Ganahan kag esport, pero ang imong kapikas mas gustong magbasa. Kutikutihan ka ug organisado; pero ang imong kapikas dili. Ganahan kang makighugoy-hugoy; pero ang imong kapikas dili.

‘Magkalahi kaayo ming duha!’ miingon ka sa imong kaugalingon. ‘Nganong wala man kami makamatikod niini sa trato pa mi?’

Tingali nakamatikod ka. Pero basig kaniadto andam kang mopahiangay—kinaiya nga angay nimong ipakita pag-usab karon nga minyo ka na. Kini nga artikulo makatabang nimo sa paghimo niini. Apan tagda una kon unsay angay nimong mahibaloan bahin sa mga kalainan ninyong duha.

Ang ubang kalainan dagko. Importante nga panahon sa panagtrato inyong sutaon kon kamo angay ba gayod sa usag usa. Busa kon ang managtrato makamatikod nga dako gyod silag mga kalainan, daghan kanila magbulag imbes mosulod ug gubot unya nga kaminyoon. Apan komosta ang dili kaayo dagkong kalainan nga dili malikayan ni bisan kinsang magtiayon?

Walay duha ka tawo nga bug-os magkaparehas. Busa, normal lang sa magtiayon nga magkalahi sila sa bisan hain sa mosunod:

Interes. “Dili ko ganahag mga pasatiempo nga himoon sa gawas,” miingon si Anna, * “pero ang akong bana ganahan nga magkatkat ug nagyelong kabukiran ug magbaktas-baktas sa daghang adlaw diha sa kakahoyan.”

Batasan. “Ang akong asawa dugayng matulog pero makamata gihapog alas 5:00 sa buntag, pero ako nagkinahanglag siyete o otso oras nga katulog kay kon dili magsapot ko,” miingon si Brian.

Kinaiya. Tingali ikaw hilomon, pero ang imong asawa hingestorya. “Nagdako ko nga dili mosulti sa akong mga problema,” miingon si David, “pero ang akong asawa gikan sa pamilya diin ang tanang butang hisgotan.”

Ang mga kalainan dunay kaayohan. “Ang akong paagi tingali maayo, pero dili buot ingnon nga kini lang gyod ang hustong paagi,” miingon si Helena.

Magmaandam sa pagsuportar. Si Adam miingon: “Ang akong asawa nga si Karen walay interes sa esport. Pero nakakuyog siya nako sa daghang dula ug miabiba pod duyog nako. Si Karen interesadog mga art museum, busa mokuyog ko niya, ug siyay akong pabut-on hangtod kanus-a siya gustong magtan-aw-tan-aw didto. Maningkamot gyod ko sa pagpakitag interes sa art kay ganahan man siya niini.”—Prinsipyo sa Bibliya: 1 Corinto 10:24.

Pagbaton ug bukas nga kaisipan. Dili buot ingnon nga sayop ug panglantaw ang imong kapikas tungod lang kay lahi siyag panglantaw. Kanay nakat-onan ni Alex. “Nagtuo ko nga usa lang ang epektibong paagi sa pagbuhat ug usa ka butang ug nga ang ubang paagi dili epektibo,” siya miingon. “Pero sa naminyo ko, akong nakita nga daghag paagi diay sa pagbuhat ug usa ka butang, ug ang matag paagi parehong epektibo.”—Prinsipyo sa Bibliya: 1 Pedro 5:5.

Magmarealistiko. Ang pagkahimong parison wala magpasabot nga managsama gyod kamo sa tanang butang. Busa ayaw paghunahuna nga pakyas ang imong kaminyoon tungod lang kay nakita na nimo ang mga kalainan. “Daghang tawo moingon nga ‘Nabutaan ko sa gugma,’” matod pa sa librong The Case Against Divorce. Apan, “ang inyong adlaw-adlaw nga malipayong panag-ubanay,” nagpadayon ang libro, “nagpakita nga bisan unsa pay inyong mga kalainan, makahimo gihapon kamo sa paghigugmaay sa usag usa.” Paningkamot sa pagsunod sa tambag nga “magpadayon sa pag-antos sa usag usa . . . kon ang usa adunay reklamo.”—Colosas 3:13.

Sulayi kini: Isulat kon unsay imong naangayan o nagustohan sa imong kapikas. Dayon isulat ang mga butang nga imong nakita nga dili kamo magkaparehas. Basin imong masuta nga ang inyong mga kalainan dili diay kaayo dako. Makita sa listahan kon asang bahina ka angayng magpahiangay ug magpaluyo sa imong kapikas. “Malipay ko kon ang akong asawa magpahiangay kanako, ug nahibalo ko nga malipay siya kon magpahiangay pod ko niya,” miingon si Kenneth. “Bisag lisod kini para nako, malipay ko nga makita siya nga malipayon.”—Prinsipyo sa Bibliya: Filipos 4:5.