Sa ubang pamilya, ang mga anak gidahom nga motabang sa mga buluhaton sa balay, ug sila motabang nga dili magbagulbol. Sa ubang pamilya sab, ang ginikanan wala magpaabot nga motabang ang ilang mga anak sa buluhaton sa balay, busa ang mga anak malipay niana ug dili ganahang motabang.

Ang mga researcher nag-ingon nga kini na ang nagakahitabo sa kadaghanang nasod, diin ang mga anak ginasilbihan imbes motabang. “Karon, ang mga bata gipasagdan sa pagdulag video game, pag-internet, ug pagtan-awg TV,” miingon si Steven nga usa ka amahan. “Wala kaayo kay madahom nila.”

Unsay imong hunahuna? Importante ba gayod ang pagtabang sa mga buluhaton sa balay—dili lang sa pag-atiman niini kondili sa pagbansay usab sa bata?

Ang ubang ginikanan magpanuko sa paghatag sa ilang mga anak ug mga buluhaton sa balay, ilabina kon ang bata daghag homwork ug buluhaton sa eskuylahan human sa klase. Bisan pa niini, tagda ang mga kaayohan sa paghatag sa bata ug mga buluhaton sa balay.

Ang mga buluhaton sa balay makatabang sa bata nga mohamtong. Ang mga bata nga motabang sa buluhaton sa balay lagmit mas maayo sa eskuylahan. Ang buluhaton sa balay makatabang kanila nga makabaton ug pagsalig sa kaugalingon, mahimong disiplinado, ug mahimong determinado—mga kinaiya nga gikinahanglan aron makakat-on.

Ang mga buluhaton sa balay makabansay sa bata sa pagtabang sa uban. Ang uban nakaobserbar nga ang mga bata nga motabang sa buluhaton sa balay posible nga motabang sa komunidad inigdako nila. Dili kini ikatingala kay ang pagtabang sa mga buluhaton magbansay kanila sa pag-una sa kaayohan sa uban. Sa laing bahin, si Steven nga gihisgotan sa sinugdanan sa artikulo, miingon: “Kon ang mga bata dili patabangon, sila magtuo nga sila ang silbihan, ug managko nga sayop ug panglantaw bahin sa pagkaresponsable ug pagkakugihan.”

Ang mga buluhaton sa balay makapahiusa sa pamilya. Tungod sa ilang pagtabang diha sa balay, ang mga bata mobati nga dili lang kay gihatagan silag importansiya sa pamilya kondili sila dunay responsabilidad usab niana. Kini nga leksiyon dili makat-onan kon mas hatagag prayoridad sa ginikanan ang buluhaton sa eskuylahan human sa klase imbes  ang buluhaton sa balay. Pangutan-a ang imong kaugalingon, ‘Unsa may kapuslanan kon ang akong anak suod sa iyang mga kadula ug soccer pero dili suod sa pamilya?’

Bansaya sila samtang bata pa. Ang uban miingon nga kinahanglang hatagan sa ginikanan ang bata ug buluhaton kon mag-tres anyos na. Ang uban pod miingon nga sa edad nga dos o ubos pa sila hatagag buluhaton sa balay. Ang punto mao, ang mga bata malipay kaayong motrabaho uban sa ilang ginikanan ug mosundog kanila.—Prinsipyo sa Bibliya: Proverbio 22:6.

Paghatag ug buluhaton nga haom sa ilang edad. Pananglitan, ang tres anyos nga bata mahimong manghipos sa mga dulaan, manarapo, o maglainlain sa mga labhonon. Ang dakodako na nga bata mahimong mag-vacuum, maghinlo sa sakyanan, ug magluto. Ang buluhaton nga imong ihatag ipahaom sa kon unsay iyang kayang himoon. Basig makurat lang ka nga ganahan diay kaayo siya sa pagbuhat sa gisugo sa iya.

Hatagig prayoridad ang buluhaton sa balay. Tingali lisod kini kon ang imong anak daghag homwork. Apan kon dili nimo siya hatagag buluhaton sa balay aron lang motaas ang iyang grado, “kana nagpakita nga sayop ang imong gihatagag prayoridad,” nag-ingon ang librong The Price of Privilege. Sama sa nahisgotan na, ang mga buluhaton sa balay makatabang sa bata nga mahimong mas maayong estudyante. Ug ang ilang makat-onan mag-andam kanila dihang makabaton na usab unya silag pamilya.—Prinsipyo sa Bibliya: Filipos 1:10.

Hunahunaa ang tumong imbes ang resulta. Tingali dugayng mahuman sa bata ang trabaho nga imong gihatag kaniya. Basin imong makita usab nga dili kaayo maayo ang agi sa iyang trabaho. Kon ingon niana ang mahitabo, ayawg taposa ang trabaho nga imong gipabuhat kaniya. Ang imong tumong dili aron mahimo niya ang buluhaton nga parehog agi sa hamtong kondili aron mahimo siyang responsable ug makakita nga makapalipay ang pagtrabaho.—Prinsipyo sa Bibliya: Ecclesiastes 3:22.

Hunahunaa ang hustong ganti. Ang uban miingon nga makakat-on ang bata nga mahimong responsable kon sila suholan. Ang uban sab nag-ingon nga kon ang bata suholan, maghunahuna lang sila sa ilang makuha sa pamilya imbes sa ilang ikatabang niana. Sila usab nagpasidaan nga basin ang bata dili motrabaho kon siya dunay kuwarta—ilhanan nga ang bili sa mga buluhaton sa balay mahimong walay kapuslanan. Ang leksiyon? Mas maayo nga kon hatagan ang bata ug kuwarta, kini ihatag dili ingong suhol sa iyang pagtrabaho.