PANGUNANG TOPIKO | KONTROLADO BA NIMO ANG IMONG KINABUHI?

Ang Problema: Negatibong Pagbati

I-PLAY

NADAOG ba ka sa kaguol, kasuko, o kahiubos? Kon mao, tingali wala na kay panahon ug kusog sa paghimo sa mga butang nga importante kanimo. Unsay puwede nimong himoon? *

PANANGLITAN SA BIBLIYA: DAVID

Si Haring David nakasinatig lainlaing emosyon—lakip ang kabalaka ug kaguol. Unsay nakatabang kaniya? Gisalig ni David sa Diyos ang tanan. (1 Samuel 24:12, 15) Gisulat usab niya ang iyang gibati. Ug kay dako siyag pagtuo sa Diyos, kanunay siyang mag-ampo. *

ANG GIHIMO NI GREGORY

Sa nahisgotan na, si Gregory dunay anxiety disorder. “Ang akong sobrang pagkabalaka wala na sa lugar ug dili na nako makontrolar,” siya miingon. Sa unsang paagi nakontrolar pag-usab ni Gregory ang iyang kinabuhi? “Aron ko maulian,” siya miingon, “dili ko mobalibad kon motanyag ug tabang ang akong asawa ug mga higala. Nagpakonsulta sab kog doktor, ug mas nasabtan na nako ang akong kondisyon. Human sa paghimog mga kausaban, sa ngadtongadto mibati ko nga kontrolado na nako ang akong kondisyon, imbes akoy gikontrolar niini. Mabalaka gihapon ko pero nahibalo na ko karon kon unsay makapasugmat niini ug kon unsay akong himoon.”

“Ang kasingkasing nga malipayon maayo nga tambal.”—Proverbio 17:22

ANG IMONG MAHIMO

Kon gikontrolar ka sa negatibong pagbati, sulayi kini:

Isulat ang imong gibati.
Isulti kini sa suod nga membro sa pamilya o higala.
Ayaw padala sa imong pagbati. Pananglitan, pangutan-a ang imong kaugalingon, ‘Duna ba gyoy basehan ang akong negatibong paglantaw sa akong kaugalingon?’
Hunong na sa pagkabalaka, pagkasuko, o kahiubos. Gamita hinuon ang imong kusog sa mas mapuslanong mga buluhaton. *

Ang Punto: Sagad, ang hinungdan sa atong negatibong pagbati dili ang situwasyon kondili kon unsay atong panglantaw niana.

^ par. 3 Ang ubang negatibong pagbati tingali maoy epekto sa usa ka problema sa panglawas nga nagkinahanglag tabang sa doktor. Ang Pagmata! wala magrekomendar ug bisan unsang paagi sa pagtambal. Kinahanglang susihon sa indibiduwal kon unsang mga kapilian ang maayo para kaniya sa dili pa modesisyon.

^ par. 5 Daghang awit sa Bibliya maoy mga pag-ampo ni David nga iyang gisulat.

^ par. 13 Alang sa dugang impormasyon, tan-awa ang serye nga “Kon Unsaon Pagsagubang sa Kabalaka,” sa Hulyo 1, 2015 nga gula sa Ang Bantayanang Torre.