modesisyon bahin sa edukasyon, trabaho, ug uban pa. Ang pagdesisyon parehas sa pagpilig hustong dalan diha sa krosing. Kon kabalo ka sa imong destinasyon, sayon ra ang pagpili sa hustong dalan. Sa samang paagi, kon kabalo ka sa imong tumong, mas sayon pod ang paghimog maayong desisyon. Ang Proverbio 21:5 nag-ingon: “Ang mga plano sa kugihan mosangpot gayod sa kaayohan [o, kalamposan].” Kon mas sayo kang magplano pinaagi sa paghimog maayong mga tumong, mas dali kang molampos. Kanay naeksperyensiyahan ni Damaris dihang kinahanglan siyang mohimog importanteng desisyon sa batan-on pa.

⁸ Si Damaris migraduwar sa hayskul nga dagkog grado. Makaeskuyla unta siyag abogasiya sa usa ka unibersidad nga walay bayad, pero gipili niyang motrabaho sa bangko.  Ngano? “Bata pa lang, nakadesisyon na kong magpayunir. Kana nagpasabot nga motrabaho ra kog part-time. Kon maabogada ko, mokita kog dako, pero maglisod ko pagpangitag part-time nga trabaho.” Karon, si Damaris 20 ka tuig nang payunir. Gibati ba niya nga gihimo niya ang hustong tumong ug desisyon sa bata pa? “Sa bangko nga akong gitrabahoan, daghan kog maestoryang mga abogado. Ginahimo nila ang trabaho nga mao untay akong ginahimo kon naabogada ko. Pero, daghan ang dili malipayon sa ilang trabaho. Ang akong desisyon nga magpayunir nakatabang nako nga malikayan ang makapadismayar nga kinabuhi sa sekular nga karera ug magmalipayon sa pag-alagad kang Jehova sa daghang tuig.”

9. Nganong angayng dayegon ang atong mga batan-on?

⁹ Libolibo ka batan-on sa mga kongregasyon sa tibuok kalibotan ang angayan sa kinasingkasing nga pagdayeg. Giuna nila si Jehova ug ang ilang espirituwal nga mga tumong. Ilang natagamtam ang malipayon kaayong kinabuhi ug sa samang higayon nakakat-on sila sa pagsunod sa giya ni Jehova sa tanang butang. Apil niana ang edukasyon, trabaho, ug pamilya. “Salig kang Jehova sa bug-os mong kasingkasing,” miingon si Solomon. “Sa tanan mong mga dalan tagda siya, ug siya magatul-id sa imong mga alagianan.” (Prov. 3:5, 6) Ang mga batan-on sa kongregasyon bililhon kang Jehova, kinsa nagmahal pag-ayo nila ug naghatag nilag proteksiyon, giya, ug panalangin.

10. (a) Nganong kinahanglang una sa atong mga prayoridad ang ministeryo? (b) Sa unsang paagi mahimo tang epektibo sa ministeryo?

¹⁰ Kon gusto sa usa ka batan-on nga malipay si Jehova, unahon niya ang ministeryo. Gipasiugda ni Jesu-Kristo nga “ang maayong balita kinahanglang igawali una.” (Mar. 13:10) Kay dinalian kaayo ang pagsangyaw, kinahanglang una ni sa atong mga prayoridad. Puwede ba nimong himoong tumong nga mahimong mas regular sa pagsangyaw? Puwede ba kang magpayunir? Pero unsa may imong buhaton kon dili kaayo ka ganahang mosangyaw? Ug sa unsang paagi mahimo kang mas epektibo sa pagsangyaw? Duha ka simpleng paagi ang makatabang: Pangandam pag-ayo, ug ayawg surender sa pagsulti sa uban sa imong nahibaloan. Masorpresa gyod ka sa kalipay nga imong bation dihang magsangyaw.

11, 12. (a) Unsay mahimo sa mga batan-on para makapangandam sa pagsangyaw? (b) Giunsa paggamit sa usa ka batan-on ang kahigayonan nga makasangyaw sa eskuylahan?

