DAGHANG mammal nga nagpuyo sa bugnawng katubigan ang dunay bagang tambok ilalom sa panit nga makatabang niini aron ang ilang lawas magpabiling init. Ang sea otter dunay laing klase sa proteksiyon batok sa katugnaw—ang baga nga balhibo.

Hunahunaa: Ang balhibo sa sea otter mas baga kon itandi sa ubang mammal, kini dunay mga usa ka milyong balhibo matag kuwadrado pulgada (155,000 per sq cm). Iniglangoy sa otter, ang hangin duol sa lawas niini dili makagawas tungod sa baga nga balhibo. Kini nga hangin nagsilbing panagang aron ang panit dili mabasa sa tubig nga makakuha sa kainit sa lawas.

Ang mga siyentista nagtuo nga dunay kaayohang makuha sa pag-research sa balhibo sa sea otter. Nakaeksperimento sila ug ubay-ubayng artipisyal nga balhibo, ug gisusi usab ang gitas-on sa balhibo ug gilay-on sa usag usa. Nadiskobrehan sa mga siyentista nga kon “mas baga ug mas taas ang balhibo, mas uga o mas dili masuphan ug tubig ang panit.” Sa ato pa, ang balhibo sa sea otter talagsaon gayod.

Ang mga researcher naglaom nga sa ilang pag-research makadiskobre silag bag-ong teknolohiya sa pagdisenyo ug paggamag mga panapton nga dili masuphan ug tubig. Tungod niini, ang uban nakaingon nga kadtong mosalom sa bugnawng katubigan mas maayong magsul-ob ug balhiboong pangsalom sama nianang sa sea otter!

Unsay imong hunahuna? Ang balhibo ba sa sea otter nga dili masuphan ug tubig sulagma lang nga mitungha? O kini ba gidisenyo?