DAGHAN ang dili motuo sa mga dili ingon nato ug sa espiritismo nga naglantaw niini ingong inimbento o bunga lang sa hunahuna sa mga magsusulat sa mga pelikula o programa sa telebisyon. Pero ang Bibliya lahi ug panglantaw bahin niini. Klaro kaayo ang pasidaan sa Bibliya batok sa espiritismo. Pananglitan, ang Deuteronomio 18:10-13 nag-ingon nga kinahanglang likayan ang pagdiwata, salamangka, pagtan-awg tilimad-on, pagpamarang, pagpangdaot, pagkonsultag espiritista, pagpanag-an, ug pagkonsultag patay. Ngano man? Ang teksto dugang nag-ingon: “[Si] bisan kinsa nga nagabuhat niining mga butanga dulumtanan kang Jehova, . . . Pamatud-i ang imong kaugalingon nga walay-ikasaway kang Jehova nga imong Diyos.”

Nganong dulumtanan sa Bibliya ang tanang matang sa espiritismo?

Ang Bibliya nag-ingon nga sa dugay na kaayong panahon una pa gihimo sa Diyos ang yuta, naglalang siya ug milyonmilyong espirituhanong mga linalang, o mga anghel. (Job 38:4, 7; Pinadayag 5:11) Ang matag usa kanila gihatagag kagawasan sa pagpili​—ang katakos sa pagpili kon unsay husto ug sayop. Ang uban kanila mipili sa pagrebelde sa Diyos, ug mibiya sa langit aron maghatag ug kagubot sa yuta. Busa ang yuta “napuno sa kapintasan.”​—Genesis 6:2-5, 11; Judas 6.

Ang Bibliya nag-ingon nga kining daotang mga anghel dako kaayog impluwensiya, nga nakalimbong sa milyonmilyong tawo. (Pinadayag  12:9) Ila pa ganing gipahimuslan ang interes sa tawo nga mahibalo bahin sa umaabot.​—1 Samuel 28:5, 7; 1 Timoteo 4:1.

Ang ubang gahom sa mga dili ingon nato morag makatabang sa tawo. (2 Corinto 11:14) Pero ang tinuod, ang daotang mga anghel naningkamot sa pagbuta sa hunahuna sa tawo bahin sa kamatuoran maylabot sa Diyos.​—2 Corinto 4:4.

Klaro kaayo diha sa Bibliya nga ang pagpakigkontak sa daotang espiritu dili kay usa lang ka ordinaryong lingawlingaw​—kini makadaot. Busa dihang nakat-onan sa potensiyal nga mga tinun-an ni Jesus ang kamatuoran bahin niining mga butanga, kadtong naghimog mga “salamangka nagtapok sa ilang mga basahon ug nagsunog niini atubangan sa tanan,” bisag mahal kaayo kini.​—Buhat 19:19.

Daghan usab karon ang midesisyon sa paglikay sa mga kalihokan ug kalingawan nga konektado sa espiritismo. Pananglitan, sa 12 anyos pa si Maria, a daw makatag-an siya sa umaabot nga mga hitabo o kapeligrohan. Iyang isulti ngadto sa iyang mga eskolmet kon unsay iyang mabasa diha sa tarot card o baraha, ug kay ang iyang mga gipanag-an natinuod man, nainteres kaayo siya sa okulto.

Si Maria nagtuo nga gikan sa Diyos ang iyang abilidad sa pagpanag-an nga makahimo kaniya sa pagtabang sa uban. “Pero nahibulong ko,” siya miingon. “Dihang basahon nako ang baraha, makatag-an ko para sa uban, pero dili ko makatag-an para sa akong kaugalingon, bisag gusto sab kong mahibalo bahin sa akong umaabot.”

Kay naglibog sa daghang pangutana nga wala matubag, si Maria miampo sa Diyos ug sa ulahi nasangyawan sa mga Saksi ni Jehova ug nagsugod pagtuon sa Bibliya. Nakat-onan ni Maria gikan sa Bibliya nga  ang iyang abilidad sa pagtagna sa umaabot dili gikan sa Diyos. Nasabtan sab niya nga aron mahimong higala sa Diyos, kinahanglang idespatsar niya ang tanang butang nga may koneksiyon sa espiritismo. (1 Corinto 10:21) Unsay resulta? Gilabay ni Maria ang iyang mga gamit ug mga libro sa espiritismo. Siya karon nakigbahin na sa pagsangyaw sa uban bahin sa kamatuoran nga iyang nakat-onan gikan sa Bibliya.

Sa tin-edyer pa si Michael, ganahan kaayo siyang mobasag mga nobela bahin sa mga dili ingon nato. “Gi-imagine nako ang akong kaugalingon nga ako tong bidang karakter nga parehas nakog edad nga nagsuroysuroy sa hinanduraw nga kalibotan,” siya miingon. Si Michael wala makamatikod nga adik na diay siya sa pagbasag mga libro sa madyik ug Satanasnong mga rituwal. “Tungod sa akong pagkamaukit-ukiton, nainteres ko sa pagbasag libro ug pagtan-awg mga salida bahin niini,” siya miingon.

Pero tungod sa pagtuon ni Michael sa Bibliya, nakita niya nga kinahanglan siyang mag-amping kon unsay iyang basahon. “Naghimo kog listahan sa mga butang nga may koneksiyon sa espiritismo ug gilikayan kini,” siya miingon. “Nakakat-on kog importanteng leksiyon. Ang 1 Corinto 10:31 nag-ingon: ‘Himoa ang tanang butang alang sa kahimayaan sa Diyos.’ Karon, pirme nakong pangutan-on ang akong kaugalingon, ‘Ang pagbasa ba nako niini makahatag ug kahimayaan sa Diyos?’ Kon dili, naglikay na ko niini.”

Ang Bibliya gipakasama sa usa ka lampara. Kini maoy talagsaong tuboran sa kahayag nga nagyagyag kon unsa gayod ang espiritismo. (Salmo 119:105) Pero duna pay gipadayag ang Bibliya. Kini dunay nindot kaayong saad bahin sa usa ka kalibotan nga wala nay impluwensiya sa daotang mga espiritu. Pagkanindot nianang panahona! Pananglitan, ang Salmo 37:10, 11 nag-ingon: “Sa dili na madugay, ug ang daotan mawala na; ug pagasusihon mo gayod ang iyang dapit, ug siya mawala diha. Apan ang mga maaghop magapanag-iya sa yuta, ug sila makakaplag gayod sa ilang tumang kalipay sa kadagaya sa pakigdait.”