¹¹ Puwede kang magsugod sa pagtubag sa komon nga mga pangutana sa imong mga eskolmet, sama sa “Nganong nagtuo kag Diyos?” Makita sa jw.org ang mga artikulo nga makatabang sa mga batan-on nga matubag ang maong pangutana. Tan-awa ang GITUDLO SA BIBLIYA > MGA TIN-EDYER. Makita nimo diha ang worksheet nga “Nganong Nagtuo Kog Diyos?” Makatabang nimo ang maong worksheet sa pag-andam sa imong tubag. Diha, may tulo ka teksto nga magamit nimo sa pagtubag​—Hebreohanon 3:4, Roma 1:20, ug Salmo 139:14. Gamit ang mga worksheet, makapangandam kag tubag sa matag pangutana.​—Basaha ang 1 Pedro 3:15.

¹² Kon may kahigayonan, dasiga ang imong mga eskolmet nga sila mismo ang moabli sa jw.org. Kanay gihimo ni Luca. Sa klase, ilang gihisgotan ang lainlaing relihiyon, ug namatikdan ni Luca nga ang ilang libro may sayop nga mga impormasyon bahin sa mga Saksi ni Jehova. Bisag gikulbaan, mihangyo siya nga isulti ang hustong impormasyon, ug misugot ang maestra. Si Luca nakapatin-aw sa iyang tinuohan ug napakita pod niya ang atong website sa tibuok klase. Ingong homework, giingnan sa maestra ang  mga estudyante nga tan-awon ang whiteboard animation nga Sukli ang Bully nga Dili Makig-away. Lipay kaayo si Luca nga nakasangyaw siya.

13. Nganong dili ta angayng mosurender dihang makaatubag kalisdanan?

¹³ Ayawg kaluya bisag usahay ang dalan nga imong gisubay daghag libaong. (2 Tim. 4:2) Kon makaatubag kalisdanan, ayawg kalimti ang imong tumong. Si Katharina 17 anyos dihang gihimo niyang tumong nga sangyawan ang iyang mga katrabaho. Kadaghan siyang giinsulto sa usa kanila, pero wala siya mosurender. Tungod sa iyang maayong panggawi, nakadayeg niya ang iyang katrabaho nga si Hans. Ingong resulta, si Hans mibasa sa atong mga publikasyon, nagtuon sa Bibliya, ug nabawtismohan. Si Katharina mibalhin sa laing lugar ug wala na mahibalo niana nga panghitabo. Hunahunaa ang iyang kalipay dihang 13 ka tuig sa ulahi, samtang naglingkod sa Kingdom Hall uban sa iyang pamilya, gipailaila si Hans ingong imbitadong mamumulong! Maayo na lang nga wala mosurender si Katharina sa pagsangyaw sa iyang mga katrabaho!

14, 15. (a) Dihang mapresyur, unsay angayng hinumdoman sa mga batan-on? (b) Unsay mahimo sa mga batan-on dihang presyuron sa ubang batan-on?

¹⁴ Sa nahisgotan na niining artikuloha, gidasig ka sa pagpokus sa pag-alagad kang Jehova. Kini nagpasabot sa pag-una sa espirituwal nga mga tumong. Ang ubang batan-on lagmit nagpokus sa paglipaylipay, ug basin hagaron kang moapil nila. Ngadtongadto, kinahanglan gyod nimong ipakita nga determinado kang tumanon ang imong gipiling tumong. Ayaw kalimti ang imong tumong dihang presyuron. Kon balikan nato ang ilustrasyon sa bus, dili ka mosakayg bisan unsang bus tungod lang kay morag lingaw kaayo ang mga pasahero.

¹⁵ Naay daghang paagi aron dili ka madala sa presyur. Pananglitan, likayi ang mga situwasyon nga matental ka. (Prov. 22:3) Ug pahinumdomi ang kaugalingon sa pait nga mga resulta kon sundogon ang daotang panggawi sa uban. (Gal. 6:7) Makatabang sab kon dawaton nimo nga nagkinahanglan kag tambag. Kon mapainubsanon ka, paminawon  nimo ang isulti sa imong ginikanan ug ubang hamtong sa espirituwal diha sa kongregasyon.​—Basaha ang 1 Pedro 5:5, 6.

16. Hisgoti ang usa ka eksperyensiya nga nagpakita sa kaayohan sa pagpaubos.

¹⁶ Ang pagpaubos nakatabang kang Christoph nga dawaton ang maayong tambag. Wala madugay human sa iyang bawtismo, nahimo siyang regular sa gym. Ang ubang batan-on sa gym nanghagad niya nga moapil sa ilang sports club. Iya ning giestorya sa usa ka ansiyano, kinsa nag-awhag kang Christoph sa paghunahuna sa pipila ka kapeligrohan sa dili pa modesisyon, sama sa kapeligrohang maimpluwensiyahan sa espiritu sa kompetisyon. Miapil ra gihapon si Christoph sa maong sports club. Pero ngadtongadto, iyang naamgohan nga ang maong sport bayolente​—peligroso pa gani. Nakig-estorya na pod siya sa pipila ka ansiyano, ug silang tanan mihatag niyag tambag gikan sa Bibliya. “Si Jehova naghatag nakog maayong mga magtatambag, ug naminaw ko Niya, bisan pag dili dihadiha.” Mapainubsanon ba nimong dawaton ang maayong tambag?

17, 18. (a) Unsay gusto ni Jehova para sa mga batan-on karon? (b) Unsang makapaguol nga situwasyon ang lagmit mahitabo dihang hamtong na ang usa, ug unsaon paglikay niini? Iilustrar.

¹⁷ “Pagmaya, batan-ong lalaki [o babaye], sa imong pagkabatan-on, ug tugoti ang imong kasingkasing nga magalipay kanimo sa mga adlaw sa imong pagkabatan-on.” (Eccl. 11:9) Oo, gusto ni Jehova nga magmalipayon ka ingong batan-on. Gipakita niini nga artikulo ang usa ka paagi aron mahitabo kana. Pagpokus sa espirituwal nga mga tumong, nga iapil si Jehova sa tanan nimong plano. Kon sayo nimo ning himoon, mas dali pod nimong makita ang giya, proteksiyon, ug panalangin ni Jehova. Hunahunaa ang tanang maayong tambag sa Pulong sa Diyos, ug ipadapat ang tambag: “Hinumdomi, karon, ang imong Dakong Maglalalang sa mga adlaw sa imong pagkabatan-on.”​—Eccl. 12:1.

¹⁸ Walay tawo nga magpabiling batan-on. Ang mga batan-on sa ngadtongadto mahimong hamtong nga indibiduwal. Makapaguol nga, dihang hamtong na, daghan ang nagbasol kay mihimog sayop nga mga tumong sa bata pa o, mas pait pa, wala gyod mohimog mga tumong. Pero, ang mga batan-on karon nga nagpokus sa ilang espirituwal nga mga tumong mobatig dakong kalipay inigkahamtong na tungod sa mga desisyon nga ilang nahimo. Kanay nahitabo kang Mirjana, kinsa maayo kaayo sa sports dihang tin-edyer pa. Giimbitar siyang moapil sa Winter Olympic Games pero gipili niya ang bug-os panahong pag-alagad. Kapig 30 ka tuig sa ulahi, naa gihapon sa bug-os panahong pag-alagad si Mirjana kauban sa iyang bana. Siya miingon: “Ang pagkasikat, dungog, posisyon, ug kuwarta lumalabay ra ug dili kaayo importante nga mga tumong. Ang pag-alagad sa Diyos ug pagtabang sa uban sa espirituwal, bisan sa gamayng paagi, mao gyoy maayo ug dumalayong mga tumong.”

19. Sumaryoha ang mga benepisyo sa pagpokus sa espirituwal nga mga tumong samtang bata pa.

¹⁹ Ang mga batan-on sa kongregasyon angayan gyod sa kinasingkasing nga komendasyon, kay bisan pa sa mga kalisdanan, nagpokus gihapon sila sa pag-alagad kang Jehova. Gihimo ni sa mga batan-on pinaagi sa pagkab-ot ug espirituwal nga mga tumong ug pag-una sa pagsangyaw. Dugang pa, determinado silang dili kalimtan ang ilang espirituwal nga mga tumong bisan pa sa impluwensiya sa kalibotan. Makaseguro ang mga batan-on nga dili makawang ang ilang paningkamot. Maangkon nila ang mahigugmaong pagsuportar sa mga igsoon. Ug kon unahon nila si Jehova, molampos ang ilang mga plano.